Wongeela Maatewos 2
2
Baya Adu'uutii Ka Dhufan Qorattoota Urjji'ii
1Bara nugusa Heerodisii titti arddii Yihuda'aa titti ta argamittu, magaalaa Beetelihemii itti Yesus yeroo dhalatetti, qorattoonni urjji'ii baya adu'uutii gara Yerusaalemii ni dhufan. 2Akkana'llee jedha'aa ni gaafatan, «Nugufnni worra Yihudotaa ka dhalate eessatti? Urjjii baya adu'uutii argnee isaa sagadu'uuf dhufinnee jirra.»
3Nugufnni Heerodis'llee kana yeroo dhagayetti ni naye, namoonni Yerusaalmii marri'llee isa woliin ni nayan. 4Itti gaafatamoota qeesotaa maraa fi barsiisota ummataa ka seeraa wolitti qabee, Masihiin ka dhalatu garamtti akka ta'e, isaan ni gaafate.
5Isaan'llee akkana jechu'uun ni deebisaniif, «Nabiyyichaan raaginni akkana jedhu waan barreeffameef, Masihiin ka dhalatu, arddii Yihuda'aa magaalaa Beetelihemitti,
6‹konyaa arddii Yihuda'aa titti ka argamittu, ati yaa Beetlihem!
Ummata kiyya Israa'eeliin ka eegu durssaan si keessaa waan bayuuf,
magaalota guguddoo Yihuda'aa womaanuu hin hanqattu.› »
7Kanaan duubatti Heerodis worra qorattoota urjji'ii ta'an sanniin dhossa'aan waamsisee, yeroo sirrii ta'e ka urijjiin itti argamitte gaafatee ni hubate, 8Akkana'llee jedhee gara Beteliheem titti isaan ni erge, «Deema'aatii waayee daai'maa ufi eegganna'aan qoradhaa, yeroo argattanitti, ani'llee dhaqee akka isaa sagaduuf koota'aatii natti himaa.»
9Isaan'llee ajaja nugusichaa eega dhagayaniin duubatti, bayanii ni deeman, kunoo! Urjjiin baya adu'uutii argan'llee haga bakka daa'immnni ni jira turee irra dhaabatanitti, dura dura isaanii deema'aa isaan ni eemara ture. 10Urjjicha'llee yeroo arganitti haalaan ni gammadan, 11gara manaa'llee aseenanii daa'ima haadha isaa Maariyaamiin woliin uduu jiru ni arganiin, kufanii'llee ni sagadaniif, sanduuqota isaanii'llee bananii kennaa worqqi'ii, ixaanaatii fi qumbi'ii'llee ni dhiyeessaniif.
12Gara Heerodisii'llee akka hin deebineef Waaqinni eebjju'uun waan isaan ufi eeggachiiseef, qorattoonni karaa bira'aatiin gara biyya isaanii deebi'anii ni deeman.
Daa'ima Qabatanii Gara Biyya Gibxii Dheessuu Isaanii
13Qorattoonni urjji'ii eega deemaniin duubatti, maleyikkaan Goofta'aa Yooseefitti eebiju'uun muldhatee, «Heerodis daa'ima ajjeesu'uuf waan barbaaduuniif, ka'iitii daai'maa haadha woliin qabadhuu gara biyya Gibxii dheessi, haga sitti himutti'llee achuma turi!» jedheen.
14Kanaaf Yooseef halkaniin ka'eeti, daaima haadha woliin qabatee, gara biyya Gibxii ni deeme. 15Achitti'llee Heerodis haga du'uuf ni ture, kun'llee ka ta'e Gooftaan nabiyyichaan, «Ilma kiyya Gibxiitii ni waameen» dubbiin jedhe, akka raawwatamuuf.
Heerodis Daai'mman Akka Ajjeesise
16Kanaan duubatti Heerodis qorattoonni urjji'ii akka isa sobaniin yeroo hubatetti, haalaan ni dallane, gara Beethlihemiitii fi gandoota naannoo jiran mara lolttoota isaa ergee, akkaatama bara qorattoota urjji'ii irraa hubateetiin, umriin isaanii woggaa lama ka ta'anii fi achii gadi ka ta'an, Beetlihemii fi naannoo isi'ii ka turan daa'imman dhiiraa ni ajjeesise.
17Yeroo sanitti, nabiyyicha Erimiyaasiin akkana jechu'uun raaginni dubbatame ni raawwatame,
18«Raahel waayee ijoollee isi'iitiif yoo boottu,
qooniqqi ani bade'eetii fi booya hadhaaya'aa Raama'atti ni dhagayame,
ijoolleen isi'ii lubbu'uun waan hin jirreef,
obissu'uuf'llee ni didde.»
Gibixii Gara Naazireetii Deebi'uu
19Heerodis eega du'een boodatti maleyikkaan Goofta'aa Gibxitti Yooseefitti eebjju'uun muldhatee, 20«Daa'ima ajjeesu'uuf namoonni barbaadan waan du'aniif, ka'iitii daa'ima haadha woliin qabadhuu, gara biyya Israa'eelii deemi!» jedheen. 21Yooseef'llee ka'eeti daa'ima haadhaan woliin qabatee, gara biyya Israa'eelii titti ni deebi'e.
22Garuu Aekelaawos bakka abbaa isaa Heerodisii bu'ee, arddii Yihuda'aa irratti mootomuu isaa yeroo dhagayetti, Yooseef garas deemu'uuf ni sodaate. Ta'u'llee eebjju'uun qajeelchi waan isaa kennameef, gara arddii Galiila'aa ni deeme. 23#Mar 1:24; Luq 2:39; Yoh 1:45.«Naaziraawicha ni jedhama» jedhamee nabiyyootaan ka dubbatame, akka raawwatamuuf, gara magaalaa Naazireet jedhamttuu dhufee, ni jiraate.
Currently Selected:
Wongeela Maatewos 2: ArsiDNT
Highlight
Share
Copy
Want to have your highlights saved across all your devices? Sign up or sign in