Matai 13
13
1Palitsuva lilyo pwu UJesu akahuma nńumba akatsitama pambale pańanza. 2Pwu vakalundamana upwu ale avanu va vongosu ikipuga vuvule. Pwu umwene akipaka mwiboti, mwu akatama. Avene avanu ikipuga kyoni vakima pamwambo. 3Pwu umwene akavavula ńongosu inongwa akatsovela nsihwanihitso pakuvavula akata: Lola ulunge undahi akabiha pakulaha imbeju jya mwene. 4Vwu ali pakulaha imbeju jya mwene, pwu ijyinge jikatsigwa panzila, pwu isidege sikitsa sikahola sikamala. 5Ijyinge jikatsigwa nkilunga kya maganga umwu nagumuli ummanga mwongosu. Jyu jikamela ṅani-ṅani vuvule ulwakuva umanga nagumuli mwongosu. 6Pwu ilitsuva vwu litogile, pwu jikapya jikuma ulwakuva najili nuvuńesu. 7Ijyinge jikoṅana nimitwińo upwu jagwitsaga, vwu jimelile imitwińo pwu gikahopotsa. 8Ijyinge jikatsigwa pakilunga ikinnonu jikahupa iseke. Ijyinge jikahupa imilevulu kitsigo, ijyinge jikahupa imilevulu ntanato, ijyinge jikahupa imilevulu gidatu. 9Uvi ali nimbulukutu vi apulikage.
10Pwu vakahegelela kumwene avakongi va mwene vakambutsa vakata: Vutsovela kiki nsihwanihitso upwu vukuvavula? Navugolosa vuvule kiki? 11Imwene akanda akata: Ulwakuva uńe mupevilwe ulwa kutsivona itsa kuvutitu itsa ludeva lwa kukyańa, avene valya vwu navapevilwi. 12Ulwakuva uvi ali nasyo isinge, vi ikwongeletsivwa ukupevwa nisinge, vi silesukaga vuvule. Umwene uvi nali nako akange, vi ipokivwagwa nakene ukwu ali nako. 13Pwu nditsova nsihwanihitso upwu ndikuvavula avene, mańa upwu vilola navikutsivona itsinge, nupwu vipulika navikutsimańa itsinge, navisika pakutsimańa, 14Tsikuvitsila itsu alagage Ujesaja upwu atetsage: Ukupulika nimbulukutu kwu ndapulika, mańa nandatsivone, ukulola namiho kwu ndalola, mańa nandatsimańe. 15Mańa inumbula tsa vanu ava tsipelile nzito vuvule, imbulukutu tsa vene tsitsivye ukupulika, vasińinzitse amiho ulwakuva vita tulalolaga namiho, tulapulikaga nimbulukutu, inongwa tulatsimańaga munumbula tulakilivukaga, une ukuta ndilavaponyaga. 16Uńe lweli ndi va ndugataluko namiho ulwakuva gilola, nimbulukutu ulwakuva tsipulika. 17Mańa jilweli-lweli ndikuvavula ndita: Navańamalago navagolosu va vongosu vanogwagwa ukulola itsu mwilola uńe vakalemwa ukutsimańa ukunge, vakata tupulikage itswu mupulika uńe, vakalemwa ukupulika ukunge. 18Ino ndivavule uńe ikihwanihitso kya uvi alahaga imbeju. 19Uvi angave ipulika ilimeńu lya ludeva, angave nikulimańa, vi ivona ikwitsa Umbivi ipoka akalahilwe munumbula jya mwene. Vi uju ndikata: Ijyinge jikalahwa panzila. 20Ijyene ijyu ndatetsaga jilahilwe pakilunga kya maganga, vi uvi ivona apulike ilimeńu pwu ihekela ukulyupilila ṅani-ṅani vuvule, 21mańa imilela gyu niva nagyo. Bako va kwima akasiki kapamato kene. Ivona ilimeńu limpelye nuvukuvilwa nuvuswimo ulwakuva ali nalyo, pwu nasihava ukumwambutsa sisisi. 22Ijyene ijyu ndatetsaga jilahilwe mmitwińo, vi uvi ivona apulike ilimeńu, pwu ikisagila ukwu kikumpelela ikilunga iki, nuvuteki uvukunteka uvukavi, syu sikuligoga ilimeńu pwu niseke natsisika. 23Ijyene ijyu ndatetsaga jilahilwe pakilunga ikinnonu, vi uvi ivona apulike ilimeńu, pwu ikulimańa ihupa niseke. Ujyunge ihupa imilevulu kitsigo, ujyunge imilevulu ntanato, ujyunge imilevulu gidatu.
24Akavavula ikinge ikihwanihitso akata: Uludeva lwa kukyańa luli ndumunu uvi alahaga imbeju innonu nkilimila kya mwene. 25Vwu vagonelye avanu pwu akitsa untavangwa va mwene akalaha ililulu mungano akaluta. 26Pwu vwu jihomola, vwu jihumya isisotso pwu likavoneka nalyene ililulu. 27Pwu avakivaga vakatsitsova kumwene-ńumba vakata: Nkuludeva nulahili imbeju innonu nkilimila kyako? Lihumilekwu ililulu ili? 28Umwene akavavula akata: Alahile untavangwa. Pwu avakivaga vakata: Ndeti uve humbe tubihe tukańapile? 29Umwene akabela akata: Bako, pange muńapila ningano vwu mwińapa ililulu. 30Musileke sikulage paninie syu sivili sisike kumbene. Kumbene kwu ndilatsova navabeni ndilata: Ndundamanye tango ililulu, mbopage ntutsigo vakotsage mmwoto. Ijyene ingano mungegelage nsyanga syango.
31Akavavula nikinge ikihwanihitso akata: Uludeva lwa kukyańa luli ndakaseke ka nkisina, ukwu umunu akatola akalaha mungunda gwa mwene. 32Mańa akene kwu kadebe kuseke tsoni, apene lweli upwu kangave kakulile pwu kiluta lwoni uluseke uvuvaha, kikipela ukuva mbiki vuvule, pwu isidege sya kukyańa sihona uvuswa mmapagika ga gwene.
33Akavavula nikinge ikihwanihito akata: Uludeva lwa kukyańa luli ndunsabe, ugwu akatola undala akahanza nuvuhevete isidili sidatu, pwu vukalula vwoni vuvule. 34Tsoni tsitsitsi UJesu akatsovela nsihwanihitso vwu ikuvavula avanu avalundamine ikipuga vuvule, ukwene ukutsova vuvule kwu natsovage itsinge. Tsoni itsu avavulaga akatsitsovela nsihwanihitso vuvule. 35Pwu kwu kukwitsa tsitsile itsu atsovage UJesaja uńamalago upwu atetsage: Ndingave nditsova pwu ndilatsovelaga nsihwanihitso, ndilatsivonyaga itsu tsale tsa kuvutitu sikutsoni vuvule upwu kitengwe ikilunga.
36Pwu akavatavula avanu umwu vavelye ikipuga kyoni, umwene akingila nńumba. Pwu avakongi va mwene vakahegelela kumwene vakata: Utuvulage uvwe ikihwanihitso kilya kya lilulu mungunda. 37Umwene akavavula akata: Uvi ilaha imbeju innonu vi Ńamunu. 38Ikyene ikilimila kyu kilunga. Ijyene imbeju innonu vwu vańaludeva, ilyene ililulu vwu vańavuvivi. 39Umwene untavangwa uvi ikuvalaha vi Setano. Ijyene imbene vwu vusililo ikilunga iki. Avene avabeni vwu vasunwa va Nguluve. 40Nduvwu vilundamanya ililulu vikotsa numwoto vwu valagahaga vuvule-vule pavusililo ikilunga. 41Pwu Uńamunu alavasuṅa avasuṅwa va mwene nkulundamanya tsoni ińambutso itsikuvambutsa avanu voni navibeda isimilitso nkilunga kya mwene. 42Vwu valavalaha nkivive kya mwoto. Mwu jilava ingolo jyene, lulava lwu lugadutso lwa mino lwene. 43Pwu avagolosu valalangala ndilitsuva ndudeva lwa dadajavo. Uvi ali natsu imbulukutu vi apulikage.
44Uludeva lwa kukyańa luli ndikyuma ikyu vasihile nkilimila, ikyu ujyunge umunu akakivona akavuja akasiha. Pwu akahekela akaluta akasigutsa syoni isyu ale nasyu isyuma akagula ikilimila kikyo.
45Uludeva lwa kukyańa luli nduńavugutsi uvi alondaga ińambo innonu tsa kugula. 46Lino vwu aluvwene ulunge ulwambo ulupala sitso, pwu akabiha akatsigutsa syoni isyu ale nasyo isyuma akitsa akagula lulwa.
47Uludeva lwa kukyańa luli ndulwelo ulwu vilaha muńanza vilova isomba tsoni umwu tsivelye nsivumbuko nsivumbuko. 48Vivona tsidigile mumwa, pwu vikwegela pamwambo, vitama pakuhala innonu. Tsu vivika nsiswiswi, itsene imbivi tsu vitaga. 49Vwu tsili vuvule-vule nitsa kuvusililo ikilunga. Pwu avasuṅwa valabiha pakuvasavula avavivi ndulundamano lwa vagolosu. 50Valavalaha nkivive kya mwoto. Mwu jilava ingolo jyene, lulava lwu lugadutso lwa mino lwene. 51Pwu UJesu akavavutsa akata: Nda mutsivwene tsoni tsitsitsi? Avene vakata: Ena nkuludeva. 52Umwene akata: Voni avamańakalata avipelile ukuva vakongi va ludeva lwa kukyańa vali ndumweneńumba uvi ipakula nisipya nisilala umwu avikile ikyuma kya mwene.
53Pwu UJesu vwu amalile ukusitsova isihwanihitso sisisi pwu akaluta. 54Akatsisika mbutsenge umwakulye, akavavula inongwa nńumba tsa vene tsa kwisajilamwo. Pwu avene vakatsivona mwitumbu vakata: Umunu uju aluvwene ndaku uluhala ulu namaka ga kuvombela tsoni? 55Nda nanswambe va mpunzasibiki ulya? Uvańina nda navi uvi vita vi Malija ilitavwa? Avalukololwe nda navwu va-Jakobu nu-Josepu nu-Simoni nu-Juta? 56Navene avahatsave nda natwiva navo apa voni? Atsivwene ndaku tsoni tsitsitsi? 57Pwu tsikipela tsa kuvambutsa tsitsitsi, Umwene UJesu akavavula akata: Mwoni mbunge uńamalago vikumwimika avanu, mańa mumyave umwu akulye nanńumba jya mwene mwu vikungilila. 58Akabela ukupela syongosu isipelwa sya maka mumwa ulwakuva avene navale nalwo ulwidiko ulunge.
Currently Selected:
Matai 13: Kinga
Highlight
Share
Copy
Want to have your highlights saved across all your devices? Sign up or sign in
New Testament in Kikinga © British and Foreign Bible Society, 1961.