Fuɗɗoode 6
6
No ɓerɗe yimɓe poti ɓawlude
1Nde yimɓe puɗɗunoo heewude ley adunaaru de ndimi ɓiɓɓe rewɓe ndeen, 2ɓiɓɓe Laamɗo nji'i no ɓiɓɓe rewɓe ɓeen ŋarɗiri. Ɓe cuɓii ley ɓeen ɓe ɓe njiɗi, ɓe ndewli ɗum'en.
3Ndeen Joomiraaɗo wi'i:
— Ruuhu am heddataako e neɗɗo faa abada, sabo wo teewu tan. Duuɓi muuɗum paltataako 120 katin.
4Ley jamaanu oon, e caggal muuɗum fu, tagaako mawko ina ngonnoo ley adunaaru. Sabo wo ɓiɓɓe Laamɗo kawriti e ɓiɓɓe tagaaɓe rewɓe de ndimdi e muɓɓen. Ɓeen ngoni worɓe jom'en semmbe ɓe inɗe anndeeɓe ley jamaanuuji ɗiin.
Haala ilam tuufaanu
5Joomiraaɗo yi'i no ɓerɗe yimɓe poti ɓawlude ley adunaaru, e no miilooji bonɗi tan keewiri ley ɓerɗe muɓɓen wakkati fuu. 6Joomiraaɗo mimsiti ko tagannoo neɗɗo ley adunaaru. Ɓernde muuɗum metti sanne. 7Ndeen o wi'i:
— Mi fiɗɗan yimɓe ɓe tagumi ɓeen e adunaaru, kamɓe e kulle mawɗe e pamare e ladooje e leydi e pooli piirooji fuu, sabo mi mimsitii ko tagannoomi ɗum'en.
8Ammaa Nuuhu kaa heɓii moƴƴere yeeso Joomiraaɗo.
9Inan kabaaru Nuuhu e ɓiɓɓe muuɗum. Nuuhu wo gorko ponnditiiɗo mo walaa feloore e hakkunde yimɓe jamaanu muuɗum. O jokkii laabi Laamɗo. 10O rimi ɓiɓɓe worɓe tato, ɓeen ngoni: Saam e Haam e Yaafet. 11Adunaaru heewi bonde yeeso Laamɗo, darngal heewi e mayru. 12Laamɗo yi'i no adunaaru nduun foti bonde, sabo yimɓe wonɓe e mayru fuu njokkii laabi oonyiiɗi. 13Laamɗo wi'i Nuuhu:
— Timmoode ko tagunoomi ɗuum fuu yottake, sabo yimɓe kebbinirii adunaaru e bonde muɓɓen. Si goonga, mi fiɗɗan ɓe ley adunaaru ndu. 14Kooƴaa leɗɗe Gofir, moƴƴinanaa hoore maa laana mawka. Ngaɗaa cuuɗi ley makka, takkiraa ceeki makka ɗiin taari, dow e ley fuu. 15Inan no moƴƴinirtaa ka:
Njuuteefi makka laatoo piyanɗe 300, njaajeefi makka laatoo piyanɗe 50, tooweefi makka du laatoo piyanɗe 30. 16Ngaɗaa feneetere e wecco makka nde njuuteefi muuɗum wo fiyande wootere. Ngaɗaa dammbugal laana kaan dow wecco makka. Ngaɗanaa ka cuuɗi leyiiji e hakkundeeji e dowuuji. 17Miin du, mi waddan ilam tuufaanu e adunaaru faa mi halka ko wuuri, ko foofata fuu. Ko woni e adunaaru ndu fuu halkan. 18Ammaa mi tabintinan amaana am e maaɗa. A naatan laana kaan, aan e ɓiɓɓe maaɗa worɓe e jom suudu maa e deekiraaɓe ɓiɓɓe maaɗa. 19Ko wuuri fuu, nannaa ɗum'en ley laana kaan, ɗiɗi ɗiɗi, gorel e dewel faa keddodoo e maaɗa. 20Pooli e siyiiji muɓɓen, daabaaji e siyiiji muɓɓen, ko ladata fuu e siyiiji muɓɓen, ɗiɗi ɗiɗi ngara to maa faa keddoo de kisa. 21Kooƴanaa hoore maa sii neema fuu, ndesaa faa laatane aan e majji fuu nyaamdu.
22Nuuhu waɗiri noon pay, o waɗi ko Laamɗo yamiri ɗuum fuu.
Currently Selected:
Fuɗɗoode 6: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022