Matayo 15
15
Ntende ya vaa kükü
(Mrk 7:1-13)
1Afarisayo nane asëyi va Seria vëgafika ufuma uYerusalemu vëgamwndea Yesu, vëgamuwëëya, 2“Gusokokë asëywi vako vëtikeere ntende nëgwayihangie ufuma gwa anyampaa vitu? Vëtigoyaa mëkhono awe mwino inoneye nëëkëë muntu inoola!” 3Yesu agavasucha, “Gusokokë nyenye mwaanjëte ntende yanyu aghonjo na mutimëkeere Seria amwa Muungu? 4Muungu wahanyiye. ‘Vakurye va ho vina nyokwe’ na, ‘Nëugumutukaa ihe mbesa nyinya, inoneye akuye.’ 5Ëgweeso nyenye muusëyaa mwino nësa muntu ukweti intu nëudahëte uvafa gwa uvaarëya ihe mbesa nyinya ëgweeso uguhanya: ‘Intu ërëë narëduyaa gwa umufa Muungu.’ 6Uvii, gusoko a ntende anyu mwahoriye ukhani wa Muungu. 7Nyee anyalakuno! Isaya agatavëra vija ino gusoko anyu; nëagahanya:
8‘Antu avaa, Muungu uguhanya,
vëunkuryaa gwa nkhani gutufu,
ëgweeso munkhoo yawe,
vëëkure nanëë.
9Ikuryo rawe rëtinoneye,
gusoko mantu nëvëuyaseyaa
unë maraghëëyo anaantu gutufu.’”
Mantu nëëgumuruva muntu
(Mrk 7:14-23)
10Yesu agautaana mwirundo wasuu wa antu, agavëëra, “Tegheeyi na mumanye! 11Intu nërëumuruva muntu ti rësëë nërëumwingië umoomo ëgweeso rësëë nërëuduaa umoomo. Rësëë unërëumuruvaa muntu.”
12Asëywi vëgamwendea, vëgamwëëra, “Wurë, wamanyaa mwino Afarisayo vëgahurisiwa nënaa vategheeya nkhani yakona?” 13Ëgweeso mweeso agavasucha, “Mu ibohi në Tata wanë wa girunde inarëfandëaa rëukurwa. 14Vareki veeso! Vasaa unë afoku, atongeeri va afoku, na mufoku nëwamutongeera mufoku muuya voong'e vavëë vëugwëra mwikhombo.” 15Fetero agalakëa, “Gukhanëe rianaayo wikhori wasuu.” 16Yesu agahanya, “Ngwë, nanë nyee mutimanyiena? 17Wurë, mutimanyie mwino intu nërëgingëaa mu moomo rëgendaa munda na nënaa khee akura rëujughutwa gunjë uchoona? 18Ëgweeso asaa nëëgufumaa umoomo ëgufumaa mu nkhoo na asaa unë ëgumutendea muntu mu uvaya. 19Gusoko mu nkhoo ëguduaa masëgho nëmavë a wuuraghi, uramatwë, ulehadi, uhëmbi, usudanga wa wegheghe na givira malolo. 20Asaa unë ëgumutendea muntu muuvaya. Ëgweeso ula malëwa gwa udëa goya mëkhono ëtiumutendeaa muntu muuvaya.”
Uhuvëi wa mukhema umwe
(Mrk 7:24-30)
21Yesu agahegha faafo agenda gëkhaa wilaya a Tiro na Sidoni. 22Uvii, mukhema umwe Mukananayo wa ng'ë ësëë agamwendea, na agarëa: “Müküü, Mwana wamwa Daudi, nyonea uvavi! Munchaane ugunyomwa na gënyonyinyonyi.” 23Ëgweeso Yesu inamusuchaa ukhani mbanduvë. Uvii, asëywi vakwe vëgamwendea vëgamwëëra, “Mukhanëe ende kunë winjë gusoko uguhongangangie ukuriye mukindo.” 24Yesu agasucha, “Natumiwe gusoko a antu va Isiraeli nëvayaghee mwino nkhoo.” 25Faafo mukhema wasuu agaja agatungama usonge akwe agahanya, “Müküü, njarëëya.” 26Yesu agamusucha, “Ëtinoneye uhora malëwa a ang'ënya na uyighumëa mbwa.” 27Mukhema wasuu agasucha, “Tutë, Müküü, ëgweeso nanë mbwa igulaa manyinyukango nëëgugwanga ufuma mumesa a müküü wawe.” 28Faafo Yesu agamusucha, “Mukhema uyuu, uhuvëi wako aküü, uvii, utendewe mwino ugufenja.” Muncha wakwe wasuu agafora itungo ërëëro ërëëro.
Yesu uguvaforya antu vingë
29Yesu agadua faafo agenda umpëo a irambo ra uGalilaya aganatëa ugëtanto, agikhaa, 30Antu vingë ino vëgamwendea vëatoe virema, afoku, vitevee, vimumu nanë vangëja vingë nënaa virue, vëgavavëka usonge a mëghuu akwe. Yesu noo agavaforya. 31Mwirundo wasuu wa antu ugataka ino nënaa woona vimumu vëurighëtya, nënaa vëremee vaforaa, anyaviteve vëgwëndeenda nanë afoku vëgoona, Vëgamukurya Muungu wa Isiraeli.
Yesu uguvafa malëwa antu maghana a njou anë
(Mrk 8:1-10)
32Uvii, Yesu agavataana asëywi vakwe, agahanya, “Navaonea antu avaa uvavi gusoko gwa matiku atatu aja vëitambëëmwe nanëë, ngwë vëtikweti malëwa. Ntiuyanja uvareka vende vëtilee taja vëkuye na weha munjëa.” 33Asëywi vëgamwëëra, “Afaa gwëë mu mbugha, guuhangiafe malëwa nëëdahite uvikutya antu avaa voong'e?” 34Yesu agavawëëya, “Mukweti mëkaate ënga?” Vëgamusucha, “Mufungatë na vinaa somba vikeevuu,” 35Uvii, Yesu agaraghëëya na uhanya antu vikhee fang'ë. 36Agamëhora mëkaate ësëë mufungatë na vinaa somba visii agamurumba Muungu, agavifajua, agavafa asëywi veesonoo vëgaavaghania antu. 37Antu voong'e vëgala, vëgikuta. Vëgahaangwëya makhokho, vëgijuya makafu mufungatë. 38Vasaa nënaavalaa naa aghosya maghana anjou anë gwa ureka uvavarëya akhema nanë ang'ënya. 39Uvii, Yesu agavanyaghwisya, antu aganatëa mumasua, ageenda umukoa wa uMagadani.
Currently Selected:
Matayo 15: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.