ɛMacu 20
20
Ninaa ɛTomɛ ne iHwap ɛNap
1“Yaa ne ten igbɔm ɛdaa ne irywa da ne ɛkyɛɛ ne ijwee ne ɛ kɛ wuru ne ihwɛlɛ ɛ phɛɛs ne tɔk ninaa ɛtomɛ nɛ nibhɛ yaa mɔn ɛbhɛ ɛtomɛ gha ne ihwap ɛnap ɛbhɛ. 2Nibhɛ ne sim me nɛ wu yaa tal nibhɛ ɛkɔn na ne i ku tal ɛtuk ɛdaan, ne ɛ ji tom nibhɛ ne ihwap ɛnap ɛbhɛ da.
3“Ne sɛ nten de kɛ hɔn igyɔs ɛnduwujɛng, ɛkyɛɛ ne ijwee gha ne wuru, ne ɛ yaang nidɛng ninyi na kɛ kyinasek ɛlɔ ɛtungga, sɔng nibhɛ mɔn ɛkɔn nang. 4Ne ɛ yaak nibhɛ, ‘Ma cwi ɛn te ɛbhɛ mɔn ɛn ɛtomɛ gha ne ihwap ɛnap nge da, naa ne tal nyini ɛkɔn na ne ɛ kɛ jam mɛ.’
5“Ninyi na ne phɛ. ɛNyi gha ne ɛ ta mɔn ɛlɛy dɔng nten de ne igyɔs de kɛ hɔn ɛnduwubɔ ne iphɛ iphaa, ne igyɔs ɛtat. 6Kɛ ne sɛ nten de phɛɛs ne hɔn igyɔs iwii, ɛnyi gha ne ta phɛ ɛlɔ ɛTungga gha dɔng, ne ɛ ta bhɛ sɛ nidɛng ninyi na kɛ ta kyinasek ɛnggyɛ wo dɔng. Ne ɛ phom nibhɛ ɛ yɔngɔ, ‘iKyee iphɛ kɛ te aa phoo ɛn iroy de buu ɛbɛ wo tang ɛkɔn ne mɔn naa?’
7“Nibhɛ ne kyii nɛ nibhɛ yɔngɔ, ‘Sɔng ɛnyi kɛ bo njwi ɛtomɛ gha nang.’
“Ɛnyi gha ne yaak nibhɛ, ‘Ne ɛ ma cwi ɛn ɛbhɛ mɔn ɛn ɛtomɛ gha ne ihwap ɛnap nge da.’
8“Kɛ ne sɛ ɛlɔ yɛ kɛ teye irwirywɛ, ɛkyɛɛ ne ijwee gha ne yaak ɛhaa ne wɛɛ ɛbhɛ ihwap ba, ‘Yel-le ninaa ɛtomɛ na ɛ tal nibhɛ, tsa nɛ ninaa ɛtsim ma ɛbhɛ taal nɛ ninaa ɛyisɛ na.’
9“ɛNyi gha ne tal ninaa nɛ nibhɛ yɛɛs ɛtomɛ gha igyɔs iwii de ijam ɛtuk ɛdaan. 10Kɛ ne sɛ ninaa ne kɛ tsa bo nibhɛ wo kɛɛ tuu, nibhɛ ne i wɛɛ te yaa hante nibhɛ ne ijam be, ne ma kyii ta nang ɛrɔngɔ ijam ɛtuk ɛdaan de. 11Ne sɛ nibhɛ kɛ say ihywɛ, nibhɛ ne yaa wunga ne ɛnyi ne ihwap ba. 12Nibhɛ bo, ‘Ninyi yɛnaa wo nɛ nibhɛ kɛ yɛɛs ɛtsim ma kɛ mɔn ɛtomɛ ɛwa ɛdaan zɔng, ˆɛ kɛ ne tal nibhɛ ɛte ne njwit, ne njwi kɛ phoo ne iroy ɛbɛ wo, igbey i halang njwii.’ ”
13“ɛNyi ne ihwap ne kyii ɛdɛng ngɛ ndɔ nibhɛ wo ɛ yɔngɔ, ‘ɛSaa, sɔng nggɛ mɔn nyini ɛkɔn ɛkpɛɛ nang, nggɛ tal nyini ɛkɔn na ne njwɛɛn kɛ ku sim me nɛ, hang ma sang so ɛlɛy naa? 14Say ɛkɔn na ne ɛ so ɛhaa mo te ɛ hyel, mee nggɛ sim naa tal ninyi yɛnaa wo ɛli ne nggɛ tal nyini wo. 15Hang nggɛ ma sang hɔn naa mɔn ɛkɔn na ne nzi sim ne ɛkɔn na ne ɛ so ɛhaa nge naa? Hang ɛ bok irway daa ne iyɛnɛng nge de naa?’
16“iPhɛ ɛlɛy, ninaa ɛtsim ma sɛ ne tes se ninaa ɛyisɛ yɛ, ninaa ɛyisɛ na ne tes se ninaa ɛtsim mɛ.”
ɛYɛso gha kɛ ta Boote iBol ne iKu Ɛbhɛ de Dɔng
(ɛMar 10.32-34; ɛLuk 18.31-34)
17Kɛ ne sɛ ɛYɛso gha i hyel ɛ phɛɛs dak ne iYɛrushɛlɛm be, ne ɛ yel-le ninɔn ne icwam ɛbhɛ ɛnduwubɔ nɛ ninyi ifaa na ne iwap ijwaan. Ne ɛ yaak nibhɛ, 18“Phok ɛn, njwɛɛn phɛɛs daa ne iYɛrushɛlɛm, yaa ne bhɛ nang ɛngɔn ɛnyi gha ndɔ ne iwɔ ne nindiinday nibo niYahodawa na, nɛ ninaa ne kpɛl ɛShara na, nibhɛ ne Hyɛ ɛbhɛ ɛshara ne iku. 19Nibhɛ ne nang ɛbhɛ nɛ ninyi na ne hame nibhɛ so niYahodawa tɛ nibhɛ ne towos ɛbhɛ, nibhɛ hal ɛbhɛ, nibhɛ ne ji gangat ɛbhɛ. Ɛ sɛ ne yilitsik ɛtuk ne itwat tɛ.”
ɛRoo ɛGyinɛ niYohana Ye
(ɛMar 10.35-45)
20ɛGyinɛ ninɔn ɛZɛbɛdi na ne yɛɛs ɛlɔ ɛYɛso gha nɛ ninɔn ɛbhɛ ifaa, ɛ cwi ne irwa-nggburuk ɛnu ɛyisɛ ɛYɛso gha ɛ roo ɛbhɛ ɛdɛ ɛkɔn na.
21ɛYɛso gha ne phom ɛbhɛ ɛ yɔngɔ, “iKyee ne ɛ sim me?” Ne ɛ yaak ɛYɛso yegha.
“Sim me nɛ te ɛdaan ndɔ ninɔn ifaa yɛnaa wo sɛ bhɛ soos ne iwɔ ne irwye mo, ɛdɛng gɔɔ ne soos iwɔ ne itsan mo ne igbɔm mo da.”
22ɛYɛso gha ne kyii nɛ ɛ yaak ninɔn na, “Sɔng ɛ yɛɛ ɛn ɛkɔn na ne ɛ roro ɛn nang, aa yɛɛn ne sɔ ɛn ɛhyihyangas sa ne na sɔ nɛ woo?”
Nibhɛ ne kyii nɛ, nibhɛ yɔngɔ, “Njwi yaa yɛɛ nɛ.”
23ɛYɛso gha ne yaak nibhɛ, “Ɛ sɛ sɔ ɛn ɛhyihyangas nge gha ɛtsak, daa ne ibol ne soos ne iwɔ ne irwye nge de ne iwɔ ne itsan nge wo, sɔng me nzi ne yɛk ngɛ nang. Nilɔ yɛnaa nggyɛ wo so nilɔ ninaa ne ɛKyɛɛ nge gha kɛ ku ryɔng nibhɛ nɛ.”
24Ne sɛ ɛbyin ninɔn ne icwam ɛnduwubɔ na kɛ phok ibol lɛ, nibhɛ ne te njenjek nɛ nigwaa ifaa yɛ na nggyɛ wo. 25ɛYɛso gha ne yel-le nibhɛ gbik ɛlɔ ɛdaan, ɛ yaak nibhɛ, “Ɛ yɛɛ ɛn nigɔm ninyi na ne hame nibhɛ so niYahodawa na i tɔɔsel ihwet daa ne igbɔm nibhɛ da, nindiinday nibhɛ na ma ta i tɔɔsel igbɔm. 26Sɔng iphɛ ne te ɛlɛy ndɔ mon no nang. ɛNyi gha ne ɛ sim te aa teye ɛndiinday ya ndɔ mon no nang, te ne ɛ teye ɛhaa ne mon nyini ɛtomɛ, 27ɛhaa ne ɛ ta sim aa teye ɛhaa ɛyisɛ yɛ, iphɛ ne so nggbinggbing ɛ teye ɛkpuru mon. 28ɛLɛy ne ɛNgɔn ɛNyi gha ne mang, sɔng ɛ kɛ yɛɛs tɛ ninyi na mɔn ɛbhɛ nitomɛ nang, ɛ kɛ yang yɛɛs te ɛ mɔn ninyi na nitomɛ na, ɛ phyii nang iken ɛbhɛ ɛ phɔt nɛ ninyi gbom.”
ɛYɛso gha kɛ Phaal Niwil ifaa iRwisɛ
(ɛMar 10.46-52; ɛLuk 18.35-43)
29Ne sɛ ɛYɛso gha nɛ ninɔn ne icwam ɛbhɛ na ɛ wuusi ne iYɛriko de, ɛgbaang ne idira ninyi wo ne i kungus ɛbhɛ. 30Nidɛng ninaa ne iwil la ifaa kaa ne ɛ soos ne nkiinɛ. Kɛ ne sɛ nibhɛ kɛ phok wu ɛYɛso gha ɛbhɛ phebhe wo, nibhɛ ne yaa yeres ne ɛgbaang ne izɔlɔs, nibhɛ bo, “ɛDaray, ɛNgɔn ne ɛDoda, san iyɔm mos!”
31iDira ninyi de ne nep nibhɛ, nibhɛ yaak nibhɛ wu tɛ nibhɛ kunggbyak, nibhɛ ne jung kyii ta hante ne yel-le yɛ, nibhɛ yɔngɔ, “ɛDaray, ɛngɔn ɛDoda, san iyɔm mos!”
32ɛYɛso gha ne kyinak ɛ yel-le nibhɛ, ɛ yaak nibhɛ, “iKyee ne ɛ sim ɛn te n nzɛ mɔn nyini nɛ?”
33Nibhɛ ne kyii nɛ nibhɛ yɔngɔ, “ɛDaray, njwi sim njwi sɛɛ yaa wɛɛ.”
34ɛYɛso gha ne san iyɔm nibhɛ, ne ɛ dat irwisɛ nibhɛ, nɛ nten nɛ nibhɛ ne yaa wɛɛ, nibhɛ ne kungus ɛYɛso yegha.
Currently Selected:
ɛMacu 20: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project