ɛMacu 16
16
niFarisawa na Sim ɛli nɛ nibhɛ sɛ Yaang Nyu ɛKɔn ne Kparat
(ɛMar 8.11-13; ɛLuk 12.54-56)
1niFarisawa na nɛ niSadukyawa na ne yɛɛs ɛlɔ ɛYɛso gha te nibhɛ phɔwɔ ɛbhɛ, iphɛ ɛlɛy, nibhɛ yaak ɛbhɛ wu te ɛ tɔɔl nyu ɛdɛ ɛkɔn ne kparat de ne iphɛ yaa tɔɔrek wu ɛTaanggbey ɛbhɛ kɛ tom ɛbhɛ ɛtsak. 2ɛYɛso gha ne kyii nɛ ɛ yaak nibhɛ, “I sɛ irywa wo kɛ seng nten ne irwirywɛ ne ɛ yɔng ɛn, ɛlɔ yɛ sɛ jam. 3I ne sɛ irywa wo kɛ seng, ifɛ sii ne ihwɛlɛ, ne ɛ yɔng ɛn wu inɛn yaa reey izenge wo. ˆƐ yɛɛ ne wɛɛ ɛn inɔp ˆɛ seng ɛn nyu nikɔn nɛ nibhɛ yaa tes, sɔng ˆɛ kɛ ne yɛɛ ne seng ɛn nyu nikɔn nɛ nibhɛ tes ne izam mɛdee wo nang. 4Ninyi ne izam mɛnaa wo so nibebhe, nibhɛ bok nggyuk. Nibhɛ sim tɛ nibhɛ sɛɛ yaang nyu ɛkɔn ne kparat, sɔng yaa ne tɔɔl nibhɛ idɛ nyu ɛkɔn ne kparat ta kang ne ibol ɛYunana de nang. ɛYɛso gha ne tek nibhɛ ɛ hyel.”
iYis niFarisawa ne iDee niSadukyawa
(ɛMar 8.14-21)
5Kaa ne sɛ Ninɔn ne icwam ma kɛ bere ne idɛ ikpang ɛling ngo nibhɛ ne seng wu nibhɛ kɛ te bap tang boos ibɛrɛdi. 6ɛYɛso gha ne yaak nibhɛ, “Wɛɛ ɛn nyini yɛnɛng, ryɔng nyini ɛlɔ ne iyis niFarisawa de ne idee niSadukyawa de.”
7Ninɔn ne icwam ma ne yaa bol ndɔ nibhɛ, nibhɛ bo, “Hang yung so ibol de ne njwɛɛn kɛ shɛɛ tang boos ibɛrɛdi de bɛ?”
8ɛYɛso gha ne seng ɛkɔn na nɛ nibhɛ bol lo, nɛ phom nibhɛ ɛ yɔngɔ, “Nyinɛn no ne ìnang ne itin mon de kɛ taasek ko, ikyee phɛ kɛ te ɛ bol ɛn ndɔ mon no, ɛlɔ ne hame ɛ bok ɛn ibɛrɛdi dee? 9ˆƐ maa tɔ tang seng ɛn naa? Ɛ kɛ te ɛn bab ɛli ne nggaa bo ivɛrɛdi iwii da n re nɛ ninyi ninom iwii na naa? Ɛ kaa ne tang ɛn ɛbyin nɛ ne isap maaghe woo? 10iVɛrɛdi ɛniitaa da ne kaa re nɛ ninyi ninom nwaas da lɛɛ? Ɛ kaa ne tang ɛn ɛbyin nɛ ɛ yɛk ɛn ne isap maaghe woo? 11iKyee phɛ kɛ ne te ɛ sang seng ɛn wu hang ibol ne ibɛrɛdi de ne nzi bol loo? Nzi bo ryɔng ɛn nyini ɛlɔ ne iyis niFarisawa de, ne idee niSadukyawa de.”
12Ninɔn ne icwam ma ne ji seng, sɔng ɛYɛso gha kaa bo wu tɛ nibhɛ ryɔng no ɛlɔ ne iyis ne i yɛk ne ibɛrɛdi nang, ɛ kaa yang i bo wu tɛ nibhɛ ryɔng en ɛlɔ ne imɛmɛ niFarisawa nɛ niSadukyawa.
ɛBiturus sa kɛ Seng wu ɛYɛso gha ɛbhɛ so ɛKiriti Gha
(ɛMar 8.27-30; ɛLuk 9.18-21)
13Kɛ ne sɛ ɛYɛso gha kɛ phɛ ne ivel iKɛsɛriya ne iFilibi, ne ɛ ji phom ninɔn ne icwam ɛbhɛ na ɛ yaak nibhɛ, “Ninyi na jung bok wu ɛNgɔn ɛNyi gha so ɛhay lɛɛ?”
14Nibhɛ ne kyii nɛ nibhɛ yɔngɔ, “Nidɛng i bo wu ɛ soyɛ ɛYohana ne Yaak ne iBatisima, nidɛng ne yɔngɔ wu ɛLiya, nidɛng ne yɔngɔ wu ɛRimiya, nidɛng ne yɔngɔ wu ɛ soyɛ ɛdɛ ɛnɛbi gha.”
15ɛYɛso gha ne phom nibhɛ ɛ yɔngɔ, “Nyinɛn no lɛɛ, ɛ bo ɛn wu nzo ɛhay?”
16ɛSimɔn ɛBiturus sa ne kyii nɛ ɛ yɔngɔ, “iGyɛ ɛ soyɛ ɛKiriti, ɛNgɔn ɛTaanggbey ne iken.”
17ɛYɛso gha ne kyii nɛ ɛ yaak ɛBiturus segha, “ɛSimɔn ne ɛ soyɛ ɛngɔn ɛYunana, ɛ soyɛ ɛhaa ɛwɛng! Sɔng ɛten ɛsii ɛbhɛ kɛ mɔng ngɛ ibol lɛdee wo nang, ɛKyɛɛ nge ne ɛ so daa ne irywa ɛbhɛ kɛ mɔng ngɛ. 18Nzi ne tɔng ngɛ igyɛ ne ɛ soyɛ ɛBiturus, ɛ soye ɛphang, daa ne ɛphang ngɛwoo wo ne nzɛ ne lɔl ne idira ninaa ne roos nge de. Sɔng iku sɛ ne phyin iphɛ ne ihwet tang. 19Na nang ngɛ niyaya ninunzuk ne igbɔm ɛTaanggbey ya, sɛ ne sɛ ɛkɔn na ne ɛ kɛ sim ɛzay ya, ne ma sim ɛbhɛ daa ne irywa wo ne mang, ɛhaa ne ɛ kɛ ne mbaray ndɔ ɛzay ya, ne ma mbaray ɛbhɛ daa ne irywa wo ne mang.” 20ɛYɛso gha ne kpɛng ninɔn ne icwam ɛbhɛ na wu hang nibhɛ mɔng ɛnyi wu iyee i soye ɛKiriti gha.
ɛYɛso gha kɛ Mɔng iHywee ne iKu ne ɛ sɛ Ku
(ɛMar 8.31–9.1; ɛLuk 9.22-27)
21Ne lenɛ nten nɛdee nggyɛ wo, ɛYɛso gha ne yaa bol nɛ ninɔn ne icwam ɛbhɛ na wɛsɛrɛk, ɛ bok nibhɛ, “iPhɛ so nggbinggbing mbɛ ne iYɛrushɛlɛm mbɛ sɔ nggbang gbom ne iwɔ ne ndiinday niYahodawa na, nɛ nindiinday nibo na, gbik nɛ ninaa ne kpɛl ɛShara gha. Nibhɛ sɛ bhɛ phoo me ne nggyi ta yilitsik ɛtuk ne itwat tɛ.” 22ɛBiturus sa ne hɔwɔ ɛYɛso yegha gɔɔ, ne ɛya nep ɛbhɛ, ɛ bo, “Te iRoy kyɛngɛ ɛDaray ɔɔy! Sɔng ɛkɔn nɛghaa wo yaa sɛ yɛ nang.”
23ɛYɛso gha ne hyereey ne ɛ yaak ɛBiturus segha, “Cwi gɔɔ ɛbɛ wo ɛShɛtan ɔɔy! ˆƐ sim aa teyɛ ikɛɛ ne ɛkɔn ne kyibhɛ nge, sɔng icwas sɛdaa wo le ɛlɔ ɛTaanggbey yang, ifɛ le ɛlɔ ɛten ɛsii.”
24ɛYɛso gha ne ji yaak ninɔn ne icwam ɛbhɛ na, “Gbik ɛnyi gha ne ɛ sim aa roos me wo, te ne ɛ mbaray ito ɛbhɛ, ɛ tɔɔk ihon ne gangat ɛbhɛ ɛ kungus me nɛ. 25Daa ɛli ne ɛhiha ɛnyi ne ɛ sim te aa phɔt iken ɛbhɛ de, aa ne wɔs iphɛ, ɛhiha ne ɛ kɛ ne wɔs iken ɛbhɛ de ɛlɔ me wo ɛ sɛ ne sɛ iphɛ. 26iPhɛ so ɛnyi gha ikyee ne aa sɛ ɛzay ya gbik ko ɛ ji wɔs iken ɛbhɛ dee? iKyee ne ɛnyi gha sɛ yɛɛ ne bo ɛ sunu ne iken ɛbhɛ dee? 27ɛNgɔn ɛnyi gha sɛ ne yɛɛs ndɔ ne ito-ndiinday ɛKyɛɛ ɛbhɛ nɛ nimalɛka, ɛ mɔn ɛrɔngɔ iyɛnɛng daa ɛkɔn na ne ɛ kɛ mɔn. 28Nzi tɔng nyini itin nɛ, ɛbyin mon so ɛbɛ wo ne hame nibhɛ sɛ kus nyɛɛn nibhɛ kyi yaang ɛNgɔn ɛNyi yaaso ndɔ ne igbɔm ɛbhɛ da.”
Currently Selected:
ɛMacu 16: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project