ATITI AWM ANGCHEI NAI 14
14
Abram my Lota ai atleu nai
1Babulon samrang Amraphela, Elasar samrang Ario, Elam samrang Kedoraloma hawi Koiim samrang Tidal napi nai samrang leaung palyhreichi ly 2Sodom samrang Bera, Komora samrang Birasa, Adamah samrang Sinaba, Zeboim samrang Semeber, Bela samrang ti y baly Zoar samrang leaung pangreichi ai tavai tiu u bo. 3Huni samrang leaung pangreichi ai ly Sidim leaunghawi y avum i nai asa u. Huni meingtym ai vai ly pangli kadei napi nai ne. 4Mymychi ly saneng holai nyh ryrei Kedoraloma i peang nai theung y awm u; na i py saneng holai thomrei saneng y, nichi ly mymy ai tiu u bo. 5Saneng holai palyhrei saneng y Kedoraloma hawi mymy mang y abawi nai samrangchi ly tavai tiu i Asateroth Karnaim mary i Rephaim cheng ai py, Hama mary i Zuzim cheng ai py, Kiriathaim adym i Emim cheng ai py pajau vui iy, 6Edom pri mawitleaung y awm nai Horit chengchi, daichi ka-vym y awm nai Elparan mary y tym pa-rei tleh ai nai hui u bo. 7Naibaly nichi ly amki prei i Kadesa mary mang y vawi u ali teang. (Huni ly Enmisapa mary napi.) Nichi ly Hazazon Tamar mary y awm nai Amori chengchi ai py, Amalek chengchi i pri verei y py tiu i eaung bo.
8Naibaly Sodom samrang, Komora samrang, Adamah samrang, Zeboim samrang hawi Bela samrangchi ly Sidim leaunghawi y tavai tiu ai nai tavaimichi ai palau u ali teang bo. 9Elam samrang, Koiim samrang, Babulon samrang, Elasar samrang leaung palyhreichi ly samrang leaung pangreichi hawi tavai atiu u nai ne. 10Huni leaunghawi theung y ly angawmchi, ketara humchi khri pa-rei awm nai deaungkho y Komora samrang hawi Sodom samrang ly tavai atiu nai thym khala y angpreng hawi vui i, huni angawm theung y tla hawi mei bo; na i py samrang leaung thomrei ly mawi mang y angpreng u i tleaung u nai ne. 11Tavai eaung nai samrang leaung palyhreichi ly Sodom hawi Komora samrang i teicha teineichi hawi atitichi la pi pawn iy tako u veng bo. 12Abram amnau i chapo Lota ly Sodom mary y awm nai ne; nichi ly Lota ai patiu iy, yhmtheaungchi la pi pawn bo.
13Na i py khumi leaungrei ly tleaung i, Amori pri Mamre i peang nai dengkeaung thengreung sahawi y awm nai Hebrai cheng Abram teng y thui pi. Mamre hawi amnau Esakola hawi Anerchi ly Abram hawi nai asa naichi ne. 14Abram ly amnau i chapo ai patiu vui bo, nanai thai i mymy i tavaimi leaung 318 rei palau iy samrang leaung palyhreichi ai Dan mary tym pa-rei hui bo. 15Naibaly mymy i tavaimichi ai amkawm hai akyhkyh iy vum y paleung ka-echi ai tiu u nai ly eaung bo. Damaska tosyh Hobah mary khrairei hui u. 16Paleung ka-echi my la pi pawn nai vawnchi nga bawibawi teang. Mymy i amnau i chapo Lota hawi yhmtheaungchi, neampachychi, langheng hawi naichi ai py hawi u ali teang bo.
Melkhizadeka my Abram ai amtheaung hai nai
17Abram ly Kedoraloma samrang hawi takhra samrangchi ai pajau nai bo y vawi ali teang i, Sodom samrang ly Shaveh leaunghawi y Abram ai lamchung ai nai chei bo. (Huni meingtym ai ly samrang i leaunghawi, nanai py palau.) 18Naibaly salo kangteng Tameuh i pathyp pi nai keung Salem samrang Melkhizaedeka my tako hawi kreip hang Abram teng y syn pi;#Heb 7.1–10 19“Kani hawi khaileaung sa nai keung, salo keh i Tameuh my Abram ai amtheaung hai sy,” nanai thui i amtheaung hai bo. 20“Nang i paleung ka-echi ai sum hai nai keung salo kangteng Tameuh teng y palo nai awm sy!,” napi. Naibaly Abram ly Melkhizedeka teng y tavai atiura i nga nai vawnsaichi theung i horei y harei talam bo.
21Sodom samrang my Abram teng y, “Tavai tiura i nga nai vawnsaichi ly lo teu; na i py kai i khumi bawibawichi ai ly pei ali teang ba,” napi.
22Abram my ni teng y, “Kani hawi khaileaung sa nai keung salo keh Areng Tameuh i mei ka-niu y vai kai vaineng abeu mang. 23Nang i vawn nanai ly phainai vui harei py, ti y baly kalang vui amairei py lo y leang mang; kai my Abram ai nang hai nai na a! ti lawh na. 24Kaimy i vui ati sai py kang lo pi y leang; kai my i khumichi i la nai kamthum naini kala khyh. Na i py kai hawi nai asa naichi Aner, Esakola hawi Mamrechi amji u sy,” napi.
Currently Selected:
ATITI AWM ANGCHEI NAI 14: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.