ATITI AWM ANGCHEI NAI 11
11
Babulon yhm ka-sang
1Angchei y ly khaileaung pri verei y leu harei awm khyh nai deaungkho y khumichi ly leu harei teaung khyh nai ne. 2Nichi ly nisi mang y asyh veangveang nai kha y, Babulon pri y adym ang deng harei niu i hu y awm u bo. 3Nichi ly mychi tengtawi, “Jeu u! achi iukhi paawp u sina,” nanai arum u. Hunai kamta nichi ly iukhi akau hai nai ketara py sa u teang. 4“Vai ly achi khaileaung pri verei y ahei y ai nai hawi amyn amthang jo ai nai, mary pui hawi kani angteu nanai pa-rei asang nai yhm pui so u sina,” nanai arum u bo.
5Naibaly Areng my nichi i mary pui hawi yhm ka-sang sa nai ly khen ai nai satla. 6Mymy ly “Khumichi ly cheng harei, leu py harei khyh nai deaungkho y, vai i ka-so mychi i ngai nai kamta sa u veangveang ai bo! 7Achi chei iy mychi tengtawi pany thai y ai nai leu athli hai piupa vui sina,” napi. 8Huni dengdairei Areng my nichi ai khaileaung pri verei y ahei hai pawn i, mary pui sa nai py anawn u bo. 9Areng my khumichi ai leu athli hai piupa vui nai deaungkho y huni mary pui ai ly Babulon,#11.9: Babulon Babulon, nanai ly “Athli piupa,” nanai sai ne. nanai palau bo. Hu i dengdairei nichi ai khaileaung pri verei y ahei hai akyhkyh vui nai ne.
Sema i kangpreangchi
(1 Neng 1.24–27)
10Hini ly Sema i kangpreangchi ne. Sema ly tuibai tuitleng theu nai bo saneng nyhrei khala y, mymy i saneng ly chungvairei awm i chapo Arpasa ai sa. 11Huni bo y mymy ly saneng 500 rei heng i cho chanauchi nga asai rai.
12Arpasa ly saneng 35 rei khala y chapo leaungrei sa, amyn ly Selah ne; 13huni bo y Arpasa ly saneng 403 rei heng i cho chanauchi nga asai rai.
14Selah ly saneng 30 rei khala y chapo Eber ai sa; 15huni bo y saneng 403 rei heng i cho chanauchi nga asai rai.
16Eber ly saneng 34 rei khala y chapo Pelek ai sa; 17huni bo y saneng 430 rei heng i cho chanauchi nga asai rai.
18Pelek ly saneng 30 rei khala y chapo Reu ai sa; 19huni bo y saneng 209 rei heng i cho chanauchi nga asai rai.
20Reu ly saneng 32 rei khala y chapo Seruk ai sa; 21huni bo y saneng 207 rei heng i cho chanauchi nga asai rai.
22Seruk ly saneng 30 rei khala y chapo Nahora ai sa; 23huni bo y saneng 200 rei heng i cho chanauchi nga asai rai.
24Nahora ly saneng 29 rei khala y chapo Terah ai sa; 25huni bo y saneng 119 rei heng i cho chanauchi nga asai rai.
26Terah ly saneng 70 rei awm nai bo y Abram, Nahora hawi Haranchi ai sa nai ne.
Terah i kangpreangchi
27Hini ly Terah i kangpreangchi ne; mymy ly Abram, Nahora hawi Haranchi i ampo ne. Haran ly Lota i ampo ne. 28Haran ly mymy i ampo heng nai thym khala y my, Babulon pri Ura napi nai mymy i mary y dei bo. 29Abram ly Sarai ai pom i, Nahora ly Haran i chaniu Meleka ai pom. Haran ly Isekai hawi Meleka i ampo ne. 30Sarai ly chanau so y.
31Terah ly chapo Abram, katu Lotachi hawi lengngo Saraichi ai hawi iy, Kanan pri y chei ai nai Babulon pri Ura mary i dengdairei amsa i, Haran mary y tym iy, huni mary y khuteng sa. 32Terah ly saneng 205 rei awm nai khala y hu y dei nai ne.
Currently Selected:
ATITI AWM ANGCHEI NAI 11: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.