Matiö 14
14
Zan Mɛzumɛ ga ‑kɔ ‑dhiang 'ö Matiö ‑ya zë
(Makö 6,14-29; Dhukö 9,7-9)
1‑A "tʋ̈ng bha‑ 'gü kö Edhodö ꞊në ‑gblüdë 'ka Gadhidhe ‑sɛ 'gü, 'yö Yesu ‑wɔn ma. 2'Yö‑ pö ö ‑bha gwëëzë ‑nu ‑dhɛ ꞊dhɛ Zan Mɛzumɛ ꞊në ꞊ya 'go ga 'gü 'ö ꞊ya ‑bö. Yö ꞊në‑ ‑wɔn 'gü 'yö "sɩ 'dhö‑ ‑dhɛ 'yö "dhabhliwɔn ‑nu kë sië bha.
3‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ꞊yaa‑ pö 'nu ö ‑bha gwëëzë ‑nu bha‑ ‑nu ‑dhɛ ꞊dhɛ ‑wo Zan kun kö ‑wa ‑da ‑kaso 'gü. Kö ꞊waa‑ 'kun ꞊waa‑ ‑lö ꞊waa‑ ‑da ‑kaso 'gü. 'Ö gun "dhʋ̈ kö Edhodö ꞊ya ö dheebhang Fidhipö ‑bha dhebhɔ 'wo‑ ‑dhɛ Edhodiadö bha‑ 'sü‑ ‑gɔ. 4Kö Zan ꞊yaa‑ pö‑ ‑dhɛ ꞊dhɛ 'yaa ‑së kö ‑a dheebhang ‑bha dhebhɔ ‑zë ‑yö ‑ya ‑gɔ. 5Kö ‑a pö 'ö Zan ‑ya wo "dhʋ̈ bha ꞊ya ꞊sië Edhodö ‑dhɛ kö ‑ya "piʋ̈ ꞊dhɛ 'ö‑ zë, "kɛɛ kö ‑yö "suʋ̈ sië Zuifö ‑nu ‑gɔ, ‑a ‑gɛn ‑mü ꞊dhɛ kö ‑a ‑nu ꞊gban "pɛpɛ ‑wo Zan ‑dɔ Atanna ‑wʋdhiʋ̈loomɛ 'ka.
6"Kɛɛ ꞊dhɛ 'ö Edhodö bhɔ "tʋ̈ng bha‑ trookëyi ꞊ya ꞊loo, 'ö Edhodiadö 'dhu 'dhö "tan kë sië 'mɛ 'wo nu troo ‑ta bha‑ ‑nu ‑kuu "dhiʋ̈, 'yö ‑dhi Edhodö ‑dhɛ yaa 'gü yaa wo. 7'Yö ‑sö ‑bhö 'në bha‑ ‑dhɛ 'ö‑ pö: «Pë "ʋʋ pë 'ö dho‑ ‑wɔn pö ö ‑dhɛ ö ‑dho ‑a nu‑ ‑dhɛ. 8'Ö "dhʋ̈ bha kö 'në bha‑ dhe ꞊ya ‑wʋ 'kpɔ‑ ‑bha kö ꞊yaa‑ pö ‑yö Zan Mɛzumɛ ‑gɔ ꞊në ‑wɔn pö. 'Yö 'në bha 'ö dɔ ö dhe ‑wʋ bha‑ ‑ta 'yö‑ pö Edhodö ‑dhɛ ‑yö Zan ‑gɔ ‑ya 'tɛa‑ do 'gü kö ‑yö ö gba‑ 'ka. 9‑A pö 'ö 'në bha ‑ya wo "dhʋ̈ bha 'yii dhi ‑gblüdë Edhodö ‑dhɛ, "kɛɛ ꞊dhɛ 'ö ‑kë ꞊dhɛ ꞊ya "plüün bho 'mɛ 'ö‑ ‑nu ‑dhɛ troo ‑ta bha‑ ‑nu wëëdhö 'ö ꞊ya ‑sö ‑nu ꞊gban ‑bhö bha‑ ‑wɔn 'gü, 'yö‑ pö ö ‑bha gwëë" ‑nu ‑dhɛ ꞊dhɛ ‑wo 'dho kö ‑wo nu Zan Mɛzumɛ ‑gɔ 'ka‑ ‑dhɛ. 10'Yö mɛ do bɔ kö ‑yö 'dho Zan ‑gɔ "kan ‑dhɛ 'gü ‑kaso 'kɔ 'gü. 11'Yö 'mɛ bha 'ö dho 'yö Zan ‑gɔ ‑kan 'yö ‑da 'tɛa‑ do 'gü 'yö nu‑ 'ka 'nëdhiëngnë bha‑ ‑dhɛ, 'yö dho‑ 'ka ö dhe ‑dhɛ. 12'Yö Zan ‑bha ꞊klangdhiʋ̈ ‑nu 'wo nu 'wo‑ ꞊gee sü 'wo dho‑ 'ka 'wo‑ bun bho, 'yö 'wo dho 'wo ‑ziö ‑gɛn 'gü Yesu ‑dhɛ.
Yesu ‑bha mɛ "gblü "sɔɔdhu "dhiʋ̈ gba ‑kɔ ‑dhiang 'ö Matiö ‑ya zë
(Makö 6,33-44; Dhukö 9,10-17; Zan 6,1-14)
13꞊Dhɛ 'ö Yesu ꞊ya 'wɔn bha‑ ma, 'yö ‑da "kplagɔnë 'gü ö do 'ka 'yö dho ‑dhɛ "dhiʋ̈ ꞊nëng ‑dhɛ 'bha 'gü.
"Kɛɛ ꞊dhɛ 'ö mɛ kpö 'gbɛ ꞊waa‑ 'wɔn ‑dɔ, 'yö 'wo go 'pö‑ ‑nu 'gü 'wo ‑ta wo ‑gɛn ‑ta "yi "piʋ̈ "yɛɛdhö 'wo dho‑ "gblʋʋ ꞊keng‑. 14Yesu ‑bha ‑go "kplagɔnë 'gü ‑sü kö ‑yö zun "sia‑ kö mɛ "dhaa ‑yö ꞊klëën ‑sü 'ka ‑dhɛ bha‑ 'gü, 'yö‑ ‑nu ‑wëë ‑ya ‑kë, 'yö "yuëdhi ‑nu "pɛpɛ 'wo gun‑ ‑nu kpö 'gü mü bha‑ ‑nu ‑kë "klʋ̈ʋ̈klʋ̈.
15꞊Dhɛ 'ö dhɔng ꞊ya ‑da, 'yö‑ ‑bha ꞊klang ‑nu 'wo ꞊yɔɔn‑ "sɔɔ 'wo‑ pö‑ ‑dhɛ: «"Bin ꞊ya 'ma ꞊ya bo, "kɛɛ 'sa ‑dhɛ 'kwa‑ ‑bha ya ‑dhɛ "dhiʋ̈ ꞊nëng ‑dhɛ ‑mü, ‑bhöpë 'bha 'yaa ꞊slɔɔ mü, ꞊dhɛ 'ö "dhʋ̈ ‑bhö ‑a pö 'mɛ 'wo ya‑ ‑nu ‑dhɛ ‑wo 'dho 'pö‑ ‑nu 'gü kö ‑wo woo‑ ‑bhöpë ‑nu mɔɔ‑!»
16'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Aa bhoo, ‑a ‑dhɛ 'yaa‑ ‑bha kö ‑wo 'dho "dhʋ̈, ka ꞊në ‑kaa ‑nu gba ‑bhöpë 'ka!» 17"Kɛɛ 'yö 'wo‑ ‑yɔ bɔ‑ ‑gɔ 'wo‑ pö: «‑Bhöpë 'kö ꞊ya 'to yi ‑gɔ yö ꞊ya 'to 'bluu‑ bhɛ "sɔɔdhu waa‑ 'yuʋ̈‑ ꞊plɛ.» 18'Yö‑ pö‑ ‑nu ‑dhɛ: «‑Ka nu‑ 'ka n ‑dhɛ yö!» 19꞊Dhɛ 'ö ꞊ya kë "dhʋ̈ 'yö‑ pö 'mɛ 'wo bha‑ ‑nu ‑dhɛ ‑wo ‑ya 'kpaa‑ ‑ta. ꞊Dhɛ 'ö‑ ‑nu ꞊gban "pɛpɛ ꞊wa 'yaanu, 'yö ö ‑kɔ ‑da 'bluu‑ bhɛ "sɔɔdhu waa‑ 'yuʋ̈‑ ꞊plɛ bha‑ 'gü, 'yö ö "yan "dhiʋ̈ ꞊wlü dhang‑ 'gü 'yö ꞊bhɛa Atanna ‑dhɛ 'yö‑ nuɛ" bho 'yö‑ "kplükplü bho 'yö‑ nu ö ‑bha ꞊klang ‑nu ‑dhɛ, 'yö 'wo‑ 'gü ‑gblü 'mɛ 'wo bha‑ ‑nu ‑ta. 20'Yö 'mɛ 'wo bha 'wo pë ‑bhö 'wo kën, 'yö ‑bhöpë 'bha ‑yö to, 'yö‑ 'dhɛ 'ö to bha 'wo‑ ꞊loo 'ko ‑ta, 'yö ‑kë 'bluu‑ "kplü töö ‑yan ‑kaɔng do ga ꞊plɛ 'ka. 21'Mɛ 'ö Yesu ‑ya ‑nu "dhi gba "dhʋ̈ bha‑ gɔɔn‑ ‑nu ‑dɩ ‑slɔɔ kö 'wii 'në ‑nu waa‑ dhong ‑nu dhʋng, ‑wo ‑mɔɔ mɛ "gblü "sɔɔdhu ‑nu ‑bha.»
Yesu "ta ‑sü "yi ‑ta ‑kɔ ‑dhiang 'ö Matiö ‑ya zë
(Makö 6,45-52; Zan 6,15-21)
22‑A ‑nu ‑bö pë ‑bhö ‑sü 'ka ‑sü oo, 'yö Yesu ‑yö to 'ö‑ pö ö ‑bha ꞊klang ‑nu ‑dhɛ ‑wo ‑da "kplagɔnë 'gü "vaandhö kö ‑wo "yi "kan, "sanni ö ‑bo ‑wʋ ‑kpɔ 'mɛ bha‑ ‑nu ‑bha ‑sü kö ‑wo dho wo ‑gɔ 'pö‑ ‑nu 'gü ‑sü ꞊zinng 'gü. 23꞊Dhɛ 'ö ꞊ya bo ö ‑wʋ ‑kpɔ mɛ kpö bha‑ ‑nu ‑bha ‑sü 'ka, 'yö ‑da ‑tɔn 'në 'bha bha‑ ꞊gbin‑ kö ‑yö bhɛa" Atanna ‑dhɛ 'mü. ‑Yö ‑to ‑tɔn ꞊gbin‑ mü ö do 'ka 'yö "bin ‑yö ma. 24"Tʋ̈ng 'ö kë sië‑ 'ka "dhʋ̈ bha kö‑ ‑bha ꞊klang ‑nu ‑zë ꞊wa ‑gɛn ‑yan kpö "ta sü "yi ‑ta, "kɛɛ kö "tɛɛ "gbɩɩ‑ ‑yö ziö sië, 'ö go‑ ‑nu 'dho ‑zian 'ka, kö "yi ‑yö ꞊bang "bang kë sië 'ö "yi kpö ‑nu 'wo ‑ma "yitagɔ bha‑ ‑bha. 25꞊Dhɛ 'ö ‑dhɛkpaɔ "dhiʋ̈ ꞊ya ꞊loo, 'wo dho ‑dhɛ ‑ga kö Yesu ‑yö "ta sië "yi ‑ta "wɛ tuaa ꞊tuaa tuaadhö 'ö nu‑ ‑nu ‑zian 'ka. 26"Kɛɛ ꞊dhɛ 'wo wo "yan ‑kpan ‑bha kö ‑yö nu sië ꞊dhɛ ‑kɔ bha‑ 'dhö "yi ‑ta, 'yö "suʋ̈ 'dhö ‑da ‑nu 'gü, 'yö 'wo ‑ya "gbla ‑sü ‑bha 'wo‑ pö: «Mɛ ‑zii ‑mü!» 'Yö 'wo ‑ya "ta bhoo ‑da ‑sü ‑bha. 27"Kɛɛ 'yö Yesu ‑yö to 'ö‑ pö‑ ‑nu ‑dhɛ: «‑Ka ka zuë" kë ‑sɛa, 'ka 'dho "suʋ̈, ma ‑mü!» 28'Yö Piɛdhö ‑ya pö‑ ‑dhɛ: «N Dëmɛ, ꞊ya kë i 'ka ꞊dedewo tɛan‑ 'ka kö ‑bhö dɔ kö mang ‑dɩ 'pö 'a "ta "yi ‑ta ꞊dhɛ i 'dhö kö 'a nu i ‑dhɛ 'gü!» 29'Yö Yesu ‑ya pö‑ ‑dhɛ: «‑Bhö nu!»
'Yö Piɛdhö ‑yö go "yitagɔ 'gü 'yö ‑da "yi ‑ta 'yö gun 'dho sië Yesu "piʋ̈. 30"Kɛɛ 'ö 'dho sië "dhʋ̈ kö "tɛɛ ‑yö ziö sië "gbɩɩ‑ 'ka "dhʋ̈ ‑kpɛawo, 'yö "suʋ̈ 'dhö ‑da Piɛdhö 'gü, 'yö ‑ya 'pö ‑dho "yi ꞊wlöö ‑sü ‑bha, "kɛɛ 'yö ꞊gbla 'ö‑ pö: «N Dëmɛ, ‑bhö n dha!» 31'Yö to 'yö Yesu ‑yö ö ‑gbe 'gü ‑pʋ ‑a "tʋ̈ng 'ka 'yö‑ sën‑ ‑kɔ ‑bha 'yö‑ pö‑ ‑dhɛ: «"Eke, i ‑bha ‑zʋ ‑yö n ‑dhɛ ‑sü ‑yö 'dɛdɛ ꞊tɔn ‑kɛɛ, Piɛdhö! ‑Më ꞊në ‑kë 'yö 'i 'zëë‑ 'zë ‑kë?» 32꞊Dhɛ 'ö‑ ‑nu ꞊gban ꞊plɛ ꞊wa ‑da "yitagɔ 'gü, 'yö "tɛɛ ‑yö bo ziö ‑sü 'ka. 33'Yö‑ ‑bha ꞊klang ‑nu 'dhɛ 'wo to "yitagɔ 'gü 'wo zun‑ ‑dhɛ wo kpiö 'gü 'wo‑ pö: «'Aa, yi Dëmɛ, Atanna Gbö ‑mü i 'ka ꞊dedewo tɛan‑ 'ka!»
Yesu ‑bha "yuëdhi 'gbɛ ‑dha Zenezadhe ‑sɛ 'gü ‑kɔ ‑dhiang 'ö Matiö ‑ya zë
(Makö 6,53-56)
34꞊Dhɛ 'ö ꞊wa "yi bha‑ "kan ꞊wa zun "sia‑ Zenezadhe ‑sɛ 'gü, 35'mɛ 'wo "pɛan bha‑ "piʋ̈ ‑wo ‑to ‑mü 'wo Yesu dɔ, 'yö 'wo ‑ya ‑a nu ‑wɔn ‑dhɛa "dhiʋ̈ bho ‑sü ‑bha "sɛ 'gü ‑dhɛ ꞊gban 'gü 'yö 'wo nu woo‑ "yuëdhi ‑nu 'ka‑ ‑dhɛ. 36'Yö 'wo ꞊bhɛa‑ ‑dhɛ kö "yuëdhi ‑nu bha ‑wo wo ‑kɔ "fiëfiëdë ‑zë 'pa‑ ‑bha ‑sɔ "zɔ 'ka (kë "dhʋ̈ kö ‑wo dha). 'Yö 'mɛ 'wo wo ‑kɔ pa‑ ‑dasɔ "zɔ 'ka "dhʋ̈ bha‑ ꞊gban "pɛpɛ 'wo ‑kë "klʋ̈ʋ̈klʋ̈.
Currently Selected:
Matiö 14: dnjGW
Highlight
Share
Copy
Want to have your highlights saved across all your devices? Sign up or sign in
© 1991, Wycliffe Bible Translators, Inc. All rights reserved.
(Print version published in cooperation with l’Association Ivoirienne pour la Traduction de la Bible)