MATIYU 22
22
1Yisa daa laa n‑tɔ'asi daadam maa, nyɛsiri puuni, ni, 2“Arizana naam yɛla ŋmanni la nŋɔa#:- Nasɔ n daa bɛ ni, ka u daa sɛ'asi pɔ'adiri kyuu n‑ti u biiya. 3U daa tum u daaba ni ba kyaŋŋi nti booli ŋɔn pun zuusi seeba maa, ni, ba kyɛm na. Amaa ba daa bu sakki n‑kyɛ na. 4Dizugu u daa laa n‑tum seeba yaasa ni ba ti yɛli ba, ni, ‘Kyuu maa saha paaya. N maali kyuu maa yɛla zaa siri n‑naai. M pun kɔri nigi ni bunkɔbkara la, ka di zaa niŋi la siri. Ya kyɛm pɔ'adiri kyuu maa na!’ 5Amaa ba ba'aba daa ka u ni, ka ba zaa daa bakki n‑kyaŋŋi ba kyɛnni. Sɔ daa kyaŋŋi la u puu, sɔ mun daa kyaŋŋi daa: 6ka seeba mun daa gbaai u daaba maa n‑diisi ba vi, halli nti ku ba gba. 7Dinŋɔ n daa kyɛ ka Naa maa suuri yisigi pam, ka u daa tum u soogyadima ni ba ti ku ninvugkuuriba wa ka nyoaai ba tiŋŋa maa bugum. 8Tɔ; di nyaaŋŋa ka u yi daa booli u niriba maa na nti yɛli ba, ni, ‘Kyuu maa saha paaya, amaa man daa zuusi seeba la bu sumsi ni ba di kyuu maa. 9Dinzugu ya kyɛma n‑dɔli tiŋŋa wa pala ni sɔkara nti zuusi yan nya seeba zaa, ni, ba kyɛm pɔ'adiri kyuu maa na.’ 10Tɔ: ka daaba wa daa yi n‑dɔli sɔya maa n‑la'asi ban daa nya seeba zaa na - ninvugsuma halli ni ninvugbeeri zaa gba - halli ka duu maa ti paali. 11Amaa Naa maa ŋɔn daa kpɛ, ni u ti nya ban daa la'am na la, u daa nya dɔsɔ ka u bu yɛ pɔ'adiri kyuu neema. 12Di saha ka u daa boosi u, ni, ‘N zɔa, i niŋi la wula n‑kpɛ na ka bu yɛ kyuu maa neema?’ Ka doo maa kur fɔ surimm ka bu yɛli u seelli. 13Tɔ; ka Naaba daa yɛli u niriba maa, ni, ‘Ya gbaama u n‑lɔ u nuusi ni u gbaya ka zaŋŋi u n‑yi m‑basi zibsim ni sa. Bɛni ka ba kur kumna, ka ŋɔbri ba nyina.’ ” 14Ka Yisa daa laa n‑yɛli ba, ni, “Niriba pam ka ba booli, amaa ban gamsi ninvugseeba la bu zoaai.”
15Di nyaaŋŋa ka Farisiseeba daa la'am taaba n‑gbaai gbaari zaŋŋi n‑kyaŋŋi ba nin niŋi seem n‑gbaai Yisa u yɛttɔ'a puuni. 16Ka ba daa tum ba nyaandɔliseeba, ni NaaHɛroodi niriba, ni ba kyɛ Yisa saani na nti yɛli u, ni, “Ti Karimba, ti mi halli, ni, i nyɛ la ninvugsuŋŋu, ka i kur wulisiri Naawunni soori ni yɛlimaŋni: halli i ba'a ka niriba yɛla ni ka bu zɔri ninsaala nini. 17Tɔ, ka dinŋɔna yɛlim ti: i yɛli la wula - di tuya ni ba yoori lampoo n‑tiri Room NaaTitaari, bee, di bu tuusi?” 18Ka Yisa daa baŋŋi ba teesibeeri ŋɔn nyɛ seem, ka yɛli ba, ni, “Yan birikɔnsi daandima wa! Wula zugu ka ya gbiiri m bɔ'a? 19Ya tim ma lampoo la'afu na ka n nya.” Ka ba daa zaŋŋi la'afu n‑ti u na, 20ka u yi boosi ba, ni, “Ŋɔni makkri m bɛ la'afu maa ni wa? - ni ŋɔni yuuri n sɔbi m‑bɛ ka ni?” 21Ka ba yɛli, “NaaTitaari dinni.” Di saha ka Yisa laa n‑labsi n‑yɛli ba, “Dizugu ya zaŋŋma din nyɛ Naaba dinni n‑ti Naaba maa, amaa ka zaŋŋma din nyɛ Naawunni dinni n‑ti Naawunni.” 22Ka ban daa wum lala maa, di daa gyɛri ba pam u zugu. Ka u daa bakki ka kyɛ ba.
23Tɔ; ka lala saha maa ka Saddusidima - ban yɛtti, ni, kum yisigri ka ni la - ba gba daa kyɛ na nti boosi u boosa. 24Ba daa yɛli u, ni, “Ti Karimba, Musa daa yɛli, ni, dɔsɔ beeri yi ti kpi ka u ka biiya, ŋɔn dim u beeri pukoori maa n‑dɔ'ai biisi n‑ti u beeri maa. 25Tɔ; ka mabiisi bayɔpɔi n daa bɛ ti tiŋŋa wa. Ka ba kpeema n daa di pɔ'a ka kpi ka bu dɔ'ai biiya, ka kyɛ u pɔ'a maa n‑ti u nyeeri la. 26Ka ŋɔn pa buyi daana la daa di pɔ'a maa ka kpi ka bu dɔ'ai biiya, ni buta daana maa gba daa niŋi lala, halli nti paai buyɔpɔi daana la gba. 27Di nyaaŋŋa ka pɔ'a maa gba kpi. 28Tɔ: ka dinŋɔna Zaadaari, niriba yi ti yisigi kum ni, babayɔpɔi wa puuni ŋɔni n nin nyɛ pɔ'a maa sira, dama ba zaa daa di u ni?” 29Ka Yisa daa labsi n‑yɛli ba, ni, “Ya burigi soori ya ziilinsi zaŋŋi n‑kyaŋŋi Naawunni Sɔppu maa zugu, ni zaŋŋi n‑kyaŋŋi ŋɔn Naawunni ŋɔn mari yiiko seem la gba. 30Zaadaari kum yisigri saha ba ku ti laa n‑diri pɔ'aba bee n‑kunni dɔppa, ba ti ya n‑ŋmanni la hoo arizana malaakadima la. 31Amaa zaŋŋi n‑kyaŋŋi ban kpi kum yisigri la yɛla, ya bu karim Naawunni ŋɔn daa yɛli seem? - ni, 32‘Mani n nyɛ Naawunni ka i badima gyeemni ma. Halli Ibrahim Naawunni n nyɛ ma, ni Yisahaaku Naawunni, ni Yaakubu gba.’ - ya bu wum lala? U siri pa la ninvugkpiimma Naawunni amaa ninvugvuya Naawunni.” 33Ka niriba maa ŋɔn daa ti wum dinŋɔa, di daa gyɛri ba, u wulisigu wa zugu.
34Farisii dima maa ŋɔn daa ti wum Yisa ŋɔn daa kyɛ ka Saddusidima sini ba noori seem la, ba daa la'am n‑kyɛ u saani na. 35Ka ba ninvugsɔ ŋɔn daa nyɛ Naawunni zaaligu baŋŋna daa ti boori ni u zamsi Yisa yam, ka doaai n‑zaani m‑boosi u, ni, 36“N Karimba, Naawunni ŋɔn daa zaali zaaligu maa zaa puuni, kani n lee m‑mugsi ka kpa n‑gaari zaa?” 37Ka Yisa daa labsi n‑yɛli u, “Ni, ‘Zaŋŋma i sufu n‑wuri i Dugma Naawunni, ni i siiya, ni i teesa zaa.’ 38Kan mugsi n‑kpa n‑gaari zaaligu kam zaa nla. 39Kan paasi buyi daana ŋmanni la kana: ka nyɛ la, ni, ‘Wuri i taraana hoo nyin wuri i mammaŋŋa seem la.’ 40Musa zaaligu la zaa, ni anabidima wulisigu zaa gba, bɛ la abayi wa puuni.”
41Farisii dima maa ŋɔn daa la'asi taaba, Yisa daa boosi ba, 42ni, “Bɔ ka ya ya n‑yɛli zaŋŋi n‑kyaŋŋi Masiiya maa yɛla? - Naawunni ŋɔn ya tum sɔ na ni u ti di naam n‑fa u niriba m‑basi. Ni, naam za'anɔri kani ka u ti ya n‑yi na?” Ka ba daa labsi n‑yɛli u, ni, “NaaDauda dinni.” 43Ka Yisa yɛli ba, ni, “Ka dinŋɔna, wula zugu ka NaaDauda daa tɔ'asi Masiiya maa yɛla, n‑tɔ'asiri Naawunni Siiya yiiko ni, m‑boonni u, ni, u Dugma. Dama u daa yɛli#:-
44‘Ti Dugma daa yɛli n‑ti n Dugma maa,
Ni, “Kyɛm n nudirigu zii na n‑zinni,
Halli ka n zaŋŋi i dindaandima zaa
N‑niŋi i nuusi ni.” ’
45Ka di yi nyɛ la dina, ka NaaDauda booli ŋɔn Masiiya maa, ni, u Dugma, ka wula ka Masiiya maa nin toaai m‑bɛ NaaDauda za'anɔri ni?” 46Tɔ: ka di saha sɔ daa bu nyaŋŋi n‑labsi Yisa seela, halli sɔ daa bu laa m‑boosi u boosa yaasa, lala dabsiri maa zaŋŋi n‑kyɛnna.
Currently Selected:
MATIYU 22: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.