MATIYU 19
19
1Yisa ŋɔn daa naai yɛttɔ'a wa, u daa yi Galilii tingbaŋŋu ni n‑kyaŋŋi Gyuudii tingbaŋŋu ya'ari, halli nti lɔŋŋi Gyɔdin mɔ'ari la. 2Ka zama pam daa dɔli u, ka u daa tibri ba bɛni. 3Ka Farisii dimseeba daa kyɛ u saani na ni ba da u gbinni. Ba daa boosi u n‑yɛli, ni, “Yɛlim ti: ammi, doo mari soori ka u nin toaai n‑yiisi u pɔ'a daliiri kam zaa zugu?” 4Ka Yisa daa labsi m‑boosi ba, ni, “Ya bu karim Litaafi la? Ni, Naawunni ŋɔn daa piili duniya naaŋŋu la, u daa naam ba doowa ni pɔ'a, 5ka daa yɛli ba, ni, dinŋɔ zugu doo nin kyɛ u ba ni u ma ka ŋɔn ni u pɔ'a la'am n‑tabli taaba. Ni, babayi maa nin la'am m‑bɛ ni kaman bunyinni. 6Dizugu ba laa m‑pa niriba ayi amaa bunyinni. Dinŋɔna Naawunni ŋɔn la'am bunseesi ni a leebi bunyinni maa, ninsaala di wɔligi a.” 7Ka Farisii dima la daa boosiya, ni, “Ka di niŋi la wula ka Musa daa zaali zaaligu la, ni, sɔ nin toaai n‑za'asi u pɔ'a? - ni, u zaŋŋma pɔ'aza'asigu gbaŋŋu n‑ti u pɔi, ka naayi kyɛ ka u bakki.” 8Ka u daa yɛli ba, ni, “Ya tuppuwumni la zugu ka Musa daa ti soori, ni, ba niŋma lala. Amaa di daa pa lala piiligu saha la. 9Amaa man yɛtti ya wa, doowa yi kari u pɔ'a ka pɔ'a maa bu tum la zina, ka doo maa ti laa n‑di pɔ'asɔ, u niŋi zina.” 10Ka u nyaandɔliba daa yɛli u, “Di yi nyɛ lala ŋɔna, zaŋŋi n‑kyaŋŋi doo ni u pɔ'a yɛla, dinŋɔna di sum ni nira di laa n‑di pɔ'a.” 11Ka Yisa daa yɛli ba, “Wulisigu wa muna - pa sɔkam zaa nin toaai n‑dɔli dinŋɔ maa, na'ala seeba Naawunni ŋɔn pun zaŋŋi n‑ti ba la. 12Dizugu yɛla pam m bɛ ni n‑kyɛ ka doo ku toaai n‑di pɔ'a#:- baseeba m bɛ ni ka ba madima daa dɔ'ai ba lala, ka baseeba ninsaala daa niŋi ba lala, seeba mun niŋi la lala ba mammansi, Arizana naam maa zugu. Kyɛ ka sɔ ŋɔn nin toaai n‑deaai wulisigu wa deaai di.”
13Di saha maa ka ba daa mari bibisi n‑kyɛ Yisa saani na ni u zaŋŋi u nuusi m‑pa ba zugri n‑susi Naawunni n‑ti ba. Ka u nyaandɔliba maa daa nyikki ba di zugu. 14Yisa mun daa yɛli ba, “Ya kyɛli bibisi maa, yan di ta'ari ba ni ba di kyɛ n saani na! Dama banŋɔ taabu n su Naawunni naam la.” 15Ka u daa zaŋŋi u nuusi m‑pa biisi maa zugri, ka daa doaai m‑bakki bɛni.
16Ka dɔsɔ daa kyɛ Yisa saani na nti yɛli u, ni, “N Karimba, tunsuŋŋu bɔ ka n nin tum ka deaai nyɔvuri kan ka naari?” 17Ka u daa yɛli u, “Wula ka i boosi ma bunsuma yɛla? Naawunni kɔkɔ n nyɛ bunsuŋŋu. I yi boori i kpɛ nyɔvuri, see ka i dɔli zaaligudima la.” 18Ka doo maa daa labsi m‑boosi u, ni, “Zaaligu bɔ n nyɛ a?” Ka Yisa daa yɛli, “Ni, ‘Di ku ninsaala.’, ‘Di tum zina.’, ‘Di zu.’, ‘Di di ziri sɛhara n‑lusi i kpeaa u yɛlli ni.’, 19‘Tim i ba ni i ma gyirima.’, ni, ‘Wuri i taraana hoo nyin wuri i mammaŋŋa seem la.’ ” 20Ka na'akyimbila maa yɛli, “Anŋɔ zaa ka n daa pun dɔla. Bumbɔ m pɔsigi ma yaasa?” 21Ka Yisa daa yɛli u, ni, “I yi boori n‑niŋi seelikam suŋŋa deede, kyɛma nti koosi i marigu zaa n‑zaŋŋi n‑tɔri faradima, ka i arizikki maali n‑zoaai Naawunni saani. Ka kyɛ na n‑dɔli ma.” 22Tɔ, ka na'akyimbila maa ŋɔn daa ti wum lala u daa bakki ni sufusa'aŋŋu, dama u daa nyɛ la bundaana ni yɛlimaŋni.
23Ka Yisa daa yɛli u nyaandɔliba maa, ni, “Yɛlimaŋni ka n yɛtti ya wa, ni, di tɔ pam ni bundaana kpɛ Arizana naam ni. 24Ka n yɛtti ya yaasa, ni, halli arakoomi nin ti kpɛ seeriga voori ni m‑puligi n‑yi ka bundaana na ku toaai m‑ma'asi ni u kpɛ Naawunni naam ni.” 25Ka u nyaandɔliba ŋɔn wum lala di daa gyɛri ba pam, ka ba boosi, ni, “Ka ŋɔni n lee n‑nin tiligi?” 26Yisa daa gɔsi ba ka yɛli, “Dinŋɔ tɔ pam ninsaalidima saani, amaa Naawunni ku kɔŋŋi bunseelikam niŋbu.” 27Dinsaha ka Piita daa yɛli u, “Nyama, tirima n nyɛ seeba ban kyɛ yɛlli kam m‑basi ka dɔli i! Tɔ - bɔ ka ti nin mari di zugu?” 28Yisa daa yɛli, “Yɛlimaŋni ka n yɛtti ya wa, yaseeba ban pun dɔli man nyaaŋŋa la, ni, Ninsaala Bii maa yi ti zi u naam zizii maa ni, ka di bɛ la duniya paalli din kyɛ na la puuni - lala saha maa ka ya niriba pii ni ayi wa nin ti zini naam gbana zugu n‑katti Izraɛli za'anɔya pii ni ayi niriba sariya. 29Ka sɔ yi bɛ ni ka u kyɛ u yiri, bee u babiisi ni u mabiisi, u ba ni u ma, bee u biisi bee u puri, man yuuri zugu, di daama nin deaai a taabu pampampam, ka u nin ti nya nyɔvuri kan ka naari m‑paasi. 30Amaa ban daŋŋi tooni nin ti kpalim nyaaŋŋa, ka ban kpalimni nyaaŋŋa mun nin ti daŋŋi tooni.”
Currently Selected:
MATIYU 19: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.