Yauhaas 10
10
Zaaj Lug Pevtxwv Has Txug Tug Tswv Yug Yaaj
1Yexus has tas, “Kuv qha tseeb rua mej has tas tug kws moog huv lub nkuaj yaaj, yog nwg tsi moog ntawm lub rooj nkuag moog, tabsis nwg cale nce lwmqhov moog xwb, tug ntawd yog tubsaab tubnyag. 2Tug kws moog ntawm rooj nkuag, tug ntawd txhaj yog tug tswv yug yaaj. 3Tug kws zuv qhovrooj yuav qheb rooj nkuag rua nwg; thaus nwg cuab nwg paab yaaj tej npe, paab yaaj yuav paub nwg lub suab hab nwg yuav coj puab tawm moog. 4Thaus nwg coj paab yaaj tawm moog lawm, nwg yuav ua puab ntej, hab puab yuav lawv nwg qaab, ruaqhov puab paub nwg lub suab. 5Paab yaaj yuav tsi lawv lwmtug qaab, tabsis puab yuav tsiv tawm ntawm tug ntawd moog, ruaqhov puab tsi paub tug ntawd lub suab.”
6Yexus has zaaj lug pevtxwv nuav rua puab, tabsis puab tsi totaub sov yog Nwg has txug dlaabtsi.
Yexus Yog Tug Tswv Yug Yaaj Zoo
7Yogle ntawd, Yexus txhaj rov has rua puab tas, “Kuv qha tseeb rua mej has tas, Kuv yog lub rooj nkuag yaaj. 8Txhua tug kws lug uantej Kuv, puavleej yog tubsaab tubnyag xwb, tabsis paab yaaj yeej tsi noog puab tej lug. 9Kuv yog lub rooj nkuag. Tug kws lug ntawm Kuv moog, tug ntawd yuav dlim; nwg yuav moog-moog lug-lug hab nrhav tau zaub noj. 10Tubsaab tuaj, tes yog tuaj nyag, tuaj tua, hab tuaj ua kuas puamtsuaj xwb. Tabsis Kuv lug, yog lug kuas mej tau txujsa, kws yog tau lub neej kws puvnpo.
11“Kuv yog tug tswv yug yaaj kws zoo. Tug tswv yug yaaj kws zoo yeej txaussab hlo muab nwg txujsa theej paab yaaj. 12Tug kws raug luas ndlav, nwg yeej tsi yog tug tswv yug yaaj hab paab yaaj ntawd los yeej tsi yog nwg le, thaus pum maa tuaj, nwg yuav tsiv hab tso paab yaaj tseg; maa yuav tum paab yaaj hab ua rua paab yaaj tsiv tawg uasaab uasua taag. 13Nwg tsiv, vim yog luas ndlav nwg zuv paab yaaj xwb, nwg yeej tsi mobsab txug paab yaaj. 14-15Kuv yog tug tswv yug yaaj kws zoo. Leejtxiv paub Kuv lecaag hab Kuv paub Leejtxiv lecaag, tes Kuv paub Kuv paab yaaj hab puab paub Kuv ib yaam nkaus le ntawd. Kuv yeej txaussab tuag theej puab. 16Kuv muaj dlua ib paab yaaj kws tsi nyob huv lub nkuaj nuav. Kuv yuavtsum moog coj kuas tau puab lug; puab yuav noog Kuv lub suab, hab taagnrho puab suavdlawg yuav lug#10:16: puab suavdlawg yuav lug; tej phoo ntawv qub kws xuas teg sau, muaj puab yuav ua. ua ib paab koom ib tug tswv xwb.
17“Leejtxiv hlub Kuv ruaqhov Kuv txaussab hlo tso Kuv txujsa tseg, sub Kuv txhaj tau Kuv txujsa ntawd rovqaab lug. 18Tsi muaj leejtwg yuav txeeb tau Kuv txujsa ntawm Kuv moog. Yeej yog Kuv txaussab tso Kuv txujsa ntawd tseg xwb. Kuv muaj cai tso Kuv txujsa tseg hab Kuv muaj cai muab Kuv txujsa rovqaab lug. Nuav yog yaam kws Kuv Txiv tau xaaj kuas Kuv ua.”
19Vim tej lug kws Yexus has nuav, txhaj ua rua cov Yudais rov tsi sishum dlua. 20Muaj ntau leej has tas, “Nwg raug ib tug dlaab! Nwg vwm lawm! Uacaag mej tseem yuav noog Nwg tej lug ua dlaabtsi hab?”
21Tabsis muaj qeeleej has tas, “Tug tuabneeg kws raug dlaab yeej tsi txawj has tej lug nuav! Dlaab yuav ua lecaag khu tau tug tuabneeg kws dligmuag kuas pumkev?”
Cov Yudais Tsi Leeg Paub Yexus
22Lub sijhawm ntawd yog caij ntuj no, yog lub caij ua kevcai ncu txug nub kws khu lub Tuamtsev huv lub nroog Yeluxalees. 23Yexus taabtom ncig moog ncig lug huv Xalumoos lub qaabkhaav ntawm lub Tuamtsev, 24cov Yudais txawm sissau tuaj vijvog Yexus hab nug has tas, “Koj tseem yuav ca peb nyob ua xyemxyaav moog ntev npaum lecaag? Cale qha qhov tseeb rua peb seb, Koj puas yog tug Mexiyas tag?”
25Yexus teb tas, “Kuv tub qha rua mej lawm, tabsis mej tsi kaam ntseeg Kuv. Tej num kws Kuv Txiv kuas Kuv ua, tub ua timkhawv qha rua mej paub txug Kuv lawm; 26tabsis mej tsi ntseeg, ruaqhov mej tsi yog Kuv paab yaaj. 27Kuv paab yaaj yeej noog Kuv lub suab; Kuv paub puab, hab puab yeej lawv Kuv qaab. 28Kuv muab txujsa ntev dlhawv moog ibtxhis rua puab, puab yuav tsi tuag ib zag le. Yeej tsi muaj leejtwg kws yuav txeeb tau puab tawm ntawm Kuv moog. 29Tej kws Kuv Txiv muab pub rua Kuv, luj dlua txhua yaam huv tuabsi,#10:29: Tej kws Kuv Txiv muab pub rua Kuv, luj dlua txhua yaam huv tuabsi; tej phoo ntawv qub kws xuas teg sau, muaj Kuv Txiv, tug kws muab puab pub rua Kuv, yog tug kws luj dlua ndlais huv tuabsi. hab tsi muaj leejtwg kws yuav txeeb tau puab ntawm Leejtxiv txhais teg moog. 30Leejtxiv hab Kuv yog tuabtug.”
31Tes cov Yudais txawm rov khaws pobzeb yuav ntaus Yexus dlua. 32Yexus has rua puab tas, “Kuv Txiv kuas Kuv ua ntau yaam num zoo rua mej pum; tej ntawd yaam twg yog yaam kws ua rua mej txhaj yuav muab pobzeb ntaus Kuv?”
33Puab teb tas, “Qhov kws peb yuav muab pobzeb ntaus Koj, tsi yog vim tej num zoo kws Koj ua, tabsis vim qhov kws Koj haslug saib tsi taug Vaajtswv! Koj tsuas yog tuabneeg xwb, tabsis Koj khaav has tas Koj yog Vaajtswv.”
34Yexus teb tas, “Tub muaj lug sau ca rua huv mej txuj Kevcai lawm, Vaajtswv has tas, ‘Mej yog tej nyuas vaajtswv.’ 35Peb paub tas tej kws Vaajtswv Txujlug qha yeej yog qhov tseeb moog taag ibtxhis le xwb; Vaajtswv hu cov tuabneeg ntawd hu ua tej nyuas vaajtswv, puab cov ntawd tub yog cov kws tau txais Nwg Txujlug nuav ntaag. 36Kuv tub yog tug kws Leejtxiv xaiv hab khaiv lug rua huv nplajteb nuav. Uacaag mej tseem has tas Kuv haslug saib tsi taug Vaajtswv? Puas yog vim qhov kws Kuv has tas Kuv yog Vaajtswv Leejtub? 37Yog Kuv tsi ua tej num kws Kuv Txiv kuas Kuv ua, tes mej kuj tsi xob ntseeg Kuv hlo le. 38Tabsis yog Kuv tub ua tej num ntawd lawm, txawm yog mej tsi ntseeg Kuv los xij, mej yuavtsum ntseeg tej num kws Kuv ua ntawd, sub mej txhaj yuav paub meej-meej tas Leejtxiv hab Kuv koom ib txujsa.”
39Tes puab txawm yuav rov nteg Yexus dlua, tabsis Yexus tsiv dlim ntawm puab txhais teg moog lawm.
40Yexus txawm hlaa tug dlej Yauladees moog rua tim qhov chaw kws Yauhaas muab tuabneeg ua kevcai rausdlej hab Nwg nyob rua tid. 41Muaj tuabneeg coob-coob tuaj cuag Nwg, puab has tas, “Yauhaas tub tsi tau ua ib yaam txujci tseemceeb dlaabtsi le, tabsis txhua yaam kws Yauhaas has txug tug txivneej nuav puavleej muaj tseeb.” 42Cov tuabneeg kws nyob rua ntawd muaj ntau leej lug ntseeg Yexus.
Currently Selected:
Yauhaas 10: HNJ2022
Highlight
Share
ਕਾਪੀ।
Want to have your highlights saved across all your devices? Sign up or sign in
© 2022 United Bible Societies. All rights reserved.