Chivkeeb 11
11
Tug Pemthuam Npanpees
1Thaus ntawd taagnrho tuabneeg nplajteb tsuas muaj tuabyaam lug hab siv tuabyaam lug ntawd xwb. 2Thaus puab tsiv moog rua saab nubtuaj, puab moog txug rua ntawm lub tajnraag Npanpiloos hab puab txawm moog nyob ua zej ua zog rua ntawd. 3Puab sisthaam has tas, “Cale tuaj! Peb yuav puab thwvcib hab coj moog hlawv kuas tawv.” Yogle ntawd, puab txhaj muab cov thwvcib ntawd hab roj aav nplaum lug lu uake kuas sis tuav. 4Puab has tas, “Zagnua peb cale tsim ib lub nroog kws muaj ib tug pemthuam sab nto ntuj, sub peb txhaj muaj koob muaj npe hab tsi tawg tsiv moog nyob uasaab uasua thoob nplajteb.”
5Tug TSWV txawm nqeg lug saib lub nroog hab tug pemthuam kws puab tsim, 6hab Nwg has tas, “Nwgnuav cov tuabneeg nuav yog ib paab hab puab has ib yaam lug; qhov nuav yog tej kws puab nyavnyuas pib ua xwb. Tsi ntev ntshe puab yuav muaj peevxwm ua tau txhua yaam lawvle puab xaav ua! 7Peb cale moog muab puab cov lug sis dlu sub puab ib leeg txhaj yuav tsi totaub ib leeg.” 8Yogle ntawd, tug TSWV txhaj lug ua rua puab tawg moog nyob uasaab uasua thoobplawg lub nplajteb, puab txhaj tsotseg tsi tsim lub nroog ntawd ntxiv lawm. 9Yogle ntawd, txhaj muab lub nroog ntawd hu ua Npanpees,#11:9: Npanpees: Lub npe nuav has muaj ntsiv thooj le lulug Henplais kws has tas “sis dlu.” ruaqhov tug TSWV ua rua txhua tug tuabneeg ntawd nyag has nyag ib yaam lug, hab Nwg ua rua puab tawg uasaab uasua ntawm qhov chaw ntawd moog nyob thoobplawg nplajteb.
Sees Caajceg
(1 Xwmtxheej Vaajntxwv 1:24-27)
10Nuav yog Sees le caajceg. Ob xyoos tomqaab kws dlej nyaab nplajteb, Sees muaj noobnyoog 100 xyoo, nwg muaj ib tug tub hu ua Apakesas. 11Dlhau ntawd, nwg tseem ua neej nyob tau 500 xyoo hab muaj tub ntxhais coob leej ntxiv.
12Thaus Apakesas muaj noobnyoog 35 xyoos, nwg muaj ib tug tub hu ua Selas; 13dlhau ntawd, nwg tseem ua neej nyob tau 403 xyoos hab muaj tub ntxhais coob leej ntxiv.
14Thaus Selas muaj noobnyoog 30 xyoo, nwg muaj ib tug tub hu ua Enpaws; 15dlhau ntawd, nwg tseem ua neej nyob tau 403 xyoos hab muaj tub ntxhais coob leej ntxiv.
16Thaus Enpaws muaj noobnyoog 34 xyoos, nwg muaj ib tug tub hu ua Pelej; 17dlhau ntawd, nwg tseem ua neej nyob tau 430 xyoo hab muaj tub ntxhais coob leej ntxiv.
18Thaus Pelej muaj noobnyoog 30 xyoo, nwg muaj ib tug tub hu ua Le-us; 19dlhau ntawd, nwg tseem ua neej nyob tau 209 xyoos hab muaj tub ntxhais coob leej ntxiv.
20Thaus Le-us muaj noobnyoog 32 xyoos, nwg muaj ib tug tub hu ua Xelus; 21dlhau ntawd, nwg tseem ua neej nyob tau 207 xyoo hab muaj tub ntxhais coob leej ntxiv.
22Thaus Xelus muaj noobnyoog 30 xyoo, nwg muaj ib tug tub hu ua Nahaus; 23dlhau ntawd, nwg tseem ua neej nyob tau 200 xyoo hab muaj tub ntxhais coob leej ntxiv.
24Thaus Nahaus muaj noobnyoog 29 xyoos, nwg muaj ib tug tub hu ua Telas; 25dlhau ntawd, nwg tseem ua neej nyob tau 119 xyoos hab muaj tub ntxhais coob leej ntxiv.
26Tomqaab Telas muaj noobnyoog 70 xyoo, nwg maamle muaj peb tug tub kws yog: Anplaas, Nahaus hab Halaas.
Telas Caajceg
27Nuav yog Telas kws yog Anplaas, Nahaus, hab Halaas txiv le caajceg. Halaas yog Lauj txiv; 28Halaas tuag nyob huv lub nroog Aws tebchaws Npanpiloos, thaus ntawd nwg txiv tseem ua neej nyob. 29Anplaas yuav Xalais ua quaspuj, hab Nahaus yuav Halaas kws yog Ixakhas txiv tug ntxhais Milekas lug ua quaspuj. 30Xalais xeeb tsi taug tub.
31Telas coj nwg tug tub Anplaas, nwg tug xeebntxwv Lauj kws yog Halaas tug tub, hab nwg tug nyaab Xalais kws yog Anplaas tug quaspuj, tawm huv lub nroog Aws, tebchaws Npanpiloos moog rua tebchaws Kana-aas. Tabsis thaus puab lug txug ntawm Halaas, tes puab txawm lug nyob rua ntawd lawm. 32Telas tuag rua qhov chaw ntawd, thaus nwg noobnyoog muaj 205 xyoos.
Currently Selected:
Chivkeeb 11: HNJ2022
Highlight
Share
ਕਾਪੀ।
Want to have your highlights saved across all your devices? Sign up or sign in
© 2022 United Bible Societies. All rights reserved.