LUKA 17
17
Kaneetisyet agobo kanagutik
(Mat 18:6-7, 21-22; Mar 9:42)
1Ki leenji kasubikyik anyun, “Pwoonei kanagutik matiny: ago pwo! Eng' chiichooto punu! 2Kita kaigai eng' ineendet kirooch kaatinnyi koitap pai ne oo ak kewiirchi araraita, kosiir ye inachi age eng' chu mengech. 3#Mat 18.15 Oriipkei: ngo chiliilun ne otupche, iger kong'; ak ngo sik, inyochi kaat. 4Ak ngo chalwogenjin konyil tisap eng' peetuut agenge, ak ngo week ole imi konyil tisap koleen, Kaasigu; inyochi kaat.”
Kaneetisyet agobo kayaneet
5Ak ki leenji che kiyooktoi Kiptaiyat, Teswech kayanennyo. 6Ak ki le Kiptaiyat, Ndotinye kayaneet ne uu keswootap karadali, ko ye omwachi mogoywoni, oleenji, Kitutin, ak keminin eng' araraita; kogasook iit.
Otwogindet ak poisyennyi
7Ago mi ng'oo eng' okweek ne tinyei otwogindet ne ibatisyei anan ne iyagi keechiirek, ne leenjin ye kait kobunu mbar, “Nyoo tebi ng'wony iamisye?” 8Tos ma kaigai koleenji ineendet, Chobwa tuguuk che aame, kermenge ak iboisyeiwo, agoi aamisye ak aeeise; si yeityo iamisye ak ieeise aginye? 9Tos weekyin otwogindonooto kongoi amu kayai tuguuk che kagaging'at? 10Uu nooto tuun ak okweek, ye kaoyai tuguuk tugul che kaging'atak, omwa ole, Ki otwogik che ma tilei kiy; kageyai che kanyooljinech keyai.
Kisoobi piik taman ak aeng' che amei mogondosaik
11Ak ye ki mi ooreet kowendi Jerusalem, kobun kwenutap Samaria ak Galilaya. 12Ak kingo mong'ji nganaseet age, kotuiyo ak murenik taman che ki tinyei mogondosaik, che kitonondos eng' ole loo: 13ak kiwaach kole, “Jeso Kiptaiyat, rirenech.” 14#A.La 14.1-32 Ak kingo keer icheek, koleenji, “Oba oboorchigei tisiik.” Ak ye kingap kaba, kotiliiliitu. 15Ak kingo keer age eng' icheek kole kagosap, koweek, kolasunonu Kamuktaindet eng' kutit ne oo; 16ak ki ibutyi keelyekyik koweekyi kongoi; ak ki Samarindet chiichooto. 17Ak ki wol Jeso kole, “Kama kitiliil taman? Ago mi ano chugai sogoolu? 18Tos ma piit agot agenge ne kaweek kogoochi kalasunet Kamuktaindet, kobatee toondoni? 19Ak koleenji ineendet, Ng'eet, si iwe: kagosaabin kayaneng'ung'.”
Nyonunet ne po laitornatetap Kamuktaindet
(Mat 24:23-28, 37-41)
20Ak kingo teebee Pharisaik kole “Nyoonei au laitornatetap Kamuktaindet”, kowolji icheek koleenji, “Ma nyoonei laitornatetap Kamuktaindet kegeeronu: 21ama kimwaei keele, Ogeero, mi oli! Anan mi oliin! Amu, ogeero, mi laitornatetap Kamuktaindet kwenung'wong'.”
22Ak ki leenji kasubikyik, Tuun pwoonei peetuusyek, che tuun omache ogeer peetuut agenge ne po Weeriitap chii, ak mogeere. 23Ak tuun leenjinok, Ogeero, mi oliin! Ogeero, mi oli! Amat obe, anan osup icheek: 24amu uu kalyeleet, ne ilyelune komosta age eng' kipsengwet, ak kooluu agoi komosta age ne po kipsengwet; tuun uu nooto Weeriitap chii agine eng' peetuunnyi. 25Ago kanyool konyalil eng' tuguuk che chaang' ak koeesyo ineendet ibini. 26#Tau 6.5-8 Ak ko uu ole ki piitunda eng' peetuusyegap Noah, ko tuun uu nooto eng' peetuusyegap Weeriitap chii. 27#Tau 7.6-24 Ki amisyei, kieisei, kiitunisyei, ak ki igoitoi kitun, agoi peetuut ne ki wo Noah moinget oriit, ak ki nyo maraneet, ak kobar tugul. 28#Tau 18.20-19.25 Uu nooto agine, ole ki piitunda peetuusyegap Lot; ki amisyei, kieisei, ki alisyei, ki aldaisyei, ki koolsei, ak kiteeksei; 29ago eng' peetuut ne kimanda Lot eng' Sodom koroobon maat ak koik che laldos che ki punu kipsengwet, ak kobar tugul: 30uu nooto eng' peetuut ne kibooru Weeriitap chii.
31 # Mat 24.17-18; Mar 13.15-16 Eng' peetuunooto, ko mat kochoorgei ineendet ne mi koot parak, koip tuguukyik che mi ko; amat koweek agine ineendet ne mi mbar. 32#Tau 19.26 Obwaat osotyotap Lot. 33#Mat 10.39; 16.25; Mar 8.35; Luk 9.24; Jhn 12.25 Age tugul ne cheeng'ei kosar saboondanyi kobeeti: ak age tugul ne ibeeti saboondanyi koriibei. 34Amwaiwok ale, Tuun ruitos piik aeng'u eng' itoogut agenge eng' kemounooto; kimuti age, kebagaakta age. 35Tuun ng'oisei kobogorisyek aeng'u kibagenge; kimuti age, kebagaakta age. 36Tuun mi piik aeng'u mbar: kimuti age, kebagaakta age.
37Ak ki wolji ineendet koleenji, “Ano, Kiptaiyat?” Ak ki leenji, Ole mi muusto, koyumjingei olooto motong'wek ak icheek.
Currently Selected:
LUKA 17: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
