Marcos 6
6
So Jesús hueta'a yi Nazaret
(Mateo 13.53-58; Lucas 4.16-30)
1So Jesús ca'ai ca hueta'a da ÿi'iguelaxa ca lañaxataqa', nauectagueto soua lapaxaguenataqa. 2Qaq co'ollaq iviteuga so na'a'q mataxaqui, nachi somayi dapaxaguenataxaatapoigui aso laponaxaqui na judiopi. Qaq ÿataqta qalota na shiÿaxauapi n'axaÿaxaatega, nachi ÿataqta huo'o da l'aalaxa. Nachi somayipi 'enapeco':
–¿Chaq huá'ago' ca ÿachigoxota'ague 'enauac na laÿajnec dam da' shiÿaxaua? qataq ¿chaq négue't dam da' naÿajnec mayi qoÿami', qataq nam sa qaÿauanapigui mayi i'ottacpi? 3Yi damayi chochi qo'ipaq l'o, llalec aso María, qataq lqaÿa so Santiago, José, Judas qataq so Simón. Qataq naua lqaÿa't 'alo souaqta'agueta.
Nachi sa ishit da qai'amaqten. 4Qalaxayi so Jesús 'enapeco':
–'Enauac na shiÿaxauapi ÿataqta ÿauotec ca l'aqtaxanaxanec ñi Dios, qalaxayi na maichi lma'shicpi, lauo' l'ecpi, qataq ca lma' sa ishit da i'amaqten.
5Nachi so Jesús sa ishit da huo'o ca i'ot nam sa qaÿauanapigui. Nda'a't da huo'o na ÿashil-lec na sa no'onpi da nataden, qalaxayi saq 'amaqtaq. 6Nachi so Jesús ÿataqta i'aalac somayipi, cha'ayi sa ishit da da'amqajnataxan. Ime, nachi somayi jec da quetagui na pueblopiolec mayi sa qaÿapeque da dapaxaguenataxaatac.
So Jesús ÿama'q soua lapaxaguenataqa da da'aqtaxa'n
(Mateo 10.5-15; Lucas 9.1-6)
7Qaq co'ollaq ime, nachi iÿaxanoiguilo soua doce lapaxaguenataqa, nachi ÿama'q, dostega't naq'en. Nachi ÿanema soomayi da l'añaxa'c da yaqto' i'oldauec na n'ecpi leguemaxaic. 8Qataq ÿanema da lqataxac soomayi, da yaqto' sa ishit da huo'o ca ÿachi' na nqa'aic, chaqcata ca lashilaxala'. Qataq da sa ishit da ÿachi' ca lachoxonaxaqui', qataq ca alo'q, qataq aca alom. 9Qataq da ÿauo'oi naua lapela't, qataq 'oonolec ca l-lomaxaqui, qaq sa ishit da dos caua ÿachita'pe. 10Qataq 'enapegalo' soomayi, 'eeta':
–Qami' qom ivita da qaunoxoñiu'a ca camachicague't noÿic, qaq nachica qoviita'a, chochi ivitta'a da qoquiÿa'ai que'eca 'alhua. 11Qaq da huo'o ca huaña da sa ishit da qami' ÿacongueta qataq sa qami' n'axaÿaxanalo, nachi qoquiÿa'ai camayi, qalaxayi qauchigoqoiuec qome na namoxoÿaxa naua qadapia'chilli', qaq damayi nachi l'anaxat da camayipi maichi nasouaxajla't. Qaq ÿataqta 'eesa de'eda qami' sa'axatema da qom ivita que'eca pa'ateec na'a'q qom nmit na nasouaxashitpi ñi Dios, nachi saqalligueme qome da nhuaxanaguec nam lma' so Sodoma qataq so Gomorra, qaq saq 'en'am qome ca nhuaxanaguec qanqoÿin ne'ena shiÿaxauapi mayi sa qami' ÿacongueta.
12Nachi soomayi je'c, nachi da'aqtaxaadem na shiÿaxauapi, da yaqto' ÿaxaadeec naua n'onataxaco. 13Nataq'en qalota na n'ecpi leguemaxaic na i'oldauec, qataq qalota na sa no'onpi na i'ame'n na aceite, nachi no'oita qanqoÿin.
Da nalaataguec so Juan mayi nachilaxanataxanaq
(Mateo 14.1-12; Lucas 9.7-9)
14Qaq so nta'a Herodes ivido'ot da ÿaÿaten 'enauac de'eda, cha'ayi mashi ÿaÿaten 'enauac na shiÿaxauapi da n'aqtaguec so Jesús. Nachi se'eso Herodes 'enapeco':
–Souaxai' nachida da Juan mayi nachilaxanataxanaq da qaltaq nca'aleec, qaq ÿoqo'oyi huo'o de'eda l'añaxac.
15Qataq huo'o na laÿipi 'eeta':
–Souaxai' nachida da Elías mayi l'aqtaxanaxanec ñi Dios.
Qataq huo'o na 'eeta':
–Souaxai' Dios l'aqtaxanaxanecda, 'eeta'am som hua'au l'aqtaxanaxanecpi ñimayi.
16Qaq so Herodes co'ollaq l'axaÿaxac de'eda, nachi 'enapeco':
–Damayi nachida da Juan mayi samaxasoxoolec co'ollaxa da qaipeteguec na lqaic, da mayi qaltaq nca'aleec.
17Cha'ayi so Herodes damaxasoxoolec co'ollaxa da qaicoñi' so Juan qaÿauo'o ca lquet, qoÿanaigui aca ncoñitaxanaxaqui, souaxat aso Herodías. Asá'aso Herodías, asomayi lhua co'ollaxa so Felipe som lqaÿa so Herodes. Qalaxayi so Herodes deuotaxanec co'ollaxa da ÿauo'o lhua. 18Nachi so Juan 'enapega co'ollaxa so Herodes, 'eeta':
–Sa ÿaÿamaxañi da 'auotaxanec añi lhua so 'adqaÿa.
19Nachi asa'aso Herodías ÿataqta nquiÿa so Juan, nachi ÿauotaique da ÿalauat, qalaxayi sa ÿañoxot. 20Cha'ayi so Herodes ÿaÿateeta da so Juan ÿataqta no'on da lataxac, qataq qui'itta, ÿoqo'oyi ñi'iÿalec. Qaq ÿoqo'oyi somayi sa ÿashinem asomayi da huo'o ca 'ena'ac so Juan. So Herodes, nai'ctaxa da qalligueme da ÿoqta ÿaÿateetegue ca l'aqtaxanaxac so Juan, qalaxayi nachi 'en'am nqopita da n'axaÿaxana. 21Qalaxayi aso Herodías huetoigui naq'en so na'a'q co'ollaq so Herodes i'ot so lqui'axac da deque'elec so lañoxoqui. Nachi somayi iÿaxana so ltauapi nta'alpi, qataq na huataxanaq lta'alpi, qataq nam sallaxanecpi mayi lma' yi Galilea. 22Nachi aso llale aso Herodías inoxoneu'a ca huaña ca nqui'axac da dasot. Qaq de'eda lasotaxac asomayi ÿataqta lauela so Herodes qataq som lqui'axauapi. Nachi so nta'a Herodes 'enapego' asomayi, 'eeta':
–Aÿim 'auÿaxanot ca 'aueetac, nachi 'am sami'.
23Nachi ÿan da l'aqtac da 'eetega da ipacchigui da ÿaneec ca camachaqca qaiÿaxanaique, nai'ctaxa da huo'otaq tachiguingui na laiñi nam 'alhuapi mayi ilotague' somayi. 24Nachi asomayi pa'auec, nachi ichimaxata aso late'e, 'eeta':
–¿Négue't ca seÿaxanaique?
Nachi asomayi 'enapeco':
–'Auÿaxaneu'a qome na lqaic ñi Juan mayi nachilaxanataxanaq.
25Nachi aso qa'añole saqaÿaloq da ÿi'iguelaxau'a ca hueta'a so nta'a. Nachi 'enapego', 'eeta':
–Ñishitaique da nachina nagui da aÿim 'ai'anem ca nqui'axaqui, 'auachitangui ca lqaic ñi Juan mayi nachilaxanataxanaq.
26Nachi so nta'a ÿataqta daquico. Qalaxayi mashi ÿan so l'aqtac da 'enapec ipacchigui, qataq hua'aqchigui co'ollaxa somayi so lqui'axauapi. Qaq ÿoqo'oyi sa ishit da illapec cam qaiÿaxaneu'a. 27Nachi so nta'a sa ÿaÿaloxon da ÿamaq so 'oonolec huataxanaq l'ec da ndouo ca lqaic so Juan. 28Nachi jec so huataxanaq l'ec da taÿa aso ncoñitaxanaxaqui. Nachi ipeteguec na lqaic so Juan, nachi ndoi', ÿachitagui so nqui'axaqui. Nachi somayi ÿanem aso qa'añole, qaq asomayi ÿami' aso late'e.
29Nachi nam quetague'pi so Juan co'ollaq ÿaÿaten de'eda, nachi qaÿi'iguenau'a so l'oquiaxac, nachi qaidouec, da yaqto' qailayiñi.
So Jesús iqui'axan so cinco mil shiÿaxauapi
(Mateo 14.13-21; Lucas 9.10-17; Juan 6.1-14)
30Qaq co'ollaq ime de'eda, nachi so Jesús datata'agueta soua lamaxa'shi. Nachi soomayi i'axattrapeguema somayi 'enauac nam i'otpi qataq nam dapaxaguenataxaadec. 31Nachi so Jesús 'enapegalo soomayi, 'eeta':
–Qolaq qome, cada'ac da ñimataxauec, ñoqo'onaxauga ca tojlec 'alhua.
Cha'ayi ÿataqta qalota na nmeeta'a't shiÿaxauapi da nategueu'alo soomayi, nachi ivitta'a da qaica ca ldaqa't da huotaique da deque'e'. 32Nachi so Jesús nda'agueta soua lamaxa'shi da je'c, ñiyingui aso barco da nqo'ooda ca tojlec 'alhua. 33Qalaxayi qalota co'ollaxa na ÿauaategue somayi co'ollaq jec qataq qaÿauatton so Jesús. Nachi hua'aua ca qotaÿa'a 'alhua 'enauac nam chigoqchiguiñalo naua puebloyi, nachi hua'auñi da ivi' co'ollaq saxanaxa da ivilyi' soomayi. 34Nachi so Jesús co'ollaq huenoteeguesop aso nnotaxaqui, nachi ilaigui so qalota shiÿaxauapi. Nachi ÿataqta huo'o da lchoxonnataxanaxa, cha'ayi 'eeta'am ana qagueta mayi qaica ca ilo'ogue. Nachi quetot da qalota na ÿapaxaguenec. 35Qaq co'ollaq mashi avit, nachi soua lapaxaguenataqa nquiguedeu'a somayi. Nachi qoÿiitega, qoÿiita':
–Mashi avit, qataq ne'ena souaqta'a tojlec. 36Qaq no'on da qonapega na shiÿaxauapi da taÿa nam netalguete naua 'ale'u qataq naua pueblolqa mayi sa qaÿapiguii, da yaqto' deshijnaxanaique ca aloq, cha'ayi ne'ena shiÿaxauapi qaica ca chic.
37Qalaxayi so Jesús 'enapeco':
–Qami' mayi qai'añiim ca aloq namayipi.
Nachi soomayi 'ena'po':
–¿Ishito' peta'a da qomi' sauoqta'a doscientos denarios da seshijnaxanqaique ca nallic, da yaqto' sequi'axanaq namayipi?
38Nachi so Jesús 'enapegalo soomayi, 'eeta':
–¿Ca lcáte' caua qanqolli' pan? Ña qaumichiñi'.
Nachi co'ollaq qaÿaÿate'n soua huo'oi, nachi qai'aqtaxanem, qoÿiita':
–Qomyi cincole yiua pan, qataq dosolqa yiua nÿaxayi.
39Nachi somayi ÿamaxalec so shiÿaxauapi da nso'ooñi, huaxaÿapega't naq'en, nso'onaxanaxaalec na 'auaqpi dadala. 40Nachi nso'ooñi somayipi, ÿaqauga yi huaña na cien qataq na cincuenta. 41Nachi so Jesús ÿacongueta soua cincole pan qataq soua dos nÿaxayi, nachi ÿamato'ot na piguem da nqouagaxaunot ñi Dios, nachi icolaxachiguilo soua pan qataq ÿanoiguilo soua lapaxaguenataqa, da yaqto' soomayi ÿanoiguilo so shiÿaxauapi. Nataq'en ÿanoiguilo 'enauac so shiÿaxauapi soua dosolqa nÿaxayi. 42Qaq 'enauac somayipi deque'e, qataq comadaxaicpi. 43Qaq co'ollaq ime, nachi qaiÿoxoguilo soua doce canasta so ñi'iÿoxotpi aso pan qataq soua nÿaxayi. 44Qaq se'eso shiÿaxauapi mayi chic se'esoua pan, somayipi ivi' ca cinco mil.
So Jesús quetalec so 'etaxat
(Mateo 14.22-27; Juan 6.16-21)
45Qaq co'ollaq ime de'eda, nachi so Jesús i'auaxa'n soua lapaxaguenataqa, ñiyingui naq'en aso barco da i'axasoxoodelec aso lapel da nqo'ootra yi pueblo Betsaida. Qaq somayi n'onañi da ncoyigueetague' na shiÿaxauapi. 46Qaq co'ollaq ime da ncoyigueetague' somayipi, nachi jec da tashiguemec aso qasoxonaxa da nqouagaxauen. 47Qaq co'ollaq mashi pe, nachi aso barco mashi vichiguingui na laiñi aso lapel, qaq so Jesús ñaq huetalec so lqaxaÿaxa, nda'a't. 48Nachi somayi ila'aguelo soua lapaxaguenataqa da nqalligotta'pe da delloctaxaata'pe, cha'ayi soomayi ÿataqta datatreguet so l'at. Qaq co'ollaq mashi chi'iguejda, nachi so Jesús jec da nqo'oneueeguelo soomayi, quetalec na 'etaxat. Nachi somayi nshitaique co'ollaxa da napactalguete. 49Qaq co'ollaq qaila'ague da quetalec na 'etaxat, nachi qoÿiitega da nqui'i. Nachi soomayi i'alaqtaguilo, 50cha'ayi 'enauaque soomayi da iloda'a nachi ÿataqta ñi'i'. Qalaxayi so Jesús 'enapegalo soomayi, 'eeta':
–¡Qan'añaxachi qome, nachaÿim, sa ishit da qayi'ii!
51Nachi somayi huenojñigui aso barco mayi qanayiitangui, nachi so l'at vi'iiguet, nachi soomayi ÿataqta huo'o da l'elqa', qataq da l'aalqa'. 52Cha'ayi soomayi sa ishi't co'ollaxa da ÿaÿate'n ca naigui aso pan, cha'ayi naua lquiyaqtel soomayi saxanaxa da nauaayiñi.
So Jesús nataden na dalolaxaicpi yi Genesaret
(Mateo 14.34-36)
53Nachi ñi'iguelaxatra, i'axasoxoodelec aso lapel da nqo'ooda yi 'alhua Genesaret. Huaña, nachi qaicoñidai' aso barco, qoÿano'ot so loigue. 54Qaq co'ollaq chochi huenotreeguesop aso barco, nachi na shiÿaxauapi ÿauatton so Jesús. 55Nachi somayipi jec da quiguilo naua 'ale'u, nachi qandouo na dalolaxaicpi huetalec qanqoÿin na lacanecpi da qanda'a ca qaÿaÿaten da hueta'a so Jesús. 56Nachi cam tau'a somayi nam pueblopiolec, huo'otaq nam pueblo lta'adaicpi, huo'otaq naua n'onaxayi, nachi qaÿachauga na nqa'aicpi na sa no'onpi. Nachi qanachoxonnot so Jesús da ishit da ÿashiita da chochi qaipoteu'a na lapo' laÿi. Nachi 'enauac nam ipoteu'a somayi, nachi no'oita.
Currently Selected:
Marcos 6: TBSNT
Highlight
Share
ਕਾਪੀ।
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.