Marcos 2
2
So Jesús nataden so sa da'añiigue
(Mateo 9.1-8; Lucas 5.17-26)
1Qaq co'ollaq mashi qaÿoqteguelo so na'axa'te, nachi so Jesús qaltaq ÿi'iguelaxa yi pueblo Capernaum, qaq co'ollaq chochi qaÿaÿaten da hueta'a ca lma'. 2Nachi saqaÿaloq da anaga't na shiÿaxauapi, ivitta'a da qaica ca ndaqa' ca lasom. Qaq somayi i'axattac da l'aqtac ñi Dios. 3Nachi qandou'a ca hueta'a so Jesús so shiÿaxaua mayi sa da'añiigue. Somayi nacootaguilo soua lÿa't cuatro. 4Qalaxayi soomayi sa ishit da ÿañoxo't da ivildeu'a ca hueta'a so Jesús, souaxat da qalota na shiÿaxauapi. Nachi soomayi nqa't so laÿi so lapo' so noÿic. Nachi se'eso nauatac qaÿasaqchiguingui so sa no'on mayi huetalec so lacanec. 5Nachi so Jesús co'ollaq ila'a da lpi'iÿaxa'c soomayi, nachi 'enapego' so sa no'on, 'eeta':
–'Am ÿalcolec, nam 'adasouaxashitpi nagui 'enauac qaÿapalaxat.
6Qalaxayi nam dapaxaguenataxaatapeguec na nqataxacpi mayi ÿalectauo, nso'ootañi deuennataxaatac, 'eeta': 7“¿Tá'ainco' dam da' shiÿaxaua, yi 'eetec de'eda da l'aqtac? Ishiueetac ñi Dios, yi qaica ca ishit da ÿapalaxat ca nasouaxashit, chaqñita ñi mayi.” 8Qalaxayi so Jesús, somayi maichi ÿaÿateetac da lhuennataxac namayipi. Nachi 'enapego', 'eeta':
–¿Tá'ainco' yi qadhuennataqai de'eda? 9¿Chaq négue't ca ÿoqta saq alaq da qaidolec? ¿Peta'a da qoÿiita': “Na 'adasouaxashitpi 'enauac qaÿapalaxat,” huo'otaq da qoÿiita': “Qoñishiguem, 'aunana't na 'adacanec, nachi qojec?” 10Qalaxayi nagui qami' nachaxanalo na shiÿaxaua llalec da namayi huo'o naq 'enec ana 'alhua da ÿapalaxat na nasouaxashitpi.
Nachi 'enapego' so sa da'añiigue, 'eeta':
11–Nagui 'am shinapega, qoñishiguem, 'aunana't na 'adacanec, nachi 'anqo'ona ca 'adma'.
12Nachi so sa da'añiigue ñishiguem, nachi inana't so lacanec, ca'ai ca hueta'a, qaq 'enauac da qaÿauaachigui. Qaq ÿoqo'oyi 'enauac na shiÿaxauapi ÿataqta huo'o da l'aalaxa, nachi ÿi'oxodeetac ñi Dios, 'eeta':
–Ÿataqta sa ÿauana da sauanaqchigui ca 'eeta'am de'eda.
So Jesús iÿaxana so Leví
(Mateo 9.9-13; Lucas 5.27-32)
13Qaq co'ollaq ime de'eda, nachi so Jesús qaltaq taxaama so loigue aso lapel. Nachi 'enauac na shiÿaxauapi naÿa somayi, nachi ÿapaxagueetac. 14Qaq co'ollaq jec, nachi ila'a so Leví som llalec so Alfeo. Somayi nso'ootañi, hueta'a aca lshiitenaxanaxaqui na shiÿaxauapi da ishiiten ca nta'a. Qaq so Jesús nachi iÿaxana somayi, 'eeta':
–Aÿim 'auca'ategue qome.
Nachi so Leví ñishiguem, nachi ca'ategue.
15Qaq so Jesús co'ollaq deque'etac, hueta'a ca lma' so Leví. Nachi qalota nam ÿacootapeeguet ana nshiitenaqte ca nta'a, qataq na 'itaxaloxoicpi da nso'ootañi da lqui'axaua so Jesús qataq soua lapaxaguenataqa, cha'ayi ÿataqta qalota nam quetague' somayi. 16Qalaxayi nam dapaxaguenataxaatapeguec na nqataxacpi qataq na fariseopi co'ollaq ila'a somayi da lqui'axaua 'enauac namayipi, nachi 'eetegalo soua lapaxaguenataqa, 'eeta':
–¿Tá'ainco' ñi qadataxala'ai yi deque'etac qataq nÿomtac, ÿalectaigui nam ÿacootapeeguet ana nshiitenaqte ca nta'a qataq nam 'itaxaloxoicpi?
17Nachi so Jesús co'ollaq hua'axaÿa de'eda, nachi 'enapeco':
–Sa ishit da iuen ca natannaxanaq nam saqca ca da qataq nam no'oitapi, chaqnata nam sa no'onpi. Cha'ayi aÿim sa ishit da ñanaÿa da seÿaxana ca no'on da lataxac, chaqcata ca 'itaxaloxoic.
Qainattac so Jesús ca llic da nqouaqchit ca shiÿaxaua
(Mateo 9.14-17; Lucas 5.33-39)
18Qaq huo'o so na'a'q da nqouaqchit nam quetague' so Juan qataq nam quetague' na fariseopi. Nachi huo'o na anaÿa so Jesús, nachi inattac, 'eeta':
–¿Tá'ainco' yi nqouaqchittac nam quetague'pi so Juan qataq nam quetague' na fariseopi, qalqo' na 'adapaxaguenatacpi yi sa ishit da nqouaqchit?
19Nachi so Jesús 'enapeco':
–¿Peta'a ishito' da nqouaqchit nam ÿalectau'a ca nadonaxac, da huo'otaq ca auonaxaua ña ÿalecta'aguet camayipi? Cha'ayi da ña ÿalectauo ca auonaxaua, nachi camayipi sa ishit da nqouaqchit. 20Qalaxayi anata ca na'a'q da qaÿauec camayi. Huaña qome, nachi namayipi ishit da nqouaqchit.
21Qaica ca ishit da napaden ca nogoxot ltoxoic da dapannaxana ca dalaxaicolec. Cha'ayi da ÿi'iguena't ca dalaxaicolec laÿi, nachi ishit da icolaxata'ague ca ltoxoic. Huaña, nachi nquigaxateec ca ltoxo. 22Nataq'en qaica ca ishit da ÿachagui aca shiguiÿac l'oc ltoxoi ca dalaxaicolec lataxa. Cha'ayi ca dalaxaicolec lataxa ishit da icolaxata'ague acamayi, huaña, nachi daqat camayi, nataq'en aca l'oc. Qaq ÿoqo'oyi ca dalaxaicolec lataxa, camayi qaÿachagui aca dalaxaale l'oc.
Soua lapaxaguenataqa so Jesús napoctraña na ala na trigo so na'a'q mataxaqui
(Mateo 12.1-8; Lucas 6.1-5)
23Qaq huo'o so na'a'q mataxaqui, nachi so Jesús i'axasoxootelec so nanaxanqa', nachi soua lapaxaguenataqa soomayi napoctraña na ala na trigo. 24Nachi na fariseopi 'eetego' somayi, 'eeta':
–Ña 'aula'a, ¿tá'ainco' da 'eetec de'eda naua 'adapaxaguenataqa, qamaq sa ishit da qaishitapec yi na'a'q mataxaqui?
25Qalaxayi so Jesús 'enapego' somayipi, 'eeta':
–¿Sa ÿauango' peta'a da qami' qautaxaÿaxañi da 'eetec so David, co'ollaq huo'o so na'a'q da somayi qataq soua lÿa't huo'o da lhuenaxanqa' qataq ÿoqoua't? 26Nachi so David pa'aigui so lauo' ñi Dios co'ollaq ña lataxala' so Abiatar nam ntaxaÿaxanaxanecpi da qaitaxaÿapegue' ñi Dios. Nachi chic aso pan mayi qoÿanot ñi Dios, asom nda'a't nam ntaxaÿaxanaxanecpi mayi ishit da chic. Nachi somayi nataq'en ÿanoiguilo soua lÿata'pe.
27So Jesús nataq'en 'enapeco':
–So na'a'q mataxaqui qai'ot co'ollaxa da qaÿauotaique da nmataxaqui ca shiÿaxaua, qaq sa ishit co'ollaxa da qai'ot ca shiÿaxaua, souaxat yi na'a'q mataxaqui. 28Qaq ÿoqo'oyi ne'ena shiÿaxaua llalec, namayi nataq'en huo'o naq 'enec da huo'o ca damaxasoxoolec da qai'ot yi na'a'q mataxaqui.
Currently Selected:
Marcos 2: TBSNT
Highlight
Share
ਕਾਪੀ।
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.