Marcos 1
1
So Juan mayi nachilaxanataxanaq da'aqtaxaatapeguelec yi tojlec 'alhua
(Mateo 3.1-12; Lucas 3.1-9, 15-17; Juan 1.19-28)
1'Eda da 'eetec co'ollaq chita'ague da no'on qad'axaÿaxac mayi i'axat da llic so llalec ñi Dios, l'enaxat Jesucristo.
2So l'aqtaxanaxanec ñi Dios, l'enaxat Isaías, ÿiyiñi co'ollaxa da 'eeta':
Aÿim Dios samaq qome ca i'aqtaxanaxanec da sa'auaxangue da 'ata'ague,
da yaqto' ÿaqataxanai' ca 'anqa'aic.
3Qaq huo'o so ÿale chimaqtapeguelec so tojlec 'alhua, da lÿaxanaxac 'eeta':
“Qauqataxañiÿai' qome ca nqa'aic ñi qadataxala',
ÿataqta qan'onaxachiitegue.”
4Qaq nachida da 'eetec so Juan co'ollaq nachilaxaatac na shiÿaxauapi, huaña so tojlec 'alhua. Nachi 'eetega namayipi da ÿaxaadeec naua n'onataxaco, nachi qanachilaxan, yaqto' qaÿapalaxa't naua lasouaxashi'te. 5Qaq anac da n'axaÿaxana somayi 'enauac nam chigaqa'a yi 'alhua Judea qataq yi la ciudad Jerusalén. Nachi namayipi i'axa't naua lasouaxashi'te, nachi so Juan nachilaxan, huaña so tala Jordán.
6Qaq naua alogo so Juan n'oxonqa, chigaqaiguilo na laue ana camello, qataq so nsaataxaqui l'oc. Qaq somayi chictac ana shiiquioxoi qataq na dapic lli'i. 7Nachi somayi da'aqtaxaatapeguem na shiÿaxauapi, 'eeta':
–Huo'o na aÿim nca'attalec, qaq namayi ÿacteec da l'añaxac, sa ishit da shiita'am. Qataq ÿataqta sa yalou'a da ñoqollimot da ñaqa't naua lapela'te lque'te. 8Aÿim qami' ñachilaxanguilo na 'etaxat, qaq camayi, qalaxayi qami' nachilaxanguilo ca Espíritu Santo.
Da nachilaxanataguec so Jesús
(Mateo 3.13-17; Lucas 3.21-22)
9Qaq se'esoua na'axa'te, nachi so Jesús nvi', chigoqta'a yi pueblo, l'enaxat Nazaret, yim huaigui yi 'alhua Galilea. Nachi so Juan nachilaxan somayi, huangui so tala Jordán. 10Qaq co'ollaq chochi nnoxooshiguem so 'etaxat, nachi so Jesús ila'a na piguem da qanauatoigui, qataq so Espíritu Santo da naÿaña somayi, 'eeta'am na qoto'. 11Nachi qai'axaÿa so n'aqtac chimqot na piguem, 'eeta':
–'Am mayi nachi'am ÿalec, 'am ÿauotaxat, aÿim ÿataqta 'am ñitootapeguec.
Da ñi'iguenataguec so Jesús
(Mateo 4.1-11; Lucas 4.1-13)
12Nachi so Espíritu Santo saqaÿaloq da taÿa naq'en somayi so tojlec 'alhua. 13Nachi so Jesús hueta'a somayi cuarenta na'axa'te, huetangui na ishiyipi. Nachi anac so Satanás da ÿi'iguen somayi, qataq anac na lamaxashicpi ñi Dios da itauaatac somayi.
So Jesús hueta'a yi Galilea co'ollaq chita'ague da do'onataxan
(Mateo 4.12-17; Lucas 4.14-15)
14Qaq co'ollaq mashi qoÿanaigui aso ncoñitaxanaxaqui so Juan, nachi so Jesús taÿa yi Galilea. Huaña, nachi i'axattac dam no'on qad'axaÿaxac mayi i'axat da l'onataxanaxac ñi Dios da ilo'ogue 'enauacna. 15'Eeta':
–Mashi yaqta'a ivita yi laloqo' da nvi' da l'onataxanaxac ñi Dios da ilo'ogue 'enauacna. Qaq qaualachi' qome naua qan'onataxacolli', qataq qau'amaqchiñi da n'aqtaxanaxac mayi chigaqaigui da nca'alaxa.
So Jesús iÿaxanalo soua cuatro ÿi'acoxoiqa
(Mateo 4.18-22; Lucas 5.1-11)
16So Jesús queto'ot na loigue aso lapel mayi huaña yi Galilea. Huaña, nachi ila'a so Simón qataq so lqaÿa Andrés. Soomayi ÿasaqtrapiguiñi so lalegue'c, cha'ayi ÿi'acoxoiqa. 17Nachi so Jesús 'enapegalo', 'eeta':
–Aÿim qauca'achiigue, nagui qami' sanaguilo da qanmichiÿaique na shiÿaxauapi, qoñiita'am ca ÿi'acoxoic.
18Nachi soomayi n'onaxatchiguilo so lalegue'c, nachi ca'atregue somayi.
19Nachi qaltaq jec so Jesús. Qaÿata'ague, nachi ila'a so Santiago qataq so lqaÿa Juan, Zebedeo llalqa. Soomayi netrangui aso nnotaxaqui', napadeeta'pe so lalegue'c. 20Nachi nÿaxaañalo, nachi soomayi n'onaxatchiyiñi so lta'a' Zebedeo, n'ona'aguet aso nnotaxaqui qataq so lamaxashicpi. Nachi soomayi ca'atregue so Jesús.
So shiÿaxaua mayi huo'o so l'ec leguemaxaic
(Lucas 4.31-37)
21Qaq co'ollaq ivitra yi pueblo Capernaum, nachi so na'a'q mataxaqui so Jesús tau'a aso laponaxaqui na judiopi, nachi dapaxaguenataxaatac. 22Nachi na shiÿaxauapi ÿataqta i'aalac na l'aqtacpi, cha'ayi somayi naua lapaxaguenataxanaxaco 'eeta'am cam damaxasoxonapec, qaq sa ishit da 'eeta'am nam dapaxaguenataxaatapeguec na nqataxacpi. 23Nachi huaigui asa'aso laponaxaqui nam lma' yi'iyi pueblo som shiÿaxaua mayi huo'o so l'ec leguemaxaic. Somayi i'alaq, 'eeta':
24–¿Tá'ainco' yi qomi' 'atapegueu'alo, 'am Jesús, Nazaret l'ec? ¿Qomi' 'auanaÿalo peta'a da qomi' 'anlaxajyiñi? Aÿim 'am sauatton, qataq saÿaten da nachi'am lalamaxat ñi Dios.
25Nachi so Jesús nlaxa so n'ec leguemaxaic, 'eeta':
–¡'Au'enaxanai', qoca'ai ne'ena shiÿaxaua!
26Nachi se'eso n'ec leguemaxaic decopchi naq'en se'eso shiÿaxaua, nachi n'axannec da i'alaq, nachi ca'ai somayi. 27Nachi 'enauac na shiÿaxauapi ñi'i. Nachi maichi nnattega't, 'eeta':
–¿Négue't de'eda? ¿Peta'a dalaxaic napaxaguenataxanaxac? ¡Yi dam da' shiÿaxaua ÿataqta huo'o naq 'enec da damaxasoxon, ivida'a nam n'ecpi ishit da ÿalaxaguet!
28Nachi saqaÿaloq da qaÿaÿajna'a't so Jesús 'enauac yim 'alhua Galilea.
So Jesús nataden aso lachodo so Pedro
(Mateo 8.14-15; Lucas 4.38-39)
29Qaq co'ollaq qanayica'ai aso naponaxaqui, nachi so Jesús nnaicapegueto soua Santiago qataq so Juan da nqo'ooda ca lma' so Simón qataq so Andrés. 30Qaq aso lachodo so Simón nnaatai', cha'ayi asomayi huo'o na l'edaxa. Nachi qai'aqtaxanem so Jesús da asomayi sa no'on. 31Nachi so Jesús nqo'oneu'a asomayi, nachi ÿacona na lhuaq da ÿaashiguem. Huaña, nachi asomayi qaica so l'edaxa, nachi huetapegueto soomayi.
So Jesús qalota na nataden sa no'onpi
(Mateo 8.16-17; Lucas 4.40-41)
32Qaq co'ollaq mashi inoxooñi aso nala', mashi napaltapiguiñi, nachi qandou'a so Jesús 'enauac na sa no'onpi qataq nam huo'o na l'ec leguemaxaic. 33Nachi 'enauac nam lma' se'eso pueblo, namayipi laponeu'a ca lasom. 34Nachi so Jesús ÿataqta qalota na nataden nam sa no'onpi ÿotta'a't na lalolaxashitpi, nataq'en qalota na i'odauec na l'ec leguemaxaic, qalaxayi sa ishit da huo'o ca ÿashiitem da da'aqtaxan na n'ecpi, cha'ayi namayipi ÿataqta ÿauattoota somayi.
So Jesús da'aqtaxaatapeguelec yi Galilea
(Lucas 4.42-44)
35Qaq co'ollaq ña qaÿata'aguet so na'a'q, nachi so Jesús ñishiguem, nachi tauga ca pa'auec so la ciudad da nda'a't da nqouagaxauen. 36Nachi so Simón qataq soua lÿa't je'c da nmittraique somayi. 37Qaq co'ollaq ÿanatra, nachi da'aqtaxaatrapeguem somayi, 'eetra':
–'Enauac 'am qanmittaique.
38Qalaxayi somayi 'enapeco':
–Ñoqo'onaxalo qome naua lÿa't 'ale'u mayi sa qaÿapiguii, da yaqto' nataq'en sa'axatema da n'aqtac, cha'ayi nachida da huo'omshi ñanac.
39Nachi so Jesús coleetapeguelec yi 'alhua Galilea, dapaxaguenataxaatapoigui ana laponaxaqui na judiopi, qataq i'ottapeguec na l'ec leguemaxaicpi na shiÿaxauapi.
So Jesús nataden so nchiga na l'oc
(Mateo 8.1-4; Lucas 5.12-16)
40Qaq huo'o so shiÿaxaua nchiga na l'oc, somayi nqochineu'a so Jesús, nachi i'adoto naua l-llicte. Nachi 'enapego', 'eeta':
–Da 'aushit, qaq no'on da aÿim 'anataden.
41Nachi so Jesús ÿataqta huo'o da lchoxonnataxanaxa somayi. Nachi ipoteu'a, qaq 'enapego', 'eeta':
–Aja', seshit. Nagui 'am no'oita.
42Qaq co'ollaq chochi nasaxauec da l'aqtac, nachi jec so lalolaxa se'eso shiÿaxaua, nachi no'oita. 43Nachi so Jesús ÿamaq somayi, qalaxayi ÿataqta huaqattega, 'eeta':
44–Sa ishit qome da huo'o ca 'au'aqtaxanem. Chaqdato' da qojec, nachi 'anachaxaneu'a ñim ltaxaÿaxanaxanec na shiÿaxauapi da qaitaxaÿapegue' ñi Dios, qataq 'ai'aneuo qome ca 'adachitaqtaxanaxat mayi 'enapega co'ollaxa so Moisés da ÿan cam mashi no'oita, yaqto' 'enauac da qaÿaÿaten da mashi 'am no'oita.
45Qalaxayi se'eso shiÿaxaua co'ollaq jec, nachi quetot da da'aqtaxanem 'enauac na shiÿaxauapi dam huaigui co'ollaxa. Qaq ÿoqo'oyi so Jesús nachi sa ishit da nachaxaneu'a na pueblopi. Chaqdata da huetaugalo naua tojleguete 'ale'u. Qalaxayi nachi 'en'am chigoqteguelo na anac da anaÿa somayi.
Currently Selected:
Marcos 1: TBSNT
Highlight
Share
ਕਾਪੀ।
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.