Genesis 2
2
Iqmoeq 2
1Miqyail neq, nqtavq khi mail miltsaq bhai khal jaol khal jiav nail iqsanl bhai teivq gaq-a nail ngaol.
2Kovq n n-gaol Miqyail neq, aivq-i mail teivq-a nail iqsanl mail teivq gaq khi, sivq n-gaol bhai gaq naq naq-a nail ngaol.
3Sivq n n-gaol neq, teivq thaq nail iqsanl gaq gil lai khi gaq naq naq nail aqn pevq nail ngel-i mail, aq-u n-gaol bhai Miqyail geeqlaoq bivq khi meeq nail haol nail aqn bhi pevq lal-a nail ngaol.
4Niil neq, Heeqphaq Miqyail-i mail nqtavq dai khi, miltsaq bhai teivq-a nail ganl juq pevq nail ngaol.
Eiqdeiq gaoqkhail lavqkhoel khe yaqyov-aq khi mail yaqmai-aq
Miqyail nqtavq khi mail miltsaq bhai teivq-u phao,
5miltsaq kovtavq bhai maoq-aol maq bhi aol lee haq nail ngel-i mail, aqbhaol juq maq doevq dol lavq, aqjiiv juq gail maq jiiv dol lavq haq-al. Miltsaq bhai tseq bhiq duq bhiq nail tsaol-aq gail, maq jaol-ai haq-al.
6Thail hai ngaol-aoq, miltsaq kov-uvq nee mail ulcuvq eel haq dov lal khi, miltsaq bhai aqjail jail lal-a nail ngaol.
7A bhai nee ngal-aq, Heeqphaq Miqyail neq, miltsaq-i mail tsaol-aq teivq khi aivq nail nalbhaoq bhai aqdoevq bhi doevq nail aqhaq jiiv bhoel bhiq-a nail ngel-i mail, tsaol-aq al gaq aqdoevq doevq lal-a nail ngaol.
8A bhai nee ngal-aq, Heeqphaq Miqyail neq, nlma dov khoeq phao khe jiav nail, Eiqdeiq dai khul nail jaolduq bhai gaoqkhail teevq khail lav sav khi, tsaol-aq al gaq bhai bhi jaol-a nail ngaol.
9Gaoqkhail al nail lavqkhoel bhai neq, al jaiq-ail hel daiq meeq khi jaq heeq phaq-ail pevq nail aqheeq nail aqbhaol juq gail, Heeqphaq Miqyail-i mail bhi doevq-a nail ngaol. Gaoqkhail nail gaoltsi bhai neq, aqdoevq bhi doevq lal nail aqbhaol gail, bhaol nail ngaol. Meeq nail doil nail tsel pav nia nail aqbhaol gail bhaol nail ngaol.
10Laoljaol teevq jaol neq, Eiqdeiq miltsaq nee mail gaoqkhail lavqkhoel bhai il dol-aivq khi gaoqkhail bhai ulcuvq bivq nail ngaol. Al ovqtavq, gaoqkhail lavqniil phao gail il dol-aivq khi, liq pav il pal-aivq thaq nail ngaol.
11Iqmoeq ilmoeq khe laoljaol neq Philsoq laoljaol dai khul khi heel aol nail Haqbhillav nail miltsaq bhai il jaol-aivq thaq nail ngaol.
12Miltsaq al bhai aol nail heel neq, mal dee dee nail ngaol. Bheiqdeiqlal dai khul nail aqbhaol nee dov lee thaq nail huqbhiq nil nail khaqjiq dai khi, sainl aqnav juq gail dov nail ngaol.
13Laoljaol nvq jaol teevq jaol neq, Gilhoq dai khul khi Khulsav nail miltsaq doi dai, il jaol-aivq thaq nail ngaol.
14Laoljaol hail jaol teevq jaol neq, Tilgaqlil nail laoljaol dai, khul khi Aqsullav nail miltsaq nlma dov khoeq phao nee mail, il nail ngaol. Laoljaol liq jaol teevq jaol neq, Pheqlaqtaq nail laoljaol dai, khul nail ngaol.
15A bhai nee ngal-aq, Heeqphaq Miqyail neq, gaoqkhail bhai bhi kha jaq bhi kha daol khi, bhi hel daiq phail nail galduq, tsaol-aq al gaq bhai, Eiqdeiq gaoqkhail lavqkhoel-ai bhi jaol-a nail ngaol.
16Aq-u phao, Heeqphaq Miqyail tsaol-aq al gaq bhai niail hai ge bhiq-a nail ngaol: "Gaoqkhail lavqkhoel khe khal doevq nail aqbhaol nail aqheeq yaoq phaq yaoq-ao nee, jaq nail ya nail ngaol.
17Thail hai ngaol-aoq, meeq nail doil nail tsel pav nia nail aqbhaol al bhaol khe aqheeq neq, maq ya jaq-ail. Jaq-u n-gaol neq, ya sil naol" dai, ge bhiq-a nail ngaol.
18Heeqphaq Miqyail gaoq ge nail: "Tsaol-aq neq, teevq gaq taivq-ail jaol nail neq, maq meeq-ail, aivq bhai bhi tsao jao-ai nail galduq, aivq nee tsaq lai nail aqtsaoq teevq gaq bhai ngal teivq naol" dai, ge nail ngaol.
19A bhai nee ngal-aq, Heeqphaq Miqyail neq, miltsaq oil khi jaiqyaq juq khi mail keivq-avq juq bhai teivq gaq-al nee ngal neq, iqsanl bhai, aqmil bhi mil nail galduq, tsaol-aq jaol nail bha hel laivq gil-a nail ngaol. Tsaol-aq-i mail aqmil mil bhiq-a nail khe-ai, jaiqyaq juq teevq phaq nee teevq phaq, aqmil jiav lal-a nail ngaol.
20Tsaol-aq neq, jaiqyaq juq dai khi keivq-avq juq iqsanl mail bhai, aqmil mil bhiq khi mail ngaol-aoq neq, al juq nail lavqkhoel khe, tsaol-aq bhai tsao jao-ai nail aqtsaoq maq jaol-ail.
21Al heel ngel-i mail, Heeqphaq Miqyail neq, tsaol-aq bhi iq thaiq kov dee deel laiq-a nail ngaol. Aivq iq thaiq kol laiq-u phao, Heeqphaq Miqyail neq, aivq nail aqbhail haqeeq teevq khaoq oil dov khi, haqjoil-i mail lav pheeq bhiq thaq nail ngaol.
22A bhai nee ngal-aq, aqbhail haqeeq al khaoq-i mail yaqmai-aq teevq gaq bhai teivq khi, tsaol-aq jaol nail bha hel laiq bhiq thaq nail ngaol.
23Aq-u phao, tsaol-aq al gaq niail hai ge nail ngaol: "Niil gaq neq, ngaq nail haqeeq nail lavqkhoel khe haqeeq, ngaq nail haqjoil lavqkhoel khe haqjoil, pevq nail ngaol. Aivq neq, tsaol-aq yaqyov-aq nail lavqkhoel nee pevq lal-a nail ngel-i mail aivq bhai 'Tsaol-aq nail yaqmai-aq' dai, ya khul nail ngaol" dai, ge bhiq-a nail ngaol.
24Al heel ngel-i mail, yaqyov-aq neq, aqbhu aqma bhai khaonq ha-ail ceevq khi, khaqma bhai hevq-a nail ngel-i mail, aqyu nvq gaq neq, teevq heeq teevq maol taivq-ail pevq lal nail ngaol.
25Aqyu nvq gaq nvq gaq ail, aqgaq aqdoi maq doi khi mail ngaol-aoq, haq sil nail dai, maq jiav-ail.
Currently Selected:
Genesis 2: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.