Popular Bible Verses from Mateo 24

Share

Qataq ÿataqta qalota qome na sa ÿaÿamaxañisat, qaq ÿoqo'oyi huo'o qome na ÿaxaañi da ÿauotec ca lÿa. Qalaxayi ca qaica ca ÿoqocha'a, chochi ividaxatta'a ca loga't da nachaalataxac, qaq nachica ca qanca'alaxateec.

Qaq de'eda no'on n'axaÿaxac mayi i'axat da n'aqtaguec da l'onataxanaxac ñi Dios mayi ilo'ogue 'enauacna, damayi qai'axateec qome 'enauac ana 'alhua, da yaqto' 'enauac nam ÿotta'a't shiÿaxauapi ÿaÿaten damayi. Huaña, nachi ivita ca loga'tna.

Qami' qau'aqaitapeguelec qome da chimaqchiguiñalo na alaataxac. Qalaxayi sa ishit qome da qayi'ii, cha'ayi damayi nachi qoÿina'ac. Qalaxayi saxanaxa qome da ivita ca laloqo'na.

Cha'ayi ca qompi maichi delogui' ca sa lauo' l'ecpi, qataq ca nta'a maichi delogui' ca lÿa nta'a. Qataq huo'o ca nqouaxa qataq naua nalolaxaco, qataq qalota na 'alhuapi na huo'o na nacholaxanaxa. Qaq 'enauac ne'ena nachina na chigoqchiguiña na que'ejnaxacpi.

Na piguem qataq ana 'alhua imeuo qome, qalaxayi da i'aqtac sa ishit da imeuo.

Cha'ayi ÿataqta qalota qome na chochi n'enaqchingui da i'enaxat, 'eeta': “Aÿim mayi nachaÿim qadta'ai qadca'alaxaquii,” nachi ÿataqta qalota qome na ÿatenachit.

Huaña, nachi qami' qoÿaadeuo, da yaqto' qami' qaiuaxaata'pe, qataq da qami' qaÿalauat. Qataq 'enauac na shiÿaxauapi ÿataqta qami' nquiÿalo, souaxat da aÿim qoquiitague'. Nachi que'eca na'a'q ÿataqta qalota qome na ÿaxaneec da lpi'iÿaxac, nachi nquiÿa ca lÿa qataq da imenguet ca sa lataxac. Qataq qalota qome na tenataxanaxaicpi na nachaxan, 'eetega da l'aqtaxanaxanecpi ñi Dios, nachi ÿataqta qalota qome na ÿatenachit shiÿaxauapi.

Nachi so Jesús 'enapeco': –Maxatchaxa qome, sa ishit da huo'o ca qami' ÿatenachi't.

Qaq ÿoqo'oyi qami' ÿataqta qanaÿamaxachiitai' qome. Cha'ayi qom mashi sa ishit da taÿapigui qadvilli de'eda, nachi nvi' na shiÿaxaua llalec.

Qaq qami' ÿataqta qanloiteec qome, cha'ayi sa qauaÿajñi ca laloqo' da ñi'iguelaq na qadataxala'ai.

Qalaxayi que'eca na'a'q qataq ca laloqo' de'eda, qalaq qaica ca ishit da ÿaÿaten, ivida'a na namaxashic piguem l'ecpi sa ÿaÿaten qataq na llalec ñi Dios. Chaqñita ñi ita'a mayi ÿaÿaten.

Cha'ayi ÿataqta qalota qome na anac da 'eetega nta'a nca'alaxaqui, huo'otaq 'eetega da l'aqtaxanaxanecpi ñi Dios. Nachi namayipi i'ot qome na lta'adaic n'anecpi qataq nam sa qaÿauanapega, da yaqto' datenataxan. Qaq sa iuena'a da ishit nataq'en qome da ÿañoxot da ÿatenachit nam lca'aguishicpi ñi Dios.

'Eeta'am da 'eetec co'ollaxa soua na'axa'te mayi huetoiguilo so Noé, qaq nachi 'eetec nataq'en qom ivita da ñi'iguelaq na shiÿaxaua llalec. Se'esoua na'axa'te co'ollaq saxanaxa da npaxaashiguem ana 'alhua, qalaq na shiÿaxauapi i'ottac na lqui'axac, nÿomtac, qataq huadootega't, qataq da ÿadonaxanaxan na llalpi, chochi ivitta'a so na'a'q da so Noé huenoxonoigui aso nnotaxaqui. Qalaxayi sa ishit co'ollaxa da anoma de'eda somayipi, chochi ivitta'a co'ollaq anac so auot, nachi huaÿoxon naq'en 'enauac somayipi. Qaq 'eda da 'eetec nataq'en qom ivita da ñi'iguelaq na shiÿaxaua llalec.