Popular Bible Verses from Lucas 3

Share

Qaq co'ollaq saxanaxa da qaicoñi' so Juan, nachi somayi nachilaxaatac 'enauac na shiÿaxauapi, qaq nataq'en so Jesús anac da qanachilaxan. Qaq somayi co'ollaq ña nqouagaxaueetac, nachi na piguem 'ico' da qaÿauatoigui. Nachi so Espíritu Santo anaÿaña somayi, 'eeta'am na qoto' ÿataqta yi'oqta. Ime, nachi chimqot na piguem so n'aqtac, 'eeta': –'Am mayi nachi'am ÿalamaxat ÿalec, 'am ÿauotaxat, aÿim ÿataqta 'am ñitootapeguec.

Qalaxayi so Juan 'enapega 'enauac so shiÿaxauapi, 'eeta': –Aÿim 'eesa da qami' ñachilaxanguilo nagui na 'etaxat, qalaxayi huo'o na aÿim nca'attalec, namayi qami' nachilaxanguilo qome ca Espíritu Santo qataq ca nodec. Qaq namayi ÿataqta ÿacteec da l'añaxac, qaq sa ishit da shin'am, qataq aÿim sa ishit da yalou'a da ñaqat naua lapela'te lque'te.

Ÿataqta qanachaxañiita qome, yaqto' ishit da qaila'a da ÿoqta 'eesa da mashi qaualachi' naua qan'onataxacolli', qaq sa ishit da tatapigui qadvilli da qoñiita': “Qomi', maichi qomi' llalqa so Abraham,” cha'ayi aÿim qami' shinapegalo da ñi Dios ishit da ÿachigoxotaigui ne'ena coma' ca llalaqpi so Abraham.

Aca qachipe mashi sogote da imetai' da iquesoxoñot ana qo'ipaqpi, qaq 'enauac ana qo'ipaqpi mayi sa ishit da no'on ana ala, anamayi qaiquesoq, ime, qaq qaÿasaxangui ca nodec.

Qaq damayi ipacchigui da l'aqtac so l'aqtaxanaxanec ñi Dios co'ollaq ÿiyiñi da l'aqtac, 'eeta': Huo'o qome ca shiÿaxaua chimaqtapeguelec ca tojlec 'alhua, 'eeta' da lÿaxanaxac: “Ña qauqataxañiÿai' ca nqa'aic ñi qadataxala', ÿataqta qauauachiitegue ca llic. 'Enauac na ca'amgue ÿataqta qanlaxatchigui, qataq 'enauac ana qasoxonaxa qataq na comadelecpi ÿataqta qanaloqchiichiguiñi, na nqa'aicpi mayi namaqtapigui qalaq ÿashicteec qanqoÿin, qataq na nqa'aicpi mayi sa nala'a't na 'alhua qalaq qanaloqchiiñi, yaqto' 'enauac na shiÿaxauapi ila'a da nca'alaxa mayi ÿan ñi Dios.”