If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

येशू अपन चेलनसे कही, “पाप करनके लगान बारो परीक्षा त नेहात्तओ आतहए। पर धिक्कार, बो आदमीके, जौन आदमीके कारणसे पाप करन लगान बारो परीक्षा आत हए! जौन आदमी जे छोटो मैसे एकके पाप करन लगात हए बोके घेँटमे चकियाको पट्टा बाँधके बोके समुन्दरमे फेकदेनो बोके ताहीं ठिक हुइहए। होसियार रहाओ, कि तुम का करत हओ; अगर तुमर भइया अपराध करहए तओ बोके डाँटओ, और अगर बो पक्षताप करैगो कहेसे तुम बोके क्षमा दियओ। अगर तुमर भइया दिनमे सात चोटी तुमर बिरुद्धमे अपराध करी, और सातऔ चोटी तुमर ठिन घुमके आएके ‘मए अपन मन बदलके पाप करन छोडनडटो हओं,’ करके कएहए, तुम बोके क्षमा करीयओ।”

तओ चुनेभए चेला प्रभुसे कहीं, “हमर बिश्वासके और बढाए देओ।”
प्रभु येशू कही, “अगर तुमरमे लाहाटाको दानके बराबर फिर बिश्वास हुइतो कहेसे तुम जा तुतको रुखासे ‘तए जरसे उखणके समुन्दरमे जा,’ कहिके कहिते कहेसे बो तुमर बात मान लेतो।”

“अगर तुमर नोकर खेत जोतके या भेंणा चुगाएके अएहए कहेसे, का तुम बो नोकरसे, ‘जल्दी-जल्दी आ और खानु खानके बैठ’ कहाबैगे? बल्कि तुम कहाबैगे, कि ‘मिर ताहीं खानु तयार कर, और जब तक मए नाए खाएडारओं, तबतक मिर सेवा करनके ताहीं तयार हो; तओ फिर तए खैए-पिए’ तुम अपने नोकरके बोको करोभओ कामके ताहीं धन्यबाद नाए देबैगे जो तुम बोसे करनके ताहीं कहे रहओ। उइसी करके, जब तुम बो सब कुछ करलए हओ जो तुमके करनके ताहीं कहोगओ रहए, तओ जा कहान चाहो, ‘हम त नालायक नोकर हएं; काहेकी जो हमएं करनके रहए बहे करे।’”

जब येशू और बाके चेला यरूशलेम सहर जान बारो डगरमे जात रहएं, बे सामरिया और गालील परदेशके क्षेत्र हुइके जात रहएं। और एक गाउँमे घुसत पेती कोढ रोग लागेभए दश आदमीनसे बाको भेँट भओ। और बे दुर ठाणके जोडसे कहीं, “हे येशू, हे महान गुरु, हमर उपर दया कर।”
येशू बिनके देखके कही, “जाओ; अपनएके यहूदी पुजारी ठिन दिखाओ।” और जातएजात कोढ रोग लागेभए आदमी अच्छे हुइगए।
तओ बिन मैसे एक जा देखके, कि मए अच्छो हुइगओ हओं, तओ बो बडो जोणसे परमेश्वरको महिमा करत बो येशूके ठिन घुमके आओ; और येशूके धन्यबाद देत बाको पाउँमे घुपटा पणिगओ। और बो एक सामरी सहरमे रहान बारो आदमी रहए।
और येशू कही, “का दशौं आदमी अच्छे नाएभए, तओ फिर नौ जनै कहाँ हएं? का जा सामरी आदमी बाहेक कोइ औ नाए निकरो, जो परमेश्वरकी प्रसंसा करए?” तओ येशू सामरी आदमीसे कही, “उठके चलो जा; तिर बिश्वास तोके अच्छो करीहए।”


परमेश्वरको राज्य कब अएहए करके फरिसीनको समुहनको प्रश्नको जबाफमे येशू बिनसे कही, “परमेश्वरको राज्य देखन करके नाए आबैगो। नत् आदमी कएहएं, कि ‘देखओ, ख्रीष्ट हियाँ हए!’ या ‘हुवाँ हए!’ काहेकी देखओ, परमेश्वरको राज्य तुमर बीचमे हए।” येशू चेलनसे कही, “बो दिन आबैगो, जब तुम मए, आदमीको लौंणाको देखन इच्छा करैगे, पर तुम नाए देख पबैगे। आदमी तुमसे कहामंगे, ‘देखओ, ख्रीष्ट हुवाँ हए!’ या ‘देखओ, ख्रीष्ट हियाँ हए!’ पर तुम जैयओ मत् और नए बिनके पिच्छु लागीयओ। काहेकी जैसी बिजुली चम्कत हए बादरको एक किनारेसे लैके दुस्रो किनारे तक उजियारो करत हए, आदमीको लौंणा फिर अपनो दिनमे उइसी हुइहए। पर अइसो होनसे अग्गु बहुत दुख सहन पणैगो। और जा पिढीके आदमी मोके इन्कार करंगे।
जैसी हमर पुर्खा नोआको दिनमे भओ रहए, उइसीयए आदमीको लौंणाके दिनमे फिर होबैगो। नोआ जहाज भितर नाए घुसन तक आदमी खात रहएं, पित रहएं और बेहा बारी करत हएं, पर जब जलप्रलय आओ तओ सबनके नष्ट करदइ। और उइसीयए हमर पुर्खा लोतके समयमे भओ रहए, जो सदोम सहरमे रहात रहए, कि आदमी खात-पित लेन-देन करत, बाली लगात और घर बनात रहएं। पर जौन दिन लोत सदोम सहरसे निकरो, बो दिन आगी और गन्धक स्वर्गसे बरसो और सब आदमीनके जो सदोम सहरमे रहात रहएं बिनके सबके नाश करदइ। मए, आदमीको लौंणा प्रकट होन दिनमे अइसियए हुइहए।
अइसियए दिनमे जौन पाँण उपर हए, और अगर बिनको समान घर भितर हए कहेसे बो बे समान लेनके तरे नाए जामएं। उइसी खेतमे होन बारे फिर घुमके नाए आमएं। लोतकी बैयरके सँग का भओ, बो याद करओ। काहेकी जौन अपन प्राण बचानके इच्छा करत हए, बो बाके खोबैगो। पर मिर और अच्छो समाचारके ताहीं अपन प्राण गुमान बारो, बो बचाओ जाबैगो। मए तुमसे कहात हओं, बो रात दुई जनै एक सिथरीमे हुइहएं। एक जनै चलो जएहए और दुस्रो छुटजएहए। दुई जनै बैयर एकए सँग चकिया पिसत हुइहएं। एक चली जएहए, दुसरी छुटजएहए। दुई जनै आदमी खेतमे हुइहए, एक जनै चलो जएहए दुस्रो छुटजएहए।” तओ बे येशूसे पुछीं, “हे प्रभु जा कहाँ होबैगो?” येशू बिनसे कही, “जैसी गिद्धनको जमा भओ ठाउँ देखके पता चलत हए, कि डोँगर कहाँ हएं। उइसी सब आदमी पता पामंगे, कि जा घटना कहाँ हुइहए।”

Listen to लूका 17