Athpariya 2023 WBT (NT) Non-Dramatized

Athpariya 2023 WBT (NT) Dramatized

यरुसलेमलाम्‍मा ओटायागा आम्‍टेप्‍मा फारिसि याप्‌मिचि हिट्‌नुङ् धारमाबिधि काहिसिक्‍बाचि येसु सोरि ओटाए, हिट्‌नुङ् उसिलाप्‍टुए, “काचेलाचिङा टुबाठेबाचिलाम्‍मा लिसाडायागा रितिथितिचि पोङ् चालाँ ओचोगुन्‍गा? पोङ्‌भोने हिट्‌नागाँ चामा नुङ्‌ना पाइला उन्‌चि मुक् वासिमाना रिति चा ओचोगुन्‍गा॥”
येसुङा हिट्‌नागा लोडुचे, “खानिङाम्‍बाक् पोङ् माङ्‌हाङ्‌ङाना आग्‍याँ आएगुमुङ् आप्‍पे खानि चालान्‌ङि एरोक् आबान्‌डिटिगा? पोङ्‌भोने माङ्‌हाङ्‌ङा माट्‌टुएसुए, ‘काप्‍पा-कामा मान् चोगुचि’ हिट्‌नुङ् ‘पाबा-मामाङाना बिरुद्‌दाङि ओचाफेन्‍ना रिङ् काचेक् सेप्‍मा डोक् कोन्‌युक्॥’ टरो खानि आपिगिटि, ‘जुन्‍ङा आप्‍पे मामा-पाबा लाउङ्‌सा खान्‍ङा आङालाम्‍मा टोक्‍मा कोन्‍डाना थोक् आङा माङ्‌हाङ्‌लाउङ्‌सा ठाङ्‌मा हिडुङे’ हिट्‌नुङ् हिट्‌नाँ पाबा-मामा मान् चोक्‍मा कोन्‌निना॥ नाड्‌डेउङ् आप्‍पे खानिगा रितिथितिलेङ् लाहाब् आलिसिउङ् माङ्‌हाङ्‌ङाना आग्‍याँम्‍बाक् पाक्‍चा ठानाँ आचोक्‌निम्‍ना॥ हाउ निङ्‌ग्‍वा ओमाक्‍पाचि! यासैया माङ्‌काटाङा माट्‌टुना ना रिङ् छेम्‍बा खानिलोक् टोङ्‌युक्–
‘नागा याप्‌मिचिङा उन्‌चि यासिङाम्‍बाक् आङा मान् याङ्ओचोक्‍ङागा,
टरो उन्‌चि निङ्‌ग्‍वाम्‍बाक् आङालेङ् वाइना॥
हिट्‌नागाँ बिथाङि आङाना माङ्‌ध्‍यान् ओचोगुएट्‌टु,
पोङ्‌भोने हिट्‌नागाँ याप्‌मिचिङा ओचोगुगा रितितिथि एरोक् उहिसिक्‍टुचिगा॥’”


येसुङा याप्‌मिचि उन् सोरि छेम्‍डुचिउङ् लोडुचे, “आरिङ् निङ्‌ग्‍वा पिडानुम् खेम्‍सानुम् हिट्‌नुङ् बुजा चोगानुम्॥ याप्‌मिङा ओयासिलाम्‍मा चोगा खोना थोक्‍ङा चा याप्‌मि आसुद्‌दो चोगुन्‍ना, टरो उनिङ्‌ग्‍वा भिट्‌रालाम्‍मा भारा होन्‍गा रिङ्‌ङा एरोक् हिट्‌ना आसुद्‌दो चोगुटु॥”
हिट्‌नुङ्‌ना चेलाचि ओटायाउङ् उन् ओलोडुए, “पाक् खान्‍ङा ठाहा आटोगुएनि, खान्‍ङा आमाट्‌टुना रिङ् ओखेम्‍सुङ् फारिसि याप्‌मिचिगा उन्‌चि याक्‍लेडाइसे?”
टरो उन्‍ङा लोडुचे, “टोनालोग्‌ङि युङ्‌ना आङाना पाबाङा लेट्‌टुन्‍गेट्‌टुन्‍गा ख्‍वाप्‍पा सिङ् उभुङ्‌मा ओजारालाम्‍मा डोक् आङ्‌सुढिसुटु॥ हिट्‌नागा खेम्‍गेन्‍चा लाप्‍नेनुम्‌चिम्, हिट्‌नागाउम्‍टे याङ्‌कानिनिबा याप्‌मिचिगा याङ्‌कानिनिबा ओठेडोङ्‌चि ए॥ ठिबाङ् याङ्‌कानिबाङा आरको याङ्‌कानिनिबा लाम्‍बेट्‌टुए भोने, हिट्‌नागाचि इप्‍पाङ् डोक् खोपिल्‍टाङि ठाचिचि॥”
पाटरुसङा लोडुए, “ना मुन्‍डुम्‌ङाना उटुप् पाइना आन्‍याँ याप्‌मिलोडा॥”
येसुङा लोडुचे, “पाक् हाट्‌ले चा खानिङा बुजा आचोक्‍नेट्‌निम्‌नि? पाक् खानिलाउङ्‌सा ठाहा वाइना इ? याप्‌मिङा ओयासिलाम्‍मा चोगा थोक् ओमाभोक् भिट्‌रा लिक्‌युएट्‌युक्, हिट्‌नुङ् ओयेम्‌लाम्‍मा भारा होन्‌युएट्‌युक्॥ टरो याप्‌मिङाना ओयासिलाम्‍मा भारा होन्‍गा रिङ् उनिङ्‌ग्‍वा भिट्‌रालाम्‍मा होन्‌युक्, हिट्‌नुङ् नागा रिङ्‌ङा डोक् याप्‌मि आसुद्‌दो चोगुटु॥ पोङ्‌भोने याप्‌मिङाना उनिङ्‌ग्‍वालाम्‍मा ओचाफेन्‍ना निङ्‌ग्‍वा, याप्‌मि सेप्‍मा, इम्‍मेप्‍माजामा टोॽवा, सोब्‍बे खाले मेन्‍झेमा-येम्‍बेछाङि इम्‍मेप्‍माजामा चोक्‍मा, याङ्‌खुट्‌मा, माङ्‌जो साँचि पिमा हिट्‌नुङ् खिजेक्‍पा चाट्‌मागा रिङ् लियुक् ए॥
“नाड्‌डेगा रिङ्‌ङाम्‍बाक् याप्‌मि आसुद्‌दो चोगुटु॥ टरो उमुक् मिवासिङे चोनाँ हिट्‌ना आसुद्‌दो चोगुन्‍ना॥”


हिट्‌नुङ्‌ना येसुङा हिट्‌ना डेन् पोक्‍टुढोङ् टुरोस लोक् सिदोन छेट्‌रालेङ् खाडे॥ हिट्‌ना छेट्‌रालाम्‍मा ठिबाङ् कानानि मेन्‍झेमा आबाउङ् टाराङ्-टाराङ् राट्‌सा माट्‌टुए, “आडाङ्‌बा, दाउद पुङ्‌लाङिना, आङा लुक्‍मा याङ्‌टुक्‍टा! आइछा मेन्‍झेमा टोन्‍डेबाङा आड्‌डिक् ओचाफेन्‍लोक् याङ्‌छामा चाट्‌टुएसुए॥”
टरो येसुङा हिट्‌ना मेच्‍छेमा पाक्‍चा लोडुवाट्‌टुन्॥ हिट्‌नुङ् ओचेलाचि ओआबाउङ् बिन्‌टि उन् ओचोगुए, “ना मेच्‍छेमा पाङ्‌सुडिसु, पोङ्‌भोने हिट्‌ना राट्‌सा आनि एङ् एङ् आब्‌युगेट्॥”
टरो येसुङा माट्‌टुए, “आङाम्‍टे ओमासागा ठुँबाचि गाड्‌डे उलिसागा इस्‍राएलङिगा याप्‌मिचि घुवार फामा एरोक् माङ्‌हाङ्‌ङा याङ्‌पाङ्‌साना॥”
ना रिङ् खेम्‍सुङ् हिट्‌ना मेन्‍झेमा उन् सोरि आबाउङ् गुङ् चोगाउङ् लोडुए, “आडाङ्‌बा, आङा घुवार याङ्‌फाडा॥”
येसुङा हिट्‌ना मेन्‍झेमा लोडुए, “छालेट्‌चिगा चालेपा कोछुबाचि चामा पिमा नुना लिनिना॥”
हिट्‌ना मेन्‍झेमाङा लोडुए, “छेम्‍बा डोक् आडाङ्‌बा, टरो कोछुबाचिङा चा टे ओडाङ्‌बाङा चोगा ठोङ्‌लाम्‍मा ओठायागा उटुक्‍राचि ओचोटु टे॥”
टब येसुङा हिट्‌ना लोडुए, “छेम्‍बा डोक् ए आन्‍झो, काबिस्‍वास ठेना रैछो॥ खान्‍ङा आमाट्‌टु गाड्‌डे डोक् उलियाक्॥” हिट्‌ना बेला डोक् उइछा नुमानिङ् लिसालेट्‌टे॥


येसु हिट्‌निलाम्‍मा होन्‍डाउङ् गालिल ताल ओफेरो लिसा खाडे, हिट्‌नुङ् झोम्‍झोबालेङ् ठाङाउङ् हिट्‌नि युङे॥ हिट्‌नुङ् याप्‌मिचिगा ठेना खिमेयाङ्‌मे उन् सोरि ओटाए॥ हिट्‌नागाँ ओखेट्‌लेङ्‌बा, याङ्‌कानिनिबा, लोङ्‌लेन्, ओकेलुबा हिट्‌नुङ् आरु जोम् उटुगागा याप्‌मिचि ओआप्‍टुचिउङ् ओटोकानाङि उयुङ्‌सुचे, हिट्‌नुङ् उन्‍ङा हिट्‌नागा नुमानिङ् चोगुचे॥ हिट्‌ना बेला याप्‌मिचिङा ओकेलुबाचि ओचेक्‍टागा, लोङ्‌लेन्‌चि उनुयागा, ओखेट्‌लेङ्‌बाचि ओलाम्‌टिएगा, याङ्‌कानिनिबाचिङा याङ्उनिसुगा रिङ् उनिसुङ् आड्‌डिक् डोङ् ओठोङ्‌डे॥ हिट्‌नुङ् हिट्‌नागाँ इस्‍राएलङिना माङ्‌हाङ्‌ङाना निङ् ओचोन्‍डुए॥
हिट्‌नुङ्‌ना येसुङा ओचेलाचि उन् सोरि छेम्‍डुचिउङ् लोडुचे, “नागा याप्‌मिचि निसुङ्‌चिङुङ् आङाना आड्‌डिक् आलुक्‍मा टुगाइसे, पोङ्‌भोने नागा आङालोक् ओवासागा हाट्‌ले सुम्‍बोक् लेम्‍बा लिमैडे, हाट्‌ले नागालोक् चामा-ठुङ्‌मागा थोक् पाक्‍चा वाइना॥ आङा नागा याप्‌मिचि पाक्‍चा मिचेट्‌ङे पाङ्‌निङ्‌चिङ्‌गा॥ नाभाम्‍टे हिट्‌नागा पाङ्‌लेङ् ओखाट्‌युगेट्‌ना बेला लाम्‍बोङि फाङ् उलियुक् होला॥”
ओचेलाचिङा उन् ओलोडुए, “नाटेप्‍मा औधि याप्‌मिचि ख्‍वाबा चोक्‍माचि लाउङ्‌सा ना खुसुना डेन्‌ङि आन्‍याँ खोनिलाम्‍मा नाटेप्‍मा औधि चालेपा टाप्‍माना?”
येसुङा हिट्‌नागा सिलाप्‍टुचे, “खानिलोक् काइ गोटा चालेपा युङ्‌ग्‍वाना?”
हिट्‌नागाँ ओलोडुए, “सि गोटा चालेपा लोक् खाट्‌टिप्‍मा खाटिटिउगा ङासाचि उयुङ्‌ग्‍वा॥”
हिट्‌नुङ् उन्‍ङा याप्‌मिचि चाउरिङि युङ्‌सानुम्‌चि पिक्‍सा लोडुचे॥ हिट्‌नुङ्‌ना उन्‍ङा सि गोटा चालेपा लोक् ङासा कोबुङ् माङ्‌हाङ्‌ङि पोए-पोए ठाङ्‌सुए, हिट्‌नुङ् एगुङ् ओचेलाचि पिडुचे हिट्‌नुङ् ओचेलाचिङा याप्‌मिचि ओहान्‍डुबिडुचे॥ हिट्‌नागा सोब्‍बेङा फोक् उइप्‍टालोक् ओचोए, हिट्‌नुङ् चेलाचिङा मोन्‍डागा ओखान्‍डा ओखान्‌डि ओकोबुङ् सि डालो टेप् उछुम्‍सुए॥ हिट्‌नि जोम् मेन्‍झेमाचि हिट्‌नुङ् पिच्‍छाचिङा चा ओचोए, हिट्‌नि ओचोगा येम्‍बेछा याप्‌मिचि एरोक् टेम्‍बोक् हाजार टेप्‍मा ओवासेट्‌टागा॥ हिट्‌नुङ् येसुङा याप्‌मिचि पाङ्‌सुचिउङ् उन् नाउङि ठाङे, हिट्‌नुङ् मागादान छेट्‌रालेङ् खाडे॥

Listen to मात्‌ति 15