If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

जेख्णी यीशु अपड़ै बाराह चैलानि आज्ञा दी बेठा, ता सै गलीलेरै शहरा मझ उपदेश जां प्रचार कांननी तेठां किना ग्या। यूहन्ने बपतिस्मा दींणै बाऐ जेख्णी जैल्ही मझ यीशु मसीहरै कमां केरै बारै मझ शुणु ता तेनी अपड़ै चैलै यीशु किना ऐक्यु पुछणनि भेईजै, “क्या तु ऐ सै मसीह आ, जैस भेईजणैरा वायदा परमेश्वरै क्यौरा थ्या, या असु कोसक्यै हौरैरा इंतजार कांना?” यीशु जुबाव दिता, “जै किछ तुहैं शुणु जां तकाउ ऐ सभ गहि करि यूहन्ने सिंउ शुणा देया। कि कांणै तकांतै अत्तै, लट्टै चलतै-फिरतै अत्तै, कोढ़ी ठीक कांने अत्तै लाउरै, टांउणै शुणतै अत्तै, मुड़दै जींतैनै अत्तै लाउरै, जां गरीबनी खुशखबरी शुणांईयूंति आ। जां धन्य अत्तै सै जै मूं पन विश्वास कांना ना छडतै।”
जेख्णी यूहन्नेरै चैलै तेठां किना गांहथै थ्यै, ता यीशु यूहन्नेरै बारै मझ मैहणुवां केरी भीड़ि सिंउ बोलणा लगा, तुवे ऐस सुनसान जगाय मझ कितु तकाणनि गियोरै थ्यै? तुवे बियारी मझ हिलतु कोसक्यै लम्मू घाहिया तकाणनि थ्यै गियोरै? ता फिरी तुवे कितु तकाणनि गियोरै थ्यै? क्या एकि मैहणु जेनि बड़ै मेंहगै लिकड़ै लाउरै थ्यै? ना! जै मेंहगै लिकड़ै लांतै सै ता मैहला मझ रीहंथै। तां तुवे केईनी गियोरै थ्यै? क्या कोसक्यै भविष्यवक्तै सिंउ मिलणनी गियोरै थ्यै? हाँ! आंउ तुहांनि शुणांता, कि ऐ सैक्या आ जै भविष्यवक्तै किना बि बधि करि आ। यूहन्ना सै मैहणु आ, जेसेरै बारै मझ पवित्र शास्त्रा मझ लिखोरू आ: तका, आंउ ताउ किना पेहिलै अपड़ै विषैक पुजांणारै भेईजता, सै तिंडै ऐईणेरै तेईनी मैहणुवां तियार करैला।
सच ता ऐआ कि आज तेईनी ज्योतै बि मैहणु भोरै अत्तै, तैन्हां मझ अक बि यूहन्ना बपतिस्मा दींणै बाऐ किना बधि करि ना। फिरी बि स्वर्गेरै राज्य मझ हल्कै किना हल्का मैहणु बि यूहन्ने किना बधि करि आ। जेख्णी किना यूहन्ना बपतिस्मा दींणारै प्रचार कांना शुरू किया, तैस टैंमा किना लैकरी ऐम्हियां तेईनी परमेश्वरैरा राज्य बड़ा जल्दी फैलता जां शक्तिशाली मैहणु तैस मुकांणा चांहथै। यूहन्नेरै ऐईंणा तेईनी सारै भविष्यवक्ता जां मूसेरी व्यवस्था परमेश्वरेरै राज्यरै बारै मझ भविष्यवाणी कातै रिय्है। जां अगर तुवे मंनणा चांहथै ता मिंडी गल मनि ल्या कि यूहन्ना ऐ सैहै ऐलिय्याह आ जेसेरै ऐईंणेरै बारै मझ भविष्यवाणी भोरी थी। जै बि मिंडी गल शुणता, सै ध्यान दी करि शुणियां जां समझिया।
आज इस टैंमेरै मैहणुवां केरी बराबरी आंउ कोस सिंउ करूं? सै बजारा मझ बेठौरा तैन्हां बच्चा सैयि अत्तै, जै योकिया केरी चुगली कातै कि होरै मैहणु कितु कातै अत्तै। असै तुवाड़ै तेईनी खुशिरै गीत लाय पण तुवे ना नच्चै; असै तुवाड़ै तेईनी ढाह बारा पण तुहैं लैरी ना दित्ती। यूहन्ना बड़ै-बारियै उपवास करींथिया जां अंगूरी रस ना पिईंथ्या, पण मैहणु बोलतै कि तैस मझ बुरी आत्मा आ। पण जेख्णी आंउ मतलब मैहणुरा पुत्र या, जै साधारण मैहणु सैयि खांता पींता, ता मैहणु बोलतै अत्तै कि “ऐस मैहणु तका, ऐ पेटु जां पियक्कड़ आ; ऐ चुंगी लींणारा जां पापिया केरा मित्र आ, पण एकि मैहणुरै कम ऐ साबित कातै कि केणु बुद्धिमान आ।”


फिरी यीशु तैस नगरेरै मैहणुवंनी फिटकार दित्ती जै तैन्हांं शहरा मझ भुईंथ्यै, जैन्हां मझ तेनी बड़ै सारै सामर्थैरै कम क्यौरै थ्यै, केईनी कि तेठणिरै मैहणुवें पाप कांना ना थ्या छडौरा। “खुराजीन जां बैतसैदा नगरा मझ बेशणार मैहणुवो तुहां पनि हाय! केईनी कि तुहां बिच जै सामर्थैरै कम क्यै अगर सैक्यै कम सूर जां सैदा नगरा मझ क्यौरै भूंतै ता तेठणिरै मैहणु बड़ै पेहिलै पटु ला लींतै जां ऐपु पन धूड़ मयि लींतै, ऐ लुहानेरै तेईनी कि तैन्हैं पाप कांने छडि दितोरै अत्तै।” पण आंउ तुहां मैहणुवां सिंउ बोलता, कि सै सजा जै परमेश्वरै सूर जां सैदानि दींणी सै तैस सजाय किना बड़ी हलकी भूंणी जै सजा तैस तुहांनि न्याएरी धियाड़ी दींणी। जां हे कफरनहूम शहरेरै मैहणुवो! क्या तुवे सौचतै अत्तै कि तुवाड़ा स्वर्गा मझ आदर भूंणा? ना! परमेश्वरा तुवे नरका मझ सुटणै! केईनी कि जै सामर्थैरै कम ताउ मझ क्यौरै अत्तै अगर सै कम सदोम नगरा मझ क्यौरै भूंतै, ता सै नगर आज तेईनी बंणी रींहणु थियु। पण आंउ तुहां मैहणुवां सिंउ बोलता, कि सै सजा जै परमेश्वरै सूर जां सैदा शहरानि दित्ती सै तैस सजाय किना बडी भूंणी जै सजा तैस तुहांनि न्याएरी धियाड़ी दींणी।


तेसै टैंमा यीशु बौलु, “हे पिता, तु स्वर्गेरा जां धरतिरा प्रभु आ, आंउ तिंडा धन्यवाद काता, कि तीं ऐकेई गलै ज्ञानियां जां समझदार मैहणुवां किना छपा रखि, जां साधारण मैहणुवां पनि प्रकट केयि।” हाँ, हे पिता! केईनी कि ताउ ऐहै ठीक लगु।
मिंडै पिता ऐ मूंनी सभ किछ दितोरू आ, जां सिर्फ सैहै आ जै पुत्रा जांणता, जां पुत्रा छडि करि हौरा कौ बि पिता परमेश्वरा ना जांणता। ऐठणीरै तेईनी जैन्हां मैहणुवां पुत्र मतलब आंउ चुणता, तैन्हांं मैहणुवां पिता परमेश्वर जांणना।
“अपड़ै धर्म गुरूवा केरै नियमा केरै बोझा हैट दबियोरै सारै मैहणुवो मूं किनि ऐईछा, मूं तुहांनि सुख-शान्ति दींणी।” मूं पिचालीं ऐईछा जिहीं दाँत जुंगऐ हैट बेशता तिहियें तुवे मिंडी शिक्षाईया किना शिख्रा; कि आंउ नम्र मैहणु आ जां मनेंरा खरा आ: तुहां अपड़ै मंना मझ शान्ति मेईंणी। केईनी कि जैस कंमा कानेंरा आंउ तुहांनि हुक्म दींता सै कांना तुवाड़ै तेईनी मुशिकल ना।

Listen to मत्ती 11