Korwa - WBT (NT) Non Drama

Korwa - WBT (NT) Drama

ईसू पहाड़तेय उतरावनेन दो हाँय देह दूर मुरुक बगरा होड़कू सेनेडा। दो मी होड़ कुड़गा होड़ हंडाय वेजेडा। हाँय ईसू परनामतेडखने कताया, “ने परबू, आम चहाःतना दो आम ईंगमे नपायगोड।” हनते ईसू आँयग तिःई लंबावतेडखन हाँये टोँवावतिरिया। अरू हननमेला हाँयग कुड़गा बेमारीतेय नपाययान। हनते ईसू हाँय एचेरेय कताया, “नाःआ कता आम तोनोंगीग एचेरे अलोम बड़रा। मनदो आम पुजउरी एचेरे सेनेकियानखन एचे जासगुःमे, अरू आम सुद होयाः लगा मोसेस हुकुमकेरा, हना नियम इया बलिदानमे देगगे, जेमहा जमा होड़कू सुदीगोड, आम नपाययना, माःआन।”


हना तयोमरे ईसू कपरनहूम सहररेय बोलोनेन दो, रूमी देसरीग मी सव सइना होड़कूरीग हातपात होड़ ईसू एचेरे वेगकियानखने कताया, “ने परबू, ईंगरीग मी होड़ सेवकिया होड़ इदानिया। हाँय लकवा ञेडगोतिरिया अरू हना हसूते मुरुक हलकइनरे इदानिया।”
दो ईसू हाँय एचेरेय कतातेड, “ईंग सेनतिंग अरू हाँयिंग नपायगोडता।”
दो हाँयग हातपात होड़ कताया, “ने परबू, आम ईंग ओड़ाः वेग जुकूर ईंग कोवायिंगा। आम मिनीटोंग कताम कताय दो, ईंगरीग सेवकिया होड़ नपाय जुवाःताय। ईंग होड़कूराः आड़रे इदानिंगा, अरू ईंगराः कता मनाः सइना होड़कू हों इदानकुःआ। ईंग मी होड़ एचेरेयिंग कतायता, दूमे, दो हाँय सलाव जुवाःताय अरू मी होड़ एचेरेयिंग कतायता, दबूमे, दो हाँय ईंग एचेरेय वेग जुवाःता। ईंग सेवकिया होड़ एचेरेयिंग कतायता, नाःआ बुताम एचे, दो हाँय हनानाः बुताय बुताता।”
हना अयूमतेडखन ईसू बयावयाने अरू अनँयग देह दूरकू वेजेडा हँकुःआ होड़कू एचेरेय कताया, “अपे ईंगपे अयूम। इसराएल होड़कू एचेरे हों नाःआमिन बिसवास ईंग नुँहू वरी मेरिंग ञेलगडा। अरू ईंग अपे एचेरेयिंग कतायतना, मुरुक बगरा होड़कू पुरुब अरू पछिम अते वेगकियानखन अपेरिकुःआ खुटिपरिया होड़कू इबराहीम अरू इसहाक अरू एकूब सुदा सेरमो देसरे जोजोम सरबहारेकू दुड़ुःता। मनदो राइजरिकुःआ होड़कू हंडा ओरोकू बोलो अवेतेरा। भगवान हँकू बहरी अंदरारेय एचे ढोकलावगोडकूता अरूकू इयामता अरू तिरिंग रेटेग-रेटेगकू कड़रावता।”
हनते ईसू हाँयग हातपात होड़ एचेरेय कताया, “आम ओड़ाःमे सलाव जुवाः। आम बिसवासकेरा हनन इया होया जुवाः।” अरू हाँयगरीग सेवकिया होड़ हनन मेलाय नपाययान।


ईसू सिमोन पतरसराः ओड़ाःरेय सेनेडा अरू पतरसरीग हनहार जारते गेतेगतोय दोहोना। दो ईसू हाँये टोँवावतेरा अरू ओहेन जार अड़ाःतिरिया। हननमेला हाँय रेमवाडखन हँकूय सेवातेरा।
सिंगाड़ मेला होड़कू, भूतकू समसावनेना हँकुःआ मुरुक बगरा होड़कू ईसू एचेरेकू अगूतेडकुःआ। अरू हँकुःआ भूतकू ईसू कनाता कतारेय उडुंगगोतेडकू। हाँय हसूत होड़कू होंय नपायगोतेड। नाःआ कता भगवानराः बड़रा कता होड़ एसयाह मड़ंगरेय कतातेरा, हनन इया होयायान,
“हाँय अबूराः अबड़ावतो अते अरू जमा इयाःआ हसूतेय नपायगोतेडबुःआ।”


ईसू मुरुक बगरा होड़कू आयँगराः चइरो गतररे ञेलतेडकू दो हाँय चेलाकू एचेरेय हुकुमतेरा, “दोबू अबू नाःआ हुडिंग समुंदर मार परोमबू सेने पारता।”
हनते मी होड़ नियम चेडदार होड़ वेजेडखन ईसू एचेरेय कताया, “ने गुरुजी, आम सेनता हंडा आम देह दूर ईंग होयिंग सेनता।”
दो ईसू हाँय एचेरेय कताया, “हुई हुटाकू दोहोन लगा दुलू इदा अरू तितीगकू दोहोन लगा तुका इदा। मनदो मनुवारीग बेटातराः बोः अतड़े लगा हों ततेर कोवानेःआ।”
अरू एटाः चेला हाँय एचेरेय कताया, “ने परबू, ईंग अपांग तील लगा ईंग मड़ंगमे सेने ओवायिंग।”
मनदो ईसू हाँय एचेरेय कताया, “कसूररे गोएगतो इदानकुःआ हँकुःआ होड़कू, अँनकूरिकुःआ गोएगतो होड़कूकू तील ओवा। मनदो आम ईंग देह दूरमे वेग।”


हनते ईसू डोंगारे दुड़ुःनेनखने सेना अरू आँयगरिकुःआ चेलाकू हों हाँय सुदाकू दोहोना। दो हनमेला असाका हना समुंदररे मुरुक गड़रा घटा होयानेना। डोंगा लहराते हुडिंग हुडिंग मेर बुडाःआ। मनदो ईसू अपीगतोय दोहोना। दो ईसूरिकुःआ चेलाकू हाँय एचेरेकू सेनेडा अरू हाँय बेरेडतेडखनकू कताया, “ने परबू, अलेम बनसाव। गुजुःतनाले।”
दो ईसू हँकू एचेरेय कताया, “ने हुडिंग बिसवास होड़कू। अपे चिला लगापे बोरतना?” हनते हाँय रेमनेनखन गड़रा घटा अरू लहरा रोंकाः लगाय कतातेड अरू होय मधिमयान।
मनदो हँकू बयावयान अरूकू कता होड़ेंगा, “ओहरे! नाँय करा इयायीग होड़ हवे? होय अरू लहरा हों नाँयराः हुकुम मनाव जुवाःता।”


हनते ईसू हना हुडिंग समुंदर पारनेनखन गदरेनिया छतररेय सोदोरनेना। दो भूतकू समसावतोकिन दोहोना, हँकिनाः बार होड़ होड़किन, मड़गट अते उडुंगनेनखन ईसू सुदाकिन जुमावनेना। हँकिन मुरुक जबड़किन दोहोना। अरू हना अते तोनोंगीग हना दूरते मेरकू सेने अवेना। अरू हँकिन खिररीकियानखन ईसू एचेरेकिन कताया, “ने भाबी भगवानरीग बेटात, आम अले करेगले लगाम चहाःतना? भगवान अले लगाय तोल दोहोकेरा हना बेला अते मड़ंग आम अले हलकइनले लगाम वेगकिया जा?”
हंडा अते हुडिंग तोरेरे मुरुक बटूड़ सुकरीकूकू सराःआ। दो हँकुःआ भूतकू ईसू एचेरेकू असेःआ, “आम नँकिन अते अलेय उडुंग एंडा दो, अले हँकुःआ सुकरीकू एचेरेम वारगोडले।”
दो ईसू कतातेड, “दूपे।” दो हँकू हँकिन अतेकू उडुंगनेन अरू सुकरीकू एचेरेकू बोलोयान। दो सुकरीकू दरा अते बतकाव उतरावनेनखन समुंदररेकू बोलो बुडावयान। दो सुकरीकूरिकुःआ सरवाहाकू हना ततेरतेकू ञीरयान अरू सहररे सेनेडखन होड़कू एचेरे, हंडा चिनचिला होयानेना अरू मड़ंगरे भूतकू समसावनेना हँकिनाः होड़किनराः जीवरे चिनचिला होयानेना हना जमाकूनकू कता उदुःतेरा। हनते सहर अते मुरुक बगरा होड़कू ईसू सुदा जुमाः लगाकू वेजेडा अरू हँकू ईसू एचेरे असे घड़ीनकू कतातेड, “अले सिमान अते आम सलाव जुवाःमे।”

Listen to मती 8