If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

फसह रे त्याहार का पैल्ले, जां यीशु ने जाणी लेया कि मेरा से बेल्ला आई गेया कि दुनिया जो छड्डी करी पिता का हटी जां। यीशु अपणी सेवकाई री सुरुआत का लेई आखर तिकर अपणे चेल्‍लेयां कने बड़ा प्यार करदे थिये। जां शैतान शमौन इस्करियोती रे निक्के यहूदा रे मन बिच ए गल्ल पाई बैठ्ठे रा थिया, कि से तिन्हा जो पकड़वाए, तां फसह री रोट्टी खाणे रे बेल्ले यीशु ने ए जाणी करी कि पिता ने सब किच्‍छ मेरे हक बिच देई दित्ते रा है, ते से परमेश्वर रे पास्से का आया ते परमेश्वर का हटेया करदा है, तां रोट्टी जो चुक्की करी अपणे चोग्गा उतारी दित्ता ते अंगोछा लेई करी अपणी कमर बन्नी, तां भांडे बिच पाणी भरी करी अपणे चेल्‍लेयां रे पैर धोणे ते जिस अंगोछे, ते अपणी कमर बन्नी थी तिसी कने पुंजणे लगे जां से शमौन पतरस का आये तां पतरस ने तिन्हा जो बोल्लेया, ओ प्रभु कै तुसा मेरे पैर धोया करदे हिन? यीशु ने तिसजो जवाब दित्तेया, जे मैं करदा, तू तिसजो हल्ले नी जाणदा, पर इधेरे बाद समझणा पतरस ने तिन्हा जो बोल्लेया, तुसा मेरे पैर कदी भी नी धोई पाणे! ए सुणी करी यीशु ने तिसजो बोल्लेया, जे मैं तेरे पैर ना धोआं, तां तेरा मेरे कने कोई सांझा नी शमौन पतरस ने तिन्हा जो बोल्लेया, ओ प्रभु जी, तां मेरे पैर ही नी, बल्कि हत्थ ते सिर भी धोई देयो यीशु ने तिसजो बोल्लेया, जे न्हाई बैठ्ठे रा है तिसेरे पैर रे सवाये होर किच्‍छ भी धोणे री जरुरत नी है, पर से बिल्कुल सुच्चा है, ते कुसकी इक्क जो छड्डी करी तुसा सारे सुच्चे हिन। से तां अपणे पकड़वाणे वाले जो जाणदे थिये इधेरे तांइ तिन्हा बोल्लेया, इक्क जो छड्डी करी तुसा सारे रे सारे सुच्चे हिन। जां से तिन्हेरे पैर धोई बैठ्ठे तां से अपणे कपड़े पाई करी फिरी बेई गे, ते तिन्हा जो बोलणे लगे, कै तुसा मणू समजे के मैं तुसा कने कै कित्तेया? तुसा मेरे जो गुरु ते प्रभु बोलदे, ते ठीक ही बोलदे, किजोकी मैं है भी। जे मैं प्रभु ते गुरु होई करी तुसा रे पैर धोये, तां तुसा जो भी इक्क दूये रे पैर धोणा चाएदे। किजोकी मैं तुसा जो इक्क नमूना दस्सी दित्तेया कि जिय्यां मैं तुसा कने कित्तेया, तुसा भी तिय्यां ही करेया करो। मैं तुसा कने सच-सच बोल्दा, नौक्कर अपणे मालक का बड्डा नी, ते ना ही दूत अपणे भेजणे वाले का बड्डा हुंदा। अवे तुसा ए गल्लां जाणदे हिन, ते जे उन्हा रे हिसाब कने चलो तां तुसा धन्न हिन। मैं तुसा सारे रे बारे बिच नी बोलदा; जिन्हा जो मैं चुणी लित्तेया रा है तिन्हा जो मैं जाणदा, पर ए इधेरे तांइ होया कि पवित्रशास्त्र रा से वचन पूरा हो,
“जिनिये मेरी रोट्टी खाई, तिनिये मेरे कने धोखा कित्ता।”
अवे मैं तिसेरे होणे का पैल्ले तुसा जो जताई दिंदा कि जां ए होई जांगा तां तुसा विश्वास करो कि से मैं ही है। मैं तुसा जो सच-सच बोलदा कि जे मेरे भेजे रे जो अपणाई लिंदा, से मेरे जो अपणाई लिंदा, अते जे मेरे जो अपणांदा, से मेरे भेजणे वालेयां जो अपणाई लिंदा।

ए गल्लां बोल्ली करी यीशु अपणे मन बिच बड्डा वरी उदास ते दुखी होई गे, ते बोलणा लग्गे, “मैं तुसा जो सच-सच बोलदा तुसा बिच इक्क ने मेरे जो पकड़वाणा।”
चेल्‍ले शक्क कने, कि ए कुसेरे बारे बिच बोल्लेया करदे हिन, इक्क दूज्जे पास्से दिख्खणा लग्गे। तिन्हेरे चेल्‍लेयां बिच का इक्क चेल्ला, जिस कने यीशु प्यार करदे थिये, यीशु नेड़े बैठ्ठे रा थिया। शमौन पतरस ने तिसजो इसारा करी के पूच्छेया, दस्स, ए कुसेरे बारे बिच बोल्लेया करदे हिन? तां तिसने तिय्यां ही यीशु रे पास्से झुकी तिन्हा जो पूच्छेया, ओ प्रभु, से कुण है? यीशु ने जवाब दित्तेया, जिस जो मैं ए रोट्टी रा टुकड़ा डूबाई करी दिंगा, से ही है, तां तिन्हा ने टुकड़ा डूबाई करी शमौन इस्करियोती रे निक्के यहूदा जो दित्तेया। टुकड़ा लिंदे ही शैतान तिस बिच समाई गेया, तां यीशु ने तिसजो बोल्लेया, जे तू करेया करदा, झट कर। पर बैणे वालेयां बिच का कुन्ने नी जाणेया कि तिन्हा ने ए गल्ल तिसजो कुधेरे तांइ बोल्ली यहूदा का इक्क थैली हुंदी थी, इधेरे तांइ कुसकी-कुसकी ने ए समजेया कि यीशु तिसजो बोल्लेया करदे हिन कि जे किच्‍छ असा जो त्योहर तांइ चाएदा से खरीदी लै, या ए कि कंगाला जो किच्‍छ दे ते से रोट्टी रा टुकड़ा खाणे रे बाद झट बाहर पास्से चली गेया, ते ए रात्ती रा बेल्ला थिया।

जां से बाहर चली गेया तां यीशु ने बोल्लेया, अवे मेरी, यानी मणू रे पुत्तर री महिमा होई, अते परमेश्वर री महिमा मेरे अंदर होई है। ते जिय्यां परमेश्वर जो अपणे पुत्तर री वजह कने महिमा मिल्ले री है तिय्यां ही पिता-परमेश्वर ने भी अपणे पुत्तर जो जल्द ही महिमा दैणी। ओ मेरे प्रियों, मैं होर थोड़ी हाण तुसा रे कने है: फिरी तुसा मेरे जो तोपणा, ते जिय्यां यहूदियां जो बोल्लेया, जित्ते जाया करदा है तित्ते तुसा नी आई सकदे, तिय्यां ही मैं तुसा जो भी बोलदा मैं तुसा जो इक्क नौआ हुकम दिंदा कि इक्क दूए कने प्यार रख्खो, जिय्यां मैं तुसा कने प्यार करदा, तिय्यां तुसा भी इक्क दूये कने दाह-पीड़ रख्खो। जे अगर तुसा अप्पु मिते प्यार रखगे, तां इसी कने सारेयां जो पता चलणा कि तुसा मेरे चेल्‍ले हिन। शमौन पतरस ने तिन्हा जो बोल्लेया, ओ प्रभु जी, तुसा कुते जाया करदे हिन? यीशु ने जवाब दित्तेया, जित्ते मैं जाया करदा है तू हल्ले तित्ते नी आई सकदा, पर इसेरे बाद मेरे पीच्छे आणा।

पतरस ने तिन्हा जो बोल्लेया, ओ प्रभु जी, अब्बे मैं तुसा रे पीच्छे किजो नी आई सकदा? मैं तां तुसा तांइ अपणी जान दैणे तांइ भी तैयार है। यीशु ने जवाब दित्तेया, कै तू मेरे तांइ अपणी जान देई दिंगा? मैं तेरे कने सच-सच बोलदा कि मुर्गे रे बाहर बांग मारणे का पैल्ले ही तू मेरे जो पछानणे का त्रै वरी मुकरी जाणा।

Listen to यूहन्ना 13