 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

عِيسَى ࢡَنغْتِ غِتٜ، عٛيِعِ رِسْکُࢡٜ طٛنْ ندٛکَّ دٛکّٜ مَࢡّٜ ندٜرْ بَاتِرْطُمْ شٜىٰدٜ؞ عٛيِعِ دٜبّٛ جُرُمْطٛ تَلَکَاجٛ حٛکِّ سُلٜيْجٜ ݠَمَرٜ طِطِ؞ ندٜنْ عٛوِعِ‏: «غٛونغَ مبِعَنْمِ عٛنْ‏: دٜبّٛ جُرُمْطٛ تَلَکَاجٛ عٛو، حٛکِّ کٛ ࢡُرِ يِمْࢡٜ ڢٜىٰرٜ ڢُو؞ نغَمْ کَمْࢡٜ ࢡٜندٛکِّ سٜطَّ دِغَ طُوطٜىٰنغَ جَوْدِ مَࢡّٜ، عَمَّا دٜبّٛ عٛو، کٛو ندٜ عٛ لَاڢُطٛ، عٛحٛکِّ کٛ عٛمَرِ نغَمْ نغُورٜ مَاکٛ ڢُو؞»


ندٜ وٛطْࢡٜ طٛنْ مبٛلْوَ دٛوْ حَيْکَلِيرُ ، نٛ ندُ ڢَوْنِرَ بٜى کَاعٜ بٛوطّٜ عٜ کُوجٜ دٛکَّنَاطٜ اَللَّه؞ عِيسَى وِعِ‏: «ࢩَلْطٜ نغَرَنْ، ࢡٜنغِبِّنَنْ کٛ نغِعٛتٛنْ طٛ، حَيْرٜ لُتَّتَا دٛوْ حَيْرٜ؞»


ࢡٜࢨَمِمٛ‏: «جَوْمِرَاوٛ، ندٜيٜ کُوجٜ طٜعٜ لَاتٛتٛ؟ بٜى عَلَامَ کَيٜ کٛلَّتَ وَکَّتِ کُوجٜ طٜعٜ لَاتٛتٛ؟»
عِيسَى جَابِ‏: «کَکِّلٜ نغَمْ تَا عٛنْ مَجِّنَ کٛعٜ مٛوطٛنْ؞ نغَمْ طُوطْࢡٜ نغَرَنْ بٜى عِنْدٜ عَمْ، ࢡٜمبِعَنْ‏: مِنْ وٛنِ اَلْمَسِيحُ، وَکَّتِ بٛو ࢡَدَکٜ؞ تَا تٛکّٜ ࢡٜ؞ تٛ عٛنْ نَنِ حَالَ کٛنُوجِ عٜ تُورْتٛلْجِ، تَا کُلْتٛرٜ، نغَمْ دٛولٜ کُوجٜ طٜعٜ عَارْتَ وَرْغٛ، عَمَّا طُمْ لَاتَتَاکٛ تِمّٛودٜ بٜى لَوْ؞» ندٜنْ عٛوِعِ ࢡٜ‏: «عُمَّاتٛورٜ عُمَّنْتٛ عُمَّاتٛورٜ، لَامُ عُمَّنْتٛ لَامُ؞ دِمْبَنْطٜ لٜسْدِ مَوْطٜ لَاتٛتٛ، حَا نٛکُّوجٜ غٛطّٜ بٛو ࢩَوُجِ کَلُّطِ عٜ وٜىٰلٛ، کُوجٜ کُلْنِيطٜ عٜ عَلَامَاجِ مَوْطِ لَاتٛتٛ حَا عَسَمَ؞
«عَمَّا حِدّٜکٛ طُمْ لَاتٛ، ࢡٜنَنغَنْ عٛنْ، ࢡٜتٛوࢩَنْ عٛنْ، ࢡٜنجَحْرَنْ عٛنْ حَا شُوطِ دٜوَلْ مَࢡّٜ، ࢡٜنَسْتِنَنْ عٛنْ ڢُرْسِنَ، ࢡٜنجَحْرَنْ عٛنْ يٜىٰسٛ لَامِيࢡٜ عٜ يٜىٰسٛ مَوْࢡٜ لٜسْدِ نغَمْ دَلِيلَ عِنْدٜ عَمْ؞ کُوجٜ طٜعٜ ڢُو نغَرَنَنْ عٛنْ نغَمْ شٜىٰدَنٛنْ يَمْ؞ نجٛغٜ طُمْ حَا ࢡٜرْطٜ مٛوطٛنْ نغَمْ تَا عٛنْ تَاسْکِتِنَ حُجَّاجِ مٛنْ؞ نغَمْ مِحٛکَّنْ عٛنْ وٛلْدٜ عٜ حِکْمَ، حَا کٛنّٜعٜنْ مٛوطٛنْ مبَاوَتَا وَابَاغٛ عٛنْ عٜ دَرْتَنَاغٛ عٛنْ؞ کٛو سَارٛعٜنْ مٛنْ عٜ دٜىٰرْطِرَاࢡٜ مٛنْ عٜ بَنْدِرَاࢡٜ مٛنْ عٜ سٛوبِرَاࢡٜ مٛنْ ࢡٜزَمْبٛتٛ عٛنْ، ࢡٜمبَرَنْ وٛطْࢡٜ حَا مٛوطٛنْ؞ کٛو مٛيْ ڢُو وَࢩَنْ عٛنْ نغَمْ عِنْدٜ عَمْ؞ عَمَّا کٛو غَاسَاوٛلْ حٛورٜ مٛوطٛنْ حَلْکَتَا؞ بٜى تِطِّنَارٜ مٛنْ عٛنْ کِسْنَنْ يٛنغْکِيجِ مٛوطٛنْ؞»


«تٛ عٛنْ نغِعِ حٛنٛوࢡٜ تَارَکٜ بٜرْنِوٛلْ عُرُسَلِيمَ، ندٜنْ کَمْ عَنْدٜ غِبِّنٜىٰکِ مَاغٛلْ ࢡَدَکٜ؞ وَکَّتِ مَنْ، وٛنْࢡٜ حَا يَحُدِيَ ندٛغَّ حَا کٛوسٜىٰجٜ، وٛنْࢡٜ ندٜرْ عُرُسَلِيمَ نغُرْتٛ عٜ ࢡٜنْ حَا غٜسٜ بٛو تَا نَسْتَ بٜرْنِوٛلْ؞ نغَمْ طُمْ لَاتٛتٛ ࢩَلْطٜ بَاتٛلْ نغَمْ حِࢡِّنغٛ کٛ وِنْدَ ڢُو؞ کَيْتٛ‏! بٛنٜ لَاتَنْتٛ رٜوْࢡٜ رٜىٰدُعٜنْ عٜ مُسِنِنَنْࢡٜ ࢩَلْطٜ مَنْ‏! نغَمْ ࢡِلَّارٜ مَوْندٜ لَاتٛتٛ ندٜرْ لٜسْدِ ندِعِ عٜ تِکّٜرٜ اَللَّه بٛو دٛوْ عُمَّاتٛورٜ ندٜعٜ؞ ࢡٜ مبَرٜتٜىٰࢡٜ بٜى کَاڢَاجٜ، ࢡٜ يَحْرٜتٜىٰࢡٜ نَنغَاࢡٜ شَکَ عُمَّاتٛوجٜ ڢُو؞ عُمَّاتٛوجٜ جَنَنّٜ نجَاࢡَنْ عُرُسَلِيمَ حَا تٛ وَکَّتِ مَࢡّٜ تِمِّ؞»


«عَلَامَاجِ لَاتٛتٛ حَا نَانغٜ، حَا لٜوْرُ عٜ حَا کٛودٜ؞ دٛوْ لٜسْدِ بٛو، کُلٛلْ عٜ سَکْلٜرٜ لَاتٛتٛ حَا عُمَّاتٛوجٜ دَلِيلَ حَرَکَ مبٜىٰلَ عٜ ࢨُوغٜ؞ يِمْࢡٜ مَايَنْ نغَمْ کُلٛلْ دٛوْ کٛ تَمِّ وَرْغٛ دٛوْ لٜسْدِ؞ نغَمْ بَاوْطٜىٰجِ عَسَمَ بٛو ندِمْبٛتٛ؞ ندٜنْ ࢡِي-نٜطّٛ وَنغَنْ غِتٜ يِمْࢡٜ، عٛوَرَنْ ندٜرْ دُولٜ بٜى بَاوْطٜ عٜ تٜدُّنغَلْ مَنغَلْ؞ تٛ کُوجٜ طٜ ݠُطِّ لَاتَاغٛ، ندَرْتٜ بٛوطُّمْ، ࢡَنغْتٜ کٛعٜ مٛنْ، نغَمْ ندِمُ مٛوطٛنْ ࢡَدَکٜ؞»


عِيسَى وٛلْوَنِ ࢡٜبَلْنْدٛلْ‏: «ندَارٜ عِبِّ عٜ لٜطّٜ غٛطّٜ ڢُو؞ تٛ عٛنْ نغِعِ طٜ طٛنْ مبِلِتَ، عٛنْ عَنْدِ دُومٛلْ ࢡَدَکٜ؞ بَنَ نٛنْ، تٛ عٛنْ نغِعِ کُوجٜ طٜعٜ طٛنْ لَاتٛ، عَنْدٜ لَامُ اَللَّه ࢡَدَکٜ؞ غٛونغَ مبِعَنْمِ عٛنْ‏: کُوجٜ طٜعٜ ڢُو لَاتٛتٛ حِدّٜکٛ يِمْࢡٜ زَمَنُورُ ندُعُ ڢُو مَايْدَ؞ عَسَمَ عٜ لٜسْدِ نجِنَّنْ، عَمَّا بٛلّٜ عَمْ نجِنَّتَا سَمْ؞»

«ندٜىٰنٜ کٛعٜ مٛوطٛنْ نغَمْ تَا ࢡٜرْطٜ مٛنْ شُکْلَنٛ طُوطَلْ ࢩَامْدُوجِ عٜ نجَرَمْجِ عٜ لَرُورَاجِ دُنِيَارُ، نغَمْ تَا ࢩَنْدٜ مَنْ جُحَ عٛنْ؞ نغَمْ طُمْ وَرَنْ بَنَ زُبَاوٛلْ دٛوْ يِمْࢡٜ دٛوْ لٜسْدِ ڢُو؞ نغَمْ مَاجُمْ عَيْنٜ، مبَطٜ دٛعَ وَکَّتِ ڢُو، نغَمْ حَا کٜࢡٛنْ سٜمْبٜ دَطُغٛ کُوجٜ غَرَنْطٜ طٜعٜ ڢُو عٜ دَرَاغٛ بٛو يٜىٰسٛ ࢡِي-نٜطّٛ ؞»
ࢩَلَوْمَ عِيسَى طٛنْ عٜکِّتِنَ ندٜرْ حَيْکَلِيرُ ، جٜمَّ بٛو عٛطٛنْ وَالٛيَ دٛوْ حٛوسٜىٰرٜ وِعٜتٜىٰندٜ حٛوسٜىٰرٜ جَيْتُنْجٜ؞ ڢَجِرِ يِمْࢡٜ ڢُو طٛنْ نجَحَ حَا مَاکٛ ندٜرْ حَيْکَلِيرُ نغَمْ نَنُغٛ مٛ؞

Listen to لُکَ 21