Génesis 11
11
Babel törrita rurayanqan
1Tsë witsanqa llapan nunakunam juk idiömallata parlayaq. 2Inti yarqamunan kaqpita ewkurmi Sinar#11.2 Sinarqa Babiloniam karqan. ninqanchö tariyarqan jatun pampata. Tsëchömi pëkuna llapan täräyarqan.
3Tsëchö tëkarmi pëkunaqa ninakuyarqan kënö: <<Atska ladrillukunata rurëkur jornuchö kuwashun>>.
Tsëmi parlayanqannölla ladrilluta rurayarqan rumipa rantin tsëwan perqayänanpaq. Tsë ladrillukunatam breawan perqayarqan. 4Tsëpitanam yapë ninakuyarqan kënö: <<Tsë ladrillukunawanmi jatun markata rurashun. Tsënömi törrita sharkatsishun ciëluman chanqanyaq. Tsënöpam pïmëpis reqimäshun. Tsënömi mëtsëpa ramakashqa kanantsikpa rantin llapantsik këllachöna täkushun>>.
5Tsënam Teyta Dios ciëlupita urämurqan markata y törrita nunakuna sharkëkätsiqta rikänanpaq. 6Tsëta rikëkurmi Teyta Dios yarpakachar nirqan: <<Pëkunaqa tsë idiömallata parlarmi shumaq parlakur tsënö rurëkäyan. Tsë markata y törrita sharkatsita usharirqa jukkunatapis mastachi rurayanqa. 7Tsënö kaptinqa pëkunaman ëwar pantatsishun tsë idiömallata manana parlayänanpaq. Tsënöpam juk idiöma juk idiömatana parlar manana käyinakuyanqanatsu imata parlayashqantapis>>.
8Tsënö nirmi Teyta Dios llapan nunakunata jinantin patsaman witsikätsirqan. Tsënöpam shärikätsiyashqan markata ushayarqannatsu. 9Tsë markachömi Teyta Dios llapan nunakunata pantatsir idiömankunata jukman jukman tikratsirqan. Tsënö pantatsishqanpitam tsë markapa shutin karqan Babel.#11.9 Babel ninanqa pantatsin ninanmi. Mana käyinakurnam nunakunaqa mëtsëpapis witsikar ewkuyarqan.
Sempa tsurinkunapita miraqkuna
1 Crónicas 1.24-27
10Këchömi qellqarëkan Sempa tsurinkunapaq y pëkunapita miraqkunapaqpis.
Diluviu kanqanpita ishkë watatam Sempa tsurin Arfaxad yurirqan. Tsë witsan Sem këkarqan juk pachak (100) watayuqmi. 11Tsurin Arfaxad yurinqanpitaqa Sem kawarqan pitsqa pachak (500) wata masran. Pëpa tsurinkuna warmipis ollqupis kayarqanran.
12Arfaxad kima chunka pitsqa (35) watayuq këkaptinmi tsurin Sala yurirqan. 13Tsurin Sala yurinqanpita Arfaxad kawarqan chusku pachak kima (403) wata masran. Arfaxadpa tsurinkuna warmipis ollqupis karqanran.
14Sala kima chunka (30) watayuq këkaptinmi tsurin Heber yurirqan. 15Tsurin Heber yurinqanpita Sala kawarqan chusku pachak kima (403) wata masran. Salapa tsurinkuna warmipis y ollqupis karqanran.
16Heber kima chunka chusku (34) watayuq këkaptinmi tsurin Peleg yurirqan. 17Tsurin Peleg yurinqanpita Heber kawarqan chusku pachak kima chunka (430) wata masran. Heberpa tsurinkuna warmipis y ollqupis karqanran.
18Peleg kima chunka (30) watayuq këkaptinmi tsurin Reu yurirqan. 19Tsurin Reu yurinqanpita Peleg kawarqan ishkë pachak isqun (209) wata masran. Pelegpa tsurinkuna warmipis y ollqupis karqanran.
20Reu kima chunka ishkë (32) watayuq këkaptinmi tsurin Serug yurirqan. 21Tsurin Serug yurinqanpita Reu kawarqan ishkë pachak qanchis (207) wata masran. Reupa tsurinkuna warmipis y ollqupis karqanran.
22Serug kima chunka (30) watayuq këkaptinmi tsurin Nacor yurirqan. 23Tsurin Nacor yurinqanpita Serug kawarqan ishkë pachak (200) wata masran. Serugpa tsurinkuna warmipis y ollqupis karqanran.
24Nacor ishkë chunka isqun (29) watayuq këkaptinmi tsurin Taré#11.24 Wakin traduccionkunachöqa Térah niyanmi. yurirqan. 25Tsurin Taré yurinqanpita Nacor kawarqan juk pachak chunka isqun (119) wata masran. Nacorpa tsurinkuna warmipis y ollqupis karqanran.
26Taré qanchis chunka (70) watayuq këkaptinran kima tsurinkuna karqan. Pëkunapa shutinmi karqan Abram, Nacor y Harán.
Tarépita miraqkuna
27Këchömi qellqarëkan Tarépa tsurinkunapaq y pëkunapa mirëninkunapaqpis.
Tarépa tsurinkunam kayarqan Abram, Nacor y Harán. Haránpa tsurinmi karqan Lot. 28Ur markanchö tëkäyaptinllaran tëtanpa puntata Haránqa wanukurqan. Tsë markachöqa caldeo nunakunam täräyarqan.
29Abrampa warminmi karqan Sarai. Nacorpa warminnam karqan Haránpa tsurin Milca. Milcapa nananmi karqan Isca. 30Sarai qolloq kaptinmi wawan karqantsu.
31Taréqa yachëkanqan Ur markapitam ewkurqan Canaánchöna täränanpaq. Ur markaqa caldeo nunakuna täräyanqan markam karqan. Canaánman ewkurmi pusharqan tsurin Abramta, willkan Lotta y llumtsïnin Saraitapis. Ëwëkäyanqanchö Harán markaman chëkurnam tsëllachöna täkuyarqan. 32Harán markachö tëkarmi Taré wanurqan ishkë pachak pitsqa (205) watayuq këkarnin.
Markert nå:
Génesis 11: qwhB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2018, Wycliffe Bible Translators, Inc. All rights reserved.
