San Mateo 21

N‑kɨu Jesús Jerusalén

1N‑ka kuyatni‑da xiꞌin Jesús Jerusalén xiꞌin ñuu nani Betfagé. Katuu ñuu jan Xeyuku Tnu Olivo. Ijan n‑tundaꞌa‑ia uu se dakuaꞌa‑ia juaꞌan ijan. 2Xiaꞌan‑ia nuu‑s nduu‑s:

—Juaꞌan koio ñuu ndeꞌa ñaꞌa yaꞌa. Na kɨu koio‑n ñuu ijan jini koio‑n ɨɨn burra ndijun io daꞌya. Nandaxi koio‑n‑tɨ te kandeka‑n‑tɨ kixi. 3Nux jundu jaꞌan: “¿Nakuenda xa daa ka kida‑n?”, te juñaꞌa koio‑n: “Ia kuu Xtoꞌo‑ro, ndoñuꞌu kɨt yaꞌa, te natundaꞌa‑ia‑tɨ ndixi nunuu ka” —kuu Jesús, xiaꞌan‑ia.

4Duꞌa n‑xetnaꞌa xa n‑jaꞌan Ianyuux nuu se n‑jaꞌan nuu ñayiu xa n‑jaꞌan Ianyuux. N‑chidotnuni‑s:

5Juaꞌan koio Sión, te juñaꞌa‑n nuu ñayiu ijan:

“Kundeꞌa xa vaxi se taxnuni nuu‑n.

Kuu‑s ná kuu ñayiu kundaꞌu kukee chi daꞌya ɨɨn burra yodo‑s vaxi.”

6Ijan dada juaꞌan‑s nduu‑s, te n‑ka kida‑s ná n‑taꞌu tniu‑ia. 7Xndeka‑s burra xiꞌin daꞌya‑tɨ n‑ka naxee nuu Jesús. N‑ka xajan‑s daꞌma‑s yata‑tɨ, te n‑ka dakaa‑s‑ia‑tɨ. 8Kueꞌe ñayiu n‑ka taka ijan. Dava‑i n‑ka xajan daꞌma‑i ichi xa jɨn ndodo burru yodo‑ia jan; dava ka‑i n‑ka xaꞌnde daꞌnda yutnu te n‑ka xajan‑i‑tnu ichi juaꞌan‑ia. 9N‑ka kana ñayiu xndijun ñaꞌa xiꞌin ñayiu xndodo nuu nuu‑ia:

Na ndadakaꞌnu‑ro daꞌya dana David.

Naka taꞌu se n‑tundaꞌa ñaꞌa Ianyuux xa vaxi‑s.

Na ndadakaꞌnu‑ro Ianyuux, Ia taxnuni nuu ntdaa ñayiu.

10Nu n‑ka kɨu‑da xiꞌin‑ia Jerusalén kueꞌe ka ñayiu n‑ka taka xa kundeꞌa‑i nax yaꞌa, te ndeꞌe ka kuvaa‑i. Ka xijan tnuꞌu tnaꞌa‑i:

—¿Jundu kuu se yaꞌa?

11Ka xiaꞌan ñayiu xndijun ñaꞌa:

—Se yaꞌa kuu Jesús. Se Nazaret kuu‑s. Se distrito Galilea kuu‑s. Se kachi tnuꞌu ñaꞌa xa n‑jaꞌan Ianyuux kuu‑s —ka kuu‑i, ka xiaꞌan‑i.

N‑xijun Jesús ñayiu ka najueen ka nadiko xyuku nukeñuꞌu Jerusalén

12N‑kɨu Jesús veñuꞌu Jerusalén, te n‑xijun‑ia se ka najueen ka nadiko xtuu nukeñuꞌu jan. N‑ngoneꞌe‑ia mexa ka xetniu se ka nadama tvini ñayiu ka xeꞌen ijan. Dɨuni n‑ngoneꞌe‑ia silla se ka diko data. 13Te n‑jaꞌan‑ia nuu‑s:

—Yodotnuni tnuꞌu Ianyuux: “Veñuꞌu nuu io xa kajan taꞌu ñayiu nuu‑r kuu veñuꞌu yaꞌa, te veꞌe‑r kuu.” Dɨuni yodotnuni tnuꞌu‑ia: “Ka xetniu‑n veꞌe Ianyuux ná ka xetniu ñaduꞌu yau kava.” —Kuu‑ia.

14N‑ka xee ñayiu kuaa xiꞌin ñayiu ka xika yakua veñuꞌu jan, te n‑ndadavaꞌa‑ia‑i. 15N‑ka xini dutu ka kunxaꞌnu xiꞌin se ka tuꞌa vaꞌa ley n‑chidotnuni Moisés xa n‑kida Jesús kueꞌe milagru. Dɨuni xa n‑ka teku‑s xa ka kana sekuechi xiti veñuꞌu jan: “Na ndadakaꞌnu‑ro Ia kuu daꞌya dana David.” Xijan kuu xa n‑ka kiti ini‑s. 16Te n‑ka jaꞌan‑s nuu Jesús:

—¿Ña teku‑n xa ka kana sekuechi yaꞌa u?

Te n‑jaꞌan Jesús:

—Joon, teku‑r. ¿Ñayo‑n n‑ka kaꞌu nuu yodotnuni xa: “Ndadakaꞌnu ñaꞌa koio sekuechi xiꞌin dichi kuechi xiꞌin daꞌya ka xadi a”?

17Te n‑dandoo‑ia‑s. Ijan dada n‑ka ndee‑da xiꞌin‑ia Jerusalén. Juaꞌan‑da xiꞌin‑ia ñuu Betania, te n‑ka ndoo‑da xiꞌin‑ia ijan.

Tnu higo ñatu n‑juun ndeꞌa

18Neꞌe datne kɨu kuu uu n‑ka ngondita ntuku‑da xiꞌin‑ia Jerusalén te n‑kojon‑ia. 19N‑xini‑ia ɨɨn tnu higo yu ichi te n‑xe tuꞌa‑ia‑tnu. Ni ɨɨn higo ñatu n‑niꞌi‑ia chi ñatu n‑juun. Xijan kuu xa n‑jaꞌan‑ia nuu‑tnu:

—Ma uun ka juun higo‑n.

Te danaa n‑yichi‑tnu. 20Nu n‑ka xini daña, se dakuaꞌa ñaꞌa‑ia xa n‑yaꞌa, te n‑ka yuꞌu anu‑da. Te ka xiaꞌan‑da:

—Naka yachi n‑yichi‑tnu.

21Te n‑jaꞌan Jesús nuu‑da ntdaa‑da:

—Xandaa xakuiti xa nux idii vuelta na kukanu ini‑n Ianyuux te ma jɨn tnɨɨ anu‑n, ñadu mee ni xa n‑kida‑r tnu higo kuaꞌa‑n xa kada koio‑n chi nux na juñaꞌa koio‑n tnduu yaꞌa: “Xiko juiin. Juan keé nuu mar”, te daa kuu. 22Davaꞌa nga xa kajan‑n nuu Ianyuux taxi‑ia nux idii vuelta n‑ka kukanu ini‑n‑ia —kuu Jesús, n‑jaꞌan‑ia.

N‑ka xijan tnuꞌu se Israel Jesús nuu jundu n‑tetutniu ñaꞌa

23N‑kɨu‑ia veñuꞌu Jerusalén te n‑dakuaꞌa‑ia ñayiu. Nɨni dakuaꞌa‑ia‑i n‑ka xee dutu ka taxnuni xiꞌin sexaꞌnu ka taxnuni nuu ñayiu Israel. Te n‑ka xijan tnuꞌu‑s‑ia:

—¿Jundu n‑tetutniu ñaꞌa xa kada‑n xa kida‑n? ¿Jundu n‑taxtutniu ñaꞌa xa kida‑n xaꞌa?

24N‑jaꞌan Jesús nuu‑s:

—Dani ruꞌu, na kajan tnuꞌu ñaꞌa‑r ɨɨn xa kajan tnuꞌu ñaꞌa‑r. Nux na jaꞌan‑n nuu‑r xa kajan tnuꞌu ñaꞌa‑r te jaꞌan‑r nuu‑n jundu n‑tundaꞌa ñaꞌa xa duꞌa kida‑r. 25¿Jundu n‑tetutniu Sua xa n‑dajuendute‑s ñayiu? ¿N‑tetutniu ñaꞌa Ianyuux a n‑tetutniu ñaꞌa ñayiu a? —kuu‑ia, xiaꞌan‑ia nuu‑s.

Te n‑ka ndatnuꞌu‑s. Ka xiaꞌan tnaꞌa‑s:

—Nux na juñaꞌa‑ro “Ianyuux n‑tetutniu ñaꞌa”, te kachi‑s nuu‑ro: “¿Nakuenda ña n‑ka jandixa‑n‑sɨ?” 26Xa maxku ndandita ñayiu xyuku yaꞌa nuu‑ro maxku jaꞌan‑ro nuu‑s xa ñayiu n‑tetutniu Sua, chi ntdantuꞌu ñayiu ka jandixa xa Sua n‑kuu se n‑jaꞌan tnuꞌu Ianyuux nuu ñayiu —kuu‑s, ka xiaꞌan tnaꞌa‑s.

27Te ka xiaꞌan‑s nuu‑ia:

—Ña ka xini‑r.

Xiaꞌan ntuku‑ia:

—Dani ruꞌu ma jaꞌan‑r jundu n‑tetutniu ñaꞌa xa duꞌa kada‑r.

N‑kakuneꞌe Jesús uu daꞌya yɨɨ ɨɨn se n‑xo xitu uva

28Te xiaꞌan‑ia ɨnka xa xiaꞌan‑ia nuu‑s:

—N‑xio ɨɨn se n‑xio uu daꞌya yɨɨ. N‑jaꞌan‑s nuu ɨɨn‑s: “Juan kadatniu ndoꞌo nuu ñuꞌu tnu uva‑r vitna.” 29Te xiaꞌan se ijan nuu taa‑s: “Ñaꞌa, ma nkadatniu‑da ijan.” Juini daa n‑jaꞌan‑s, ko n‑natu ini‑s te n‑xe kadatniu naꞌi‑s. 30Dani n‑jaꞌan‑s nuu ɨnka daꞌya yɨɨ‑s. N‑jaꞌan se ijan nuu taa‑s: “Joon, Tata, na jɨꞌɨn‑da”, kuu‑s, xiaꞌan‑s, ko ña n‑xeꞌen‑s. 31¿Nax ka kachi‑n? ¿Ndeda ɨɨn‑s n‑kida xa n‑juini taa‑s? —kuu Jesús.

Ka xiaꞌan‑s:

—Se kiꞌna ka n‑teku xa n‑jaꞌan taa‑s.

Xiaꞌan Jesús nuu‑s:

—Na jaꞌan ndaa‑r xa kueꞌe ka se ka xijan tvini nandajan gobierno xiꞌin ñadɨꞌɨ ka diko mee‑ña kɨu tnaꞌa nuu ñayiu ka jandixa xa taxnuni Ianyuux nuu‑i dada ndoꞌo. 32N‑jaꞌan Sua nuu‑n nax io xa jandixa‑n xa maxku kundido kutau ka‑n kuechi n‑ka kida‑n. N‑ka jandixa se ka xijan tvini nandajan gobierno xiꞌin ñadɨꞌɨ diko mee‑ña xijan, ko mee‑n ñaꞌa. Juini n‑ka teku‑n xijan, ña n‑ka natu ini‑n xa n‑ka kida‑n kuechi ni ña n‑ka jandixa‑n xa n‑jaꞌan‑s.

Se loko n‑ka xo xitu ñuꞌu tnu uva ɨɨn se kuu xtoꞌo ñuꞌu

33ʼKunini koio ɨnka ntuku tnuꞌu kandee na jaꞌan‑r. N‑xio ɨɨn se n‑dandee tnu uva nuu ñuꞌu‑s. N‑xani‑s yuꞌa xa n‑chikurali‑s ñuꞌu tnu uva jan. N‑kidavaꞌa‑s ɨɨn nuu kiꞌni‑s ndudi uva jan. Dɨuni n‑kidavaꞌa‑s ɨɨn veꞌe dujun. Te n‑xiaꞌan‑s ñuꞌu‑s se kundee xiꞌin‑s tnu uva jan. Ijan dada juaꞌan‑s ɨɨn nuu xika. 34N‑xee yoo xichi uva, te n‑tundaꞌa‑s se ka xinokuechi nuu‑s xa na jɨn nukaꞌnde dava‑s xiꞌin se xndee xiꞌin‑s tnu uva uva n‑juun jan. 35Nu n‑ka xee‑s ijan, te n‑ka tnɨɨ ñaꞌa se xndee xiꞌin‑s tnu uva jan. N‑ka jani‑s dava‑s. Dava‑s n‑ka xaꞌni ñaꞌa‑s. Dava‑s n‑ka jani‑s yuú. 36Ijan dada n‑tundaꞌa se kuu xtoꞌo ñuꞌu jan kueꞌe ka ntuku se ka xinokuechi nuu‑s dada xakiꞌna nuu te dani n‑ka kida ñaꞌa se xndee xiꞌin‑s tnu uva jan. 37Ndijun nga n‑tundaꞌa‑s daꞌya yɨɨ‑s xa na jɨꞌɨn‑s nuu se ijan xa na kaꞌnde‑s xiꞌin‑s uva jan, te n‑jaꞌan mee n‑jaꞌan ɨɨn‑s: “Koo koio‑s xañuꞌu nuu daꞌya yɨɨ‑ro.” 38Nu n‑ka xini se xndee xiꞌin‑s tnu uva jan xa n‑kuyatni daꞌya yɨɨ‑s ijan, te ka xiaꞌan tnaꞌa‑s: “Dɨu‑s kendoo xiꞌin ñuꞌu taa‑s. Neꞌe koio na kaꞌni‑ro‑s na kuaꞌa na ndoo‑ro xiꞌin taꞌu‑s.” 39Te n‑ka kineꞌe ñaꞌa‑s yuꞌu ñuꞌu tnu uva jan, te n‑ka xaꞌni ñaꞌa‑s. 40Na nangondita xtoꞌo ñuꞌu tnu uva jan, ¿Nax kada‑s se xndee xiꞌin‑s tnu uva jan? —kuu Jesús, xiaꞌan‑ia.

41Te ka xiaꞌan dutu ka taxnuni xiꞌin sexaꞌnu ka kunxaꞌnu n‑ka xee ijan:

—Kaꞌni‑s se unu loko ijan. Ma kundaꞌu ini‑s‑sɨ. Juñaꞌa ntuku‑s ñuꞌu‑s ɨnka se kundee xiꞌin‑s tnu uva jan. Se ijan na kaꞌnde dava xiꞌin‑s uva yoo tnɨɨ koio‑s —kuu‑s, ka xiaꞌan‑s nuu Jesús.

42Te xiaꞌan‑ia nuu‑s:

—¿Ta kaꞌu koio ka‑n tnuꞌu Ianyuux duꞌa yodotnuni a?:

Ná kuu yuú ña xe ini se ka kidavaꞌa veꞌe kuu‑s.

Yuú ña n‑ka xe ini se ijan n‑ndunuu yɨtnɨɨ nama veꞌe.

N‑kida Ianyuux, Ia kuu Xtoꞌo‑ro, xa na jini‑ro xa ña uu n‑xini‑ro.

43Xaxeꞌe xa duꞌa yaꞌa ma taxnuni koio ka‑n nuu ñayiu ka jandixa xa taxnuni Ianyuux nuu‑i, te kada‑r xa ñayiu ña ka kuu ñayiu Israel taxnuni nuu ñayiu kɨu tnaꞌa nuu ñayiu ka jandixa xa taxnuni Ianyuux nuu‑i. Ñayiu ijan kada xa taꞌu tniu‑r. 44Ñayiu na jungava ndodo nuu yuú ijan, kukuechi‑i, te nux junkava ndodo ñaꞌa yuú jan, dandiꞌi ñaꞌa‑i —kuu Jesús, xiaꞌan‑ia.

45Nu n‑yaꞌa n‑ka xo nini dutu ka kunxaꞌnu xiꞌin se fariseu tnuꞌu ijan, te n‑ka kutnuni ini‑s xa dɨu‑s n‑kakuneꞌe ñaꞌa Jesús. 46Te n‑ka nduku ini‑s xa tnɨɨ‑s‑ia te kandeka‑s‑ia jɨꞌɨn nuu juxtixia xa tekuechi neñuu‑s‑ia, ko n‑ka yuꞌu‑s nuu ñayiu xyuku ijan chi ka jandixa‑i xa tnuꞌu Ianyuux jaꞌan‑ia.

Markert nå:

San Mateo 21: xtd

Marker

Del

Kopier