Génesis 16
16
Ismael yurishqan
1Abrampa warmin Sarai qoluq karmi wawaynaq karqan. Saraipa ashmayninmi Agar jutiyuq jipash karqan. Pay karqan Egiptupitami. 2Abramtami Sarai nirqan: <<Qoluq kanäpaqmi Tayta Dios destinamash. Sayno kaykaptïqa wamrayuq kanäpaq ashmaynï Agarwan punuykulay. Paycho suriki yuriptinqa wawätanömi ashmakushaq>>.
Sayno niptinmi Abram awnirqan.
3Awniptinmi Egiptupita apamushqan ashmaynin Agarwan Abramta Sarai punusirqan. Say karqan Canaáncho chunka watana Abram taykaptinmi. 4Abramwan punur qeshyaq tukuskirmi Agarqa patrönan Saraita mamatupayta qalaykurqan.
5Saymi Abramta Sarai nirqan: <<Agarwan pununaykipaq kikï nishqäpita qeshyaq rikakur manakaqman churamänanpaq qammi jusayuq kaykanki. Sayno kashqaykipita Tayta Dios juzgashunki>>.
6Sayno niptinmi warmin Saraita Abram nirqan: <<Ashmaynikiqa makikichömi kaykan. Sayno kaykaptinqa qampitanachir imata ruraptikipis>>.
Sayno niptinmi Saraiqa ashmaynin Agarta mana puëdishqankunata rigorwan rurasir qalaykurqan. Sayno nakasiptinmi Agarqa qeshpir aywakurqan.
7Sayno qeshpikuykaptinmi Tayta Diospa angilnin sunyaq jirkacho kaykaq pukyu nawpancho yuriparqan. Say pukyu karqan Shur partipa aywana nänichömi. 8Saychömi ángel tapurqan: <<Saraipa ashmaynin Agar, ¿maypitataq shamuykanki? Y ¿maypataq aywaykanki?>>
Saymi Agar nirqan: <<Patrönä Saraipitami qeshpikuykä>>.
9Niptinmi Tayta Diospa angilnin nirqan: <<Patrönayki Saraiman kutiykur pay mandashushqaykita imatapis ruray>>.
10Saynöpis nirqan:
<<Wawaykipita miraqkuna yupaytapis mana atipaypaqmi mirayanqa.
11Olqu wamratami qeshyaq kaykanki.
Tayta Diosmi wiyashushkanki lakikur manakushqaykita.
Saymi yuriptin wawaykipa jutinta churapanki Ismael kananpaq.#16.11 Ismael ninanqa Tayta Dios wiyan ninanmi.
12Say wawaykiqa imayka chucaru cawallunömi kanqa.
Pïmaywan pelyaptinmi pïmaypis chikir contran sharkuyanqa.
Ayllunkunawanpis chikinakurmi kawanqa>>.
13Kikin Tayta Dioswan parlashqanta tantiyarmi Agar nirqan: <<Rikamaqnï Diostami rikashkä>>.
Saypitami Diospa jutinta churaparqan El-Roí#16.13 El-Roí ninanqa Rikamaq Tayta Dios ninanmi. Sayno jutinta churaparmi Diospa mas juk jutinta churarqan. nir. 14Saymi say pözupa jutinta churaparqan Beer Lahai-Roí jutin kananpaq.#16.14 Beer Lahai-Roí ninanqa Kawaykaq Rikamaqpa Pözun ninanmi. Say pözuqa kaykan Cadespita Beredman päsaq nänichömi.
15Kutiykurnami Abrampa surinta Agar wacharqan.#Gál. 4.22. Yuriykuptinmi Abram jutisirqan Ismael jutin kananpaq. 16Ismael yuriptin Abram kaykarqan puwaq chunka soqta (86) watayuqmi.
Markert nå:
Génesis 16: qvhB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2003, Wycliffe Bible Translators, Inc. All rights reserved.
