Mateo 6

Utsibo nashunte chiaid

1Adshumbic abi macuësh tapa poctse tsadquin Esusën naden chuibampanëdash: Aton matses ismenuenuidi utsibo nashunquid Nuquin Papan bëdambuen istiapimbo icquin bëdamboshëcquid menetiapimbo iqueque. Utsibo nashunnu, queshun utsibo ismenquio icquin nata.

2Mimbi atona nibëdquido meniaid utsibo chienda. Utsibo bëdambocquid danmianquidën nacbimbuen nainda. Adquido Nuquin Papan Chiaid chuibante shubun puduedshun ambi nabued aton matses chiendac. Adembidi matses dadpen capuacnoshon ambi nabued chiendac: Mabi bëdambocquid nec, canu, queshun. Aidon Nuquin Papan menete bëdamboshëcquid bedtiapimbo iquendac. 3Atona nibëdquido menequin utsibo ismenda. Meneshun: Menebanombi, quequin utsibobëta mibëd icquidquio chienda. 4Adsho issun mimbi utsibo ismenquio icquin nashunaid tantiaquid icquin Nuquin Papan mibi bëdambuen isquin bëdamboshëcquid menendac, quequin Esusën chuipanëdash.

Nuquin Papa chiannete chiaid

(Duc. 11.2-4)

5Naden Nuquin Papa chiannetetsen Esusën chuibampanëdash: Bëdambo icquid danmianquidën nacpaden nainda. Aidon Nuquin Papan Chiaid chuibante shubun puduedshun utsibo tantiamenuenuidi nidtoshon cumapenec onquequin Nuquin Papa chiannepec. Adash umanuc puduenanec utsibo iccuededacno nidshun matses dadpen tantiamenuenuidi padpiden adembidi Nuquin Papa chiannec. Adquid aton matsesën: Bëdambo iquec, canubi Nuquin Papan: Bëdambo iquec, catiapimbocquin aido bëdamboshëcquid menetiapimbo iquendac. 6Mimbi aden chienda. Utsibo ismenquio icquin Nuquin Papauidtsëqui tantiaquin mimbentsëqui chianneta. Aden chiannequid mibi icsho Nuquin Papan mimbi utsibo ismenquio icquin naidtedi tantiaquid icquin mibi bëdamboshëcquid menendac.

7Nuquin Papa chuiquin bëdambuen chianneta. Nuquin Papa tantiesabon ambi tantiaid abibidi chuibud chuibudacbimbuen Nuquin Papa chuibudenda. Iuenquio chuibudac nuqui tantiabuedën nuqui nashuntsiash. Padenquio icac nuqui nashunenquio ictsiash, queshun Nuquin Papa tantiesabon iuen aiduidi chuibudacbimbuen chienda. 8Aden chienquio icquin Nuquin Papa chianneta. Mimbi chiabi: Adopashuni. Aid nibëdnuc uënësebi. Utsi icnuc bëdambo ictsiabi, quequin mibitedishun otacquio tantiaid Nuquin Papan tantieque. 9Naden mibitedishun Nuquin Papa chuita.

Papa, bëdamboshë icquidquio yec mibi abucquimboshë tabadec.

Adquid icsho matses abitedishunquio: Ubi uaquid utsi nibëdec. Mibi bëdamboshëcquid nec, quequin ma mibi tantiapanuna, papa.

10Mibi abentsëcquiobi Cun Icbombo nec, queshun mibi yacnoshon mibëd icquidonquio mimbi chiacpadombuenuidi naic.

Adombuembidi nidaidënshun matses abitedishunquio ma mibi tantiaquin napanuna, Papa.

11Bunmianenquio icquin badiadquidën badiadquidënquien cun pete icmeta.

12Ubi chieshënquidon naid tantienquio yec ubi bëshunacpadecbidi umbi icsambuen nabued tantienquio yec bëshunta, Papa.

13Adembidi Mayan Icsa Satanasën tanquin ubi icsamete bunmequin: Iuanu, casho

ubi cudasquin mënchicta, Papa.

Mibiuidtsëqui nadatiambocquid yec bëdamboshëcquid yec nibëdantiapimbocquidquio mibi nec, Papa, Amen, quequin Nuquin Papa chianneta, quequin Esusën chuibampanëdash.

14Adashic nadpanëdash: Utsibon chieshënaqui bëdambuen ista. Cuidnanec chieshënnanenda. Mibi utsin icsambuen nabued tantienquio yec bëshunsho isash Nuquin Papa mibitedishun icsambuen naid tantienquio yec bëshunendac. 15Cuidnanec chieshënnansho isash Nuquin Papa mimbi icsambuen naid tantienquio yec bëshuntiapimbo iquendac, quequin Esusën chuipanëdash.

Buna mëmunquin nate chiaid

16Adshumbic buna mëmunte Esusën naden chuipanëdash: Tantia. Nuquin Papauidtsëqui tantianu, quequin buna mëmunquid chuinu. Muaquidën nacbimbuen ismenda. Muaquido: Buna mëmunquid nec, aton matses camenuec manimanictsëcquio yec nënquidbitsëcquiec mamënenquio iquec. Adec buna mëmunquid tanec muaic. Adsho issun matsesën bëdambocquid dannubi Nuquin Papan: Icsambo icquid nec, queshun bëdamboshëcquid menetiapimbo iquendac. 17Mibitedishun: Buna mëmunnu, queshun Nuquin Papambo tantiaquin nata. Utsibon tantianushe, queshun bëdambuen min manëdaid shueshcata. 18Aden bëdambuen manëdaid shueshcaid issun: Buna mëmunec nec, utsibon mibi catiapimbo iquendac. Matsesën isacmaid icquin Nuquin Papambien: Ubiuidtsëqui tantianuen naic, quequin tantiendac. Adshun mimbi utsibo ismenquio icquin naidtedi tantiaquid icquin mibi bëdamboshëcquid menendac, quequin chuibampanëdash Esusën.

Nuquin Papa yacno tabadte bunquiota, quiaid

(Duc. 12.33-34)

19Adshumbic padpiden Esusën naden chuibampanëdash: Mimbi nidaidënshun bedaid dayun uateuidi tantienda. Dayun uatequid nadquid nec. Chodquetequid yec macun pequin icsa uatequid yec shënibudtequid yec utsibon ampeshuntequid yec quec nibëdantequid neque. Adquiduidi tantienda. 20Aden tantienquio icquin icsaisambo tantiata. Nuquin Papambo tantiec aidbëd tabadte bunquin aidën chiacpadombuen nata. Chodquetiapimbo icquid yec macun pequin icsa uatiapimbocquid yec shënibudtiapimbo icquid yec ampeshuntiapimbo icquid yec quec abuc Nuquin Papa yacno iqueque. Aidquio tantiata. 21Utsibo abi bunaiduidi tantiec tabadnubi Nuquin Papabëd tabadte tantiaquin aidën chiacpaden nabanec tabadta, quepanëdash Esus.

Bëdambuen tantiate chiaid

(Duc. 11.34-36)

22Adshumbic abi macuësh tapa poctse tsadquin utsitsen Esusën naden chuiuapanëdash: Min tantiaten bëdambuen tantiaquin Nuquin Papa tantiaquiec mitsanauidi tantienquio yec mibi bëdambuec tabadendac. 23Pacuënnëdacbimbuen Nuquin Papa tantienquio yec mitsanauidi tantiec ¿bëdambuecta mibi tabadpatsia? Padenquio. Adec mibi icsambuec tabadtsiaque. Adenda, quequin Esusën chuipanëdash.

Bedteuidi tantienda, quiaid

(Duc. 16.13)

24Adshumbic naden Esusën chuipanëdash: Adecbidi chuiquid daëd icnuc aid daëdshun namiaid mibi ictiapimbo iquec. Abentsëcshun chiaiduidi tantiaquin utsin chiaid nainquiocquin mimbi aid chieshënec. Adquiobidi piucquid bedteuidi tantiaquid icquin Nuquin Papan chiacpadombuen mimbi natiapimbo iquec, quequin Esusën chuipanëdash.

Nuquin Papan abi tantiaquido dayun uaid

(Duc. 12.22-31)

25Adshumbic Esusën padpiden naden chuipanëdash: Umbi aden chuibued tantiash natiec tabadenda. ¿Atotsimbi pepeba? ¿Atotsimbi acpeba? ¿Mitsicquidibi dasiuidpeba? quequin min dada bëdambo icmeteuidi tantiec tabadenda. Bëdambuec tabadnu, quequin petequiduidi tantienda. Adembidi dashcute dasiuidteuidi tantienda. 26Uicchun mimbi abuc capusho isaidën ambi cute ëshë siac bacuëacsho chenquio iquec. Adecbidi ambi pete dayun uatequid shubumpi nibëdec. Adquid icshobi Nuquin Papan aton pete bedmec. ¿Aden uicchun bëdiactsëc tantiaquimbi matses tantiaquidquio icquin mibitedi pete bedmenquioda icpadic? Adquid icquin Nuquin Papan mibi nashunquin min pete icmeque. Natiec tabadenda. 27Adec mitsanauidi tantiec natiec tabadnubi mibi uënëste uëshë chonoc: Padi, udictsëcuësh uënësebi, ¿quecta mibi icpe? Padenquio.

28¿Atotsibi dasiuidpeba? quec mibitedi natiec tabadeque. Tantia. Chuinu. Cute bacuëec tuashquiaid bëdamboshë isadec, quepec matses. Adec bëdamboshë isadquid ¿ambibi bidicashun daëdcaidta dasiuidpec? Adecbidi ¿Abibi dasiuidtsashta bëdamboshë isadpadic? Padenquio. Nuquin Papan uacpadequi nec. 29¿Cute bacuëec tuashquiaid bëdamboshë isadquidbimbuecta nuquin tsusedpa chuiquid tapa Sadomon cuëmëdquidën dashcute icpampic? Padenquio. Cute bacuëec tuashquiaidien uditsëc bëdamboshë isadpec. 30Adec cute bacuëec tuashquiaid bëdamboshë isadbuedi badedquio sequiacsho nëdëncatequid nec. Adquid icnuc ¿ambi uaido mibitedi icsho Nuquin Papan mibi dasiuidte bedmenquioda icpadic? Ai, mibi dasiuidte icmeque. Natiec tabadenda. Mitsanauidi tantiec natiec tabadquin Nuquin Papa bëdiactsëc mimbi tantiatseque. 31Natiec tabadec: ¿Atotsimbi pepeba? ¿Atotsimbi acpeba? ¿Mitsicquidibi dasiuidpeba? quec tabadenda.

32Nuquin Papa tantiesaboen abi bunaiduidi tantiec tabadec. Adquido icnubi mibitedishun naden tantiata. Ambia: Cuna nibëdec quequin umbi tantiaid tantiaquidquiocquin Nuquin Papan ubi icmeshunec, quequin tantiec tabadta. 33Adembidi: Nuquin Papan namiacno tabadtequid nebi, quequin tantiaquin aidën chiacpaden naic tabadta. Aden abi tantiaquid icquin abi chuisho mibi bedmendac. 34Ubi adsho tantiash badiad utsi caic: Aid badiadën ¿atotsi icpeba? quec natiec tabadenda. Aid badiadën Nuquin Papan ambi tantiacpadombuen mibi nametsiashe. Nëid uëshëmbi: Naden naimbi, quequin tantiec natienquio yec tabadta, quequin Esusën chuipanëdash.

Markert nå:

Mateo 6: mcfNT

Marker

Del

Kopier