Luk 20
20
Isar kemotar babute suwal
(Moti 21:23–27; Mark 11:27–33)
1Ek din Isaye dórmogórot manušzon okkolore šikka der edde bala hóbor tobolig gorer. Hen šomot ḍõr imam okkol, alem okkol edde bura murobbi okkol hitara beggune fũwati ai Isare hodde, 2"Ãrare ho, tũi har kemota loi in goror? Tũware ei kemota diye de hiba honnuwa?" 3Isaye hitarare hodde, "Ãi o tũwarare ekkan hota suwal goijjum. Ãre ho: 4Yahyar torikotor gusol, hiyan ki behostottu naki mainšottu?"
5Toi hitara ekzone ekzon loi mošora gori hodde, "Zodi hoi, 'Allaro torfottu,' hen oile hite hoibo, 'Toile tũwara Yahyare biššaš ka no goro?' 6Ar zodi hoi, 'manušor torforttu,' toile mainše ãrare fattor maribo, kiyollahoile mainše Yahyare nobi mane."
7Hetolla hitara endilla zuwab diye, "Ãra hoi no fari hontu."
8Toi Isaye hodde, "Toile ãi o ki kemotaye ei šob gorir hin tũwarare no hoiyum."
Mirazdar edde ãngur ketir ošot ailla
(Moti 21:33-46; Mark 12:1-12)
9Tarfore Isaye mainšore ei mesal kahanigan howa šuru goijje: "Hono ekzon mainše ekkan ãngur keti goijje. Hiyan saša okkolore lagaiyore lamba ṭaimolla hite oinno dešot giyegoi. 10Ãnguror ainda zehon aišše, hite hitar gular bag loi anibolla ekzon gulamore oi saša okkolor hãse defeṛaiye. Kintu hitara he gulamware mar doir goijje edde hitare hali hate dũrai diye. 11Bade malike ar ekzon gulamore defeṛaiye, kintu hitara hitare o mar dor gori edde ofoman gori hali hate bidai diye. 12Hendilla hite tisera ekzon gulamore o defeṛaiye, kintu hitara hitare o mari reza reza gori baire felai diye.
13 "Toi ãngur ketir giros hodde: 'Ãi ki goijjum? Ãi ãr adoijja fuware defeṛaiyum, oitofare hitara itare šorman goribo.'
14 "Kintu saša okkole hitare deki ekzone ekzonore howa hoi goredde: Ite oilde mirazdar, aiyo, ãra itare mari felai, toi mirazgun ãrar oi zaiboi. 15Bade hitara hitare ãngur ketor baire loi zai mari felaiye.
"Ãngur ketir girose hitarare loi ki goribo? 16Hibaye zai ei saša okkolore furai felaibo edde ketigan oinno mainšor hatot dibo."
Ei hota funi mainše hodde, "Endilla no ok!"
17Kintu Isaye uzu hitarar mikka suk firaiyore hodde, "Toile endilla ze leka ase hiyanor mani ki?
"'Ze fattor raz mistiri okkole batil goijje,
hiba i beši dorhari fattor oi uiṭṭe!'
18 He fattoror uwore ze foribo, hite bangi ṭura ṭura oi zaiboi edde zar uwore he fattor foribo, hite guri oi zaiboi."
19He šomot alem okkol edde ḍõr imam okkole Isare doitto saiye, kiyollahoile hitara buzi faijjil ze, oi kahanigan hitarar berudde hoiyede. Kintu hitara mainšore ḍoraiye.
Hazna diyar babute suwal
(Moti 22:15-22; Mark 12:13-17)
20Hetolla hitara Isare suke suke raikke. Ar hitara Isare šašon goroya bisar šoktir hatot tuli di farefan hoekzon spai defeṛaiye. He spai okkole bed dori Isar sarme forhesgar boinne, zene hitara Isar hotattu Isare gollot dori fare. 21Toi hitara Isare fusar goredde, "Huzur! Ãra zani, õne zin ho edde šikka do hin ṭik, õne honokiyor uzu ṭan no goro, kintu soiyi bafe Allar rastar babute šikka do. 22Ãrare hosai, Romor badšare hazna diya iyan ãralla ṭik ki no?"
23Kintu Isaye hitarar salaki buzi fari hodde, "Ãre ekkan rufar foiša deho. Eṛe har foṭo edde nam ase?"
24Hitara hodde, "Romor badšar"
25Toi Isaye hitarare hodde: "Toile zin zin badšar hin badšare do, ar zin zin Allar hin Allare do."
26Henot hitara manušor sarme Isar hotat hono šer tuwai no fa, bolke hitara Isar zuwab funi tajjuf oiye edde suf gori taikke.
Uwafes zindar babute šikka
(Moti 22:23-33; Mark 12:18-27)
27Hodun Sadduki dolor manuše Isar hãse aišše, zara hono uwafes zinda nai hoito. 28Hitara Isare hodde, "Huzur, Nobi Musaye ãralla leki giye, hono ekzonor bái zodi fuwain no owaite bouwore raki mori zagoi, toile hitar báiye he bouwore biya goribo, edde nizor báiyolla bongšo baraibo. 29Ehon, hãt bái ase ek górot. He ḍõr báiye biya goijje, kintu fuwain no owaite mori giyegoi. 30Hitar nisor ḍõr báiye hibare biya goijje, 31tarfore tisera zone edde hendilla hãtozone biya goijje. Hitara beggune fuwain no owaite no owaite mori giyegoi. 32Šeše he mayafuwawa o mori giyegoi. 33Ehon, hitara zẽtte uwafes zinda oibo, hitarar butottu hiba har bou oibo? Hibarede hãtozone biya goijje."
34Isaye zuwabe hodde, "Ei duniyair mainše biya gore edde biya difele. 35Kintu zarare he duniyai edde mora okkolor butottu he uwafes zinda oibar laikka boli gona oiye, hitara biya o no gore ba biya o no de. 36Kiyollahoile hitara ar mori no fare. Hitara firista okkolor ḍoilla. Hitara Allar góror fuwain, zarare morattu uwafes zinda gora oiye. 37Kintu mora okkol uwafes uṛibode Musa nobir oin zoledde zongolor kahanit dehaiye, kiyollahoile Musa nobiye Mabudore, 'Ibrahimor Allah, Isakor Allah edde Yakubor Allah boli hoiye.' 38Hiba mora okkololla Allah no kintu zinda okkololla, kiyollahoile Mabudor šaikkat hitara beggune zinda ase."
39Hetunot hozon dórmiyo aleme hodde: "Huzur, õne bala zuwab diyo!" 40He oite Sadduki dole ar hono hota suwal goitte šahoš no fa.
Mosi honnuwa
(Moti 22:41-46; Mark 12:35-37)
41Isaye hitarare hodde, "Mainše ken goriyore Mosire Daudor fut hoi fare? 42Daud nize Zobur kitabot hor:
"'Mabude ãr Malikore hodde:
"Ãr ḍen ḍakottu boi
43 zetodin ãi tor dušmon okkolore
tor ṭengor tolat no raki."'
44 Otoso Daude hibare 'Malik' ḍaker; toile hiba kengori hibar fut oi faribo?"
Alem okkolottu hũšiyar
(Mark 12:38-40)
45Manuš okkole funedde šomot, Isaye sahabi okkolore hodde, 46"Alem okkolottu hũšiyar! Hitara lamba lamba hor findi beraito sa edde haṛot bazarot mainšor solam muzolišhanar usol zagat edde mela šobar barik zagat buware foson gore. 47Hitara rari okkolor gór dokol gore ar mainšore dehaibolla lamba gori duwa gore. Hendilla mainše bisarot aro beši šasti faibo."
Markert nå:
Luk 20: rhgB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Wycliffe Norway
