Luke 19
19
1ယ့ၣ်ရှူးလဲၤနုလီၤဝဲလိ ဝ့ၢ်ယရံၤဃိဘျီး လဲၤခီဂၤဝဲဒၣ်လိ. 2ဖဲနံၤဘၠီၣ်ဃ့သွဲအခွိၣ်အိၣ်ဝဲတဂၤ, အမံၤမဲၢ် စီၤစးဃဲလိအထူးတီၤနဲၢ်လိ. 3အဝဲဒၣ်ဂုာ်ကျဲးစၢၤဒ်သိး အကထ့ၣ်ဘၣ်လိယ့ၣ်ရှူးမဲၢ်မတဂၤလဲၣ်နဲၢ်လိ. လၢၤအဝဲမဲၢ်ဘၠီၢ်လိ အနီၢ်ဖုၣ်တဂၤဘျီး ဘၠီၣ်ထီဖူၣ်ထီခၠၢအိၣ်ဘျၢသါအဃိ, ဘျီးထ့ၣ်ယ့ၣ်ရှူးတသ့းဘၣ်. 4လိတၢ်နံၤအဃိ, အဝဲဒၣ်စံၣ်လိဘၠီၣ်အမံၤညါဘျီး လဲၤထီၣ်ဝဲလိ သွိးဝံာ်ဒၢၣ်တခွိၣ်အလိၤ, ဒ်သိး အကထ့ၣ်ယ့ၣ်ရှူးလိအကဟဲဝဲလိ ကျဲၣ်အဝဲအံၤနဲၢ်လိ. 5ဖဲယ့ၣ်ရှူးဟဲတုၤလိ တၢ်လီၢ်အဝဲနံၤ, အဝဲဒၣ်ကွၢ်ထီၣ်တၢ်ဘျီး စံးဘၣ်စီၤစးဃဲ, ‘စီၤစးဃဲဧၢ, ဟဲက့ၤလီၤကမ့းကမွိတကဲၢ်. ဒ့းအ့ၤ မုနံၤခီၣ်ယကဘၣ်လဲၤအိၣ်လိ နဟံၣ်လိ.’ 6စီၤစးဃဲစံၣ်လီၤဝဲကမ့းကမွိဘျီး တူၤလိၤခီၣ်ဆၢအီၤလိ တၢ်သးခူဖးဒွိၣ်အပူၤလိ. 7ဘၠီၣ်ထီဖူၣ်ထီခၠၢလိအထ့ၣ်ဘၣ်တၢ်မၤအသးတမံၤအံၤ ခဲလုၤကဒူးကဒ့ၣ်နီၢ်တၢ်ဘျီး စံးဝဲ, ‘ဘၠီၣ်တဂၤအံၤလဲၤကဲၣ်လ့ပှၤတမှံၤလိဘၠီၣ်တၢ်ဒဲးဘးဖွိတဂၤအဟံၣ်လ့.’ 8စီၤစးဃဲဂ့ထ့ဘျီး စံးဘၣ်ကစၢ်, ‘ကနၣ်တကဲၢ်, ကစၢ်ဧိ, ယတၢ်စုၣ်လီၢ်ခီၣ်ခွိၣ်လိ အအိၣ်လါယၤတဝၣ်နဲၢ် ယကဟ့လီၤဝဲလိ ဘၠီၣ်ဖှီၣ်ဘၠီၣ်ယၤအအိၣ်လိ. ဘျီးယမဲၢ်အီၣ်ကဘျံးကဘျၣ်ဘၠီၣ်တဂၤဂၤအတၢ်ဖွိတၢ်လ့ၤနဲၢ်, ယကဟ့ခွိၣ်ခံအီၤလွံၢ်စးလိ.’ 9ယ့ၣ်ရှူးစံးဘၣ်ဝဲ, ‘မုၢ်တနံၤအံၤ, တၢ်အုၣ်က့ၤခီၣ်က့ၤဟဲတုၤလ့လိဟံၣ်တဖျၢၣ်အံၤလ့. တၢ်ဂ့ၢ်ဒ့းအ့ၤဘၠီၣ်တဂၤအံၤနဲၢ်နဲၢ်မဲၢ်ဝဲစီၤအၤဘြၤဟၣ်အစၢၤအသွဲၣ်လိ. 10တၢ်ဂ့ၢ်မဲၢ်ဒ့းအ့ၤ, ပှၤကညီဖွိခွါ ဟဲဒ်သိးအကချုနဲၢ်ဘျီး အုၣ်က့ၤခီၣ်က့ၤဘၠီၣ်လီၤမၢ်တလိၣ်လိ.’ 11ဟဲဘၠီၣ်ထီဖူၣ်ထီခၠၢတလိၣ်ကနၣ်တၢ်ကတိၤအဝဲအံၤနဲၢ်, ယ့ၣ်ရှူးကတိၤ, ဘျီးစံးဘၣ်အဝဲဝီၤလိ တၢ်ကတိၤဒိတထ့ၣ်လိ. ဖဲဆၢကတီၢ်အဝဲအံၤနဲၢ်, အဝဲဒၣ်လဲၤဘူးကတုၤဘၣ်နီၢ်အသးလိ ဝ့ၢ်ယရူၤရှလ့ၣ်ဘျီး အဝဲဝီၤဆိကမိၣ်ဝဲလိ ကစၢ်ယွၤအဘီအမုၢ်ကအိၣ်ဖျါထီၣ်ဝဲခဲအံၤနဲၢ်လိ. 12လိတၢ်နံၤအဃိ အဝဲဒၣ်စံးဝဲ, ‘ပဒွိၣ်အိၣ်ဝဲတဂၤလိ အလဲၤလိ ကီၢ်ဖါယံၤတဘ့ၣ်, ဒ်သိးအကဘၣ်တၢ်ဒွိးကဲထီၣ်အီၤလိ စီၤပၤဝံၤဘျီး ကဟဲက့ၤလိဟံၣ်နဲၢ်လိ. 13တချုဒံးလိ အဝဲဒၣ် ဟးထီၣ်နဲၢ်, အဝဲဒၣ်ကိးအခ့အပှၤအဂၤတဆ့, ဘျီး ဟ့အီၤလိ ထူဘ့ၣ်ဘၣ်တဂၤတဘ့ၣ်ဘျီး စံးဘၣ်အဝဲဝီၤ, ဖဲယတအိၣ်အဆၢကတီၢ်နဲၢ်, လဲၤကူလဲၤကၤကွၢ်တၢ်လိ တၢ်အဝဲအံၤဘျီး သုကမၤန့ၢ်တၢ်ထဲလဲၣ်ခိလဲၣ်နဲၢ်ကွၢ်တကဲၢ်.’ 14တၢ်မၤအသးလိ အဝဲဒၣ် အထံဖွိကီၢ်ဖွိတလိၣ်သးဒွိၣ်အီၤ, သတးဘျီး အဝဲဝီၤ ဆှၢလီၤဘၠီၣ်စိၤတၢ်ကစီၣ်တလိၣ်ဒ်သိးအကစံးဝဲ, ‘ပတအဲၣ်ဒိးလိ ဘၠီၣ်တဂၤအံၤကကဲၣ်ပစီၤပၤဘၣ်’ နဲၢ်လိ. 15ပဒိၣ်တဂၤအံၤ ဘၣ်တၢ်ဒွိးကဲၣ်ထီၣ်အီၤလိ စီၤပၤ, ဘျီး အဝဲဒၣ်ဟဲက့ၤလိ. တဘျီဃီ, အဝဲဒၣ် ဟ့လီၤအကလုၢ်လိ အခ့အပှၤလိ အဝဲဟ့တီၢ်ဝဲထူတဘ့ၣ်ဘၣ်တလိၣ်, ဒ်သိး အကဟဲပၤဖျါထီၣ်အသးလိ အမံၤညါ, ဘျီး အဝဲဝီၤ မၤန့ၢ်တၢ်ထဲလဲၣ်ခိလဲၣ်နဲၢ် အဝဲဒၣ်ကသံညါ ဝဲအဂီၢ်လိ. 16ဘၠီၣ် အဆိကတၢၢ်တဂၤ ဟဲဘျီး စံးဝဲ, ‘ကစၢ်ဧိ ယမၤန့ၢ်ဘၣ်အၣ်ထီၣ်ထူအဘ့ၣ်တဆံခီဖျိ ယသူထူတဘ့ၣ်လိနဟ့ယၤနဲၢ်လိ. 17‘နမၤတၢ်ဂ့ၤနီလိ.’ အဝဲဒၣ်စံးဘၣ်အီၤ, ‘နမဲၢ်တၢ်ခ့တၢ်ပှၤလိ အဂ့ၤတဂၤလိ. မဲၢ်လိနသးတီနိၤလိတၢ်ဂ့ၢ်ပံတံတလိၣ်အပူၤအဃိ, ယကဟ့နၤတၢ်စိတၢ်ကမီၤလိ နကပၢဝ့ၢ်အဖျၢၣ်တဆ့နဲၢ်လိ.’ 18တၢ်ခ့တၢ်ပှၤခံဂၤတဂၤဟဲဝဲဘျီး စံးဝဲ, ‘ကစၢ်ဧိ, ယမၤန့ၢ်ဘၣ်အၣ်ထီၣ်ထူယဲၢ်ဘ့ၣ်ခီဖျိယသူထူတဘ့ၣ်လိနဟ့ယၤနဲၢ်လိ.’ 19အဝဲဒၣ်စံး ဘၣ်တၢ်ခ့တၢ်ပှၤတဂၤအံၤ, ‘နကပၢဘၣ်ဝ့ၢ်ယဲၢ်ဖျၢၣ်လိ.’ 20တၢ်ခ့တၢ်ပှၤအဂၤတဂၤဟဲဝဲဘျီးစံး, ‘ကစၢ်ဧိ နထူတဘ့ၣ်အံၤအိၣ်လိအံၤလိ. ယပၤကိးသူၣ်တီၢ်အီၤလိ တၢ်ကံးယၤထွါစဒ့ဟံၣ်အံၤအပူၤလိ.’ 21ယသးပလံၤနၤ, မဲၢ်လိ နမဲၢ်ဘၠီၣ်အကီၣ်တဂၤအဃိလိ. နဟံးန့ၢ်တၢ်လိ အတမဲၢ်နတၢ်ဘၣ်ဘျီး တၢ်လိ နတဖှ့းလီၤသူၣ်လီၤနဲၢ်, နကူးနဲလိ. 22အဝဲဒၣ်စံးဘၣ်အီၤ, ‘ကုၢ်လိအအၢၣ်အဂၤဧိ, ယကသူဂ့ၤနတၢ်ကတိၤဒၣ်နဲလိယကစံၣ်ညီၣ်နၤအဂီၢ်လိ. နသံညါဝဲလိ ယမဲၢ်ဘၠီၣ်အကီၣ်တဂၤ, ယဟံးန့ၢ်တၢ်လိ အတမဲၢ်ယတၢ်ဘျီးယကူးတၢ်လိ ယတဖှ့းယဲနဲၢ်ဘၣ်လိ. 23တၢ်ဒ့းန့ၤဘျီး, ဘၣ်မနီၢ်အဃိ နတတ့ၢ်နုယထူတဘ့ၣ်လိ စ့ၣ်ထၢၣ်အပူၤလဲၣ်. နမဲၢ်မၤဒ့းန့ၤဘျီး ဖဲယဟဲက့ၤတုၤနဲၢ် ယကဒိးန့ၢ်ဘၣ်ဂ့ၤအီၤဟူၤလါ အအ့ၣ်ထီၣ်နဲၢ်လိ.’ 24တုၤနုၤတဘျီ အဝဲဒၣ်စံးဘၠီၣ်လိ အအိၣ်ဆ့ထၢၣ်ဖဲနံၤတလိၣ်, ‘ဟံးန့ၢ်ကွံၤထူတဘ့ၣ်လိ အဝဲဒၣ်အအိၣ်ဘျီး ဟ့လီၤအီၤလိ တၢ်ခ့တၢ်ပှၤလိ အအိၣ်လါထူအဘ့ၣ်တဆ့နဲၢ်တကဲၢ်. 25အဝဲဝီၤစံးဘၣ်အီၤ, ‘ကစၢ်ဧၢ, အဝဲဒၣ်အထူအိၣ်ပၤစၢၤလ့အဘ့ၣ်တဆ့လ့. 26အဝဲဝီၤစံးဘၣ်အီၤ, ‘ကစၢ်ဧၢ, အဝဲဒၣ်အထူအိၣ်ပၤစၢၤလ့အဘ့ၣ်တဆ့လ့. 27မဲၢ်မဲၢ်, ယဒုၣ်ယဒါတလိၣ်အံၤလိ အတအဲၣ်ဒိးယကဲၣ်အစီၤပၤနဲၢ်, ဆှၢအဝဲဝီၤတလိၣ်လိ အံၤ, ဘျီး မၤသ့းအီၤလိယမံၤညါတကဲၢ်.’ 28ယ့ၣ်ရှူးစံးကတိၤတၢ်အံၤဝံၤဘျီး လဲၤဆိဝဲလိ ဝ့ၢ်ယရူရှလ့ၣ်လိ အဝဲဝီၤအမံၤညါလိ. 29ဖဲအဝဲဒၣ်ဟဲဘူးထီၣ်လိ သဝီဘ့ၤသဖးက့လါသဝီဘ့ၤသနံ1ဖဲကစၢၢ်သ့ၣ်စၤယံးနဲၢ် ဆှၢလီၤဆိ အပျဲၢ်အဘီၣ်ခံဂၤလိ အမံၤညါလိ. 30အဝဲဒၣ်မါလွိၤအဝဲဝီၤဒ့းအ့ၤ, ‘‘လဲၤလိသဝီအိၣ်လိ သုမံၤညါတဖျၢၣ်နဲၢ်တကဲၢ်. ဖဲသုလဲၤနုလီၤနဲၢ်, သုကထ့ၣ်န့ၢ်ကသ့ၣ်ယီၤ2ဖွိတဒုၣ်အိၣ်စၢၣ်ဃၤအသးလိအတဘၣ်တၢ်ဒိးဒံးအီၤနီတဘျီဒံးဘၣ်နဲၢ်လိ. ဘ့လီၤကွံၤအပျ့ၤ, ဘျီး ဟဲစိၤအီၤလိအံၤတကဲၢ်. 31ဘၠီၣ်တဂၤဂ့ၤမဲၢ်သ့းကွၢ်သု, ‘ဘၣ်မနီၢ်အဃိ သုဘ့လီၤကွံၤအပျ့ၤလဲၣ်’ နဲၢ်, စံးဘၣ်အီၤ, ကစၢ်လိၢ်ဘၣ်အီၤလိ’ နဲၢ်တကဲၢ်.’’ 32အဝဲလဲၤဝဲဘျီး ထ့ၣ်န့ၢ်တၢ်ကိးမံၤဒ့း, ဒ်ယ့ၣ်ရှူးစံးဘၣ်တီၢ်အဝဲဝီၤအသိးနဲၢ်လိ. 33ဖဲအဝဲဝီၤ ဘ့လီၤကွံၤကသ့ၣ်ယီၤဖွိအပျ့ၤနဲၢ် အကစၢ်တလိၣ်စံးဘၣ်အဝဲဝီၤ, ‘ဘၣ်မနီၢ်အဃိ သုဘ့လီၤကွံၤအီၤလဲၣ်.’ 34‘ကစၢ်လိၣ်ဘၣ်အီၤလိ.’ အဝဲဝီၤစံးဆၢဝဲဝံၤဘျီး, 35က့ၤမိၤကသ့ၣ်ယီၤဖွိလိ ယ့ၣ်ရှူးအအိၣ်လိ. အနံၤဝံၤဘျီး အဝဲဝီၤဒါလီၤအဆ့ကၤဖီခွိၣ်တလိၣ်လိ အပျိၢ်လိၤ, ဘျီး ပၤယ့ၣ်ရှူးလိ အလိၤနဲၢ်လိ. 36ဖဲအဝဲဒၣ်ဒိးကသ့ၣ်ယီၤဖွိဘျီး လဲၤတၢ်အဖၢမုၢ်နဲၢ်, အဝဲဝီၤဒါလီၤအဆ့ကၤဖီခွိၣ်တလိၣ်လိကျဲၣ်အလိၤလိ. 37ဖဲအဝဲဒၣ် ဟဲဘူးထီၣ်လါဝ့ၢ်ယရူရှလ့ၣ်ဖဲတၢ်လီၢ်တတီၢ်လိ ကျဲၣ်လဲၤလီၤလိကစၢၢ်သ့ၣ်စၤယံးအဒီၣ်ခွိၣ်နဲၢ်, အခ့အပှၤထီဖူၣ်ထီပၤစံးဘျုးကစၢ်ယွၤဘျီးစံးထီၣ်ပတြၢၤအီၤလိ အကလုၢ်ဖးဒွိၣ်မဲၢ်လိ တၢ်အဒွိၣ်အမုၣ်လိအဝဲဝီၤထ့ၣ်ဘၣ်ပၤစၢၤဝဲခဲလုၤတလိၣ်အဃိနဲၢ်လိ. 38‘မ်ကစၢ်ယွၤဆိၣ်ဂ့ၤစီၤပၤလိ အဟဲလိ ကစၢ်အမံၤတဂၤနဲၢ်တကဲၢ်. မ်တၢ်ဃူတၢ်ဖှိၣ်အိၣ်ဝဲလိမွိခွိၣ်, ဘျီးတၢ်လၤကပီၤဘၣ်ကစၢ်ယွၤတကဲၢ်.’ 39တုၤနုၤတဘျီ ဘၠီၣ်ဖၤရံၤရှဲတနီၤလိ ဘၠီၣ်ထီဖူၣ်ထီခၠၢ အကျၣ်စံးဘၣ်ယ့ၣ်ရှူး, ‘သရၣ်ဧိ, မၢလီၤနကလုၢ်ဒ်သိးနခ့နပှၤတလိၣ်ကအိၣ်ကစုာ်တကဲၢ်.’ 40ယ့ၣ်ရှူးစံးဆၢဝဲ, ‘အဝဲဝီၤမဲၢ်အိၣ်ကစုၣ်နဲၣ်, ယစံးဘၣ်သု, လၢၢ်တလိၣ်ကကိးကလူထီၣ်ဝဲလိ.’ 41အဝဲဒၣ် ဟဲဘူးထီၣ်ဘျီး ဝ့ၢ်ယရူရှလ့ၣ်, ဘျီးဖဲအထ့ၣ်ဘၣ်ဝ့ၢ်နဲၢ်, ဟီၣ်ဝဲလိ အဃိဘျီး, 42စံးဝဲ, ‘နမဲၢ်သံညါဝဲမုၢ်မဆါတနံၤအံၤလိ, တၢ်လိၣ်ဘၣ်မနီၢ်တလိၣ်လိ တၢ်ဃူတၢ်ဖှိၣ်အဂီၢ်လဲၣ်နဲၢ်ဘျီး ကဂ့ၤနီၢ်လိ. မဲၢ်မဲၢ်ခဲနဲအံၤ, နထ့ၣ်ဝဲတသ့းဘၣ်. 43မုၢ်နံၤမုၢ်သီတလိၣ်ကဟဲတုၤအိၣ်နၤဖဲနဒုၣ်နဒါတလိၣ်ကကဝီၤဃၤနၤ, မၤတံၤတၤနကျဲၣ်ဘျီး သူးအသးဘူးထီၣ်လိ နအိၣ်ကိးကပၤဒ့းလိ. 44အဝဲဝီၤကမၤဟးဝီၤကွံၤနၤခဲလုၤခဲဆ့ ဂူၤလါ ဘၠီၣ်ထီဖူၣ်ထီခၠၢအိၣ်ဝဲလိနခွိၣ်ဒူၣ်အပူၤတလိၣ်လိ. အဝဲဝီၤတပၤလီၤတ့ၤထီၢ်လၢၢ်လိအလီၢ်နီတဖျၢၣ်ဘၣ်. တၢ်ဂ့ၢ်မဲၢ်လိ နတပၤသူၣ်ပၤသးတၢ်ဆၢကတီၢ်ဝဲယွၤဟဲပၤစၢၤဝဲဒ်သိး အကအုၣ်က့ၤနၤဘၣ်အဃိနဲၢ်လိ. 45ယ့ၣ်ရှူးလဲၤနုလီၤလိ တၢ်ဘါလီၢ်အပူၤဘျီးဒွိးဟးထီၣ်ကွံၤဘၠီၣ်ဆါတၢ်ဖွိတၢ်လ့ၤတလိၣ်. 46ဘျီးစံးဘၣ်အဝဲဝီၤ, ‘တၢ်ကွ့းအသးစီဆှံပၤဖျါလိကစၢ်ယွၤစံးဝဲ, ‘ယဟံၣ်ကဘၣ်တၢ်ကိးအီၤလိ တၢ်ထုကဖၣ်အဟံၣ်လိ.’ လၢၤဘျီးသုဒွိးကဲၣ်ထီၣ်အီၤလိ တၢ်ဟုၣ်တၢ်ဘျၣ်တလိၣ် အတၢ်အိၣ်ကိးသုၣ်အလီၢ်အကျဲၣ်လ့.’ 47ယ့ၣ်ရှူးသိၣ်လီၤသီလီၤတၢ်လိ တၢ်ဘါလီၢ်အပူၤကိးနံၤဒ့းလိ. ဘၠီၣ်လုၢ်တၢ်အခွိၣ်အဒွိၣ်တလိၣ်, ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတလိၣ်, ဘျီးဘၠီၣ်ထီဖူၣ်ထီခၠၢအခွိၣ်အနၢ်တလိၣ်အသးအိၣ်မၤသ့းအီၤလိ. 48လၢၤဘျီး အဝဲဝီၤ ကဘၣ်မၤဝဲလိ ကျဲၣ်ဒ်လဲၣ်ခိနဲၢ် တသံညါဝဲဘၣ်. တၢ်ဂ့ၢ်မဲၢ်လိ ဘၠီၣ်ထီဖူၣ်ထီခၠၢကနၣ်ဒံးအတၢ်စံးတၢ်ကတိၤဘျီး တအဲၣ်ဒိးလိ အတၢ်ကတိၤလဲၤပတၤကွံၤအဝဲဝီၤနီတထ့ၣ်ဘၣ်အဃိလိ.
Markert nå:
Luke 19: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
