Matthew 8
8
Jesu aa angamtaksa tey wa tha taqhal aa
(Mark 1:40–45; Luke 5:12–16)
1Jesu kanwang anim náng juta tho, daqhan miqtang piq jiphanta. 2Ashey angam taksa teywa Jesu jamnáng ka eq, ujakho o shong tong eq batta, “Teyhungwa, nang unuk ang ujo, nga raa jin tasang eq phannu.”
3Jesu aa ujak tha thalo eq piq tha thaklo eq batta, “Nga unuk ang. Usang ang u.” Etho takshey lam o, eshi miqwa taksa tha qhalta. 4Etho Jesu aa piq ma batta, “Tat u! Utang ma tho nak bat u, etharin achal eq tingwa jamnáng ka u etho piq aa nang cham siin tanphu; etho nang uqhal ang tu ta thaji ma takhi rangma, Moses aa chamlang pinthong kotma batta, iritang thaji ri kot u.”
Jesu aa Rome ajong wa sanga tha taqhal aa
(Luke 7:1–10)
5Jesu Capernaum samhaq náng thuta tho, ashey Rome ajongwa eq Jesu relnáng ka eq nong chu eq batta. 6“Teyhungwa, i sanga jak ajaa jin tha mot moq tak eq him na wol chey aa, piq rapney tsamnang aa.”
7Jesu aa batta, “Nga ka eq piq sha taqhal náng.”
8Rome ajongwa thawel batta, “Teyhungwa, nang i him náng jin tathokrol tho ang mong. Ba nung eq raaq ujo, i sanga sha uqhal angna. 9Nga tho adak jaktáng na tong ang etho i jaktáng na ralkoltey tang tho atha. Nga irima ka u ta bat ang jo piq ukat ang aa; eshima kaphu ta bat ang jo piq ukat ang pha; nga i sanga ma iri somlo u ta bat ang jo piq aa somlo eq aa.”
10Iri raaq raa tat eq Jesu rapney patja ta etho ujio kattey tang ma batta, “Nga nim ma batphang, Israel na piq mal rapney kamtey miq sha nga khi wey mong. 11Nga asing batphang, saalkhong nia saalnop wang daqhan miq thu eq Rangmungtan phaksat rangma Abraham, Isaac, Jacob jamoq tong na. 12Etho Rangmungtan náng utang wangching angta tha anak náng beychak na, eshina ning ukhap etho paa tachikkak eq tong na.” 13Etho Jesu aa Rome ajongwa thima batta, “Him náng wang u, nang aa chamal kamtu eshimal hun angna.”
Etho ajongwa sanga tha eshi rangham tho hun qhalta.
Jesu aa daqhan miqtang taqhal aa
(Mark 1:29–34; Luke 4:38–41)
14Jesu Peter himnáng ka atho, Peter nicha rapney kho mok eq jibching na wol chey ta. 15Jesu aa piq jaktho lota etho piq kho mok tha qhalta, etho piq shat eq ning ma phaksat limtik kotta.
16Ethi rangja tho thangwa eq lotey daqhan miqtang Jesu relnáng thok solta. Jesu nung wang raaq eq anaan tsija tang tha phanchakta etho thaji takasa tang tha taqhal ta. 17Imal wang, rangsamal Isaiah batta tha asing angta,
“Piq aa hiqtang taksa tha somta
etho piq aa hiqtang thaji taksa tang tha hol chakta.”
Jesu ji náng kat thang
(Luke 9:57–62)
18Jesu aa urelna daqhan miqtang khi atho, piq aa Galilee shitim adak kang náng katma ujiphantey tang ma batta. 19Ashey thong tataltey ka eq Jesu ma batta, “Teyhungwa, nang bari náng ka ujo tho, nga tho ba jamoq kapha náng.”
20Jesu aa thawel batta, “Inkaku tang ma ubung atha etho wo tang ma tho utip atha, etharin Miqna Sa ma uwol nia nángtong angma katáng ahung.”
21Etho adak jiphantey eq Jesu ma batta, “Teyhungwa, jakho nga ka eq iwa shi rang bung kaphang.”
22Jesu aa piq ma thawel batta, “Nang i jamnáng kaphu, tsija o utiktey miqtang eq ning wang utiktey tang shi cham bung aa.”
Jesu aa ajong rangpong táng aa
(Mark 4:35–41; Luke 8:22–25)
23Etho Jesu waqwan náng qhung atho ujiphantey tang tha piq jam tho kata. 24Sammoq pol, rapney ajong rangpong jungnung thuta etho jungmot eq waqwan tha moqta. Ethi rangham tho Jesu waqwan na ujib ang chey ta. 25Ujiphantey tang ka eq piq tha tashat ta etho ning aa batta, “Teyhungwa, thalun phu, hiqtang thaji utik angma ta i!”
26Jesu aa ning thima pitta, “Nim thaji itan chamma cho inn? Nim kam lam rapney akum hal!” Etho piq shat eq rangpong etho jungmot thima bat eq thamangta etho thaji sha mangta.
27Ning thaji miqtang patja angta etho batta, “Iri chamal miq aa? Rangpong ni jungmot eq tho piq raaq utat eq aa!”
Jesu aa thangwa eq lot ta wa ni taqhal aa
(Mark 5:1–20; Luke 8:26–39)
28Jesu Galilee shitim adak kokang náng Gadara mung náng thu atho, thangwa eq lota wa ni, Jesu jamoq tachong ta. Ning ni màngbung ching wang thalat chey ta, ning ni miqcho miqpan angta, ethirangma thaji miqtang eshi lam náng katma ucho angta. 29Ning ni Jesu tha khi eq, rapney jujong aa ring eq batta, “Shkewa Miqwasa, nang aa ini jamoq chamlang somlo ma ta u? Nang rangham thuwey moq jakho, ini raa tharo tatsam ma thuta phu i?”
30Ethi rel tho, daqhan tol wak tang rong qhingta. 31Thangwa tang aa Jesu thima anup ang eq batta, “Nang aa í raa latma ta ujo, iri wak tang hanmong náng takat chak phu.”
32Jesu aa batta, “Thalat inn!” Etho ning thalat eq wak tang hanmong thináng nopta. Etho thaji wak tang tha aluk wang, eshi shitim náng qhat eq ti ta.
33Wak rimtey miqtang eq ethi tang thaji tha khi atho, ning jol eq samhaq náng kata etho thaji miq thima iri raaq raa bat kota. Etho thangwa eq lota miqwa ni tha tho uqhal angta ta tho ubat eq kota. 34Etho samhaq wang thaji miqtang tha Jesu jamoq tachong ma thuta. Etho ning aa piq tha khi atho, Jesu ma iri mung ri shingchak eq jolchu wang ma batta.
Markert nå:
Matthew 8: Mmmm
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
CC BY-NC-ND 4.0
