Mak 4
4
Kuka luŋyaŋ daŋ soŋsoŋ nina giy
(Mat 13:1-9; Luk 8:4-8)
1Arya Yesus atebaw way taliŋyaŋ gura sawanaŋ tuwkiŋ welalem guway sip epe boryaŋa. Iŋguniŋ iŋ waga way buŋta kiy iŋgu buŋta lowsu yaŋtusu kiy. Arya welalem go yiŋ way siryinda kiyaŋa. 2Iŋgura Yesus sawanaŋ sayusu, kuka luŋyiyaŋ guway dariyusu nigu giy.
3<<Di Iŋana! Lem diya le aramara wit yewyi amikriy.#4:3 Kabol Israel dagu go yiŋ wit yewyi amikŋiŋ niŋgi futtuwtiy, niŋdagu gok yuŋ. 4Amiku low kiŋ wit seyiŋ dip ketara pasikiŋ niŋgi nuŋda epe niyaŋa. 5Dip go pasiku daŋ sa geyiŋ buŋta ley. Daŋ iŋgu suiŋ yuŋ iŋgura awru sip futtiy. 6Gu wit iŋgu dawlem melaŋ, iŋgura ata buŋta epusu uy keraŋ waŋyiŋ niŋgi atŋinda amaŋ tiy. 7Arya wit seyiŋ dip go mutmut sibay geyiŋ lapinda pasik riy iŋgura mutmut iŋgu futtusu kewmitaŋ niŋgi egay tiyaŋ melaŋ. 8Arya wit seyiŋ dip go daŋ wasiŋ sip inda pasik riy. Iŋgura patak sip futtusu egay kerariy. Wit dip go egay 30 kerariy, dip go 60 tusu dip go 100 gugu kerariy. 9Iŋgura Yesus nigu giy, <<Lem gon iŋ patak sip iŋatotugusu tipgo, amuni kerawsu kuka ini iŋat,>> giy.
10Emita Yesus gayt nimi kiŋ, arya muluŋa nim yiŋ tusu lem dip iŋ suŋu waluwta iŋgu epe Yesus miŋyaŋa, kuka luŋyiyaŋ dariyiy iŋgu egay day sayaŋguniŋ. 11Arya Yesusda dariyiy, <<Na kuka sasaŋ kabol Takela ragu welalem soŋni yiŋ ulayiyi nina iŋgu patuw daridimiy. Go welalem gon yiŋ iŋanu kiyaŋya melaŋ iŋgu, yiŋ kuka atŋinda giyakam iŋgu go luŋyiyaŋ kita niŋgi iŋaw kip. 12Aisaia gugu kisriy.
<Yiŋ uy neŋneŋ imatip,
go gira diya neŋ piraŋ yuŋ,
tusu kuka iŋaŋ iŋaŋ guway tip, go kuka iŋgu egay iŋapiraŋ yuŋ,
diyap miydia yiŋ buwaya foyiŋ niŋgi Takela pasek yiŋdagu sabirpir kiskis gugu eti,>>> iŋ giy. #4:12 Ais 6:9-10
13Arya Yesus nigu dariyiy, <<Di yit kuka luŋyiyaŋ iŋgu egay iŋaw kiyaŋda melaŋ yaŋ? Arya di gorogoro kuka luŋyiyaŋ dip egay iŋap? 14Urata lem wit seyiŋ amikriy iŋgu go, lem Takela aboŋ serriy. 15Wit seyiŋ dip ketara pasikuti iŋgu go, welalem kuka aboŋ iŋawta go, awru sip Satanda epe kuka Takelara buwayanda serriy iŋgu pesuti. 16Arya dip go yiŋ wit seyiŋ daŋ sa geyiŋ buŋta pasikuti gok, kuka iŋawsu awru sip owsu buwaya wasiŋuti. 17Go yiŋ dawlemya melaŋ yiŋ nal pet niŋgi kuwta. Arya nal, lem epe payryusu murweŋ sayuwta kuka iŋgu nina go yiŋ awru sip pasikuta. 18Tusu welalem dip go yiŋ wit seyiŋ mutmut sibay geyiŋ lapinda pasikuti gok, welalem iŋgu yiŋ kuka iŋawta, 19gu yiŋ daŋ inim dagu murwaŋa nina buwaya buwaya tuwti tusu yiŋ gamudeyiŋ guway abin gusu buwya tuwti tusu yiŋ buwaya waraŋuti ulal guway e e nina. Kabol iŋgura Takela aboŋ kewŋiŋ niŋgi egay tuw kiyaŋ melaŋ. 20Arya welalem dip go wit seyiŋ daŋ wasiŋ inda pasikuwti gok. Yiŋ kuka aboŋ iŋawsu owta, iŋgura egay tuwti, dip egay 30 kerawti, dip 60, tusu dip go 100,>> giy.
Lam ow mawtara keraŋ sinaraŋ tuw kuwti
21Iŋgura Yesus dariyiy, <<Di lam ow lowsu ot da kewuwta ma fafat lefuŋinda kerawta? Yuŋ. Yiŋ mawtara fafat buŋta kerawta. 22Gugu sip ulal guway sasaŋ eti iŋgu, atŋinda mawtara futtiboŋpiŋ. Tusu ulal atŋinda mat kewyaŋ eti iŋgu yit, mawtara fut tiboŋpiŋ. 23Tusu lem gon iŋ patak sip iŋatotugusu tipgo iŋ amuni kerawsu kuka ini iŋat.
24Atebaw segu dariyiy, <<Di neŋpiraŋ, kuka iŋageta iŋgu patak sip buwadanda topiraŋ. Di lem onaŋ yuwta iŋgu go Takela ononaŋ iŋgu ketuw di geyiŋ onaŋ dip tusu segiŋmiy lep.>> 25Lem gon iŋ kuka neragu iŋaŋ boŋyip go Takela lem Iŋgu muŋa beŋgoy inap. Gugu sip lem gon iŋ kuka neragu iŋawsu buway tiŋyip go Takela muŋa inariy iŋgu imap.
Kuka luŋyaŋ aŋyay yewyi futtigat iŋguragu
26Iŋ atebaw nigu giy, <<Kabol Takela ragu welalem soŋni yiŋ ulayiyi ragu go nigu, lem diya aŋyay yewi daŋ buŋta amikyaŋ gok. 27Arya sulap go lem iŋgu wuw kiy, tusu ata beŋ go iŋ le baliwu waluw kiy. Iŋgura aŋyay seyiŋ iŋgu gorogoro futtusu le beŋ beŋ tiyaŋa iŋgu iŋ iŋaw kiyaŋ melaŋ. 28Daŋ iŋ sip aŋyay iŋgu keraŋ futtusu, egay kerawta. Patuw sip go uyay futtip, emita furay furaŋu futtuwti. Iŋgura egay fut tusu beŋ tuwti. 29Arya aŋyay iŋgu muktiŋ lem iŋgu le kunawti. Giran nal aŋyay sursur dagu go futtigat.
Kuka luŋyaŋ da mastet yewyin dagu
30Arya Yesus atebaw nigu giy, <<Niŋ kuka gorogoro ginkina kabol Takela ragu welalem soŋni yiŋ ulayiyi ragu nina. Iŋgu gira gok tusu niŋ kuka luŋyaŋ giray ginkina? 31Iŋgu da diya waay mastet seyiŋ gok, seiŋ bulubuly bulubuly sip, yiŋ daŋ naŋonda seruwta. 32Da seyiŋ iŋgu futtuw beŋ tip ulal atŋinda aramara keliyiboŋusu alŋiŋ beŋbeŋ kerap. Iŋgura nuŋ epe iŋgu buŋta takya bituw kip>> giy.
33Yesus welalem sawanaŋ sayiy, kuka luŋyiyaŋ soŋsoŋ isi. Iŋgura yiŋ patak sip iŋaŋ guniŋ, kuka iŋgu yiŋ dariyiy. 34Kuka luŋyiyaŋ kita niŋgi welalem daruyu kiy. Arya iŋ muluŋan yiŋ isi ganityamiy tuw kiyaŋa go kuka luŋyaŋ iŋgu egay day sayuw kiy.
Yesus yaŋ dariŋ emariy
(Mat 8:23-27; Luk 8:22-25)
35Nal iŋgura niŋgi gamniŋ tuw epuw kiŋ, Yesus muluŋan yiŋ dariyiy, <<Epna way baliya len,>> giy. 36Iŋgura yiŋ welalem guway gura yasowsu le waga Yesus patuw uti buŋta yaŋtuw kiy iŋgu desawsu liyaŋa. Arya waga dip yit suŋyaŋa. 37Arya yaŋ beŋgoy waraŋriy, iŋgura sigor selaw waga naŋonda lowkiŋ nima kafur yugusutiy. 38Yesus go waga eiŋinda kaliku buŋta wuw kiy, iŋgura muluŋa nim yiŋ da le wagerusu daryaŋa, <<Iŋaŋ Lem, ga eman kina iŋgu nina reri tiyaŋa melaŋ yaŋ?>> 39Arya Yesus waraŋusu yaŋ mera inariy tuŋyaŋ guniŋ tusu nigu sigor dariyiy, <<Sowsu imami kita.>> Iŋgura yaŋ way gis go emasu tuŋ yusu kira. 40Iŋgura waraŋu muluŋan yiŋ miŋyiy, <<Di giran reri tiyata, buwada payiŋ yuŋ yaŋ?>> 41Iŋgura yiŋ reri goyi sip tusu yiŋ sip yiŋ sip nigu duŋmiŋ tiyaŋa, <<Lem ini gon, iŋgura yaŋ way gis aboŋ iŋageta?>> giy
Markert nå:
Mak 4: Madi
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2024 Wycliffe Bible Translators, Inc. All rights reserved.
