Lukas 24

Kinoluli'an ni Yisus

(Mat 28:1-10; Mrk 16:1-8; Yns 20:1-10)

1Osarap-sarap po nu Runat Minggu ri, miano yo kowoinoyan-i so lobong ni Yisus, minongowit nu rampa sinodia' nosiro ri. 2Siowi nosiro watu pinonutub nu lobong-i su nosukab-o. 3Mosuwo yo sono nosiro so lobong-i, nga d'ado yo dii bangkai ni Yisus. 4Laid nosiro mundii-dii oiranan nu iri, milok po su nokosiou nosiro duo koyuwan mundii-dii so obi' nosiro ri, milap-kilap su pokakas. 5Linumaa' sobana kowoinoyan-i, sampai tinumungub so tana' ri. Mutongaro yo duo koyuwan iiri nu, “Onu po ka kopudiuman muyu nu lobuw noluli'an-o kiat so pinotoyan? 6D'ado yo Iyo tuui so' noluli'an-o. Ondomo muyu ya tinangar Niyo so kou nu laid po Niyo so Galilia ri nu, 7‘Aku, Anak nu Riniba okomon ong wagu om nikomouli' so lobuw kikoraayan om nisalib, nga so kotolu no, oluli'an Aku ya koimbagu,’ koo nima tangar ni Yisus gulu ri,” koo duo koyuwan-i.#Mat 16:21; 17:22-23; 20:18-19; Mrk 8:31; 9:31; 10:33-34; Luk 9:22; 18:31-33

8Noondoman nai' nu kowoinoyan-i iiri tinangar ni Yisus, 9om mulio yo nosiro potuturan nu kiawi' iiri so opulu om ido mompomaid ni Yisus, om so kiawi' lobuw maid-waid so Iyo nu laid iiri. 10Ngaran-o po nu kowoinoyan-i, si Maria Magdalina, si Yuana om si Maria ino ni Yakubus. Kuwai po kowoinoyan wokon minaid so nosiro potuturan nu noongourug iiri so opulu om ido pinongoorapan ni Yisus. 11Nga ponontaman nu opulu om ido pinongoorapan iiri ong momaal-maal-a kowoinoyan-i. Minongimbuali sono nosiro nu tuturan iiri. 12Nga mundiio yo si Pitrus om mundako yo mian so lobong ni Yisus. Nokologa' iyo so lobong-i, mongkubo yo iyo monsiou so dilalom-i, nga iri yo su nosiou niyo kumut pinonolui nu bangkai ni Yisus. Mulio yo sono iyo maid nu noiranan om mongiro-kiro nu iri.#24:12: Tinu-tinu solinan d'ado nokosurat nu ayat 12.

Minokisiou si Yisus so lalan mian so Imaus

(Mrk 16:12-13)

13Runat-a iiri, duo koyuwan kiat so mompomaid ni Yisus minian so kampung Imaus, kiro-kiro opulu om ido kilumitor kiat so Yirusalim. 14Sambil nosiro mompanou om mutangar-tangar suat so kinopotoyan ni Yisus om iri tuturan nu kowoinoyan-i. 15Laid nosiro mutangar-tangar-i, lumogaa yo si Yisus mobi' dii so nosiro om minaid mompanou. 16Nosiou-a nosiro si Yisus, nga tou ong nokuro su dai Iyo otondu'an nosiro. 17Mongoduato yo si Yisus so nosiro nu, “Onu ka pinutongar-tongaran muyu sisuna ri?” koo.

Mintorono yo nosiro maid nu oogutan. 18Sumombuto yo ido koyuwan, ingoranan so si Kliupas nu, “Ido ko po gaam tuui so Yirusalim su dai nokoilo nu noongourug so wagu tu ri?” koo.

19Mongoduato yo si Yisus nu, “Onu nu iri?” koo.

Sumombuto yo nosiro, “Iri bo noongourug suat so si Yisus, lobuw Najarit-i. Iyo yo poo'abar nu Kinoringan. Gogoma'on om totongaron Niyo sobana ko kikuasa. Potarang Iyo so lobuw nu Iyo yo sinuu' nu Kinoringan, om kiawi' lobuw nga koilo nu sobana ko maayo kuasa Niyo. 20Nga inowit Iyo nu ongo wowaidon nu imam om wowaidon toko ri dii si Pilatus nu nipoukum nu potoyon, om nisalib sono Iyo nosiro, 21ampa aarap kai nu Iyo yo su polabus nu bansa Israil kiat so pogkuosaan nu Ruum. Om kosiono kotolu yo runat kinopotoyan Niyo. 22Tinu-tinu kowoinoyan nopotigog so kai. Otuong-tuong po minian-o nosiro so lobong-i, 23nga dai nosiro nosiou bangkai ni Yisus. Mulio yo sono nosiro monuturan nu, nokosiou nosiro nu ongo susuu'on nu Kinoringan, om minutangar susuu'on iiri nu noluli'an-o si Yisus. 24Minian sono tinu-tinu una' mai so lobong-i, om noilaan-o sono nosiro nu bana-bana ya tinuturan nu kowoinoyan-i, nga si Yisus dai ya nosiou nosiro,” koo.

25Mutongaro yo sono si Yisus so nosiro nu, “Olowong kou ong itu. Olaid sobana om poimaid kou nu kiawi' tinangar nu ongo poo'abar nu Kinoringan gulu ri, 26nu subai kolalag nu kosonsora'an om matoi Raja Nijanji nu Kinoringan, om orumaton nai' nu Kinoringan mogkuasa maid so Iyo so surga,” koo si Yisus. 27Noopod iri, nopotarang sono si Yisus so duo koyuwan iiri nu nokosurat so Buuk nu Kinoringan suat so Iyo, kiat so sinurat ni Musa om kiawi' sinurat nu poo'abar nu Kinoringan gulu ri.

28Nokorani-rani nosiro so Imaus, ono yo loga'an nosiro ri, minusinglombus-lombus po si Yisus mompanou, 29nga inowudan Iyo nosiro nu, “Ikod po kilombus kosiono. Muondot toko po, so' tumuong-o ono,” koo nosiro. Moloyo yo sono Iyo dii so nosiro. 30Mogom-ogom nosiro mongokan-i, monomito yo si Yisus nu baang-baang om mongunsopoto yo so Kinoringan. Kobi-kobio yo Niyo, om taaki yo Niyo so duo koyuwan-i. 31Soko iri po, notondu'an-o sono nosiro nu si Yisus pala una' nosiro iiri, nga milok po su dai yo sono Iyo nosiou nosiro. 32Mutongar-tongaro yo nosiro nu, “Sobana ko minurad inawo to no sisuna nu laid Niyo mutangar so kito so lolanon-i, potarang nu totongaron so Buuk nu Kinoringan!” koo nosiro.

33Mundiio yo sono nosiro om mulio yo so Yirusalim. Dii yo kinosombatan nosiro nu opulu om ido mompomaid ni Yisus minuimpug om lobuw wokon-i. 34Mutongar-tongaro yo nosiro nu, “Bana-bana ya nu noluli'an si Yisus, om minokisiou so si Simun Pitrus!” koo.

35Tuturani yo sono nu duo koyuwan-i nololagan nosiro nu manou-panou nosiro ri, om onu kotondu'-tondu' nosiro so si Yisus nu laid Niyo mongobi-kobi nu baang-baang-i.

Minokisiou si Yisus so ongo mompomaid Niyo ri

(Mat 28:16-20; Mrk 16:14-18; Yns 20:19-23; P'rapan 1:6-8)

36Dai po nopupus nosiro mututuran nu iri, milok po su mundii-dii si Yisus so tiningkuangon nosiro ri om mutongaro yo nu, “Posonango muyu yo inawo muyu no!”#24:36: Tinu-tinu solinan d'ado nokosurat nu, Posonango muyu yo inawo muyu no! koo.

37Nokotigog nosiro om linumaa' so' ontaman nosiro ong moinat. 38Nga mutongaro yo si Yisus so nosiro nu, “Nokuro ka su kotigog kou so Aku, om dai kou poimaid nu Aku yo si Yisus? 39Siowi muyu yo akod longon Ku tu. Aku yo kondiri itu! Ingkamo muyu koyuwan Ku tu, so' ono yo po moinat-o d'ado onsi om tulang, nga Aku yo po kionsi om kitulang-a,” koo.

40Sambil ni Yisus mutangar om posiou nu longon akod Niyo baya' nopopakan-i.#24:40: Tinu-tinu solinan d'ado nokosurat nu ayat 40. 41Dai po nosiro poimaid nu iri, so' osokakan nosiro osudu'an om oiran-iranan! Mongoduato yo si Yisus so nosiro nu, “Kuwai ka kookanan muyu tuui?” koo. 42Taaki yo sono Iyo nosiro songkorot pait tinunuan. 43Olapo yo ni Yisus pait iiri om okano yo Niyo so tiningkuangon nosiro ri.

44Mutongaro yo sono si Yisus so nosiro nu, “Itu yo iri tinangar Ku so kou nu maid-waid Aku po so kou ri nu, subai otuman onu-onu nokosurat suat so Aku so ongo buuk nu Ukum ni Musa, om so buuk nu ongo poo'abar nu Kinoringan gulu ri, om so buuk nu Lagu,” koo si Yisus.

45Indadi, poorotio yo sono bana ni Yisus nosiro nu tinongaran so Buuk nu Kinoringan suat so Iyo. 46Mutongaro po Iyo so nosiro nu, “Nokosurat-o so Buuk nu Kinoringan nu, Raja Nijanji nu Kinoringan, ono yo si Kristus, subai potoyon om oluli'an nu runat kotolu no. 47Om nokosurat-a nu, obaran-o momakai nu ngaran Ku kiawi' bansa nu lobuw nu, subai rumorogo momaal nu koraayan, om obaran-a nu, ompunon-a nu Kinoringan koraayan nosiro. Om abar oono, subai so Yirusalim su gulu potuturanan. 48Kou yo su paabar so kiawi' lobuw onu nosiou muyu suat so Aku. 49Om aku yo su pologa' tuui so kou nu Atod nu Kinoringan, iri nijanji ni Amo Ku so kou ri. Nga subai indadan muyu po so Yirusalim tu nu kuosaan kou nu Atod nu Kinoringan nitaak Niyo so kou no,” koo si Yisus.#P'rapan 1:4

Kinakat si Yisus mian so surga

(Mrk 16:19-20; P'rapan 1:9-11)

50Nopupus iri, owito yo ni Yisus nosiro lumabus kiat so bandar-i, mian so kampung Bitania, om kokato yo sono Niyo longon Niyo mongoborakat so nosiro. 51Laid po Niyo mongoborakat so nosiro ri, nokotondiang-o sono Iyo so nosiro, om kinakat-o mian so surga.#24:51: Tinu-tinu solinan d'ado nokosurat nu, om kinakat-o mian so surga.#P'rapan 1:9-11 52Mongusaa'o yo sono nosiro so Iyo, om mulio yo so Yirusalim, om sobana ko nosudu'an. 53Om dadan muimpug nosiro so natad nu Waloi Maayo nu Kinoringan-i, mongorayou nu Kinoringan.

Markert nå:

Lukas 24: TomPWPgLgPn

Marker

Del

Kopier