MARKUSI 7
7
Misomo ya Insa yahusu watru waɗungao zimila, ne walisha ãmuri za Mungu
(Mat 15:1-9)
1Suku, watru wa ishama ya Mafarisayo na ɓaãdhwi ya Mafundi ya Sharia wala Yerusalemu, wangulidzana mbeli za Insa. 2Ɓas, wafahamu ɓaãdhwi ya maswihaɓa yahe yakoɗya madipe ha mihono yendza nagisi, yaãni, ɓila uyitwaharisha. 3(Mana Mafarisayo na piya Mayahudi wangina, kawaɗyi kaɓula wao udzitwaharisha ha uzuri yimihono, ha uɗunga zimila za wadzaɗe wawo. 4Na wamolawa ɓazari, kawaɗyi neka kawadzitwaharisha. Wana tsena mila nyengi zangina waziɗungao, mauri ɗe inamuna wahosao zikombe, shiya za sufuria, na nyungu za shaɓa.)
5Ɓas, Mafarisayo na Mafundi ya Sharia yale wamudzisa: «Manatrini maswihaɓa yaho kayasuɗunga zimila za wadzaɗe, ɓadi wao uɗya shahula ha mihono yendza nagisi?»
6Insa awadjiɓu: «Wanyu wanafiki! Mutrume Izaya akana haki wakati akojudza marongozi ashukidziwawo ju lanyu, mauri ɗe iheli yaangihwa:
‹Umati unu unihishimu ha malomo,
ɓadi roho yawo ya mbali na wami.
7Uniãɓudu yawo kaina faida,
yimisomo wayitoao, ãmuri za shiuɓinadamu.› »
8Insa aengedza tsena: «Wanyu ulisha ziãmuri za Mungu, muɗungu mila za wanadamu.»
9Awaambia raha: «Wanyu ulatsa ha uzuri iãmuri ya Mungu, ile musike mila yanyu! 10Mana Musa arongoa: ‹Muhishimu ɓaɓaho na mayaho.› Tsena: ‹Mutru atsomuruhanao ɓaɓahe au mayahe atsolazimu aulawe.› 11Ɓadi wanyu musurongoa amba neka mutru asumuambia ɓaɓahe au mayahe: ‹iMali nitsoshindrao nihusaidiye nayo, iyo Korɓan› (mana ya v̄av̄o, shitru yatamaniwa Mungu), 12v̄av̄o musumukuɓalia asumusaidi mayahe au ɓaɓahe na itsokao yotsi. 13Ha izo, musupua sheo urongozi wa Mungu ha zimila zanyu mwazihetsi. Amwesa musufanya nyengi zangina zifanao na zile.»
Misomo ya izo zinagisio mwanadamu
(Mat 15:10-20)
14Wakati wangina Insa ahiri raha idunia imujiliye, awaambia: «Namunivulishiye piyanyu, tsena muelewe: 15Kav̄usi yotsi ilio v̄ondze ha mutru ishindrao imunagisi yamongia moni hahe. Ɓadi izo zilawao moni ha mutru, ɗe zimunagisio. 16[Kula aliona makio ya ukia, nakiye.]»
17Wakati alisha idunia ile, angia moni na nyumba, maswihaɓa yahe yamudzisa imana ya mufano ule. 18Ɓas, awaambia: «Wanyu ne kamusushindra mwaelewa? Kamusuelewa amba kav̄usi yotsi ilio v̄ondze ha mutru ishindrao imunagisi yamongia moni hahe? 19Mana iyo kaingia rohoni hahe, ɓadi mimbani hahe, amwesa ulawa mwilini hahe.» Ha izo, ajudza amba piya zahula halali.
20Arongoa tsena: «Zilawao moni ha mutru, ɗe zimunagisio. 21Mana ɗe rangu moni, rangu rohoni ha uwanadamu, ɗe v̄ulawao fikira mbovu, uzindzi, shahawa za peu, uangamifu, 22uwidzi, uv̄endza upara, zitrendro mbovu, udangamanyifu, maendreleo mboya, uona uwivu, ukufuru, udziona, na ujinga. 23Piya trongo mbovu zizo ulawa moni ha mwanadamu, na izo ɗe zimunagisio.»
Uaminifu wa mutrumama tsi Muyahudi
(Mat 15:21-28)
24Ulawa yahe v̄ale, Insa andre hari mwa liɓavu la Tiro na Sidoni#7:24 Sidoni: Ɓaãdhwi ya zio za Shigiriki kazisurongoa na Sidoni.. Angia moni na nyumba amba kakotsaha ata mutru ajua, ɓadi kashindra adzama. 25Mana v̄uka mutrumama v̄ale akana mwana mutrumushe mwendza djini la peu; ukia yahe mahadisi yamuhusu Insa, aja adzivutsu mindruni hahe. 26Mutrumama uwo aka Mugiriki, hari mwa iãswila ya Fonikiya ya Siriya. Aja amumia Insa aindziye ishetwani yaka ha mwana wahe.
27Insa amuambia: «Lisha raɓuzi wanatsa wakure, mana tsi haki mutru urenga shahula ya wanatsa, avutsiyeyo mbwa.»
28Amudjiɓu: «Izo kweli Mutukufu, ɓadi mbwa zikao utsini mwa meza, izo uɗya kenye wanatsa wazipulisao.»
29Ɓas, amudjiɓu: «Ha siɓaɓu ya urongozi uwo, utsojua wendre, ishetwani ilawia mwana waho.»
30Ata uregea yahe ɗagoni, apara amba mwana wahe alala shitrandrani, na ishetwani imulawia.
Insa asuzihira mufa-makio kakolagua ha uzuri
31Ɓaanda ya v̄ale Insa alawia mukaɓala wa Tiro, av̄iria iSidoni, ata arudi hari mwa iƁahari ya Galilaya|Ɓahari ya Galilaya ha uv̄iria liɓavu la Dekapoli. 32Ɓas, watru wamuv̄ingia mufa-makio akana udziro wa ulagua. Wamumia amukadze yimihono pare av̄one.
33V̄ale Insa amurenge, amuv̄ingi mbali na idunia, atria za zahe makioni ha mutru ule, atri mare, amwesa ayarenge, ayatria ulimiju ha mutru ule. 34Ulawa v̄ale adzua yamatso mbinguni, atri pumu, na urongoa: «Efata!» (mana yahe: «Ɓuha!») 35Sa ile kamwe makio yahe yaɓuha, ulimi wahe uv̄ambuha, na waye alagua ha uzuri.
36Insa awafahamisha wasuambiye mutru atsokao yotsi. Ɓadi ha ikiyasi akowafahamisha, wakozidi uzijudza. 37Ɓas, waka hari mwa ushangavu muɓole halisi, tsena wakorongoa: «Asufanya piya ha uzuri. Asufanya ata wafa-makio wakiye, na maɓuɓu yalaguwe!»
Markert nå:
MARKUSI 7: swb
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
