MARKUSI 5
5
Insa asuzihira mutru akotreswa na madjini ya peu
(Mat 8:28-34; Luk 8:26-39)
1Ɓaanda ya v̄ale, Insa na maswihaɓa yahe wawaswili nyambo ya lidzia la maji, hari mwa liɓavu la Magerasi#5:1 Magerasi: V̄wa ɓaãdhwi ya zio za Shigiriki zirongoao Magadara, na ɓaãdhwi zasalia zirongoao Magergesi. Namusome wajau Mat 8:28 na yamaeledzo yayo.. 2Insa ushuka yahe djahazini v̄ale, v̄umujilia mutru akana djini la peu, alawa mahaɓurini. 3Mutru uwo akoẽshi mahaɓurini, amwesa kav̄waka ata mutru akoshindra umufunga tsena, ata ha silisili. 4Mara nyengi akofungwa yimindru ha mauzi ya shuma, amwesa akotratriwa na silisili, ɓadi akorumbua zisilisili, na ukutrua mauzi ya shuma yale; tsena kav̄waka ata mutru akana zinguvu za umuzia. 5Ha daima akoka mahaɓurini na milimani mauku na mitsana, ha ulatsa keme na udzikatra-katra ha mawe.
6Umuona yahe Insa rangu mbali, areme mbio, aja amuendrelea mindru tsini, 7amwesa ashelemedza ha ji lendza nguvu: «Usunitsaha na trini Insa, Mwana wa Mungu Monyewe Uju rahana Uju? Nilav̄iye na Mungu amba kutsonitresa!» 8Mana Insa aka amuambia: «Wawe djini la peu, mulawiye mutru uwo!»
9Ɓas, v̄ale Insa amudzisa: «Dzina laho mbani?»
Ule amudjiɓu: «Dzina langu Malijio, mana ra wengi.» 10Tsena amumia ha kusudi asuĩdziye madjini yale tsiju v̄ale.
11Shilimani hule, v̄uka ɓangwe ɓole la mav̄uruku lakorundria. 12Sa ile madjini ya peu yale yamumia Insa: «Riv̄elehe hari mwa mav̄uruku yale, riyangiliye.» 13Ayakuɓalia. Ɓas, madjini ya peu yale yalawia mutru ule, yaangilia mav̄uruku yale. Ɓangwe lile lireme mbio ushuka shilimaju v̄ale, lipuliha moni na lidzia la maji, lino ata liangamia; na yao yaka indadi ya alifu mbili.
14Watru wakorundrisa mav̄uruku yale watrala, watrangaza haɓari ile rangu mujini ata liju. Ɓas, watru wakwendra waone trongo zahidjiri. 15Wamujilia Insa, waono mutru ule akana mazetwani mengi amba aketsi, apindri, tsena akana ãkili zahe. Ɓas, watru wale waremwa na faza. 16Wao waona zile zav̄ira wawajudza trongo zahidjiria ule akana yamazetwani, na yahusu mav̄uruku yale. 17Ɓas, waandrisa umumia Insa alawe hari mwa ɓavu lawo lile.
18V̄ale kamwe akopashia lidjahazi, ule akana yamazetwani amia amuɗunge. 19Na Insa kamukuɓalia, ɓadi amuambia: «Endra dzaho ha udjama waho, wawatoleye hadisi piya izo Mola ahufanyia, na inamuna ahushukidzia urehema.» 20Ɓas, andre dzahe, aandrisa ujudza hari mwa umukaɓala wa Dekapoli piya izo Insa amufanyia, ata watru piya wakoshanga.
uMwana mutrumushe wa Yairus, na mutrumama aɓamba inguo ya Insa
(Mat 9:18-26; Luk 8:40-56)
21V̄ale moni na lidjahazi lile, Insa andre ata ashia tsena nyambo ya lidzia; na hule dunia nyengi ingulidzana kariɓu na waye tsandzaleni mwa maji. 22Ɓas, v̄uja mutru akohiriwa Yairus, moja mengoni mwa yamadhwamana ya iNyumba ya Uswali. Wakati amuona Insa, adzivutsu mindruni hahe, 23amumia ha kusudi zini: «Mwana mutrumushe wangu a kariɓu na ufa. Nisuhutafadali, uje umukadziye yimihono, ile av̄one, aẽshi!» 24Ɓas, Insa andre na waye.
Dunia nyengi ya watru yakomuɗunga, tsena yakomusera. 25Na moni v̄ale v̄uka mutrumushe akovuja damu, madza ikana maha kumi na mili. 26Aondeha halisi mihononi ha matwaɓiɓu mengi, aka arumia piya mali aka nazo, wala kaka av̄ona, ɓadi ihali yahe yakozidi uka mbi. 27Ɓaanda akia haɓari yahusuana na Insa, aja moni na idunia ile rangu mengoni, aɓamba inguo yahe. 28Mana akodziambia: «Neka amba tsishindri tsiɓamba wala ukana tu ɗe inguo yahe, natsov̄ona.» 29Sa na isa ile mushukio damu wahe ule uzia, tsena akia mwilini hahe amba av̄onesewa na maradhi yahe yale.
30Sa ile kamwe Insa adzimayizi amba v̄umulawia nguvu. Azingia idunia ile, adzisa: «Mbani ɗe aɓamba nguo yangu?»
31Maswihaɓa yahe yamuambia: «Usuona idunia heli yahusera, ɗe usudzisa: ‹Mbani ɗe aniɓamba?› »
32Ɓadi Insa aangalia wale wamuzingidzia, ile aone mutru afanya trongo ile. 33Sa ile mutrumama ule angiliwa na faza ata akodridrima, mana ajua izo zamuhidjiria; aja adzivutsu mindruni hahe, amwesa amuambia piya zikweli. 34Ɓas, Insa amuambia: «Mama, uaminifu waho uhuv̄onesa. Endra dzaho ha salama, amba uv̄onesewa na maradhi yaho.»
35V̄ale raha akolagua, v̄uja watru wala ha dhwamana wa iNyumba ya Uswali, warongoa: «Mwana mutrumushe waho afu. Manatrini umutaãɓishao tsena Fundi?»
36Ɓadi Insa ukia yahe urongozi ule, amuambia dhwamana ule: «Usuriye, amini tu.»
37Amwesa kalisha ata mutru aɗungana na waye neka tsi ɗe Monye, Yakoɓu na Yuhani, mwananyahe wa Yakoɓu. 38Wakati wawaswili nyumbani ha dhwamana wa iNyumba ya Uswali, Insa aono fidjo la watru wakolila na ulatsa keme ha nguvu. 39V̄ale angia, awaambia: «Manatrini mulatsao keme na ulila? Mwana uwo kafa, ɓadi asindzia.» 40Ɓadi wamutsehe.
Ɓas, ɓaanda atoa piya watru v̄ondze, amurenge ɓaɓahe na mayahe wa umwana, na wale waka wamuɗunga, angia v̄ahali umwana aka. 41Amusiki umuhono, amuambia: «Talita kum!» (mana ya v̄av̄o, «Mama, nisuhuambia, hima!») 42Sa na isa ile mwana mutrumushe ule ahimi, andre; mana akana maha kumi na mili. Ɓas, waremwa na ushangavu muɓole. 43Insa awaɓalidza ha kusudi amba v̄wasuke ata mutru ajua trongo zahidjiri v̄ale; tsena awaambia wamuv̄e mwana ule shahula aɗye.
Markert nå:
MARKUSI 5: swb
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
