إنجيل متّى 4
4
الفصل الرابع
1في ديك الساعة الروح القُدُس رشد يَسوع نالخلا باش يجرّبوْ إبْليس.#4:1 "الروح القُدُس رشد": في هَد النصوص "الروح القُدُس" هُوَ الروح د الله وعلى هَد الشي تصريف الفعل مدكّر. 2وْمن بعدما صام أربعين يوم وأربعين ليلة، جاه الجّوع. 3وْجا نْعندو المُجرّب وْقال لو: "إدا كُنْتِ ابن اللّٰه، آمر باش يرجعو هَد الحجار خبز." 4ردّ عليه يَسوع وْقال: "مكتوب: «ماشي بالخبز بوحدو كيعيش الإنسان وَلكن بْكُل كلمة الّي كتخرج من الدقوم د اللّٰه.»"#4:4 هَد الاقتباس من سفر التثنية 8:3. 5من بعد ادّاه إبْليس نالمدينة المقدّسة وْوقّفوْ على الصمْعة د بيت المَقْدس. 6وْقال لو: "إدا كُنْتِ ابن اللّٰه، سيّب راسك نْتحت، حيت مكتوب: «غادي يوصّي الملائكة ديالو عليك، وْغادي يرفدوك على اليَدّين ديالوم باش ما تضرب حتّى حجْرة بْرِجلك.»"#4:6 هَد الاقتباس من المزمور 91:11-12. 7قال لو يَسوع: "في جهة يَخرى مكتوب: «ما تجرّب شي الرَّبّ إلَهك.»"#4:7 هَد الاقتباس من سفر التثنية 6:16. 8ادّاه عاود إبْليس نواحد الجّبل عالي بزّاف، وْورّاه مَمْلكات الدنيا كاملين والعظمة ديالوم. 9وْقال لو: "أنا غادي نعطيك هَد الشي كامل إدا ركعْتِ وْسجدْتِ لي." 10ديك الساعة قال لو يَسوع: "مْشي فحالك، آ الشيطان، حيت مكتوب: «سْجد نالرَّبّ إلَهك، وْهُوَ بوحدو تعبدوْ.»"#4:10 هَد الاقتباس من سفر التثنية 6:13. 11ديك الساعة خلّاه إبْليس، وْجاو الملائكة وْكانو كيخدموه.
12ملّي سمَع يَسوع بلّي قبطو يوحَنّا في الحبس، مشى نالجَليل. 13وْخلّى الناصِرة وْمشى وْسكن في كَفْرِناحوم، الّي هي حدا البحَر في حدود زَبولون وْنَفْتالي، 14باش يتحقّق ديك الشي الّي قال النَّبي إشَعْيا: 15"أرض زَبولون وأرض نَفْتالي على طريق البحَر لْهيه من الأُرْدُن، بلاد الأُمَم، 16الناس الّي ݣالسين في الظلام شافو واحد الضَّو كبير، والّي ݣالسين في بلاد الموت والظلّ ديالاْ، شرق عليهُم الضَّو."#4:16 هَد الاقتباس من سفر النَّبي إشعيا 9:1-2. 17من ديك الوقت بدا يَسوع كيبشّر وْكيقول: "توبو، حيت قرّب مُلك السماوات."
18ملّي كان يَسوع ماشّي حدا البحَر د الجَليل، شاف جوج د الخوت، سِمْعان، الّي كيقولو لو بُطْرُس، وأَنْدَراوس خاه. كانو كيسيّبو واحد الشبكة في البحَر، حيت كانو صيّادة. 19وْقالّوم: "تبعوني وانا غادي نرجّعكُم صيّادين د الناس." 20وْفي الحين خلّاو الشبكات وْتبعوه. 21ݣاز من تمّاك وْشاف جوج د الخوت يَخرين، يَعْقوب بن زَبَدي وْخاه يوحَنّا، في واحد الفلوكة مع زَبَدي باباهُم، كيصلّحو الشبكات ديالوم، وْعَيّط لوم يَسوع. 22وْفي الحين خلّاو الفلوكة وْباباهُم وْتبعوه.
23وْكان يَسوع كيدور في الجَليل كامل كيعلّم في بيوت العبادة ديالوم وْكيبشّر بالإنجيل د مُلك اللّٰه وْكيشافي كُل مرض وْكُل ضعف في الناس. 24وْتشاع الخبر ديالو في سوريّة كاملة. وْجابو لو المراطين كاملين الّي فيهُم الأمْراض والحريق على كُل شكل والمسْكونين والمرياحين والمكْحوشين، وْشافاهُم. 25وْتبعوه بزّاف د الناس من الجَليل وْعشر المُدُن وأُورُشَليم واليَهوديّة وْمن الأُرْدُن لْهيه.
Markert nå:
إنجيل متّى 4: ary
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 (Active), Instituto de Asistencia Teológica (IAT)
