مادتھا 18

نامکھے گیالثیدّی نانّگا ٹاگشوگ۔

1طِطُس لوبٹوگسگون حضرت عیسیٰ مسیح یکا یونگستے ٹیس، ”نامکھے گیالثیدّی نانّگا ٹاگشوگ سو اینوگ؟“

2حضرت عیسیٰ سی ٹھوگو چھونگونجیکّا بودتے کھونگونی سکییلّا لانگچوگّا زادس۔ 3کھونگی مولس، ”نگے کھیوجا لدینبا زیرّاد، گیودپا چوستے کھیوجے سیمس ٹھوگو چھونگون ژوگس گیورتے مانے کھیوجا نامکھے گیالثیدّی نانّگا مانے ژوگس مینیان۔ 4تیبویپھیا ٹھوگو تسوگسلا پاسمو گیورکھانگون نامکھے گیالثیدّی نانّگا چھیشوگپو این۔“

5”نگے لوبٹوگس اینچیسپوے سوجیکّی ای ٹھوگو تسوگسشیگّا گاسوس چونا نگا گاسوس چوستے این، 6اِین نانگ نگا ایمان چوکھان ای چھونگونگونّی نانگنے چیگّا دِیگپا چوچوگی سانگ کھورانگی سکییا رانتھاگی ردوا چھینمو تاگستے، گیاتشوے نانّگا نوبستے شینا گیال۔“

7”دِیگپے نانّگا گییلچوگکھان دُنیائی می گونلا تسامشیگی جیگسپا مییونگ۔ تیبو تانتان جونگین، اِین نانگ تیبو جونگ چوگکھانبوا تسامشیگی جیگسپا مییونگ۔ 8کالتیس کھیرانگی لاگپا یا کانگپے دِیگپا چوچوگّادنا، چادتے پھانگستونگ، لاگپا نیس تانگ کانگپا نیس یودتے نیالوے نانّگا پھانگچوگی سانگ، لاگپا چیگ تانگ کانگپا چیگ نیامپو تھامیدپے میتشیے نانّگا چھانا گیال۔ 9یانگ کالتیس کھیرانگی میگی دِیگپا چوچوگنا، تیبو ڈوستے پھانگستونگ۔ میگ نیس یودتے نیالوے نانّگا پھانگچوگی سانگ، میگ چیگ نیامپو تھامیدپے میتشیے نانّگا چھانا گیال۔“

10”ای ٹھوگو چھونگون گُون چیگّانگ رینمیدّی میگ نیامپو ماستا۔ نگے کھیوجا زیرّاد، کھونگون کھوم چُوکھانی فرشتا نگے نامکھے یابّی لدُونلا توسگیون جُوگستے کھونگی ناتسُول شادّانوگ۔“

لُوگ ستورکھانّی رومس۔

11(اِبنِ آدم ستورتے یودکھانگون سکیوبالا یونگس)#18‏:11 سنگونمے یُونانی شوقبُو نانّگا 18‏۔ 11 بئبال سیلکھان مانگپو جیگی ابو ستینگنے چھوکسکھان انوک جُوروک 12حضرت عیسیٰ مسیح مولس، ”چی سامّاراگ؟ میجیکّا لُوگ گیا یودکھانبوے نانگنے لُوگ چیگ ستورنا، جان گُوبچوگورگُو بُو ریا بورتے ستورکھانّی لُوگ چیگپو میتسالّا؟ 13نگے کھیوجا لدینبا زیرّاد کالتیس لُوگ ستورکھانبو تھوبنا، ماستورکھانّی لُوگ گُوبچوگورگُو ای سانگ ای ستورتے تھوبکھانّی لُوگ چیگپوے پھیا کھو مانّگا تھادپو چھین۔ 14تینّا تسوگسلا کھیوجے نامکھے یاب، ایمان یودکھان ای چھونگونگونّی نانگنے چیگّانگ ستورچیسلا تھوگستھادّا مانوگ۔“

فونو دِیگپاچان جیک ٹانگپوے لامیکا کھیونگچیس۔

15”کالتیس ایمان چان فونو جیکّی کھیرانگی گیابگالّا دِیگپا چونا، کھو یودسا چیگپو سونگتے کھوے سکیونبو ستون۔ کالتیس کھوے کھیرانگی زیرکھانبو نیانتے گیودپا چونا، کھیورانّگا کھیرانگی مالِک یانگسکیار لوگستے تھوبتے اینوگ۔ 16اِین نانگ کالتیس کھوے کھیرانگی زیرکھانگون مانیانّا ’زیرکھانگون می نیس یا سومی گوا تانگستے تانتان چوچیسلا‘ کھیرانگی ایمان چان فونو چیگ یانیس ٹھیدتے کھیر۔ 17کالتیس کھوے تے گواگونلا مانیانّا، تینے عبادت خانہ لا شود، یانگ کالتیس کھوے عبادت خانہ لانگ مانیانّا، تینے کھوا ٹھال نینکھان تانگ جان ایمان میدکھان گُون ژوگس سیشیگ۔“

18”نگے کھیوجا لدینبا زیرّاد دُنیائیکا کھیوجے گونگسپا ماتانگکھانبوا نامکھے خُدےانگ گونگسپا سالّا میزاد، یانگ دُنیائیکا کھیوجے گونگسپا تانگکھانبوا نامکھے خُدےانگ گونگسپا سالّا زادِین۔“

19”یانگسکیار نگے کھیوجاگونلا زیرّاد، کالتیس دُنیائیکا ایمان چان نیس جُووا پھولچیسلا چیجیکّیکا کھاچھامسنا، تیبو نگے نامکھے یابّی کھیوجے پھیا چوا زادِین۔ 20چیازیرنا کارُو نگے مینگ کھورکھان نیس یا سوم دزومّاد نگا تیرو کھونگون نیامپو یود۔“

سنینگرجے میدکھانّی یوگپوے رومس۔

21تینے حضرت پطرؔس حضرت عیسیٰ مسیح یودسا یونگستے ٹیس، ”مسیح لے، کالتیس نگے فونو جیکّی نگے گیابگالّا دِیگپا چونا، تینے لان تسام نگے کھوا مُعافی تانگوس؟ لان ردون#18‏:21 حضرت عیسیٰ سی توسلا یہُودی پے لوبژا نانگژان سوجیکّی کھیوجے گیابگالّا دِیگپا چونا کھوا لان سوم مُعافی تانگوس۔ حضرت پطرؔس سی لان ردون مُعافی تانّگا زیر زانے کھوے گھوسدومی سانگ مانّگا تانگستے این سام۔ تانگنا ڈیگّا لے؟“

22حضرت عیسیٰ سی لانسالس، ”نگے کھیورانّگا زیرّاد، لان ردون مانپا ردُونچو لداب ردون تونگ۔“

23”سپیرنا نامکھے گیالثید نی، کھورانگی یوگپوگونّی کانے سیروگ لینچیسلا تھاگچادکھانّی گیالپو ژوگس این۔ 24سیروگ لینچیس گوزوگّاچیگ، گیالپوے لدُونلا کارور مانگپوے پینے بولون یودکھانّی میجیک کھیونگس۔ 25بولون شالگیو مید پاسانگ گیالپوے تے میبو، کھوے ناما تانگ ٹھوگوگون یانگ نور یودکھان تشانگما تسونگستے، بولون شالچیسلا کا تانگس۔“

26”یوگپو گیالپوے لدُونلا گییلتے جوجو، ’نگا نیامپو زودپا زاد، گیاگسپا نگے بولون گانگپو لوگستے پھولین‘ زیرتے جُووا پھولس۔ 27گیالپوا سنینگرجے سکییس، یانگ کھوے بولونبو مُعاف چوستے کھو چھاچوگس۔“

28”اینّانگ یوگپو پھیلوگا سونگتے ستینگنے پینے نیونگون ستون کھاچیگ بولونلا تانگکھانّی کھوے ٹوپا یوگپویکا سونگ، یانگ کھو زومستے سکیے لدامستے، ’نگے بولون لوگستے تونگ‘ زیرس“

29”کھوے ٹوپا یوگپوے سیکا گییلتے جوجو، ’نگا نیامپو زودپا زاد گیاگسپا نگے بولون لوگستے پھولین‘ زیرتے جُووا پھولس۔ 30اِین نانگ کھوے ژووابو مانیانس ماتشاد بولون شالشال تشوگپا کھو تسونکھانّگا کاگچوگس۔“

31”جان یوگپو ٹوپاگونلا تیبو تھونگتے ثو ثانٹے یونگس، یانگ گیالپو یودسا سونگتے جونگکھان تشانگما شادس۔ 32تینے گیالپوے یوگپو سنینگرجے میدکھانبو بودتے کھیونگس یانگ کھوا زیرس، ’یوگپو نگانپا کھیود، کھیرانگی نگا جوجو جْوس پا سنینگرجے سکیستے، نگے کھیرانگی بولون تشانگما مُعاف چوسپین۔ 33نگا کھیرانگی کا سنینگرجے سکییا تسوگسلا، کھیورانّگانگ کھیرانگی ٹوپیکا سنینگرجے سکیے ماگوسّا؟‘ 34گیالپوا ثو یونگستے، بولون گانگپو شالشال تشوگپا کھو تسونکھانّگا کاگستے ناگس ستانّالا کا تانگس۔“

35”کالتیس کھیوجے کھیوجارانگی فونو سنینگنے مُعافی ماتانگنا نگے نامکھے یابّیانگ کھیوجا ریرے نیامپو تینّا ژوگس چوین۔“

Markert nå:

مادتھا 18: LBJNT

Marker

Del

Kopier