مادتھا 17

حضرت عیسیٰ سی زیرّجید سنگونس۔

1جاگ ڈوگی ستینگنے، حضرت عیسیٰ مسیح حضرت پطرؔس ، حضرت یعقُوبؔ تانگ کھوے نو حضرت یُوؔحنّا ٰ ٹھیدتے سوانگ میدسا ری تھونپوجیکّیکا سکیودس۔ 2تیرو کھونگونی لدُونلا حضرت عیسیٰ سی سکوزوگس گانگپو گیورتے، کھونگی ژالدونگ نییمے زیر ژوگس یانگ کھونگی نامزا کارپو اوت ژوگس گیور۔ 3ہونمیدلا کھونگونی پیغمبر حضرت مُوسیٰؔ تانگ حضرت اِلیاس حضرت عیسیٰ سی نیامپو جالتا سالین جال۔

4حضرت پطرؔس سی حضرت عیسیٰ سی زیرس، ”مسیح لے، نگاجا ایکا یودچیسپو ما گیالّا سونگ۔ کالتیس نیرانگ تھوگستھادنا نگے جوگسا سوم سیگاین، نیرانگی پھیا چیگ، حضرت مُوسیٰؔ سی پھیا چیگ، یانگ حضرت اِلیاس پھیا چیگ۔“

5کھوے تیگون زیرکھان زانے، ثین لتانگشانجیکّی کھونگون کابس یانگ ثینّی نانگنے سونگسکادچیگی مولس، ”یبو نگے چیسپے بُوژا این، کھو نیامپو نگا ماثانٹے تھادپو این، کھوے زیرکھانگونلا نیون۔“ 6تیبو تشورّاچیگ لوبٹوگسگون ماثانٹے جیگستے کھالبوگّا گیل۔

7اِین نانگ حضرت عیسیٰ سی سکیودتے کھونگونلا چھاگتھوگّا زادتے مولس، ”لونگشیگ جیگس ماجیگس۔“ 8کھونگونی گو ستاگس تے ستاچیگ حضرت عیسیٰ سی چیگپو مانے حضرت مُوسیٰؔ تانگ حضرت اِلیاس کھونگون نیامپو میدکھانبو تھونگ۔

9رینے بابستے سکیودین یود زانے، حضرت عیسیٰ سی کھونگونلا کا سالس، ”اِبنِ آدم شیکھانگونّی ٹونے سونتیا لانّگا زادتے مانے، کھیوجا تھونگکھانبو سوانگ ماشاد۔“

10لوبٹوگسگونّی کھونّگا ٹیس، ”تینے شریعتی عالِم گونّی مسیحا سکیودّی سانگ سنگونلا پیغمبر حضرت اِلیاس سکیودگوس چیا زیرتے اینوگ۔“

11حضرت عیسیٰ سی لانسالس، ”تانتانلا، چیتشانگما ڈالڈیگ چوچیسلا حضرت اِلیاس سنگونلا یونگّوس۔ 12نگے کھیوجا زیرّاد، حضرت اِلیاس یونگ تشارتے این، اِین نانگ کھونگونی کھو نگوماشیس یانگ کھو نیامپو چوین سامکھان تشانگما چوس۔ تینّا تسوگسلا اِبنِ آدمنگ کھونگونی لاگنے ردوگنگال نیونگّوساین۔“ 13تینے حضرت عیسیٰ سی غوتا سالکھان یوحنّانی سکورلا مولتے اینکھانبو لوبٹوگس گونلا ہاگو۔

حضرت عیسیٰ سی ردود جوگسکھانّی ٹھوگوجیک پھانچوگا زادس۔

14کھونگون رینے بابستے میتشوگس یودسا سکیودّاچیگ، میجیک حضرت عیسیٰ سی لدُونلا یونگستے پِیکمویکا گییلتے 15زیرس، ”مسیح لے، نگے بوتشیکا سنینگرجے زادّانگ جوجو۔ کھو گییلتے زوگسپو گانگپو دارین ناگس ثانٹے تھونگدوگ۔ لان مانگپو کھو میے یانگ چھوی نانّگا گیل۔ 16نیرانگی لوبٹوگسگون یودسا کھیونگسپین اِین نانگ کھونگونی کھوا پھانچوگ مانیان۔“

17حضرت عیسیٰ سی مولس، ”ایمان میدکھان تانگ نگانپا میرابس، نامتشوگپا نگا کھیوجاگون نیامپو دوگ؟ نامتشوگپا نگے کھیرانگّون نیامپو زودپا بورگوس؟ بُوژا بُویکا نگا یودسا کھیونگ۔“ 18حضرت عیسیٰ سی ردود پوا کھاسکییا زادپا کھو ٹھوگوی نانگنے بینگتے سونگ یانگ تینّامالّا ٹھوگوبو گیال۔

19تینے لوبٹوگسگون حضرت عیسیٰ سی یودسا یونگستے سونگ تشور ماچوگّا ٹیس، ”نگاجا گُونلا ردود پو چیا پھینگ مانیانّا اینوگ؟“

20کھونگی لانسالس، ”چیازیرنا کھیوجا خُدے نانّگا ایمان ما چھونگون یودتے اینوگ۔ نگے کھیوجا لدینبا زیرّاد، کالتیس کھیوجا نیونگسکارّی ساون چھونگون زامشیگی ایمان یودنا ای ریبوا یکانے اکا سونگ زیرنا چھین، یانگ کھیوجاگونلا چومینیانچیس چانگ مییونگ۔“

حضرت عیسیٰ سی کھونگرانگ ڈونگشیسّی سکورلا یانگسکیار مولس۔

21”اینّانگ یتسوگسّی ردودگون دُعا تانگ روزا دوگچیس گیُودتے ماتشوگس پھینگ نیانّا مانوگ“ #17‏:21 سنگونمے یُونانی شوقبُو نانّگا 17‏۔ 21 بُو ڈِیستے میدتے اینوگ۔ اِین نانگ ستینگماگونّی نانّگا ”اینّانگ یتسوگسّی ردودگون دُعا تانگ روزا دوگچیس گیُودتے ماتشوگس پھینگ نیانّا مانوگ“ تھودتے اینوگ۔ 22لوبٹوگس چوگنییسپو گلِیلی یولجونگسّی نانّگا دزومتے یودتوس، کھونگونلا حضرت عیسیٰ سی مولس، ”اِبنِ آدم نگولوگ چوستے ڈاو گونّی لاگا ستاداین 23کھونگونی کھو ساداین یانگ جاگ سومپے جاگّا سونتیا لانگسشوگّا زادِین۔“ لوبٹوگسگونّی سیمس تشیرکھے گانگس۔

بیت المقدِس سی پھیا ٹھالشالچیس۔

24حضرت عیسیٰ مسیح تانگ کھونگی لوبٹوگسگون کفرنحُوم مّی گیالسا لیبّاچیگ، بیت المقدِس سی ٹھال لینکان گونی حضرت پطرؔس یودسا یونگستے ٹیس، ” کھیرانگی لوبٹوکگونّی بیت المقدِس سی پھیا ٹھال شالّا مانوگا؟“

25حضرت پطرؔس سی زیرس، ”شالّا زادّانوگ۔“ حضرت پطرؔس نانّگا یونّگاچیگ کھوے زیرّی سانگ سنگونلا حضرت عیسیٰ سی ٹیا زادس، ” شمعُوؔن ، چی سامّاراگ؟ دُنیائی گیالپوگونّی ٹھال سوی کانے لیندوگ، کھورانگی ٹھوگو کانے لیندوگّا یا جانمے کانے؟“

26حضرت پطرؔس سی لانتانگس، ”جانماگونّی کانے۔“ حضرت عیسیٰ سی مولس، ”تینے ٹھوگوگونّی ٹھال شال ماگوس۔ 27اِین نانگ کھونگونلا نگاتیکا ثو مییونگچیسّی پھیا تشوا سونگتے نیاکوگ تونگ، یانگ نیا گوما زومکھانبوے کھا پھیس، تینانّگا کھیورانّگا مولّی پینیجیک تھوبین۔ تیبو کھیرتے نگاتانگ نیسکوے ٹھال کھونگونلا شول۔“

Markert nå:

مادتھا 17: LBJNT

Marker

Del

Kopier