मरकुस 4

बिएजु बाणे कथा

मत्ती 13:1-9; लूका 8:4-8

1पता यीशु तथे औत जे गा त तठि बिश कइ दुबारी शिचालुण लगा। तठि अत हुसुड़ा किठा भुआ कि तस घेई कइ नाव पुठ बिशुण आउ, त सोब हुसुड़ा औत पुठ बिशा।#लूका 5:1-3 2तोउं से कथाई बइ तेन्हि सुआ बोक शिचालुण लगा। तेन ई बोक बि बोली कि 3“शुणे शुणे! यक मेह्‍णु बिएजु बाण जे गा। 4बांत पेंत कुछ बिएजु बत झड़ु त चड़ी चखुरु एई कइ से खाई छउ।”

5“किछ बिएजु शकरिआटी जगाई झड़ु, जेठि सुसुर जन ना थिआ। जन घट भुणे बझई जुए बेशक से झट लुंग गोउ। 6पर जपल दिस निसु त से धुपि बेलि टड़ गोउ त सीरे घट भुणे बझई जुए शुख गोउ।”

7“किछ बिएजु कांटि बुछ झड़ु। पर कांटे लम्मिए त तेन्के औजि बेलि तेस बिएजु केआं कोई फल ना मेआ।”

8“पर किछ बिएजु सुसुर बग झड़ु। से लुंगु त लम्मी कइ अब्बल फसल भुई; कोई तिह गुणा, कोई शठ गुणा त कोई सौ गुणा फसल भुई।” 9तोउं तेनि बोलु, “अगर तुस में बोक ध्यान जोई शुणियेल त तुस समझ घेन्ते।”#4:9 मूल भाषा अन्तर “जेस केईं शुणुण जे कन असे, से शुणिण दिए” लिखो असु।

कथाई मतलब

10पता, जपल यीशु अकेला थिआ, त तसे बाराह चेली त होरे साथी तस कथाई मतलबे बारे पुछु। 11तेन तेन्हि जे बोलु, “तुन्धे त परमेश्वरे अपु राज्ये नियको बोके समझणे बुद्धि दुतो असी, पर होरी जे सोब बोके कथाई अन्तर भुन्ति। 12ताकि

से हेर हेर कइ बि ना पिछाणियेल त

शुण शुण कइ बि ना शुणियेल होर न समझियेल।

ई ना भो कि से समझ कइ अपु मन बदलियेल त

तेन्के पाप माफ करी घियेल।”#यशायाह 6:9,10

13तोउं, तेन तेन्हि जे बोलु, “कि तुस इस कथाई मतलब न समझते ना? त फिर होर कथाई कीं समझते? 14बाणे बाड़ा जेस बिएजु बाण लगो थिआ, से परमेश्वरे वचने ईं असु। 15त केहि मेह्‍णु तेस बते ईं असे, जेठि से बिएजु झड़ थिउ। से परमेश्वरे वचन त शुणते, पर तिखेईंए शैतान एई कइ तेन्हि वचनी तेन्के मन केआं दूर कइ छता।

16त केहि मेह्‍णु तेस शकरिआटी जिम ईं असे। से परमेश्वरे वचन त खुशी जुए शुणते त मानते बि। 17पर तेस बिएजु ईं परमेश्वरे वचन अन्तर सीरे घट भुणे बझई जोई धिक रोजे लिए सुसुर रेहन्ते। होर जपल तेस वचने बझई जोई मेह्‍णु तेन्हि भुंजान्ते त से तस मनुण छड़ देन्ते।

18तिहांणि केहि मेह्‍णु तेस कांटियाली जिम ईं असे। से परमेश्वरे वचन त शुण कइ मानते, 19पर मतोके चिन्ता, धन दौलते लालच अन्तर एई कइ त अपु मने होरे होरे लोभे बेलि से फस घेन्ते त परमेश्वरे पतूं घेण छड़ देन्ते।

20पर केहि मेह्‍णु तेस सुसुर बगे ईं असे। से परमेश्वरे वचन शुण कइ मानते त तेन्हि पुठ तिह गुणे, शठ गुणे त सौ गुणे फल लगते।”

दीये कथा

मत्ती 5:15; लूका 8:16-18

21तोउं यीशु तेन्हि जे बोलु, “दीये तोउं जाते ना कि तस मन्जे पड्डे रखे या लेंसुड़ बइ घटे? ना! दीया त इस बझई जुए जाते कि तस तुबारि पुठ रखे।#मत्ती 5:15; लूका 11:33 22किस कि हर यक नियको बोक सामणि एई घेन्ति त हर यक राज खुल घेन्ता।”#मत्ती 10:26; लूका 12:2 23तोउं तेनि बोलु, “अगर तुस में बोक ध्यान जोई शुणियेल त तुस समझ घेन्ते।”

24फिर तेन तेन्हि जे बोलु, “जे तुस शुणुण लगो असे, तेस पुठ ध्यान दिए। जेन नापे बइ तुस होरी जे नापते, तेस नापे बइ तुसी जे बि नापिंन्‍तु त तुन्धे सुआ दीइन्तु।#4:24 एसे मतलब असा कि जतर ध्यान जुए तुस शुणते, ततर तुसी समझ एन्ती त तेस केआं बि ज्यादा तुसी शिचालिन्तु।#मत्ती 7:2; लूका 6:38 25किस कि जेस केईं असु, तसे धे दीइन्तु; त जेस केईं नेईं, तेस केआं से बि नीइन्तु जे तेस केईं असु”।#4:25 एसे मतलब असा कि जे में वचन शुण कइ मानता, तस हउ बि शिचालिन्तु, होर जे में वचन ना मानता, तस केआं जे कुछ बि समझ असी, से बि गवाई घेन्ति।#मत्ती 13:12; 25:29; लूका 19:26

जिमदार त परमेश्वरे राज्य

26तोउं तेन बोलु, “परमेश्वरे राज्य जीं केस जिमदारे बग बिएजु फटाणे ईं असा 27से घेई कइ रात उंघता त दिसाई खड़िन्ता। पर से बिएजु कीं लुंगतु त बोडिन्तु तसे बारे तस भनक बि ना लगती। 28धरती अपफ फल लान्ती, पेहले लुंग एन्ती, तोउं सियुड़ त पता रो पक्की घेन्ते। 29पर जपल रो पक्की घेन्ते, तोउं से जिमदार एई कइ तस लुणुण लगता, किस कि फसल लुणणे भोई गई।”

शरहेउए रोए कथा

मत्ती 13:31-34; लूका 13:18-19

30फि यीशु बोलु, “असी परमेश्वरे राज्ये बराबरी केस जुए करीण त केस कथा जुए तसे बोक लाण? 31से शरहेउए रोए ईं असा : जपल बग अन्तर तस बांते त सोबी चीजी केआं मठुड़ भुन्तु, 32पर बाण केआं पता से लुंग कइ सोबी टाट केआं बोडु भुन्तु, त तसे डा अत बोडे बोडे भुन्ते कि चड़ी चखुरु बि तसे डाई पुठ गुला बणाई कइ बिश सकते”।

33से परमेश्वरे वचन तेन्हि समझाण जे ईं सुआ कथा शुणाई शुणाई कइ शिचालताथ। 34त बगैर कथाई से तेन्हि जे कुछ न बोताथ; पर अकेले अन्तर अपु चेली जे सोब बोकी के मतलब समझान्ताथ।

यीशु तुफान शान्त करण

मत्ती 8:23-27; लूका 8:22-25

35तेस रोज जपल झवादी भुई, त तेन अपु चेली जे बोलु, “चले! तथे ओस पार घेन्ते”। 36त से हुसुड़ा छड़ दी कइ जीं से बिशो थिआ, तिहांणि से नाव पुठ साते नी छड़ा; त तेन्हि जोई होरी बि नाव थी। 37तपल सुआ ब्यार लगण लगी। पुओणि छल्हारे नाव जोई बजण लगे त नाव पुओणि बेलि भरीण लगी। 38पर से अपफ नावी पती कना उंघ बिशो थिआ। तोउं तेन्हि से खड़ेरा त बोलु, “ए गुरु, ए गुरु! तुसी कि चिन्ता नेईं न कि अस मरणे बाड़े असे?” 39तोउं तेन खड़ी कइ ब्यार डराई, त छल्हारी जे बोलु, “शान्त भो!” त ब्यार रुक गई त तठि यकदम ईं चैन एई गई। 40तोउं तेन तेन्हि जे बोलु, “तुस किस डरते? तुसी कि अपल तकर मोउं पुठ विश्वास नेईं न?” 41ईं हेर कइ चेले बिचारे सुआ डर गे त अपफ बुच बोलुण लगे, “ए कोउं भो भाई, जेसे केहणा ब्यारी त छल्हारे बि मानते?”

Markert nå:

मरकुस 4: pgg

Marker

Del

Kopier