Luka 22
22
Yahudanıń satqınlıǵı
(Mat 26:1-5, 14-16; Mrk 14:1-2, 10-11; Yuxn 11:45-53)
1Qutqarılıw bayramı dep atalatuǵın Ashıtqısız nan bayramı jaqınlap qalǵan edi. 2Bas ruwxaniyler hám diniy muǵallimler xalıqtan qorqqanlıqtan, Iysanı jasırın túrde óltiriwdiń jolın izledi.
3Sonda on eki elshiniń biri – Isqariot dep atalǵan Yahudanıń ishine shaytan kirip aldı. 4Yahuda barıp, bas ruwxaniyler hám Ibadatxananıń bas qarawılları menen Iysanı olarǵa qalay uslap beriwdi oylastı. 5Olar quwanısıp, oǵan aqsha beriwge kelisim berdi. 6Yahuda wáde berip, Iysanı olarǵa xalıq joq jerde uslap beriw ushın qolaylı payıt izledi.
Iysanıń sońǵı keshesi
(Mat 26:17-25; Mrk 14:12-21; Yuxn 13:21-30; 1Kor 11:23-25)
7Qutqarılıw bayramınıń qozısı shalınıwı kerek bolǵan Ashıtqısız nan bayramı jetip keldi. 8Iysa Petr menen Yuxandı jiberip:
– Barıńlar, bizler ushın Qutqarılıw bayramınıń asın tayarlańlar, – dedi.
9Olar:
– Qay jerde tayarlawımızdı qáleyseń? – dep soradı.
10Iysa olarǵa bılay dedi:
– Qalaǵa kirgenińizde, gúze menen suw kóterip kiyatırǵan adamǵa gezlesesiz. Onıń izine erip, ol kirgen úyge kirińler 11hám úydiń iyesine: «Ustazımız: „Shákirtlerim menen birge bayram asın jeytuǵın bólme qáne?“ – dep sennen sorap atır», – deńler. 12Ol sizlerge tósekler tóselgen joqarıdaǵı úlken bólmeni kórsetedi. Sol jerde tayarlańlar.
13Olar barıp, Iysanıń aytqanlarınıń hámmesin tawıp, bayram asın tayarladı.
14Awqatlanatuǵın waqıt bolǵanda, Iysa elshileri menen birge dasturxan átirapına otırdı. 15Olarǵa:
– Azap shekpesimnen burın bul bayram asın sizler menen birge jewdi qattı qálegen edim. 16Sizlerge aytatuǵınım: bizler Qudaydıń Patshalıǵında haqıyqıy Qutqarılıw asın jemegenimizshe, Men bul astan basqa jemeymen, – dedi.
17Sońınan Iysa qolına keseni alıp, shúkirlik etti de:
– Bunı alıp, óz ara bólisip ishińler. 18Sebebi Meniń sizlerge aytatuǵınım: Qudaydıń Patshalıǵı kelmegenshe, Men endi júzim ishimliginen ishpeymen, – dedi.
19Soń nandı alıp, Qudayǵa shúkirlik bildirdi hám onı sındırıp, olarǵa berdi de:
– Bul – sizler ushın beriletuǵın Meniń denem. Meni eslep turıw ushın bunı isleńler, – dedi.
20Sol sıyaqlı, keshki awqattan soń keseni alıp:
– Bul kese – Sizler ushın tógiletuǵın Meniń qanım menen bekitiletuǵın jańa kelisim.
21Biraq qarańlar, Meni satatuǵın adamnıń qolı Meniń qolım menen bir dasturxanda. 22Adam Ulı Quday aldın ala belgilegendey baratır. Biraq Oǵan satqınlıq qılıwshı hásiret shegedi! – dedi.
23Shákirtler bir-birinen:
– Bul isti isleytuǵın qaysısımız? – dep soray basladı.
Hámmeden ullı kim?
24Shákirtler arasında qaysısınıń eń ullı bolıp esaplanıwı kerek ekeni haqqında bir tartıs ta payda boldı. 25Iysa olarǵa bılay dedi:
– Milletlerdiń patshaları óz xalıqları ústinen ústemlik etedi, olarǵa biylik etiwshiler «xalıqtıń qayırqomları» dep ataladı. 26Biraq sizler bunday bolmańlar. Kerisinshe, arańızda eń úlken bolǵan eń kishidey bolsın, basshı da xızmetshidey bolsın. 27Qaysı biri ullı: dasturxan basında otırǵan ba yamasa xızmet etip turǵan ba? Dasturxan basında otırǵan emes pe? Biraq Men sizlerdiń arańızda xızmetshideymen.
28Sınawdan ótken waqtımda sizler Meniń menen birge boldıńlar. 29Ákem Maǵan patshalıq biyligin bergeni sıyaqlı, Men de sizlerge patshalıq biyligin beremen. 30Solay etip, sizler Meniń Patshalıǵımnıń dasturxanı átirapında iship-jeysizler, taxtlarda otırıp, Izraildıń on eki urıwına húkimdarlıq qılasızlar.
Petrdiń Iysadan tanıwı haqqında
(Mat 26:31-35; Mrk 14:27-31; Yuxn 13:36-38)
31Iysa Petrge:
– Shimon, Shimon! Adamlardıń biydaydı kepshik penen jelpigeni sıyaqlı, shaytan sizlerdi sınaw ushın ruxsat soraǵan edi. 32Biraq Men isenimiń tawısılmasın dep, sen ushın duwa ettim. Sen Maǵan qaytıp kelgenińde, tuwısqanlarıńnıń isenimin bekkemle, – dedi.
33Shimon Iysaǵa:
– Iyem! Seniń menen birge qamaqqa da, ólimge de barıwǵa tayarman, – dedi.
34Biraq Iysa oǵan:
– Petr, saǵan aytatuǵınım: búgin qoraz shaqırmastan burın sen Meni tanımayman dep, Mennen úsh ret tanasań, – dedi.
Dorba hám qılısh
35Soń Iysa shákirtlerine:
– Men sizlerdi shıjlansız, dorbasız, ayaq kiyimsiz jibergenimde, ne nárseden kemshilik kórdińler? – dedi.
– Hesh nárseden, – dep juwap berdi olar.
36Sonda Iysa olarǵa:
– Al endi kimniń shıjlanı bolsa, onı alıp júrsin. Jáne dorbasın da alsın. Kimniń qılıshı bolmasa, kiyimin satıp, qılısh alsın. 37Óytkeni sizlerge aytatuǵınım: Muxaddes Jazıwdaǵı: «Ol jınayatshılarǵa qosıp sanaldı»#22:37 Iysh 53:12., – degen sóz Mende ámelge asıwı kerek. Awa, Men tuwralı jazılǵanlar orınlanıp atır, – dedi.
38– Iyem! Qara, bul jerde eki qılısh bar, – dedi olar.
– Sol jetedi, – dedi Iysa.
Iysanıń Záytún tawında duwa etiwi
(Mat 26:36-46; Mrk 14:32-42)
39Iysa shıǵıp, Óz ádeti boyınsha Záytún tawına ketti. Shákirtleri de Onıń izine erdi. 40Sol jerge kelgende, Iysa olarǵa:
– Azǵırılmawıńız ushın duwa etińler, – dedi.
41Ózi olardan tas ılaqtırım jerdey awlaǵıraq barıp, dizerlep otırdı da, bılay dep duwa etti:
42– O, Ákem, eger Sen qáleseń, bul azap kesesin Mennen ótkizip jiber. Biraq Meniń emes, Seniń qálegeniń bolsın. 43Sonda aspannan bir perishte Iysaǵa kórinip, Oǵan kúsh berdi. 44Ol azap shegip atırıp, jáne de kúshlirek duwa etti. Onıń teri jerge tamǵan qan tamshıları sıyaqlı edi.
45Iysa duwa etip bolıp, ornınan turdı da, shákirtleriniń qasına keldi. Olardıń qayǵıdan sharshap, uyıqlap atırǵanın kórdi. 46Olarǵa:
– Nege uyıqlap atırsızlar? Turıńlar, azǵırılmawıńız ushın duwa etińler, – dedi.
Iysanıń qolǵa alınıwı
(Mat 26:47-56; Mrk 14:43-50; Yuxn 18:3-11)
47Iysa ele sóylep turǵanda, bir topar adamlar payda boldı. Olardıń aldında on eki shákirtiniń biri Yahuda kiyatır edi. Ol Iysanı súyiw ushın Oǵan jaqınlastı#Luk 22:47 Bazı qoljazbalarda mına sózler de bar: «Sebebi bul belgini ol olarǵa bergen edi: Men kimdi súysem, Ol – Sonıń Ózi».. 48Iysa oǵan:
– Yahuda! Sen Adam Ulın súyip turıp, Oǵan satqınlıq isleyseń be? – dedi.
49Iysanıń qasındaǵılar ne bolajaǵın sezip:
– Iyem, qılıshtı iske salayıq pa? – dedi.
50Olardıń birewi bas ruwxaniydiń qulınıń oń qulaǵın shawıp tasladı.
51Biraq Iysa:
– Toqtatıńlar, jeter endi! – dep quldıń qulaǵına qolın tiygizip, jazıp jiberdi.
52Soń Iysa Ózin uslawǵa kelgen bas ruwxaniylerge, Ibadatxananıń bas qarawıllarına hám aqsaqallarǵa bılay dedi:
– Meni uslaw ushın jınayatshıǵa qarsı shıqqanday bolıp, qılısh hám shoqmar alıp keldińler me? 53Men hár kúni sizler menen birge Ibadatxanada bolǵanımda, Maǵan qarsı qol kótermedińler. Biraq endi zaman sizlerdiki, házir qarańǵılıq ústemlik etetuǵın waqıt.
Petrdiń Iysadan tanıwı
(Mat 26:57-58, 67-75; Mrk 14:53-54, 66-72; Yuxn 18:12-18, 25-27)
54Olar Iysanı uslap, bas ruwxaniydiń úyine alıp bardı. Al Petr uzaqtan erip keldi. 55Háwliniń ortasına ot jaǵıp, hámmesi birge otırǵanda, Petr de olardıń arasında otırǵan edi. 56Bir shorı qız Petrdiń ottıń qasında otırǵanın kórip, oǵan tigilip qaradı da:
– Bul adam da Onıń menen birge edi, – dedi.
57Biraq Petr qızǵa:
– Yaq, qarındasım, men Onı tanımayman, – dep Iysadan tandı.
58Birazdan keyin basqa birew de Petrdi kórip:
– Sen de solardıń biriseń, – dedi.
Biraq Petr oǵan:
– Yaq, aǵa, men olardan emespen, – dedi.
59Bir saattay ótkennen soń, taǵı birew:
– Írasında da, mına adam Onıń menen birge bolǵan, sebebi ol galilalı-ǵo, – dedi bekkem isenim menen.
60Biraq Petr oǵan da:
– Aǵa, seniń ne aytıp turǵanıńdı túsinbeymen, – dedi.
Tap sol waqıtta, ol sóylep turǵanda, qoraz shaqırdı. 61Iyemiz burılıp, Petrge qaradı. Sonda Petr Iyemizdiń: «Búgin qoraz shaqırmastan burın sen Mennen úsh ret tanasań», – degen sózin esine túsirdi. 62Sırtqa shıǵıp ketip, ókirip jıladı.
Iysanı masqaralaw
(Mat 26:59-66; Mrk 14:55-64; Yuxn 18:19-24)
63Iysanı uslap turǵan adamlar Onı masqaralap ura basladı. 64Onıń kózlerin baylap, Onnan:
– Wáliylik etip ayt, Seni kim urdı? – dep soradı. 65Oǵan jáne basqa da kóp jaman sózler ayttı.
Iysa joqarǵı keńes aldında
(Mat 26:59-66; Mrk 14:55-64; Yuxn 18:19-24)
66Tań atqannan keyin, xalıq aqsaqalları, yaǵnıy bas ruwxaniyler menen diniy muǵallimler jıynalıp másláhátlesti de, Iysanı ózleriniń joqarǵı keńesine apardı. 67Onnan:
– Bizlerge ayt, Sen Masiyxpısań? – dep soradı.
Iysa olarǵa:
– Men sizlerge aytsam da, isenbeysizler. 68Sizlerge soraw bersem de, juwap bermeysizler#Luk 22:68 Bazı qoljazbalarda «…hám sizler meni jibermeysizler» degen sózler de bar.. 69Biraq endigiden bılay, Adam Ulı qúdiretli Qudaydıń oń jaǵında otıradı#22:69 Zab 109:1., – dedi.
70Sonda hámmesi:
– Demek, Sen Qudaydıń Ulımısań? – dep soradı.
Iysa olarǵa:
– Meniń Sol ekenimdi ózlerińiz aytıp tursız, – dep juwap berdi.
71Sonda olar:
– Bizlerge jáne qanday gúwalıq kerek? Óz awzınan esittik-ǵo, – desti.
Markert nå:
Luka 22: QrqMK22
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 2022
