Péna a Apotereri 22
22
1«Nyîn nírí̧ rá̧ bâa a mǐri̧, i láɓay ka mi erú a ŋgɛŋnɛ́ ɓay a sa hí̧ wǎyri, ɓay hánzáʼa ní.» 2Gelka, kú lá ɓá Pôl saɓay ka nzáʼa aramɛyɛ̧́, kú rekaw yím ɓáy. Dáy Pôl sa: 3«Mi ɓá Juyíf, kú mbuŋ mí ka Társe, ka tísiri a Silisí, dáy mi mbɛlhɛ̧ a mǐ a gelé a Zerúzalɛ̂m, bákáwa a mǐ a tɔ́ʼɔ mí hɛ̧y, pé ɓá Gamaliyɛ́l#22:3 Gamaliyɛ́l, kaw ɓá gáŋ njuku tɔ́ʼɔhɛ̧, a kú tu nɛ́ magél too a ɓil kaw a kuriri.. Ké tɔ́ʼɔ mí ɓá táŋáké, sáŋna a zîi a manárí̧. Mi mbá ka mûn gána a ɓil péna a Gáŋvbôn, ɓá báŋké ka wǎyri too, i kaw ka sénɛ́ nɛ́y. 4Mi ɓá njukuri ka láɓulaw hí̧ Zezú tɔ́ʼɔsêe, a niŋ kú í a há̧narí̧. Mi niŋ kú ŋgbá njukuri: Wɔ̧rɔ̧́njukuri rá̧ wûnynjukuri, a ɓá kuriri kɔ̧ vûn sɛl. 5Gáŋnjuku nzáʼaká̧na rá̧ gáŋnjuku walɓayri too, tu ɓá táŋáké, ɓá mi zi kúŋɓay yá. Kú hí̧ mí mbétéri ɓay a sé ziŋ nyîn a Damasri. Dáy, mi uru ɓay a sé ɓil pûké rá̧ mí gé ŋgbá gun láɓulawri ka erú ka Damas, ɓay a fa̧ kuriri gí Zerúzalɛ̂m, rá̧ kú gí ɓá kuriri tɔ́ʼɔsêe.»
Pôl saɓay a fere law a mɛ̌
(Pap 9:1-19; 26:12-18)
6«Mi e ka tûl ŋgboro, a zi ɗɛ́ŋ ka Damas. A núnmbɛ̧́nɛ́ nɔ́, ka lawgel a sêe, gáŋ hɔrɛ ɗere a nûnalê a táŋgel ki ɗɔ́ŋ mí. 7Dáy, mi lé vbú siri, a lá kɔ́ŋ a njuku ka saɓay hí̧ mí ɓá: “Sôl, Sôl, ɓayhí̧rá̧ mɔ ɓá mí tɔ́ʼɔsêe lé?” 8Dáy mi vbí ɓá: “Gáŋmbây, mɔ̌, mɔ ɓá gé lé?” Dáy ké zi nzáʼa ní a sa: “Mi ɓá Zezú a Nazarɛ́t, ka mɔ ɓá mí tɔ́ʼɔsêe.” 9Njukuri ka e kuu mǐ, kó hɔrɛ ka táŋgel, a zi lá njuku ka saɓay hí̧ mí nyá. 10Dáy, mi vbí ɓá: “Gáŋmbây, a̧hí̧ mí niŋ lé?” Gáŋmbây zi a sa: “Mɔ́ uru, a mɔ́ sé ɓil pû Damas, a sá̧, kú e gé sa hí̧ mɔ́, hɛ̧ too ka mɔ e niŋáké.” 11Mi zi kó gel mbaa, ɓayhí̧lé hɔrɛ ka táŋgel, râ̧w nûn ní. Dáy njukuri ka sé kuu mǐ, gé ŋgbá ndɔ̂ʼɔ ní, a da̧n mí sé ka̧ Damas.»
12«A sá̧, njuku a há̧na erú, rɛŋɛ́ ɓá Ananínya, ɓá njuku a táŋáké, ké tɔ́ŋ sáŋna a Mɔyíze a law mbêw, Juyífri too ka Damas hɛʼɛ nɛ́ mambá. 13Ké gí ziŋ mí dáy, a sa hí̧ mí ɓá: “Sôl, nyîn ní, nûn nɔ́ ké ŋgburu a mɔ́ kó gel! A núnmbɛ̧́nɛ́ nɔ́, nûn ní gí ŋgburu, mi kó Ananínya ɓá táŋáké”. 14Dáy, ké sa hí̧ mí: “Gáŋvbôn a zîi manárí̧, tí lú mɔ́ ɗambɛl, ɓay mɔ́ tu hɛ̧ ka lawɛ́ ziy. A mɔ kó njuku a ndáráké, a mɔ láɓay a nzɛ́ʼɛ. 15Ɓayhí̧lé, ké zi mɔ́ kaw ɓá njuku ka e saɓay a mɛ̌ a mbɛl a njukuri too, sé tûl hɛ̧ ka mɔ kó, ka a láy. 16Dáy a ŋgɛŋnɛ́, a̧hí̧ mɔ zoko ɓáy lé? Mɔ́ gí, a mɔ nyá batêm, a ɓékéhɛ̧ a mɔ̌ri̧ ké turu gefal, ka ŋgboro a ɗí rɛŋ a Gáŋmbây Zezú.”»
Pôl saɓay a nzáʼapéna a mɛ̌
17«Falké, mi regí Zerúzalɛ̂m. Sêe a há̧na ka mi kaw gɔ́ŋ Gáŋvbôn a ɓil vûn a mɛ̌, mi kó Gáŋmbây a ɓil lɔ́la. 18Dáy ké sa hí̧ mí ɓá: “Mɔ tɛ̧́ ɓá a gánáké a ɓil pû a Zerúzalɛ̂m, ɓayhí̧lé njuku pûkéri, tí nyá tɔ́ʼɔɓay a mɔ̌ sé tûl ní nyá.” 19Mi zi a sa: “Gáŋmbây, kú tu ɓá táŋáké, ɓá mi kaw sé lá ɓil vûn mára̧ gɔ́ŋ Gáŋvbôn a Juyífri, a kaw ŋgbá njukuri ka láɓulawri hí̧ mɔ́, kɔ̧ vûn sɛl, a vbá̧ kuriri. 20Dáy gelka kú í Etíyɛ́n, njuku ɓay a mɔ̌y, mǐ kɔ́, mi e a gelké. Mi zibɔʼɔké kɔ́ kuu njukuri ka í nɛ́, ɓá mǐ, pé koro laa a kuriri.” 21Dáy, Gáŋmbây sa hí̧ mí ɓá: “Mɔ́ sé, ɓayhí̧lé, mi e pé mɔ́ sé ɓá ɗínáké, sé gel a njukuri ka zi tí ɓá Juyífri yáy!” »
Pôl rá̧ gáŋnjuku ŋgawbére a Rɔmɛri̧
22Njukuri lá Pôl, gelka ké ɔrɔ saɓay a njukuri ka zi tí ɓá Juyífri yáy, kú tí vbá̧nzáʼa too ɓá: «I í njuku nɔ́ gefal! Ké ma hûl! Ké zi ma ɓay a kaw a tísiri nɛ́ nyá!» 23Kú vbá̧nzáʼa, a lú laa kuriri a gbaŋ sé sâa, a fa̧ sôm a siri a vbú sé sâa. 24Dáy gáŋnjuku a ŋgawbére a Rɔmɛri̧ hí̧nzáʼa ɓá kú ɓá Pôl ri ɓil ŋgɛ́rɛ gáŋ vûn, a kú vbá̧ nɛ́, ɓay a ɓá nɛ́ sa gbátɓay rá̧ kú ma tu, ɓayhí̧rá̧ njukuri vbá̧nzáʼa kɔ̧ tûlé nǎŋnɔ́ lé. 25Gelka, kú ŋgá̧ nɛ́ ɓay a vbá̧ nɛ́, Pôl sa hí̧ mbây a ŋgawbéreri ka e a goló ɓá: «I erú ka ŋgboro vbá̧ gun pû a Rɔm, a kú mí zi walɓay ŋgbá nɛ́ nyáy lé?» 26Gelka ké lá nǎŋnɔ́, ké sé sa hí̧ gáŋnjuku a mɛ̌ ɓá: «A̧hí̧ mɔ e niŋáké lé? Njuku nɔ́ ɓá gun pû a Rɔm!» 27A goló, gáŋnjukuké uru gí ziŋ Pôl a vbí nɛ́ ɓá: «Mɔ́ sa hí̧ mí, gbátké mɔ́ ɓá gun pû a Rɔm lé?» Pôl zi a sa: «Mi ɓá gun pû a Rɔm.» 28Dáy, gáŋnjuku a ŋgawbéreri sa hí̧ nɛ́: «Mǐ, mi hí̧ lari ŋgɛ̧́ mambá, ɓay mi ziŋ ŋgboro kaw ɓá gun pû a Rɔm.» Dáy Pôl zi nzɛ́ʼɛ a sa: «Mǐ, kú mbuŋ mí karúy!» 29A goló, njukuri ka zi ɓay a kú vbá̧ Pôl, reɗí kuu mɛ̌. Gáŋnjuku a ŋgawbéreri kaw ka wɔ́w, a ké lá ɓá Pôl kaw ɓá gun pû a Rɔm, ɓayhí̧lé ɓá mɛ̌, pé hí̧nzáʼa ɓá kú ŋgá̧ Pôl ka sɛl wɛ̧̂ɛ.
Pôl a mbɛl a gáŋnjuku walɓayri
30Gáŋnjuku a ŋgawbéreri zi ɓay a ké lá táŋa a ɓayké, ɓay a ké tu ɓayhí̧rá̧, Juyífri niŋ ɓay kuu Pôl lé. Ɓaykénɔ́ pé típéléké, ké ɗí gáŋnjuku nzáʼaká̧nari̧ rá̧ njuku walɓayri, kú mára̧. Dáy ké sa kú sɛl Pôl, a kú ɓá nɛ́ gí mbɛl a kuriri.
Markert nå:
Péna a Apotereri 22: pnz
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 CABTAL
