Péna a Apotereri 16
16
Timoté ɗa Pôl rá̧ Silás
1Pôl sé ka̧ Dɛrbe rá̧ Listɛrɛ A goló, njuku láɓulaw a há̧na rɛŋɛ́ ɓá Timoté erú, ké ɓá gun a wûny Juyíf a há̧na, ka láɓulaw, bâa a mɛ̌ ɓá njuku nzáʼaɓay girɛ́k. 2Dáy, njuku láɓulawri ka e ka Listɛrɛ rá̧ Ikoniyɔm saɓay a mɛ̌ bel mambá. 3Pôl zi ɓay a ɗa nɛ́ sé kuu mɛ̌. Dáy, a ɓá nɛ́ ndá ganzá, ɓay tûl a Juyífri, ka e a ɓil kaw a golóy, ɓayhí̧lé njukuri too tu ɓá táŋáké, ɓá bâa a mɛ̌ Timoté, ɓá njuku nzáʼaɓay girɛ́k. 4Kú, sé lá pûri mbêw mbêw, a sa hí̧ njukuri, ɓay ka apotereri rá̧ gáŋnjuku pénari̧ ka Zerúzalɛ̂m, ŋgá̧nzáʼa sé tûlké. A sa hí̧ kuriri ɓá kú niŋ ɓá báŋké nɔ́. 5Egilizeri ziŋ ŋgɛ́rɛ a ɓil láɓulaw a kuriri, sêe too bon a kuriri ŋgɛ̧́ gé ɓá mbɛl.
Kú ɗí Pôl a Maseduwa̧n
6Têm Pukí de kuriri tɔ́ʼɔɓay a Gáŋvbôn a ɓil kaw a Azí. Nǎŋnɔ́, kú tá tísiri a Firizí rá̧ Galátí. 7Gelka kú gé ka̧ gbaŋ pû Misí, kú zi ɓay a tá sé ɓil kaw a Bitiní. Dáy, Têm a Gáŋmbây zi pɔŋ ŋgboro hí̧ kuriri yá. 8Nǎŋnɔ́ pé kú tá lá Misí, a sé ka̧ gel he batô a Torowás. 9A haŋa sû̧ŋ, Pôl kó hɛ̧ a ɓil lɔ́la: Ké kó njuku Maseduwa̧n a há̧na, ew sâa, a kaw vú hí̧ nɛ́ ɓá: «Mɔ́ tá lá Maseduwa̧n, a mɔ gí hí̧ndɔ̂ʼɔ hí̧ rú!» 10Núnmbɛ̧́nɛ́ a fal hɛ̧ kónáké nɔ́, rú ɛ́ ŋgboro sé Maseduwa̧n, ɓayhí̧lé rú tu ɓá Gáŋvbôn zi ɓá rú sé tɔ́ʼɔ Bélaɓay a mɛ̌, a ɓil kawké nɔ́#16:10 Maseduwa̧n ɓá ɗambɛl pû ka tísiri a Erop, ka ɓay a Gáŋvbôn tí ka̧rú̧y..
Lidí láɓulaw hí̧ Gáŋmbây Zezú
11Rú mbí batô ka Torowás, ka sé ka̧ tûlkɔ̂ɔ a Samɔtarase. Dáy típélé a féké, rú uru a ka̧ Nɛnyápolí. 12Rú gé pɔŋ batô a goló, a uru sé ka̧ Filípí ɗambɛl pû a ɓil kaw a Maseduwa̧n, pû ka Rɔmɛri̧ tí mɔny. Rú gé kaw ɓil pûké a goló, nâm ŋgɛ̧́ kpay. 13Sêe ɔʼɔ, rú tɛ̧́ a ɓil pûké, ɓay a sé gbaŋ mbii a há̧na, rú kɛrɛ ɓá, há̧na rú e gé ziŋ gel mára̧ gɔ́ŋ Gáŋvbôn a Juyífri lé. Dáy, rú gé kaw, a saɓay hí̧ wûnynjukuri ka mára̧ e a gelké. 14Wûny mbêw a bazeŋ a kuriri nɔ́, rɛŋɛ́ ɓá Lidí, kú mbuŋ nɛ́ a Tiyátir, ké e ka wɔ́w a Gáŋvbôn. Ké kaw ɓá wûny niŋ hɛ̧sɔ́ʼɔ laa sɛ́ŋɛ́, ka lariké ŋgbɔ́rɔ mambáy. Ké kaw a lá tɔ́ʼɔɓay a Pôl, nǎŋnɔ́ Gáŋvbôn ŋgburu lawɛ́, ɓay a ké nyá ɓayké. 15Falké, ké nyá batêm rá̧ î̧n a mɛ̌ri̧ too. Dáy a vbí rú ɓá: «Wǎyri, mí tu ɓá mi láɓulaw katína hí̧ Gáŋmbây, i gí ná gel ní!» A há rú, ɓá rú zibɔʼɔké.
Kú ŋgbá Pôl rá̧ Silás
16Sêe a há̧na, rú#16:16 A gelé Luk gí ziŋ Pôl kuu njuku a ǎ̧wrí̧, nǎŋnɔ́ pé ná kó a gé lé kú tí sa «rú.» uru ɓay a sé gel gɔ́ŋ Gáŋvbôn, wûny koy há̧na, gí ziŋ rú: Ké erú ka têm ɓéké ka ɓá nɛ́ saɓay a hɛ̧ri̧ ka e gínay, ka ŋgboro a ɓay sanáké nɔ́, ké ziŋ lari ɓá ŋgɛ̧́náké hí̧ bákáwa mɛ̌. 17Ké uru a tɔ́ŋ rú kuu Pôl a vbá̧nzáʼa a sa: «Njuku nɛ́rí̧, ɓá njukupéna a Gáŋvbôn a nûnalê! Kú kaw tɔ́ʼɔ wǎyri ŋgboro pɛ̧́na.» 18Ké niŋ nǎŋnɔ́ nâm ɓá ŋgɛ̧́náké, dáy Pôl ɗí hɛ́rɛ, a kí, a sa hí̧ têm ɓéké ka mûn a wûnyké ɓá: «Ka rɛŋ a Zezú Kiris, mɔ́ tɛ̧́ ka mûn a wûny nɛ́!» Núnmbɛ̧́nɛ́ nɔ́, têm ɓéké tɛ̧́ ka mûn a wûny rá̧y. 19Gelka, bákáwa mɛ̌, kó ɓá têm ɓéké tɛ̧́ ka mûn a wûny rá̧y dá, ké ma ziŋ lari mbaay, ké gí ŋgbá Pôl rá̧ Silás, a kɔʼɔ kuriri lá gel a dawá sé mbɛl a gáŋnjuku pûri. 20Kú ɓá kuriri sé mbɛl a njuku walɓay a Rɔmɛri̧ a sa: «Njuku nɛ́rí̧ ɓá Juyífri, kú gí zuʼura káwa a njukuri a ɓil pû a manárí̧. 21Kú tɔ́ʼɔ bɔʼɔséna, ka zi hí̧ ŋgboro hí̧ nárí̧ Rɔmɛri̧, ɓay a ná zibɔʼɔké malé ná tɔ́ŋ rú̧ nyá.»
22Njukuri ɗí hɛ́rɛ ziŋ Pôl rá̧ Silás. Gáŋnjuku walɓay a Rɔmɛri̧, sa kú lú laa a kuriri, a kú vbá̧ kuriri ka ká̧wdii. 23A fal vbá̧ kuriri ɓá ŋgɛ̧́náké, kú ɓá kuriri sé kɔ̧ vûn sɛl, a sa hí̧ njuku koro vûn sɛl ɓá, ké koro kuriri ɓá béláké. 24Gelka njuku koro vûn sɛl lá nǎŋ, ké ɓá kuriri sé kɔ̧ táʼa vûn, a ɓá dii ri bɔʼɔ kuriri a dara kɔ̧rú̧.
25Gé ɓá lawgel a sû̧ŋ, Pôl rá̧ Silás gɔ́ŋ Gáŋvbôn, a ɗí sí̧ŋ a ɗél Gáŋvbôn, njuku vûn sɛl a fékéri, kaw lá kuriri. 26Núnmbɛ̧́nɛ́, tísiri laŋ ka ŋgɛ́rɛ, ka laŋ ndal vûnké, nzáʼaŋgboro vûnkéri too ŋgburu, sɛl wɛ̧̂ɛ a kú ŋgá̧ bɔʼɔ a njuku vûn sɛlri too sɛl. 27Njuku koro vûn sɛl toma, gelka ké kó nzáʼaŋgboro vûn sɛl too ŋgburu, ké lú gá̧má, ɓay a sé í mûn nɛ́, ɓayhí̧lé, ké kɛrɛ ɓá njuku vûn sɛlri too ŋgú dá. 28Dáy, Pôl vbá̧nzáʼa a ŋgɛ́rɛ: «Mɔ́ zi ná í mûn nɔ́, rú e a gelé too!» 29Dáy, njuku koro vûn sɛl, vbí ɓá, kú ɓá hɔrɛ ka̧nrú̧, dáy a ri vûn ka mûn tɔ́na ka wɔ́w, a gé huku bɔʼɔ Pôl rá̧ Silás. 30Falké, ké ɓá kuriri tɛ̧́, a vbí kuriri ɓá: «Gáŋnjukuri, a̧hí̧ mí e niŋáké ɓay a Gáŋvbôn ké pɛ̧́ mí lé?» 31Pôl rá̧ Silás sa hí̧ nɛ́: «Mɔ́ láɓulaw hí̧ Gáŋmbây Zezú, lé Gáŋvbôn e pɛ̧́ mɔ́, mɔ̌ kuu î̧n a mɔ̌ri̧ too.» 32Nǎŋnɔ́, kú gí tɔ́ʼɔɓay a Gáŋmbây hí̧ nɛ́, rá̧ njukuri too ka e a ɓil vûn a mɛ̌y. 33A haŋa sû̧ŋké nɔ́, njuku koro vûn sɛl nɔ́, ɗa Pôl rá̧ Silás sé turu nɔʼɔ a kuriri. Falké, ké nyá batêm a núnmbɛ̧́nɛ́ nɔ́, mɛ̌ kuu njuku a mɛ̌ri̧ too. 34Gelka, ké ɓá Pôl rá̧ Silás sé gé léy, ka a gé ɓá lâʼa hí̧ kuriri dáy, ké ri mûn nɛ́, mɛ̌ kuu î̧n a mɛ̌ri̧ too, ɓay ka kú láɓulaw hí̧ Gáŋvbôn.
35Gelka, gel gí táŋ dáy, gáŋnjuku walɓay Rɔmɛri̧, pé njuku a kuriri, ɓá kú sé sa hí̧ njuku koro vûn sɛl, ké pɔŋ Pôl rá̧ Silás. 36Njuku koro vûn sɛl gí sa hí̧ kuriri ɓá: «Gáŋnjuku walɓay Rɔmɛri̧, pé gí sa hí̧ mí ɓá, mí pɔŋ wǎyri kála. Í tɛ̧́, a i sé ɓá béláké!» 37Dáy, Pôl sa hí̧ kuriri: «Kú zi walɓay ka̧n tûl a ɓurú yá, a vbá̧ ɓurú ka ká̧wdii, a mbɛl a njukuri too, ɓurú njuku pû Rɔmɛri̧, a ɓá ɓurú kɔ̧ vûn sɛl. Ŋgɛŋnɛ́ lé, kú zi ɓá, kú ɓá ɓurú kála ɓá múnáké? Zi tí nǎŋnɔ́ nyá! Belɓá kú gí ka mûn a kuriri, gí ten rú!» 38Kú resé sa hí̧ gáŋnjuku walɓay a Rɔmɛ́kéri too hɛ̧ ka táy. Gelka kú gé láɓayké, wɔ́w ŋgbá kuriri, ɓay hɛ̧ a kú lá ɓá Pôl rá̧ Silás kaw ɓá njuku pû Rɔmɛri̧. 39Dáy, a uru gí lé siri hí̧ kuriri, a ten kuriri, a sa hí̧ kuriri ɓá kú kála a ɓil pûké. 40Gelka kú tɛ̧́ ka vûn sɛl, Pôl rá̧ Silás sé gel a Lidí. Fal kó gun láɓulawri, a hí̧ kuriri nzáʼa nzɛ́rɛ, kú uru a kála.
Markert nå:
Péna a Apotereri 16: pnz
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 CABTAL
