Péna a Apotereri 10
10
Kɔrney pé ɗí Píyɛ́r
1Njuku a há̧na erú ka Sezaré, rɛŋɛ́ ɓá Kɔrney, ké kaw ɓá gáŋnjuku a tûl mára̧ a ŋgawbére a há̧na ka Rɔm, a kú ɗí ɓá: «Ŋgawbére a Italíri.» 2Ké kaw ɓá njuku a táŋáké a e ka wɔ́w a Gáŋvbôn, mɛ̌ kuu î̧n a mɛ̌ri̧ too. Ké hí̧ndɔ̂ʼɔ mambá hí̧ Juyíf a há̧narí̧ ka ɓá fóyay, ka zi pɔŋ gɔ́ŋ Gáŋvbôn nyá. 3Nâm a há̧na, a sɛl a sêe sáy a bɔʼɔlêw, ké kó a ɓil lɔ́la, aŋnze a Gáŋvbôn gí gé lé, a sa hí̧ nɛ́: «Kɔrney!» 4Kɔrney ɛ̧rɛ̧ nɛ́ ka wɔ́w, a vbí nɛ́: «A̧hí̧ tá lé gáŋnjuku?» Dáy, aŋnze sa hí̧ nɛ́: «Gáŋvbôn zibɔʼɔ hɛ̧gɔ́ŋa a mɔ̌, rá̧ hí̧ndɔ̂ʼɔ ka mɔ hí̧, hí̧ njuku fóyári, dáy ké zi yɛʼɛrɛ mɔ nyá. 5Ŋgɛŋnɛ́, mɔ́ pé njukuri sé tísiri a Zopé, sé ɗí njuku a há̧na ka rɛŋɛ́ ɓá Símɔŋ Píyɛ́r. 6Ké ná gel a Simɔŋ, njuku ka kaw niŋ péna vɔŋ hɔ́ʼɔ, vûn a mɛ̌ e ka gbaŋ mbii lúkí.» 7Gelka aŋnze rekálay, Kɔrney ɗí njukupéna a mɛ̌ri̧ sére rá̧ ŋgawbére mbêw ka niŋ péna kuu mɛ̌, a kaw ɓá njuku ka hɛʼɛ Gáŋvbôn mambáy. 8Dáy, a sa hí̧ kuriri hɛ̧ too ka táy, nǎŋnɔ́, a pé kuriri sé Zopé.
Têm Pukí tí saɓay hí̧ Píyɛ́r a ɓil lɔ́la
9Típélé a féké, a kú e a ŋgboro, ka a zi ɗɛ́ŋ ka Zopéy. Píyɛ́r uru, a he sé tûl vûn a kú mɔny a sâa, a lawgel a sêe, ɓay a gɔ́ŋ Gáŋvbôn. 10Nǎŋnɔ́, ké tí lá nzala, a zi ɓay sɔ̧́lâʼa, dáy kú kaw kara lâʼa hí̧ nɛ́. Píyɛ́r duku nâm, dáy a kó hɛ̧ há̧na ɗere gí a nûnalê a ɓil lɔ́la. 11Ké kó nûnalê ŋgburu, dáy hɛ̧ há̧na ɗere gí: Ɓá báŋa gáŋ hîi a kú ŋgbá nzáʼaké nɛŋ tooy, ɗere gí ɓá tísiri. 12A ɓilké, hɛ̧sâ̧nyri̧ ɓórí ɓórí erú: Nânyri̧, hɛ̧sâ̧ny koro ka tûl ɓilri rá̧ mára̧ ndoyri ɓórí ɓórí. 13Kɔ́ŋ a há̧na saɓay hí̧ nɛ́ ɓá: «Píyɛ́r, mɔ́ uru, a mɔ́ ŋgbá, a í sɔ̧́!» 14Píyɛ́r zi a sa: «Mi zi yá Gáŋmbây! Mi zi sɔ̧́hɛ̧ a kú de malé hɛ̧ a belyáké bɔʼɔ mbêw yá.» 15Ké relá kɔ́ŋ ɓáy a bɔʼɔ séreké, sa: «Hɛ̧ ka Gáŋvbôn kó ɓá hɛ̧ a táŋáké, mɔ́ zi ná kó ɓá hɛ̧ a belyáké!» 16Hɛ̧ké niŋ nǎŋnɔ́ bɔʼɔké sáy, falké lé, hɛ̧ké rehe sé nûnalê.
17Píyɛ́r vbí tûlé ɓá hɛ̧ nɛ́ a mi kóy, zi ɓay a sa ɓá hí̧ lé? Gelka, ké kaw kɛrɛ nǎŋ, njukuri ka Kɔrney pé kuriri gí a kaw ɛ́ vûn a Simɔŋ, a e ka ŋgɛŋnɛ́ ka nzáʼaŋgboroké. 18Dáy, a kú ɗí hɛ̧ a vbí: «Ɓá a gelé, pé kú ɓá Simɔŋ Píyɛ́r nárú̧y lé?» 19Píyɛ́r kaw kɛrɛ ɓay lɔ́la ɓáy, dáy, Têm Pukí sa hí̧ nɛ́: «Njukuri sáy, e ka kála, a kaw ɛ́ mɔ́. 20Mɔ́ uru, a ɗere sé ziŋ kuriri, a mɔ́ sé kuu kuriri, mɔ́ zi ná many, ɓayhí̧lé ɓá mǐ pé kuririy#10:20 Têm pukí sa hí̧ Píyɛ́r ké many nyá, ɓayhí̧lé, Juyífri zi mára̧ káwa a kuriri kuu njukuri ka zi tí ɓá Juyífri yáy yá..» 21Píyɛ́r ɗere a sé ziŋ kuriri, a gé sa hí̧ kuriri ɓá: «Ɓá mǐ. Dáy, a̧hí̧ ɓá wǎyri gíy lé?» 22Kú zi nzɛ́ʼɛ a sa: «Kɔrney, gáŋnjuku a tûl mára̧ a ŋgawbére a há̧na ka Rɔm pé, pé rú. Ké ɓá njuku a ndáráké, ké e ka wɔ́w a Gáŋvbôn, Juyífri too hɛʼɛ nɛ́. Dáy, aŋnze a Gáŋvbôn gí sa hí̧ nɛ́, ɓá ké pé ɗí mɔ́, a mɔ́ gé pû mɛ̌, a ké láɓay, a mɔ́ erú ɓay a sa hí̧ nɛ́.» 23Dáy Píyɛ́r gí ɓá kuriri ri ɓil vûn, a ɓá kuriri ná kuu mɛ̌.
Típélé a féké, Píyɛ́r uru a sé kuu kuriri. Njuku láɓulaw a há̧narí̧ a Zopé uru a sé kuu kuriri kɔ́. 24Nâm a féké, kú gé ka̧ Sezaré. Kɔrney mára̧ î̧n a mɛ̌ri̧ rá̧ mbáŋa mɛ̌ri̧ kaw zoko Píyɛ́r, a gelé. 25Gelka, Píyɛ́r zi ɗɛ́ŋ ka pû mɛ̌y, Kɔrney uru a sé ziŋ nɛ́ ka ŋgboro, a gé huku siri a mbɛlɛ́. 26Dáy, Píyɛ́r ŋgbá nɛ́ uru, a sa: «Mɔ́ uru, mǐ kɔ́, mi ɓá njuku ɛ́ŋ mɔ̌!» 27Ka Píyɛ́r kaw saɓay ziŋ Kɔrney, ké gé ri ɓil vûn, a gé ziŋ njukuri ka mára̧ kaw ɓá ŋgɛ̧́náké. 28Dáy a sa hí̧ kuriri ɓá: «I tu ɓá táŋáké, ɓá Juyífri zi tí ka ŋgboro niŋ mbáŋa kuu njukuri ka zi tí ɓá Juyífri yáy yá, malé uru gí ri ɓil vûn a mɛ̌ nyá. Dáy, Gáŋvbôn tɔ́ʼɔ hí̧ mí hɛ̧ ɓá, mí zi ná kó njuku a há̧na mbêw ɓá njuku a táŋnyáké, malé njuku ka ma ɓay a njuku ké mbáŋ nɛ́ nyá. 29Ɓaykénɔ́, pé mi zi many nyá, a mi lá hɛ̧ɗína a wǎyri. Dáy mi zi ɓá mí vbí wǎyri, ɓayhí̧, í ɗí mí gí lé?»
30Kɔrney, mbí ɓay a sa: «Nâm sáy dá, mi kaw gɔ́ŋ Gáŋvbôn a ɓil vûn a mǐ, a sɛl a sêe sáy a bɔʼɔlêw. Núnmbɛ̧́nɛ́, njuku a há̧na ri laa ɓá fénáké a gí ew mbɛl ní, 31a sa: “Kɔrney, hɛ̧gɔ́ŋa mɔ̌ Gáŋvbôn lá, a zi yɛʼɛrɛ béla a mɔ̌ ka mɔ́ niŋ hí̧ njuku fóyári yá. 32Mɔ́ pé njukuri sé Zopé, a kú sé ɗí Simɔŋ Píyɛ́r. Kú ɓá nɛ́ ná gbaŋ mbii lúkí, a ɓil vûn a njuku a há̧na, ka niŋ péna vɔŋ hɔ́ʼɔ, a kú ɗí nɛ́ ɓá Simɔŋ.” 33Mi uru, pé a pé njukuri sé ɗí mɔ́, dáy mɔ́ zibɔʼɔké, a gí. Ŋgɛŋnɛ́, ɓurú too, rú e a mbɛl a Gáŋvbôn, rú kaw ɗɛ́ŋ ɓay a láɓay too, ka Gáŋmbây ɓá ka̧n nzáʼa, ɓay a gí sa hí̧ rúy.»
Tɔ́ʼɔɓay a Píyɛ́r a gel a Kɔrney
34Píyɛ́r mbí ɓay, a sa: «Ŋgɛŋnɛ́, mi tu ɓá táŋáké, ɓá njukuri too mambɛ̧́nɛ́ a mbɛl a Gáŋvbôn. 35Njuku nzáʼaɓay a sí̧ lé too ka tísiri nɛ́, ka hɛʼɛ Gáŋvbôn, ka a niŋ hɛ̧ a ndáráké, ri Gáŋvbôn. 36Gáŋvbôn, pé nzáʼapéna a mɛ̌, gí gel a gun Izirayɛ́lri, Bélaɓay a vónáké ka ŋgboro a Zezú Kiris, ka ɓá Gáŋmbây a njukuri tooy. 37I tí tu hɛ̧ ka tá, ka tísiri a Galilê, rá̧ tísiri Judé too, a fal tɔ́ʼɔɓay a Zâŋ rá̧ batêm a mɛ̌. 38I tu a̧ní Gáŋvbôn hí̧ kpɔ́ŋa a Têm pukí hí̧ gun a mɛ̌ Zezú a Nazarɛ́t. I tu a̧ní Zezú há̧ra̧ tísiri, a niŋ béla, a ŋgɛ́rɛ njukuri too, ka Zábolo ɓá kuriri kaw ɓá koy a mɛ̌, ɓayhí̧lé Gáŋvbôn e kuu mɛ̌. 39Dáy, ɓurú, rú kó, ka lá hɛ̧ ka Zezú niŋ ka tísiri a Juyífri rá̧ Zerúzalɛ̂m. Kú ŋgbá nɛ́, ka ɓara nɛ́ ka̧n tûl dii vbatay, ka í nɛ́. 40Gáŋvbôn, hí̧ nɛ́ ndísɛ̌ʼɛ a fal nâm sáy, ka tɔ́ʼɔ nɛ́ hí̧ rú. 41Dáy zi tí ɓá, ké tɔ́ʼɔ mûn nɛ́ hí̧ njukuri too yá, ɓá ɓurú njukuri ka Gáŋvbôn tí ten ɗambɛl, ɓay a rú saɓay a hɛ̧ ka rú kóy. Rú lâʼa, ka nzó kuu mɛ̌, ka fal ka Gáŋvbôn toma nɛ́, a bazeŋ a hûlri. 42Zezú sa hí̧ rú, ɓá rú sé tɔ́ʼɔ Bélaɓay a mɛ̌ hí̧ njukuri too, a rú sa hɛ̧ri̧ too ka rú kóy, ɓá ké kaw ɓá njuku ka Gáŋvbôn ten, ɓay a ké walɓay kɔ̧ tûl a njukuri ka e ka nûn, rá̧ njuku a hûlkéri. 43Porofɛ́tri too tí saɓay a mɛ̌ a sa: Gáŋvbôn e vbá̧buma a ɓékéhɛ̧ a njukuri too, ka láɓulaw hí̧ Zezú, ka ŋgboro kpɔ́ŋa a rɛŋɛ́.»
Têm Pukí ɗere kɔ̧ tûl a njukuri ka zi tí ɓá Juyíf yáy
44Gelka Píyɛ́r pa̧n saɓay ɓáy, Têm Pukí ɗere kɔ̧ tûl a njukuri ka kaw láɓay a mɛ̌y. 45Njuku láɓulawri, ka ɓá Juyífri ka gí kuu Píyɛ́r, kaw yér ɓay ka njukuri ka zi tí ɓá Juyífri yáy, Gáŋvbôn hí̧ kuriri Têm Pukí a mɛ̌ kɔ́! 46Kú lá, kú sa nzáʼaɓayri ɓórí ɓórí, a ɗél hɔ̧́na a Gáŋvbôn. Nǎŋnɔ́ dáy, Píyɛ́r sa hí̧ kuriri: 47«Ŋgɛŋnɛ́, njuku nɛ́rí̧ ziŋ Têm Pukí ɓá báŋa manárí̧, a gé ma de kuriri, nyá batêm lé?» 48Dáy, Píyɛ́r sa kú ɓá kuriri nyá batêm ka rɛŋ a Zezú Kiris. Nǎŋnɔ́, kú revbí Píyɛ́r, ɓá ké kaw nâm kpay kuu kuriri.
Markert nå:
Péna a Apotereri 10: pnz
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2023 CABTAL
