Matìyò 6
6
Anug ni nàʼ ighi abə bəd ifum
1Yeso ya chè imbìghè gha “Mbə̀ we awən imbə̀ʼ anug ni ya ghìyə̀ inug ne təmi kòʼ imbìghè abə bəd ni gha bəd bara awən. Mbə̰ mə̀ ya ghìyə̀ ane, nji chəyi ìwən mbaʼ ikaŋ àbɔ̀ŋɔ biri nàʼ chùd inən ane àzən àfàʼì.
2Anyumə̀ ne àghò we nàʼà aghi abə wə̀d ne chəyi àzi məd, imbə̀ʼ àghò fə awe tàŋ se chètè icheg ne bəd mbe ne bèmnè inug mbe ghìyə̀ inga məchamì Ŋwiye bə̀ fɔrɔ ane itog izib. Mbɔb ya ghìyə̀ ane ni ghì gha bəd se chɔ̀tɔ̀ awɔb. Mə gha tesiʼ inən gha, mbɔb fə bèrì chùd ane àzɔb àfàʼì. 3Ze bɔ̀ŋ gha, àghò mə nàʼ ighi abə wə̀d ne chəyi àzi məd, imbə̀ʼ àghò bḛ awe gha wə̀d ne yaʼi iban ine wì kyeri aghi ne àghò nàʼi. 4Ghìyə ane ni gha, àfàʼì ze ne àghò fàʼi ze tḛ inə̀mbi. Àghò mə ghì ane, ìwe Mbaʼ we ne bàrà inug mbe ne bəd mbe ghìyə̀ inə̀mbi, wì biri nàʼ ìze chùd.”
Anug ni chàʼra Ŋwiye
(Lug 11:2-4)
5Yeso ya chè imbìghè gha, “Anyumə̀ ne mbə̰ mbe chàʼrà Ŋwiye, imbə̀ʼ mbə̰ ghiyə awən icheg bəd ne bèmnè inug. Mbɔb ya kɔ̀ŋɔ̀ ni təm inga məchamì Ŋwiye fɔrɔ iban inɔnjì bɔŋ se chàʼrà Ŋwiye. Mbɔb ya ghìyə̀ ane məyi ni gha bəd bara awɔb. Mə gha tesiʼ inən gha, mbi fə bèrì ìzɔb chùd. 6Àghò mə kə̀b ni chàʼra Ŋwiye, nyi inga àze atog nəb, wùbì inuʼ nəb, chàʼra Ŋwiye ne yaʼi ìwe Mbaʼ we ne yaʼi inə̀mbi. Ane, ìwe Mbaʼ we bàrà inug mbe ne bəd mbe ghìyə̀ inə̀mbi biri nàʼ ìze chùd.
7Ane, anyumə̀ ne àghò we chàʼrà Ŋwiye, imbə̀ʼ àghò gha awe inug nɔʼ nɔʼ ne chəyi iwe yaʼi inga icheg ne bəd mbe ne kayi mə̀Ju mbe ghìyə̀. Mbɔb ya kɔ̀ndɔ gha ìmbɔb mə̀ŋwiye biri zug awɔb icheg ne mbɔb mbe ghà inug nɔʼ nɔʼ. 8Imbə̀ʼ mbə̰ ghiyə awən icheg inɔb imbə̀ʼ icheg ne ìwən Mbaʼ kyèri ighi mbe ne mbə̰ mbe kə̀bə̀ bɔŋ mbə se bìre ibo. 9Ane, mbə̀ chaʼra Ŋwiye anìŋ:
‹Ìwa Mbaʼ ikaŋ àbɔ̀ŋɔ,
Ghiyə gha bəd ghumni ìwe ikum.
10Àze anug ìfɔ̀n ze yeʼe,
bəd igun isəg se ghìyə̀ inug mbe ne àghò kə̀bi
icheg ne mbi yaʼi ikaŋ àbɔ̀ŋɔ.
11Naʼa ighijəg ne koʼi ina tèchɔ̀ŋ.
12Waʼ ìmba inug tibɔ̀ŋ
icheg ne tì fə waʼi inug tibɔ̀ŋ abə bəd mbe ne gughi inug ina.
13Imbə̀ʼ àghò saŋa awe gha àkwàʼrì nyi igun ina.
Chìye awa ikye abo abə Wə̀d Tibɔ̀ŋ.› #6:13 A ze inga ìŋwàʼrì anun mɔ̀ʼɔ gha, “Ze yaʼ ane imbə̀ʼ icheg ne à ya àghò beri anug ìfɔ̀n fɔrɔ ika, bə̀ bèrì ighumni ane ighə̀m imɔʼ. À ya ane.”
14Àghò mə waʼ inug tibɔ̀ŋ bəd, ìwe Mbaʼ we ne yaʼi ikaŋ àbɔ̀ŋɔ biri bə waʼ ìmbe tì inug tibɔ̀ŋ. 15Àmə yaʼ aghi ne chəyi àghò ya wàʼa inug tibɔ̀ŋ bəd, nji chəyi ìwe Mbaʼ biri bə waʼ ìmbe tì inug tibɔ̀ŋ.”
Anug ni chughi njèg chàʼra Ŋwiye
16Yeso ya chè imbìghè gha, “Anyumə̀ ne mbə̰ mbe chùghə njèg ni chàʼra Ŋwiye, imbə̀ʼ mbə̰ si ya sɔ̀mnɔ̀ awən icheg ne bəd mbe ne bèmnè inug mbe ghìyə̀. Bəd mbe ne bèmnè inug ya ghìyə̀ ìtɔb tìfe bə ni chwi abə bəd gha mbɔb mbe chùghə njèg chàʼrà Ŋwiye. Mə gha tesiʼ inən gha, mbɔb fə bèrì ìzɔb chùd. 17Anyumə̀ ne àghò we chùghə njèg chàʼrà Ŋwiye, so ìwe ìfe bə̀ sàʼ àze atog. 18Ane, chəyi bəd biri bàd awe kyèri gha àghò we chùghə njèg chàʼrà Ŋwiye. À ya məyi ìwe Mbaʼ we ne chəyi bəd mbe bàrà aməd biri bàd awe. Àghò mə ghì ane, ìwe Mbaʼ we ne bàrà inug mbe ne bəd mbe ghìyə̀ inə̀mbi biri nàʼ ìze chùd.”
Anug ni nɔ̀ŋì ighi ikaŋ àbɔ̀ŋɔ
(Lug 12:33-34)
19Yeso ya chè imbìghè gha, “Imbə̀ʼ mbə̰ nɔŋɔ awən ìmbən ighi igun isəg ne ìfùmə fɔrɔ ìsəʼə biri chìkì kə̀ məji tòʼ nəb nyi ji. 20Mbə̀ nɔŋɔ ìmbən ighi yaʼ ikaŋ àbɔ̀ŋɔ, asiŋi ne chəyi ìfùmə fɔrɔ ìsəʼə biri chìkì, ne chəyi məji biri bə tòʼ nəb nyi ji. 21Ze yaʼ ane imbə̀ʼ icheg ne asiŋi ne ìmbe ighi yaʼi angu, ìze fìŋ biri bə yaʼ angu.”
Ighə ya anam abə nyàmnyɔd
(Lug 11:34-36)
22Yeso ya chè imbìghè gha, “Ighə ya anam abə nyàmnyɔd. Ìwe ighə mə̀ yaʼ ìwi chɔm, ìze nyàmnyɔd ijìm biri zen. 23Ìwe ighə mə̀ yaʼ ìwi tibɔ̀ŋ, ìze nyàmnyɔd ijìm biri fin. Ane, ìzḛzḛ we ne yaʼi inga ine mə bə̀ŋə̀ ane afub, nji isiŋi biri fin kɔ̀ghɔ!”
Anug ni ghumni Ŋwiye fɔrɔ anug ni ghumni ighi
(Lug 16:13)
24Yeso ya chè imbìghè gha, “Chəyi wə̀d mɔ̀ʼɔ angu ne tì wì fàʼ abə mə̀mbaʼ àfàʼì məbe. À ya ane imbə̀ʼ icheg ne wì biri bàn ifibì kɔ̀ŋ ìywin, kə̀ wì fàʼ abə ifibì ane ìzi fìŋ ijìm si kə̀nì ìywin. Chəyi tì àghò fàʼ abə Ŋwiye bə̀ ywìrì zì fìŋ ane anug ni bèrì ighi ane ighə̀m ifibì.”
Anug ni nwìʼì nyɔd
(Lug 12:22-31)
25Yeso ya chè imbìghè gha, “Imbə̀ʼ mbə̰ nwìʼe awən ìwən nyɔd imbə̀ʼ ìwən ìtḛ̀, ni gha, mbə̀ kə ghi jəg aghə kə̀ mbə̀ kə ghi no aghə? Imbə̀ʼ mbə̰ bə nwìʼe awən ìwən nyɔd imbə̀ʼ ìtən nyàmnyɔd, ni gha, mbə̀ kə ghi zì aghi? Imbə̀ʼ ìwən ìtḛ̀ chè ighijəg? Imbə̀ʼ ìtən nyàmnyɔd bə̀ chè ndwi? 26Mbə̀ nḛ tìnən. Chəyi te nyɔ̀ʼɔ̀ ighi. Chəyi te bə̀ nìŋə ighi aben chà inga ngən. Si ya gha, ìwən Mbaʼ we ne yaʼi ikaŋ àbɔ̀ŋɔ we jə awɔb. Àkə chəyi mbə̰ beri ati chè tìnən? 27Wə̀d abɔ̀ʼ inən ne tì wì nwiʼì nyɔd yètì awà ifibì igun inun ineg mbe ne wì beri ni chughi igun isəg àkə we?
28Mbə̀ kə nwìʼè nyɔd imbə̀ʼ ndwi ane aghə? Mbə̀ nḛ icheg ne igyen mbe kwèghe zìyè tewàrà. Chəyi igyen mbe fàʼà. Chəyi igyen mbe bə̀ bàʼa ndwi. 29Mə gha tesiʼ inən gha, ka bèyi ifɔn Solomùn inga kə̀tə̀d məd ijìm, chəyi wì ya beri ndwi ne bɔ̀ŋi chè tewàrà ne agyen ze zìyè. 30Ŋwiye mə ya zìyè ndwi ibə̀m abə agyen ne yaʼi izɔm tèchɔ̀ŋ nɔ̀ʼ isu mbi təm màʼ inga iywid, àkə chəyi məd biri zì ndwi igun inən chè icheg ne we zìyè igun agyen? Mbə̰ ya kwàʼ bəd ne ibḛfiŋ kə! 31Ane, imbə̀ʼ mbə̰ nwìʼe awən ìwən nyɔd ni gha, ‹Tì kə ghi jəg aghə?› Kə̀ gha, ‹Tì kə ghi no aghə?› Kə̀ gha, ‹Tì kə ghi zì aghə?› 32Bəd mbe ne kayi mə̀Ju mbe nwìʼè nyɔd kə̀bə̀ ighi mbo̰ ijìm. Ìwən Mbaʼ ikaŋ àbɔ̀ŋɔ kyèri àzi aghi gha à ya àzən ati ni bèrì ighi mbo̰ ijìm. 33Mbə̀ fə bi kə̀b yaʼ anug ìfɔ̀n məd bə̀ ya ghìyə̀ inug ne koʼi, ane wì biri si nàʼ ighi mbo̰ ijìm inən. 34Ane, imbə̀ʼ mbə̰ nwìʼe awən ìwən nyɔd imbə̀ʼ ineg mbe ne yèʼe imbə̀ʼ icheg ne aneg ne yèʼe bèrì ìmbi tì inug. Aneg ajìm bèrì ìzi ngəʼ.”
Markert nå:
Matìyò 6: MBTP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2019 CABTAL
