တမၢၼ်ႇၸဝ်ႈ 3
3
ၵူၼ်းတိၼ်တၢႆၵေႃႉၼိုင်ႈ လႆႈၸိုၼ်ႈႁၢႆမႃး
1ၼႂ်းၶိင်ႇၼႃႇရီႇ ဢၼ်ႁဵတ်းသူးတွင်းပထၼႃႇ ဢၼ်ပဵၼ်ၵဝ်ႈၼႃႇရီႇၼၼ်ႉ၊ပေႇတရူႉတင်း ယူဝ်းႁၢၼ်ႇ ၵႂႃႇၶိုၼ်ႈၵႃႈတီႈပိၵ်ႈမၢၼ်ႇၸဝ်ႈလႄႈ၊- 2ပိူၼ်ႈႁၢမ်ဢဝ်ၵူၼ်းဢၼ်တိၼ်တၢႆၸဵမ်မိူဝ်ႈၼႂ်းတွင်ႉမႄႈၼၼ်ႉၵေႃႉၼိုင်ႈမႃးဢေႃႈ။ ၶဝ်ဢဝ်မၼ်းဝႆႉၵႃႈတီႈႁိမ်းၽၵ်းတူဢၼ်လႆႈၸိုဝ်ႈႁၢင်ႈလီၼၼ်ႉၵူႈဝၼ်း၊ ႁႂ်ႈမၼ်းလႆႈယွၼ်းၶၢမ်ႇဢဝ်တၢင်းဢၼ်ၽႄၸွၼ်းယိုၼ်ႈမႅင်ႇ ၵႃႈတီႈၵူၼ်းဢၼ်ၶိုၼ်ႈပိၵ်ႈမၢၼ်ႇၸဝ်ႈၸိူဝ်းၼၼ်ႉဢေႃႈ။- 3မၼ်းၼၼ်ႉ မိူဝ်ႈဢၼ်ႁၼ်ပေႇတရူႉ တင်း ယူဝ်းႁၢၼ်ႇ ၸမ်တၵ်းၶဝ်ႈၵႂႃႇၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉၸိုင်၊ ယွၼ်းလႄႈဝႃႈ၊ ၽႄၸွၼ်းယိုၼ်ႈမႅင်ႇသေၵမ်းၶႃႈ၊ ဝႃႈၼင်ႇၼႆဢေႃႈ။- 4မိူဝ်ႈၼၼ်ႉပေႇတရူႉ တင်း ယူဝ်းႁၢၼ်ႇ ယႅၵ်ႉတူၺ်းမၼ်းၼၼ်ႉၸေးၸေးသေလႄႈလၢတ်ႈဝႃႈ၊ ႁႅၼ်တူၺ်းႁဝ်းတႃႉ၊ ဝႃႈၼင်ႇၼႆသေယဝ်ႉ၊- 5မၼ်းၼၼ်ႉမီးတင်းၸႂ်ဢၼ်ထၢင်ႇဝႃႈ တၵ်းလႆႈသေၸိူဝ်ႉသေပိူင်၊ ဝႃႈၼင်ႇၼႆလႄႈ ႁႅၼ်တူၺ်းတမၢၼ်ႇၸဝ်ႈၸိူဝ်းၼၼ်ႉယူႇဢေႃႈ။- 6ပေႇတရူႉၵေႃႈလၢတ်ႈလႄႈဝႃႈ၊ ၵဝ်ဢမ်ႇမီးငိုၼ်းမီးၶမ်း၊ ဢၼ်ၵဝ်မီးၸိုင်ၵဝ်တၵ်းပၼ်တီႈမႂ်းဢေႃႈ။ ဢိင်ပိုင်ႈၼႃႇမႃႉၸိုဝ်ႈသဵင်ယေႇသူႉၶရိၸ်ႈ ၵူၼ်းဝဵင်းၼႃႇၸရႅတ်ႈၼၼ်ႉသေလႄႈ လုၵ်ႉပႆတၢင်းၵႂႃႇတႃႉ၊ ဝႃႈၼင်ႇၼႆသေယဝ်ႉ၊- 7ယိပ်းဢဝ်မိုဝ်းၶွၼ်ၶႂႃမၼ်းယုၵ်ႉၶိုၼ်ႈလႄႈ တိၼ်တင်းတႃတိၼ်မၼ်းသွင်ၶွၼ်လႆႈႁႅင်းမႃးၵမ်းလဵဝ်ဢေႃႈ။- 8မၼ်းၸင်ႇၽုတ်းလုၵ်ႉသေယဝ်ႉ၊ ပႆတၢင်းၵႂႃႇလႄႈၵႂႃႇယူႇ၊ ၵျွၵ်းဝႅၼ်ယူႇ၊ ယွင်ႈယေႃးၽြႃးပဵၼ်ၸဝ်ႈယူႇသေလႄႈ ၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈလူၺ်ႈၵၼ်တင်းၶဝ်ၼၼ်ႉယူႇဢေႃႈ။- 9မိူဝ်ႈဢၼ်ၵူၼ်းတင်းသဵင်ႈတင်းလူင် ႁၼ်မၼ်းပႆတၢင်းလႄႈ ယွင်ႈယေႃးၽြႃးပဵၼ်ၸဝ်ႈယူႇၼၼ်ႉၸိုင်၊- 10ပိူဝ်ႈဢၼ်ၶဝ်ႁူႉလွင်ႈဢၼ်မၼ်းပဵၼ်ၵေႃႉဢၼ်ၼင်ႈယူႇၵႃႈတီႈႁိမ်းၽၵ်းတူပိၵ်ႈမၢၼ်ႇၸဝ်ႈဢၼ်ႁၢင်ႈလီၼၼ်ႉသေလႄႈ ၶၢမ်ႇဢဝ်တၢင်းဢၼ်ပိူၼ်ႈၽႄၸွၼ်းယိုၼ်ႈမႅင်ႇၼၼ်ႉယူႇလႄႈ ၶဝ်ဢွၼ်ၵၼ်ဢၢမ်းၼႃႇလူင်လၢင် ၵႂင်ၸႂ်ယုင်ႈၸႂ် လူၺ်ႈလွင်ႈတၢင်းဢၼ်ပဵၼ်မႃးၵႃႈတီႈမၼ်းၼၼ်ႉဢေႃႈ။
ၵႂၢမ်းတြႃးဢၼ်ပေႇတရူႉႁေႃးလၢတ်ႈ
11ၼႂ်းမိူဝ်ႈဢၼ်မၼ်းၼၼ်ႉ ယိပ်းၵမ်ၸပ်းၸွမ်းပေႇတရူႉတင်း ယူဝ်းႁၢၼ်ႇယူႇၼၼ်ႉၸိုင်၊ ၵူၼ်းတင်းသဵင်ႈတင်းလူင် ဢၢမ်းၼႃႇလူင်လၢင်လႄႈ ၶုၼ်ႇလႅၼ်ႈၵႂႃႇၶဝ်ႈၸူးၵႃႈတီႈၸၢၼ်းဢၼ်လႆႈႁွင်ႉႁဵၵ်ႈၸိုဝ်ႈ ၸၢၼ်းသေႃးလမုၼ်ႇၼၼ်ႉဢေႃႈ။
12 ပေႇတရူႉၼၼ်ႉႁၼ်သေယဝ်ႉ၊ ၶိုၼ်းလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ ၵူၼ်းဢီႉသရေႇလႃႉၶဝ်ဢိူၺ်း၊ ႁဵတ်းသင်လႄႈသူဢၢမ်းလွင်ႈၵူၼ်းၼႆႉၼင်ႇႁိုဝ်။ ႁဵတ်းသင်လႄႈ သူယႅၵ်ႉတူၺ်းႁဝ်းၸေးၸေးၸွတ်ႇၸွတ်ႇယူႇ မိူၼ်ႁၢင်ႈၸိူဝ်ႉၼင်ႇဢၼ်ႁဝ်းဢဝ်တင်းတၼ်းၶူဝ်းတူဝ်ၸဝ်ႈၵဝ်ႇ ဢိၵ်ႇတင်းသီႇလႃႉတူဝ်ၸဝ်ႈၵဝ်ႇသေလႄႈ ႁႂ်ႈၵေႃႉၼႆႉပႆတၢင်းၵႂႃႇလႆႈၼၼ်ႉၼင်ႇႁိုဝ်။- 13ၽြႃးပဵၼ်ၸဝ်ႈဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈၶဝ်၊ ၽြႃးပဵၼ်ၸဝ်ႈၸူဝ်ႈပူႇပၢၼ်ပေႃႈႁဝ်းၼၼ်ႉ ႁႂ်ႈမုၼ်ၽုင်းလုၵ်ႈမၼ်းၸဝ်ႈ ဢၼ်သူဢဝ်ဢၢပ်ႈပၼ်ၼႂ်းမိုဝ်းၶုၼ်ပီႉလတ်ႉလႄႈ ၶုၼ်ၼၼ်ႉ ဢၢင်ႈတၵ်းပွႆႇလွတ်ႈသေၵေႃႈ သူပႄႇပႅတ်ႈသေၼၼ်ႉထၢင်ႇသႃးမႃးယဝ်ႉ။- 14သူပႄႇပႅတ်ႈၸဝ်ႈဢၼ်မူတ်းၸၢင်ႇသိုဝ်ႈတေႃႇၼၼ်ႉသေလႄႈ ယွၼ်းဢဝ်ႁႂ်ႈလႆႈၵူၼ်းၵေႃႉၼိုင်ႈဢၼ်ဢဝ်ဢသၢၵ်ႈပိူၼ်ႈတၢႆၼၼ်ႉသေယဝ်ႉ၊- 15ဢဝ်ၸဝ်ႈဢၼ် ဢဝ်သူင်ႇၵႃႈတီႈတၢင်းဢၼ်ဢသၢၵ်ႈလိပ်းၼၼ်ႉတၢႆယဝ်ႉလူင်ပႄႇ။ လွင်ႈဢၼ်ၽြႃးပဵၼ်ၸဝ်ႈႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၸိုင်၊ ႁဝ်းၼႆႉ ပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။- 16ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉလႄႈ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉ ပၼ်ႁႅင်းတီႈၵေႃႉဢၼ်သူႁူႉသူႁၼ်ၼႆႉယဝ်ႉ။ တၢင်းဢၼ်ယုမ်ႇမၢတ်ႈဢၼ်လႆႈ ၵွပ်ႈပိူဝ်ႈမၼ်းၸဝ်ႈၼၼ်ႉ ပၼ်ႁႂ်ႈၵေႃႉၼႆႉၸေးၸုမ်ႇသိုဝ်ႈၼႃႈတႂ်ႈတႃသူတင်းသဵင်ႈတင်းလူင်ယဝ်ႉ။
17တေႃႈလဵဝ်ၼႆႉၵေႃႈပီႈၼွင်ႉၶဝ်ဢိူၺ်း၊ လွင်ႈဢၼ်ၸႃႉၸဵမ်သူဢိၵ်ႇတင်း ၶဝ်ၸိူဝ်းဢၼ်ဢုပ်ႉပိူင်ႇသူၼၼ်ႉ ဢမ်ႇႁူႉလႄႈၸင်ႇလႆႈႁဵတ်းၼၼ်ႉၸိုင်ၵဝ်ႁူႉယူႇဢေႃႈ။- 18လွင်ႈတၢင်းဢၼ်ၽြႃးပဵၼ်ၸဝ်ႈ ဢဝ်တင်းသူပ်းပရေႃးၽႅတ်ႈတင်းသဵင်ႈတင်းလူင် ၽုၺ်ႇဢွၵ်ႇၼႄပျႃး လွင်ႈဢၼ်ၸဝ်ႈၶရိၸ်ႈတၵ်းလႆႈၶၢမ်ႇတၢင်းတၢႆၸိူဝ်းၼၼ်ႉဝႆႉဢွၼ်တၢင်းၼၼ်ႉၸိုင်၊ မၼ်းၸဝ်ႈႁႂ်ႈပျေႉၸုမ်ႇယဝ်ႉတူဝ်ႈၸိူဝ်ႉၼင်ႇၼႆဢေႃႈ။- 19ပိူဝ်ႈၼႆလႄႈ ၼင်ႇႁိုဝ်ၶိင်ႇၵႃႇလႃႉဢၼ်ၵတ်းယဵၼ်ၶျၢမ်းသႃႇတၵ်းလုၵ်ႉသေၵႃႈတီႈထႃႇဝရႃႉၽြႃးႁွတ်ႈမႃးလႄႈ၊- 20မၼ်းၸဝ်ႈတၵ်းပွႆႇၸႂ်ႉၸဝ်ႈၶရိၸ်ႈ ဢၼ်မၼ်းၸဝ်ႈၶၢၼ်းဝႆႉပုၼ်ႈသူ ဢၼ်ဝႃႈ ယေႇသူႉၼၼ်ႉမႃးၸိုင်၊ ပုၼ်ႈလွင်ႈၼင်ႇႁိုဝ် ဢပႅတ်ႈသူတင်းသဵင်ႈတင်းလူင်တၵ်းပေႇၼၼ်ႉ၊ ၶုၵ်းၸႂ်လႆႈမႆႈၸႂ်လႄႈ ၶၢႆႉပုတ်ႈႁူဝ်ၸႂ်သူသေတႃႉ။- 21ၸဝ်ႈၶရိၸ်ႈၼၼ်ႉၸိုင်၊ ၸူဝ်ႈဢၼ်ၵၢပ်ႈၶိင်ႇၵႃႇလႃႉဢၼ်တၵ်းဢဝ်လွင်ႈတၢင်းတင်းသဵင်ႈတင်းလူင်မႄးႁဵတ်းဢၼ်မႂ်ႇ ဢၼ်ၽြႃးပဵၼ်ၸဝ်ႈဢဝ်တင်းသူပ်းပရေႃးၽႅတ်ႈဢၼ်မူတ်းၸၢင်ႇ ဢၼ်ပဵၼ်မႃးၸႃႉၸဵမ်ၵမ်ႇၽႃႇၸႃႉတႄႇၸိူဝ်းၼၼ်ႉ ဝႆႉပျႃႇတိၵ်ႈၼၼ်ႉဢမ်ႇပႆႇႁွတ်ႈမႃးၼၼ်ႉၸိုင်၊ မိူင်းၵၢင်ႁၢဝ်ၸဝ်ႈ တၵ်းလႆႈၶၢမ်ႇဢဝ်သိမ်းဝႆႉဢေႃႈ။- 22မူဝ်းသေႇလၢတ်ႈဝႆႉလႄႈဝႃႈ၊ ၽြႃးပဵၼ်ၸဝ်ႈသူ၊ ထႃႇဝရႃႉၽြႃး တၵ်းႁႂ်ႈပရေႃးၽႅတ်ႈဢၼ်မိူၼ်ၸိူဝ်ႉၼင်ႇၵဝ်ၵေႃႉၼိုင်ႈ ပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းသူပုၼ်ႈသူဢေႃႈ။ လွင်ႈတၢင်းဢၼ်မၼ်းၼၼ်ႉႁေႃးလၢတ်ႈၵႃႈမီးတင်းသဵင်ႈတင်းလူင်ၼၼ်ႉၸိုင်၊ သူတၵ်းလႆႈထွမ်ႇဢဝ်ဢေႃႈ။- 23ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇထွမ်ႇဢဝ်ၵႂၢမ်းပရေႃးၽႅတ်ႈၼၼ်ႉၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ၊ ဝႃႈၼင်ႇၼႆဢေႃႈ။- 24ၸႃႉၸဵမ်ပရေႃးၽႅတ်ႈသမူၺ်ႇလႃႉလႄႈ ပရေႃးၽႅတ်ႈဢၼ်ႁေႃးလၢတ်ႈၵမ်းလိုၼ်းၵႃႈမီးတင်းသဵင်ႈတင်းလူင်ၼၼ်ႉ မွၵ်ႇလၢတ်ႈၼႄပျႃး ၶိင်ႇၵႃႇလႃႉဝၼ်းၼႆႉဝႆႉယဝ်ႉ။
25သူပဵၼ်ၸိူဝ်ႉၶိူဝ်းပရေႃးၽႅတ်ႈဢေႃႈ၊ သူၸၢပ်ႈသႅင်ႇၵၼ်တင်း ပတီႉၺိၺ်ႇတြႃးဢၼ်ၽြႃးပဵၼ်ၸဝ်ႈပၼ်တီႈပူႇပေႃႈႁဝ်းၼၼ်ႉလႄႈ ဝႆႉပျႃႇတိၵ်ႈ ၵႃႈတီႈဢႃႇပြႃႇႁၢမ်ႇလႄႈဝႃႈ၊ ၵႃႈၼႂ်းၸိူဝ်ႉၶိူဝ်းမႂ်းၼႆႉ၊ မဵဝ်းၵူၼ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ၊ ဝႃႈၼင်ႇၼႆၼၼ်ႉဢေႃႈ။- 26ၽြႃးပဵၼ်ၸဝ်ႈ ႁႂ်ႈယေႇသူႉ လုၵ်ႈမၼ်းၸဝ်ႈပေႃႇမႃးသေယဝ်ႉ၊ ပွႆႇၸႂ်ႉမၼ်းၸဝ်ႈမႃးၵႃႈတီႈသူဢွၼ်တၢင်းႁႂ်ႈမၼ်းၸဝ်ႈလႆႈပၼ် တၢင်းလီမင်ႇၵလႃႇတီႈသူ ၼႂ်းလွင်ႈတၢင်းဢၼ် တၵ်းႁႂ်ႈသူၵူႈၵေႃႉၵူႈၵူၼ်းဝႄႈပႅတ်ႈဢပႅတ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
Markert nå:
တမၢၼ်ႇၸဝ်ႈ 3: CBMS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright © 2021 by OMF International, Shan Baptist Churches Fellowship
