Génesis 12
12
Ñanderuete ohenói Abrámpe
1Ñanderuete katu he’i Abrámpe: Tereho ne retãgui ha nde rogayguakuéra apytégui, nde ru rógagui, upe tetã ahechaukatahápe ndéve.
2Ha ajapóta ndehegui peteĩ tetã ndetuicháva. Che rohovasáta ha ambotuicháta nde réra, ha aipota nde reiko jehovasapyrã ramo ambuekuérape g̃uarã.
3Ahovasáta umi nderovasávape, ha umi nemaldecívape Che amaldecíta avei ha nderupi ojehovasava’erã opaite tetãnguéra oĩva guive ko yvy apére.
4Ha Abram ojapopa Ñanderuete he’i haguéicha ichupe ha Lot omoirũ ichupe. Abram oguereko 75 áño osẽ ramoguare Harángui.
5Ha Abram ogueraha hembireko Sarái, ha Lot, ityvýra ra’ýpe, ha opaite mba’erepyeta ohupityva’ekue hembiguaikuéra ndive ojoguava’ekue Haránpe, ha osẽ hikuái oho hag̃uáicha Canaan retãme; ha og̃uahẽ hikuái Canaan retãme.
6Abram ohasa upérupi Siquémpe, More pegua yvyra encína peve; ha upéramo umi Canaangua oiko pe tetãme.
7Ha Ñanderuete ojehechauka Abrámpe, ha he’i ichupe: Ne ñemoñarenguérape ame’ẽta ko yvy kóva. Ha Abram omopu’ã upépe peteĩ kuave’ẽmby renda Ñanderuetépe g̃uarã, Ha’e ojehechauka haguére ichupe.
8Upéi oho peteĩ cérro oĩva Betélgui kuarahyresẽ gotýo, ha omopu’ã upépe hóga hymba pirekueguigua ha Betel opyta ichugui kuarahyreike gotýo ha Hái kuarahyresẽ gotýo; ha upépe omopu’ã kuave’ẽmby renda Ñanderuetépe g̃uarã, ha ohenói Ñanderuete réra.
9Ha Abram oho jevy upégui, oguata ohóvo Négev gotýo.
Abram Egíptope
10Umi ára rire ou ñembyahýi ndetuicháva Canaan retãme, ha Abram oho Egíptope oiko hag̃ua upépe; tuichaitereígui pe ñembyahýi Canaan retãme.
11Ha ha’e oike mboyvemi Egíptope, he’i hembireko Saráipe: Aikuaa voi ningo nde neporãitereiha.
12Upévare umi Egiptoygua nderechávo he’íta hikuái: Péva hembireko; ha chejukáne nderehehápe, ndegueraha hag̃ua hikuái.
13Upévare eréna, nde che reindyha, oho porãmba hag̃ua chéve ndérupi, ha che ánga oikove hag̃ua nderupi.
14Ha ojehu Abram oikévo Egíptope, umi Egiptoygua ohecha hembireko peteĩ kuña iporãitereiha.
15Ha umi faraon rembiguaikuéra ohechávo ichupe oho omoporã hikuái ichupe faraon renondépe; upévare ojegueraha ichupe faraon rógape.
16Ha faraon ojapo mba’eporã Abram rehe Sarái rehehápe; ome’ẽ ichupe heta ovecha, kavara, vaka, búrro, tembiguái kuimba’e ha kuñáva, búrro kuña ha camellokuéra.
17Ñanderuete katu oinupã rasy faraon ha hogayguakuérape mba’asy vai rupi, Sarái, Abram rembireko rehehápe.
18Upémaramo faraon ohenói Abrámpe, ha he’i ichupe: Mba’éiko rejapo cherehe. Mba’érehepa neremombe’u porãite chéve Sarái ne rembirekoha ra’e.
19Mba’upépa eréra’e: Che reindy hína ha’e. Upévare che araha ichupe che rembirekorãicha kuri. Péina ápe ne rembireko, eraha ichupe ha tapeho pya’e ko’águi.
20Upéi faraon ojokuái hembiguaikuérape ogueraha hag̃ua Abrámpe hetã rembe’y peve, hembireko ha opaite mba’e oguerekóva reheve.
Markert nå:
Génesis 12: ÑÑP2015
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
