MATHIE 11
11
Néphan khɛ́n Jan-Nduhɛ́nháwo chɛ yí
(Ɔ́n wú Lwik 7.18-35)
1Lóka Jezwi tɔ áha bhwe lókɔnhɔn se mɛ́n yíchwɛmán áwɔ́-mɔn phu, ló ńchan lóne no ákhúbhɛ́hɔn abha lóne gotho hromɛn ánnie yí, ló ántɔ Yankan bhwe.
2Lóka Jan-Nduhɛ́nháwo bha khúthéká gɔn, wo tɔ Krisi júmán elí phɔ bhwe se ńye, ló ńchɛ mɛ́n yíchwɛmán hrómɛn néphan mɔ́nbɛn 3lo ébhi nkɛ sa:
– Wú hɛ nɔn ɛli lephan ebhá bhá, lée nka áyɔn se salé lo bo lephan nankhɛ?
4Ló Jezwi kranman nkɔn sa:
– Hɔ́n yí hɔ́n ewú, le hɔ́n bhwe hɔ́n eyé, ɔ́n no lɛ lómɛ́n sé Jan oyé salé: 5mɛphumán ewú yí, ntabhumán énɛnsi, khokhóbhé-phɔmán phɔ jan, njɛtɔmán eyé bhwe, mɔngumán chan khúnɔn mɛn fe, ló wo tɔ Ábhwe Bhwábhwá se gbremán. 6Lephan khɛ́n ebhú mɛn mímí, áphɔ khwɛlé!
7Lóka Jan yíchwɛmán lo, lótɛ Jezwi étɔ nkɛ phɔ bhwe sé ápasá oyé, ló ánmi nkɔn sa:
– Ébí ɔ́n no ánánkhuthé lo wu ɛ? Wu ńgochro bɛn áphɛ́phrɛ ehɔ́n jika? Léliló? 8Yán ébí yábhɛ nɔn ɔ́n no wu ɛ? Wú lephan bɛn akhwa dɛgɔn bhwábhwá jɛ khrákhrá bɛn? Néphan khɛ́n ákhwa ádɛgɔn mímí jɛ khrákhrá ɔn, ńmringbilímán bháthó wo bhá. 9Ńthé ébí nbrɛn nɔn ɔ́n no wu ɛ? wú bhwetɔ́tréwo bɛn? Ee, khɛ́n mɛɛ́n kranmán hɔ́n salé, ńbanbrɛn bhwetɔ́tréwo bhwá nbrɛn lɔ. 10Átɛsalé Jan phɔ bhwe nɔn Yankan tɔ mɛ́n hrɔ́ hrómɛn sa: “Mɛn mán chɛ́ mɛn mranchɛ́wo thwási bhá hɛ hɛ́nmɛn bha phwan sitó ká hɛ lé.” 11Mímí mɛɛ́n kranmán hɔ́n: néphanmiɔn hromɛn, álepɛ lephan abanbrɛn Jan-Nduhɛ́nháwo. Lókhɛ́n lephan atɛ mri Átho Bhringbi khúbhɛ́, mɛ́n-ɛ, ńbanbrɛn Jan-Nduhɛ́nháwo. 12Jan-Nduhɛ́nháwo cí achan tɔ Yankan bhwe kábrɛ kábrɛ adi ncɛ́n, Átho Bhringbi khúbhɛ́ jrɛn ádwasan yí, áchɛ́se dwasanmán énɛn athándo. 13Bhwetɔ́trémán khúnbrɛn le Moyízi bidí ɔ́nmɔn tɔ Yankan Bhringbi khúbhɛ́ phɔ bhwe, kábrɛ kábrɛ ádi Jan cí tho. 14Kasé ɔ́n gɛ bhú mɛn mímí, ɔ́n gɛ yɛ́n salé Jan nɔn ali Eli khɛ́n wo tɔlé ábha bhá. 15Kasé ɔ́n pɛ njɛ, tɛmɛ ɔ́n yé mwámwá!
16Bannɛ́n nɔn mán khwɛ́n thénthé khúbhɛ́nɛ́n thweli ɛ? Wo tɛsa ńmiɔ́ chɛ́-nchɛ́ akhwa bhácathé elúkhwɛ́ che wó bɛn nbrɛn khɛ́n étɔlé: 17“Lo khɔ akete mɛn kho ábhigbé nánmɛ, lókhɛ́n ɔ́n ne gbe bhi! Lo kho álí nánmɛ, lókhɛ́n ɔ́n ne thɔn hɛ́ndu!” 18Khankhan mímí, Jan bha, ánnɛn ní nɛn, ánnɛn nán divɛn, ló wo étɔ sa: “Nánnánmi phromɛn bha mɛ́n phɔ!” 19Lephan Mi bha, mɛ́n anní, annán, ló wo étɔlé: “Ɔ́n wu sɛ lókɔn a, ńnɛnlí le divɛnnán ɔ́nmɔn pán nɔn ali mɛ́n yí, ló saji mɛ́n le la-nphodómán le yíléletɛ́mán ɔ́nmɔn nɔn wo thóbhɛ́!” Lókhɛ́n Yankan ɔn, mɛ́n bhweyɛ́n khɔ mɛ́n yítɛ́ khúnbrɛn hrómɛn thandi.
Ákhúbhɛ́hɔn le dɛn bhu mímí
(Ɔ́n wú Lwik 10.13-15)
20Lómánji, Jezwi égbrɛ ákhúbhɛ́hɔn khɛ́n ńtɛ mɛ́n hɛ́nmɛntányí búdúbúdú lóhrómɛn, lókhúbhɛ́nɛ́n jrɛ́n ále jrɛn wo yíléletɛ́ hɛ́nthé, ló ántɔ sa:
21– Khorazɛn khúbhɛ́, muswe gɛ hɛ! Bɛsayida khúbhɛ́, muswe gɛ hɛ! Átɛsa hɛ́nmɛntányí lókɔn otɛ hɔ́n thethé, kasé otɛ́ lóhɛ́nmɛntányí yábhɛ brɛ Thire le Sidɔn ɔ́nmɔn khúbhɛ́, ka lócí-áan wo khúbhɛ́nɛ́n khwɛn wo nzrɔ ntráliɛ́ sɔ, ló wo ehá ńtɛ́nthu phɔ, olie salé wo énɛn wo jrɛn wo yíléletɛ́. 22Lóhɛ́nthé nɔn mɛɛ́n kranmán hɔ́n gbée salé, Ákwabhɔ́ cí, óbha tɛ́ yí dri hɔ́n phɔ brɛn Thire le Sidɔn ɔ́nmɔn khúbhɛ́nɛ́n. 23Ló hɛ, Kapɛnaúmɛn khúbhɛ́, ɛbhú salé ɛ́bha pí kábrɛ kábrɛ ɛ́bha di tho? Chɛchɛ, óbha sɛ́n hɛ bháthé-áan bha di mɔngumán khúbhɛ́. Átɛsalé hɛ́nmɛntányí lókɔn otɛ hɛ khúbhɛ́, kasé otɛ́ lóhɛ́nmɛntányí yábhɛ brɛ Sodɔmɛn khúbhɛ́ lɔ, ka lókhúbhɛ́ lókɔn tre ádi ncɛ́n. 24Lóhɛ́nthé nɔn mɛɛ́n kranmán hɛ gbée salé, Ákwabhɔ́ cí, óbha tɛ́ yí dri hɛ phɔ brɛn Sodɔmɛn khúbhɛ́.
Ɔ́n má mɛn yé, ló ɔ́n ma gɛ áfíkhwá
(Ɔ́n wú Lwik 10.21-22)
25Lóka lókɔn hromɛn nɔn Jezwi tɔ sa:
– O Nthe, átho le áthé ɔ́nmɔn Hwánthe, mɛn ná hɛ nansi salé áyí khɛ́n ɛhɔn hrɔman bhweyɛ́nmán le yíyɛ́nmán ɔ́nmɔn hɛ́nmɛn ɔn, ɛhɔn phwanka tho se miɔ́ chɛ́-nchɛ́-ɛ wu. 26Nthe, mímí nbrɛn ɛpɔ salé okhɔ́ nɛn tɛ́, lónɔn achɛse akhɔ nɛn tɛ.
27Mɛn Nthe nbrɛn khwɛn yí khúnbrɛn ha mɛn mɔ́n mɛn. Álepɛ lephan ayɛn Mi, kasé áleli Nthe, álepɛ lephan ayɛn Nthe, kasé áleli Nmi. Ló lephan khɛ́n Nmi pɔ ɔn, hɛ nɔn anchɛ́ hɛ yɛ́n Nthe.
28Hɔ́n khúnbrɛn khɛ́n ɔ́n the ńnɔnkwá lwálwa khɛ́n áyí brɛn hɔ́n mɔ́n, tɛmɛ ɔ́n má mɛn yé, ló mɛn mán sé hɔ́n áfíkhwá. 29Júmán khɛ́n mɛn ní, hɔ́n lɔ tɛmɛ ɔ́n hɔ́n lóphɛ́nta pɛ, ló ɔ́n yɔ́ mɛn ká mɛn nie hɔ́n bhwe. Átɛsalé mɛn tɛ́ pɛ́tɛ, mɛn pɛ thɛ́nnɔ́n, ló hɔ́n hɛ́nfan bha gɛ áfíkhwá. 30Mímí nbrɛn, júmán khɛ́n mɛn mán sé hɔ́n ní, ále khɔnman, ló saji ńnɔnkwá khɛ́n mɛn mán ha sé hɔ́n the, lólɔ phɛ́.
Markert nå:
MATHIE 11: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
