Marko̱ 15
15
Jesuu̱ ku Pilato̱
(Mt 27.1-2,11-14; Lk 23.1-5; Jua 18.28-38)
1Nga kuꞌasen, chanaꞌmi xi kꞌa xáꞌe, xu̱ta̱ xi inchatetjunre̱ na̱xi̱nanda kju̱ chjine Kju̱a̱kixiꞌe Namiña Diuu̱ kutkuju Tjiꞌñuꞌen xu̱ta̱ xi ꞌñu kꞌa xá xi tjínre. Nga je juntaꞌe, ꞌyetaꞌñu Jesuu̱, itsjé ngaya ndabaxaꞌe Kaifa̱ ku Ponsio̱ Pilato̱ kitsingatsja, xu̱ta̱ xá xi chja̱ Roma̱ xi kjibatexuma kui ngande.
2Ponsio̱ Pilato̱ tsinengiyare̱ Jesuu̱:
—A kju̱a̱xikjain nga jí xi tjibatexumairi xu̱ta̱ Judio̱.
Ku̱i̱cha kiskengi Jesuu̱:
—Jí xi ku̱i̱cha tjibixi.
3Ja chanaꞌmi xi inchatetjunu tsé kju̱a̱ inchatsú nga inchabatejene Jesuu̱. 4Kui kju̱a̱ nga te̱ tsinengiyanire̱ Pilato̱:
—Jí kua, tjeꞌñu tsé jee xi inchabatejeneri xu̱ta̱. A natsjengijíji yajori.
5Tuxi se̱n kumáre xu̱ta̱ xi sian xá, nga̱tꞌa ngují en skengi Jesuu̱.
¡Kru tjatꞌa̱jnu kua!
(Mt 27.15-26; Lk 23.13-25; Jua 18.38—19.1)
6Ngajínꞌen nga kjima sꞌuiꞌe Paskua̱, tuxa ku̱i̱cha ngare Pilato̱ nga ꞌbatsjé ngu xu̱ta̱ xi incha nduya, tujma xi minengire na̱xi̱nanda. 7Kuima ni̱tjin singaꞌya nduya ngu xu̱ta̱ cheje xi ꞌmí Barraba. Ngu ni̱tjin nga xu̱ta̱ xá xi chja̱ Roma̱ inchaꞌbetꞌaree̱ xu̱ta̱ ku kjia tjin xi kitsikꞌien kjín.
8Kui nga jichú xu̱ta̱ kjín nga kikasere̱ Pilato̱ ku tsinengire̱ nga ngatsixan ngu xi inchangaꞌya nduya, xukúcha ngare xkinú. 9-10Ta̱nga be Pilato̱ nga ja xi inchatetjunre̱ ni̱ngu̱xi̱ tu kju̱a̱ꞌontakúnꞌentse nga jichujure Jesuu̱, kui kju̱a̱ nga tsinengiyare̱ xu̱ta̱:
—A mejénjnu nga tsixanꞌan xi batexumare̱ xu̱ta̱ judio̱.
11Ta̱nga ja chanaꞌmi xi kitsisuere̱ xu̱ta̱ nga Barraba xi ngatsixan.
12Te̱ tsinengiyare̱ Pilato̱:
—Ku mí xi mejenjnu nga tsiꞌinna xta̱ xi tjibixújnu nga kui xi “kjibatexumare xu̱ta̱ judio̱.”
13—¡Kru̱ tjatjajnu kua! —kitsú nga tsichja kjín xu̱ta̱.
14Kui nga tsinengiyare̱ Pilato̱:
— Tixuyájnu, mí najmi xi ndáji tjin xi kitsiꞌin kui xta̱.
Ta̱nga tusá ꞌñu skindia xu̱ta̱ kjín:
—¡Kru̱ tjatjai kua!
15Mejenre̱ nga ndá isén yajo̱ꞌe Pilato̱, kui nga kitsixa̱n Barraba. Ku kitsiꞌin manda nga fare̱ Jesuu̱ ku nga kru fatꞌa.
Ngieje xu̱ta̱ nga inchamijnukie Jesuu̱
(Mt 27.27-44; Lk 23.26,32-43; Jua 19.2-24)
16Já jun xi chja̱ Roma̱ kiju̱ Jesuu̱ kjíndetsinꞌen niꞌya jma nga sindu ku tsichjáre̱ ngieje jun xi ngisa. 17Sꞌe̱i̱ ngu Tianga xi aní chji̱ndi̱ yatjáire̱ Jesuu̱ ku ngu korona̱ naꞌya yeꞌére̱ tku̱. 18Ku kjia tsaꞌángire̱ nga ijnuke ku ngieje nga inchakjindia: «¡Ndá ngatjabixi reꞌe̱ xu̱ta̱ judio̱!»
19Ku naꞌñu inchaꞌmutjaire̱ tku̱ ku inchabate tejun, ku inchaminchatꞌare tkuꞌe̱ xuku xi tkúnxutsere̱ ngama nga inchamijnukie. 20Nga je jenda nga inchamijnukie, skebaꞌare tianga aní ku ñajñuꞌen te̱ kitsikajani. Kjia tsaꞌángire̱ nga kiju̱ jmá kikatꞌa kru.
21Kiju̱ Jesuu̱ ja jun, ku ndiya sakure ngu xta̱ xi ꞌmí Ximo̱ xi chja̱ nangi jmá ꞌmí Sirene̱. Nami mare̱ ja xi ꞌmí Lija kju̱ xi ꞌmí Rufo̱; nga̱jnu kju̱a̱ndiba ku ja jun kitsikaꞌa kju̱a̱ꞌñu kruꞌe̱ Jesuu̱.
22Ku̱a̱cha tjin Jesuu̱ nga kiju̱ ngu ngande xi ꞌmí Ngolgo̱ta̱, xi «Nindaꞌe mikꞌien» mejénre tsú 23Kꞌi̱a̱ kitsiꞌire bino xi tjínre najmi tsja xi ꞌmí mirra̱ tse̱ꞌe xi bejíre yajo̱ꞌe xi on xi ndakjan; ta̱nga kuyujire̱ Jesuu̱ kitsꞌi.
24-28Kjuane ñajan Tꞌajñu nga yatꞌa kru Jesuu̱ ja jun xi chja̱ Roma̱. Kjia kitsiton ngu sorteo̱ tuxi be kꞌi̱a̱ xi tseꞌe kuma ñajñuꞌen. Ku tekuácha kitsindá én xi ꞌyendutꞌa ngu yate ku kalabo̱ isenneju̱nre janda ngakꞌa kru. Ku̱i̱cha tsu kui én: «Xta̱xá xi batexumare̱ xu̱ta̱ judio̱».
Nga̱tꞌaꞌe Jesuu̱ jó ja cheje kikinchane kalabo̱ tꞌa kru, ngu nga̱tjen tsja nganda ku ngu nga̱tjen tsja ngaskun. 29Xu̱ta̱ xi kꞌi̱a̱ inchafaꞌa tuxi ndá chꞌo inchatsure̱ ku inchamijnukie, chꞌo inchatsiꞌínre̱ Ngakjáin ku ku̱i̱cha inchatsure̱: «¡Sꞌe̱i̱! Jí xi kibixi nga mari nikixundu ni̱ngu̱xi̱ ku jantse ni̱tjin nikisitjéinni kjaꞌi. 30¡Tsa kjáin nga tuxi tjínri ngaꞌñu, ꞌnatsjengi subai yajori! ¡Titjajéin kru!»
31Tjiujun ja chanaꞌmi xi xá inchatetjun tjínre kju̱ chjine Kju̱a̱kixiꞌe Namiña Diuu̱ inchamijnukie, ku ku̱i̱cha inchatsú nga inchachjaju xikjin: «Kjaꞌi xi kumáre tsꞌatsjengi, ta̱nga majínre ꞌbatsjengi yajo̱ꞌe. 32Xi tjitsu nga kui xi xu̱ta̱ kjuaꞌikꞌatsjengi, nga kui xi tjínre xá tetjunꞌen xi kjibatexuma Israee̱. ¡Já ngatjajen kru ku kjiátse skanda sꞌejínña nga̱tꞌaꞌe!»
Ku tekuácha chꞌo inchatsure̱ Jesuu̱ kui ja cheje xi inchane kalabo̱ nga̱tꞌaꞌe.
ꞌMe Jesuu̱
(Mt 27.45-56; Lk 23.44-49; Jua 19.28-30)
33Janda nga nchisen ku janda kju̱a̱ne ján ngixun kuchjíndi ndiu̱jmi. 34Ku kui chu̱ba̱, ngieje ngaꞌñuꞌen nga skindia Jesuu̱: «Eloí, Eloí, lemá sabatacni̱» Xi mejénre tsu: «¡Namiña Diuu̱ꞌna̱, Namiña Diuu̱ꞌna̱! Mí xá je kinikjaꞌabasenna»
35tjin xu̱ta̱ xi kꞌi̱a̱ tjima xi tsitꞌere, ku̱i̱cha kitsú: «Nuꞌyájnu, Elía̱ xi kitsuya Enꞌen Namiña Diuu̱ tjichjare̱.»
36Ngu xta̱ kisakure tsanga, ku binagre̱ kitsikꞌanchi̱ju, ꞌyetku ngu ya ndujú, ku kitsitiñare Jesuu̱ tuxi ngatꞌi. Ku ku̱i̱cha kitsú: «Chasemaña tsanga Elía̱ ndiukꞌajengiri jmá tjisutꞌaiji kru.»
37Tuxi ndá ꞌñu skindia Jesuu̱ ku kꞌien. 38Tekuini chu̱ba̱, najñu xi kjitjentꞌa ni̱ngu̱xi̱ jó itju nga kitjinga, janda ngakꞌa ku janda nginde.
39Cha ofisia romano̱ xi kjisian ngakjáinre Jesuu̱ kube nga kꞌien, ku ku̱i̱cha kitsú:
— Kju̱a̱xikjáinni nga Kjindiꞌe Namiña Diuu̱ kui xta̱.
40Kjín yachjín tjima kꞌi̱a̱ kua xi inchabasekjín. Kꞌi̱a̱ tjima Na Lena, Na Salome̱ kju̱, Naꞌen Kuse ku Santia xi chubaa̱. 41Jesuu̱ kisꞌematje̱ngire̱ ku kixinchaju jmá ꞌmí Ngalilea̱. Ku tuxi kjínma yachjín xi tjima kꞌi̱a̱ kua xi jña tjima Jesuu̱ nga kijí na̱xi̱nanda Jerusalen.
Nga kikjañajín Jesuu̱
(Mt 27.57-61; Lk 23.50-56; Jua 19.38-42)
42Je biajne ngixun, ku xu̱ta̱ judio̱ je inchaꞌbenda yajo̱ꞌe nga ꞌbatsjé sꞌui xi chja̱ ni̱tjin xubato. 43Ngu xta̱ xi ꞌmí Kuse, xi chja̱ nangi Arimatea̱, kitsakjunjín nga tsinengire̱ Pilato̱ yajo kꞌienꞌen Jesuu̱. Kui Kuse tekꞌia kjiyaxki̱ ngaya xu̱ta̱ xá xi chja̱ Junta xi ngitku. Kekuácha kjiminengire kju̱a̱ndá Namiña Diuu̱ nga xati ngandiba katexuma.
44Janda tjisꞌejínjínre̱ Pilato̱ nga tsitꞌe nga je kꞌien Jesuu̱. Ku tsichjáre̱ ofisia xi chja̱ Roma̱ tsanga kjáin kui én, ku kikangitsjaiyare kjia ku̱i̱cha kuma. 45Nga jichuju̱ni en xi sakure ofisia, kitsjua kju̱a̱ Pilato̱ nga nikasꞌenre Kuse yajo̱ꞌe Jesuu̱.
46Ku kjia tsꞌatse Kuse ngu tianga xi ndá ku tuxi chji. Tsꞌajengi Jesuu̱ ngakꞌa kru, kitsikjatjikja tianga ku kitsingisꞌen ngaya tsjuꞌe mikꞌien. Chubatse ni̱tjin tjínre nga kitsingiya tsindá ku ngu ndia̱jo xi tuxi taja kichjuxꞌare. Ku ngu ndia̱jo xi ꞌñú tse̱ yeꞌére̱ kjíndetjuaꞌe nga ꞌyechja. 47Ku kꞌi̱a̱ mare̱ nga Na Lena ku Na Lena xi naa̱ kumáre Kuse, inchabase jmá ngande tjise yajo̱ꞌe Jesuu̱.
Markert nå:
Marko̱ 15: MZI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
México © Sociedad Bíblica de México, A.C. AÑO
